1 Chelechang e tia el lemerema okai me a ongelolem er a rak, ea rechedal a Nephi a dirk nga er a klengit, oi el klou el delngerenger, ea rechedal a Laman a bai mlo blak a rengrir lomekerreu a llechul a Dios loltirakl a llechul a Moses.

2 A chelsel tiaikid el rak, eng mla erngii a chad el Samuel el mle chedal a Laman el mlei er a beluu er a Zarahemla e mlomuchel lolisechakl er a rechad. Meng mlo olisechakl er a rechad. Me ngullisechakl el mle betok el klebesei a uuchel reng el kirel a klengit el mo er a rechad, me tuldikii me a lekong luutang er a belual.

3 Endi lechub ea ngerel a Rubak a mlerngii el kmo ngkirel lmuut el mong, el mo omlaoch el mo er a rechad aikel tekoi el me soiseb er a rengul.

4 Endi itiang e tir a dimlak lekengei er ngii me bol siseb er a blurir; meng mocha ngmasch er bebul eoatel el mlaerngii, e ulemerk a chimal e uleldiu el mle klou a ngerel lulemlaoch el me er a rechad aikel Rubak a lilechang er a rengul.

5 Meng diluer tir, ngak el Samuel el chedal a Laman a melekoi el mer kemiu a tikingel a Dios el blael du er a renguk; eleng mla dmung el mei er a renguk el kmo, mdung er tirkael chad el kmo a saider er a llemalt a mla mei er bebrir; meng diak le bolchib eoang el dart el rak ea saider er a llemalt a mer tirkael chad.

6 Oi, a klou el tellemall a mengiil er tirkal chad, meng diak leiit el mei er tir, e diak a ngerang el sebechel ngosutrir. Ngditang el uuchelreng me a klaumerang er a Jesus Kristo, e lulterekokl el kmo ngmei er a beluulechad el mo chuarm er a betok el tekoi, e mo mad el kirir a rechedal.

7 Me a anghel er a Dios a mla ouchais er ngak el kirel, e ngilai a ungil chais el mei er a renguk. Miseia uchul me a kmlodurch el mei el dirrek el mo ouchais er kemiu, me bol sebechemiu el monguu a ungil chais; engdi kemiu a diak mkengei er ngak.

8 Me chelechang ea ikakid a tikingel a Rubak: ngdechercherel a rengrir a rechedal a Nephi a uchul, me a lsekum eng diak lebo el ouuchel a rengrir, eak nguu a tikingek er tir, e direk el nguu a Reng er ngak er tir, e modiak kulemolem er tir, e mo remuul a rengrir a rodam er tir el mo omtok er tir.

9 E euang el dart el rak a diak bol chib, e ngak a kudmeklii a mouchul a odechelakl el mo er tir. Oi, ak mo oldingel er tir loba oles, me a bosech me a rakt.

10 Oi, ak mo oldingel er tir er a meringel ngesechel a renguk, e morngii er a ongeuang el cheroll er a recherreuiu a mo mesekemiu sel chobomngemed er rokui. E tiang a merang el morngii a lak bol mekngit a rengmiu er a kngtemiu, a Rubak admung; me tirkei el ngar ongeuang el cheroll a mo mesa telemelliu.

11 Endi alsekum e komo ouuchel a rengmiu e lmuut el mo er a Rubak el Dios er kemiu, e ak mo chotucheklii a ngesechel a renguk er kemiu, a Rubak a dmung. Oi, a Rubak a dmung el kmo, te ngeltengat tirkei el mo ouuchel a rengrir e lmuut el mer ngak, engdi alii er ngikei el diak bo le mekngit a rengul er a kngtil.

12 Oi, alii er tiang el klou el beluu er a Zarahemla; tirkei el mekedung a uchul meng soblang; oi, alii er tiang el klou el beluu le kumes, a Rubak a dmung, e te betok, oi, ng klou lildois er tiael klou el beluu a mo melcherecher a rengrir el kirek, a Rubak a dmung.

13 Endi te ngeltengat tirkei el mo ouuchel a rengrir, leng tir a mo medechel. Engdi chelechang alsekum eng diak tirkei el mekedung el ngar tiang el klou el beluu, e chelechang e Ngak a kudmokl a ngau meng me metengel er a babeluades el tomelii.

