1 E chelechang e rungalk, ea kumdasu eng dirke ngarngii a mengesang er a uldesuem el diak el sebechem el mo medengelii el ngii a kirel a rolel a llemalt loba Dios el lomlals er a re dengerenger; le kele momdasu el kmo ng diak le melemalt er a re dengerenger a lebo le moterkokl el mo kiei er a ringel.

2 Chelecha e rungalk e ngak a mo smodii tia el tekoi lekor kau. Le kamomes, a uriul er a Rubak el Dios er a lotebedii a kot el demad me a delad er a sers er a Eden el mo oureor er a chutem, el ngii a le mlengai er ngii–oi, ngultebedii a chad, e ngiluu el loiang er a Ongos er a sers er a Eden a cherubim me a ngau el saider el lobult el moker me ker, el mengkar er a kerrekar er a klengar–

3 Chelechang e kede mla mo medengei el kmo, a chad a mla mo uaia Dios el medengelii a ungil me a mekngit; me kele bo lodersii a chimal, ele nguu er a kerreka er a klengar el kolii me bo lengar el diak a ulebengelel, me a Rubak el Dios a mlo loia cherubim me a ngau el saider, me lak lebol nguu a rodech–

4 Me chelechang e kid a mocha medengei el kmo, ng mloerngii a taem el mlo techall el mlo er a chad el mo mekngit a rengul er a kentil, oi, a temel kekerongel, a temel mo mekngit a rengul er a kentil e mesiou er a Dios.

5 Le lsekum a Adam a uldersii a chimal mle mereched, e ngiluu er a kerrekar er a klengar, eng di mo chad el diak a ulebngelel, di mo uaia le dilu Dios, el mlo diak a temel mo mekngit a rengul er a kentil; oi, me a tikingel a Dios a mlodiak a belkul, me a klou luldasu er a rolel a mo suobel a di mo mechoit.

6 Endi kamosang, ng meltutk el mo er a rechad el kirir el mo mad mete meldort er a kerrekar er a klengar, meng mlo kirir el medort er medal a bluulechad, me a chad a mlo cheleuid el mo cherechar, oi, ng mlo urrebet el chad.

7 Me chelechang eke mla mes el kmo, a kot el demad me a delad a meldort er a tekoi er a tech me a tekoi er a reng er a medal a Rubak; me chelechang e kede medengei el kmo, tiaikid a uchul me a chad a di mlo oltirakl er a uldesuel.

8 Me chelechaeng ng dimlak a belkul lolsobel er a chad er tia el kodall er a tech, leng mo tomellii tia el klou luldasu el kirel a deuel reng.

9 Me a leuaisei el deleb a diak lemad, ea rebet a ngiluu el mei er a rechad a kodall er a reng me a kodall er a tech, el belkul a kmo temlo cheroid er medal a Rubak, a mle klou a belkul me a chad a losebelii er a kodall er a reng.

10 Me a leuaisei e lorolang el di mocha mechesang er a tekoi er a tech, el di kmo bedengir, el mocha ko er a rengul a diablong, e tiaikid el telkib el taem er a klengar a mocha temir el mengedmokl; ng mocha taem el kirel chomengedmokl.

11 Lako mobes e rungalk, a le mlak luldasu er a rolel a mo suobel el uchul, e sel lemad a chad ea delbengel a kmal mo chebuul el mla medort er medal a Rubak.

12 Me chelechang eng diak rolel e dolsobel er a rechad er tiaikid el teletael er a rebet er tir, el chad a dimle ngii el nguu el mer ngii leng di mlo ngii loiit a tekoi.

13 Me a leuaisei e bo doltirakl er a llemalt, ea uldasu er a rolel a mo suobel, a mo diak loureor ngdi merekmo le boerngii a uuchel reng er a klengit er a rechad el ngar er tiaikid el kekerongel el di kedeb el taem; le lak bole motirakl a ikang el teletael, ea chubechub a mo diak el sebechel loureor leng mo el tomellii a urerel a llemalt. E chelechang eng diak el sebechel metemall a urerel a llemalt; le boleuaisei ea Dios a mo diak el Dios.

14 Me a leuaisei e kid omes er a rokui el chad el mla ruebet; me te mla obdechem er a chimal a llemalt; oi, a llemalt er a Dios, el ngoititerir el mo er cheroid er medal diak a ulebengelel.

15 Me chelechang ea uldasu er a kle chubechub a diak el sebechel mo oureor a lak a tngakireng el mo mekedmokl; misei a uchul ea Dios ingii a mlo melngakireng el kirel a kentil a bluulechad, me bol sebechel mo oureor a tekoi er a kle chubechub, el mo ngunguchii a llemalt er a longerchir er ngii, meng mo sebechel a Dios el mo cherrungel, e melemalt el Dios, e chubechub el Dios el dirrek.