14 Endi te mekedung a uchul meng soblang. Engdi a belsechel a merekung, a Rubak a dmung. Me sel bo moldik er a remekedung er a delongeliu, e solae ko merekang el kirel a tellemall; oi, alii er tial klou el beluu, le mekngit me a delngerenger a ngar er a chelsel.

15 Oi, alii er a beluu er a Gideon, er a mekngit me a delngerenger er ngar er ngii.

16 Oi, alii eng mo er a rokui el beluu el meliuekl er tiang er rokir, el ngar er a chimorir a rechedal a Nephi, le mekngit me a delngerenger el ngar er a chelsir.

17 Me chelechang, ea dellebeakl a mei er a beluu, ngdula Rubak er a Ildois, le teletelir a rechad el ngar er a beluu, oi, le kngterir me a delngerngerir.

18 Meng mo er ngii er a ta er a klebesei, ngdmu Rubak er a Ildois, oi, a mesisiich e merang el Dios a kmo, ngikei el mo mart a meringel chad el kloklel er a chelsel a chutem a mo diak le betik, leng klou a dellebeakl er a beluu, engdi merekmo melemalt el chad a lomart el mo er a Dios.

19 Le Dios a kmul kmo, ngsoaka bo lomart a meringelchad el kloklir lultuir er ngak; e dellebeakl el mo er ngikei el mo omart a kloklel el diak lultuir er ngak; leng diak a mo ultuil er ngak lomart a kloklir ngdi tirke el mekedung; me ngikei el diak bo lutuir er ngak e mo omart a kloklel a mo delbeakl, ngii me a meringelchad el kloklel, meng diak a mo metik le dellebeak el ngar er a beluu.

20 Ea sils a mei el le bo lomart a meringelchad el kloklir, le te mla oterkokl a rengrir er a iltetir; meng rengrir er a meringelchad el kloklir me te mo omart sei el lechiis er a cherreuir; e diak bo lomart lultuir er ngak, meng dellebeakl el mor tir me a meringelchad el kloklir; me seikid el sils e tir a mo modechelakl, ng dmu Rubak.

21 Ka momes e kemiu el chad er a klou el beluu, e mrenges a tikingek; oi, morrenges a tekoi lolekoi a Rubak; kemiu a mla medebeakl er a iltetiu, me a iltetiu meng direk el mla medebeakl le komla oterkokl a rengmiu er ngii, e dikea morrenges a tikingel ngikei el ngilai el meskemiu.

22 Kemiu a mla obes er a Rubak el Dios er kemiu er a klalo el Ngii a mla omekngeltengat er kemiu, engdi ko bai dimelatk a iltetiu, e diak moureng a sulel a Rubak e Dios el kirel; oi, a rengmiu a diak luldalm er a Rubak, e bai mo blekuuk er a klou el kldidai el reng, me a meklouelchais, me a kldidai el tekoi, me a chelechei, klautoketok, me a omelib el mekngit, me a omekcharm er a rechad, me a omokoad, me a betok el klengit.

23 Tiaikid a uchul me a Rubak el Dios a mla dmu lemei a dellebeakl er a beluu, e direk el mei er a iltetiu le kngtemiu a uchul.

24 Oi, alii e tirkal chad er chelechang el taem el mla mei, el moldik er a re profet, e oltuub er tir, e ometech er tir er a bad, e omekeuad er tir, e meruul a betok el mekngit el mo er tir, el diuaia mle omeruul er a ngar er a mong el taem.

25 E chelechang omelkingiu a kmo: Chomko kikiliei er sel temir a redemmam er a ngara mong, eng dimlaki momekeuad er a re profet; e dimlaki mometech er tir er a bad, e ki moldik er tir.

26 Olekoi, kemiu a lmuut el iimong el mekngit er tir; chelecha el ngar a Rubak, alsekum a profet a mei er a delongeliu el me ouchais er kemiu er a tikingel a Rubak, el mo ocholt a kngtemiu me a telemelliu, eng mo kesib a rengmiu er ngii, e oldik er ngii e osiik rolel a kodellel; oi, e mo dmung er ngii el kmo, ngikang a blulak el profet, e chad er a klengit, e chedal a diablong, le ngii louchais a mekngit lomerelliu.