16 E chelechang ea uuchel reng a diak el sebechel mo er ngii a lak a blals, el kirel mo diak a ulebengelel di uaia klengar er a delbenged, el mlekedmokl el biteklel a uldasu el kirel a deuel reng el dirrek el diak a ulebengelel di uaia klengar er a delbenged.

17 Chelechang eng mekera chad e mo ouuchel er a rengul a lak el rellii a klengit? E mekera e mo er a klengit a lak a llach. E mekera e mo erngii a llach a lak a blals?

18 Chelechang eng ngarngii a blals el mla mekedmokl, me a melemalt el llach el mla tuobeb, el ngii a mo uchul ea chad a mo meringel a uldesuel.

19 Chelechang ea lsekum eng diak a llach el mekedmokl el kmo ngikei el mo omekeuad a mo er a kodall cho momdasu eng mo medakt, le lomekeuad eng mo er a kodall?

20 E dirrek el lak a llach lomtok a klengit ea rechad a mo diak le medakt el meruul a klengit.

21 Me a lsekum eng diak a llach el tuobed, me a rechad a meruul a mekngit, eng ngerang sebechel rullii a llemalt, me a lechub eng kle chubechub, ng mo diak a klisiichir el kirel a ngii dile ngerang.

22 Endi ngarngii a llach el mla tuobed, me a blals el keldmokl, me a uuchel reng el mlodars; el ngii el uuchel reng a lenguu a kle chubechub; le lak ea llemalt a medechem a rokui el tekoi e mo oltaut er a llach, me a llach a me kodongii a blals; le lak, ea urerel a llemalt a metemall, me a Dios a mo diak el Dios.

23 Endi Dios a diak bolak el Dios, me a kle chubechub a ngoititrir a remo mekngit a rengrir, ngii el kle chubechub a moer ngii le tengakireng a uchul; me a tngakireng a uchul okiis er a kodall er a remla mad; me a chokiis er a kodall er a remla mad, a lmuut el ngoititrir a rechad el mo er medal a Dios; me a leuaisei ete mla moluut el mo er medal, el mo mukerrekeriil el kirel a urerir, loltirakl a llach me a llemalt.

24 Le kamosang, a llemalt oltaut a rokui el longerchir, me a kle chubechub a dirrek el mo mengerechir a rokui el a blingelel; meng di tirkei el merang el mo mekngit a rengrir a mo suobel e diak a ngodech.

25 Ngerang, chomomdasu ea chubechub ng sebechel mo melas er a llemalt? Ak subedau, Ng diak; ng diak er a di telkib. Le boleuaisei ea Dios a mo diak el Dios.

26 Me tiaikid a rolel a Dios eng mochotii tiang el klou el diak a ulebngelel luldesuel, el di mla mekedmokl er a uchelel a bluulechad. Meng uaitiang a rolel ea chad a mo metik er a rael mo suobel me a lechub eng mo er a tellemall me a chelbuul.

27 Me chelecha e rungalk, ngikei el soal a sebechel mei meng mo melim er a ralm er a klengar el diak locheraol; e ngikei el diak el soal mei a diak dorrimel er ngii el mei; endi a uriul klebesei eng mo moluut el mo er ngii loiak omerellel.

28 Alsekum eng mlo soal meruul a mekngit, e dimlak bo louuchel er a rengul er a kentil er isei el kelsel, eng mocha kirel a mekngit el mo duubech el mo er ngii, loltirakl er a smechel a tekoi er a Dios.

29 Me chelechang e rungalk eng soak a lak mongesang er kau el kirel a ikang el tekoi, di le kentim osengkau, loba sel tellemall el ngii a mo uchul eng mo mekngit a rengum er a kentim.

30 E rungalk, a kuureng me lak modngeklii a llemalt er a Dios. Lako bechei a kentim me bo mosiik a uchul mengeuid er a rengum el kmo ng diak a llemalt er a Dios; e mkengei er a llemalt er a Dios, me a chubechub er ngii, me a kllou el reng er ngii me bo le mesisiich el simengii a rengum; el ngikau el mo eriou el mo er a chebechab er a kle ngariou el reng.

31 Me chelecha e rungalk e kau a mla mokedong el mo olisechak er tir kael chad. Me kabong er rungalk el mo ouchais er a tekoi loba klemerang me a llomes, me bol sebechem el melai er a re betok el chad el mo ouuchel a rengrir, me a klou luldasu er a chubechub bol sebechel ngoititrir. Me a Dios bo le beskau a ikel bla kdung. Boluaisei.