27 Endi alsekum a chad a mei er a delongeliu e kmo: Bo er tiang eng diak le mekngit; bo er sei eng diako mekesakl; oi, ngmo kmo: bor sel soal a rengmiu; oi, bor sel soal osengiu, e di bo er a ikel soal a rengmiu; alsekum a chad a mei er a delongeliu e dmu chouaikang, e komo kongei er ngii e kmo ngikang a profet.

28 Oi, komo kidrii el mo er bab, e mo omsang a klokliu; komo omsang a kolt er kemiu, me a silber er kemiu, e mo milii er a meringel a cheral bail; le ngii e di melekoi er kemiu a somiu lorrenges, el kmo a rokui a diungil, seikid e kemiu a diak bo betik a kentil.

29 Olekoi e kemiu el mekngit el blitokl chad; kemiu el mekididai e medecherecher a rengmiu el chad, ngua klemengetel a ngerang el chomomdasu ea Rubak a mo mechikemiu? Oi, ngmoua klemengetel ngera el bo becherei a kebelung e mikou me ngomekrael er kemiu? Oi, ngmo oingerang el di molilt er a ilkolk el choitii a llomes?

30 Oi, a ngesechel a rengul a Rubak a mla mo mekeald el kiriu; kamosang, ng mla dobeklii a beluu leng kentmiu a uchul.

31 Me chelechang di kmeed kung dobeakl a iltetiu, meng mo diak le moreked, meng mo diak el sebechemiu el momtebechel; me sel bo mchebulang eng mo diak el sebechemiu loreked.

32 Me sei el taem el bocha mechebuul e komo lmangel mo er a Rubak; e di modiak a belkul a lengeliu, le klou el tellemall el mer kemiu a mocha temel kiriu, me a kerrior el mei er kemiu a mla mo moterkokl; me ko molmangel el mengebechub eri sei el sils, ngdmu Rubak er a Ildois. Misei e ko molmangel kmo:

33 Oleku meng mlo mekngit a renguk er a kngtik, e dimlak kumekeuad er a re profet, e ometech er tir er a bad, e oldik er tir. Oi, isei el sils e komo kmo: A kmal kiblo mletkii a Rubak el Dios er kemam eri sel sils er a le bilskemam a ilteet, eng dimlak bolak le moreked el riid; le chelechang a iltetam a mla modiak.

34 Ka mosang, akingmai a dongu er kemam e mechei ea bo le kukuk eng mla modibus; me a saider er kemam meng dibus er sel sils el kibo mosiik el mo er a mekemad.

35 Oi, aki mlamart a meringelchad el kloklam, eng mla mengmors el remiid, le dellebeakl a ngara beluu.

36 Olekum ekede mlo ouuchel er a rengud eri sei el sils er a tekingel a Rubak er a lemei er kid; le tiakid a beluu el mla medebeakl, me a rokui el tekoi a bocha de tom el mla mo diak el moreked.

37 Ka mosang, kidi tiang el di iliuekl er a diablong, oi, kid a di iliuekl er a re anghel er ngikei el diosiik el melemall a delbenged. Ka mosang, a kngtid a kmal meklou. Ea Rubak, ngsebechem lotucheklii a ngesechel a rengul er kemam? Me a ikaikid a mo tekingiu eri sei el sils.

38 Engdi a sils er a di mle ultab er kemiu a mla momerek; komla choilii a ulebngelel a mosuobel er kemiu, meng dikea cheldechulel mo cherechar, me a tellemall el mei er kemiu a mla moulterkokl; Oi, le ko mla choitii a klengar er kemiu losiik er a diak el sebechemiu el nguu; le ko mulsiik a deulreng, el meruul a mekngit, el ngii omtok er a teletelel sel klemerang el ngii a nga er ngikel klou el Diakaulebengelel Btelud.

39 Ea, kemiu el chad er a beluu, kureng me mrenges a tikingek! Ak meluluuch, me a ngasechreng er a Rubak bo lecheroid er kemiu, me kemiu bo mouuchel a rengmiu me bomsobel.