1 Me chelechang ea ta er a klebesei ea Samuel el chedal a Laman a mlo omlaoch a lmuut el betok el tekoi el diak el sebechel el mo meluches.

2 Me chelechang eng dilu er tir el kmo: Chelechang eak meskemiu a olangch; eim el rak a medechel, e ngii a mei a Ngelekel a Dios el mo olsobel er tirkei el mo oumerang er a ngklel.

3 Me tiaikid a bokbeskemiu el mo olangch er sel le mei; leng morngii a klou el llomes er a yanged, me a kesus ruchei er a lemei eng mo diak a ilkolk, me a rechad a lomes eng diuaia le mellomes.

4 Misei eng mo er ngii a tang el mellomes me a tang el klebesei el dimouaia tal sils el dimlak a klebesei; e tiai a mo olangch leko er kemiu le komo medengelii a bo lengasech a sils me a bo lengelt; me te mo ungil medengei el kmo, ng mlo er ngii erung el klebesei me a tal kesus; engdi sel klebesei a diak bol milkolk; e seikid sel kesus ruchei er a cherellel.

5 E ngii a mo er ngii a beches el btuch el meduum, el diak atal le moes; me tiaikid a mo tar olangch el mer kemiu.

6 E diak di likang el merekong, ng mo er ngii a betok el olangch me a mengasireng er a ianged.

7 Mi sei el sils, eng kmal mo mechas a rengmiu e morrau a rengmiu me ko momoat er a chutem.

8 Meng di mo chu ngikei el mo oumerang er a Ngelekel a Dios, ngikei a mo nguu a diak a ulebngelel klengar.

9 Me chelechang, a ikaikid a tikingel a Rubak, el anghel er ngii a dilung er ngak el kirek el me dmung er kemiu; oi, ngdilur ngak el kmo, ng kirek el mo omlaoch el mer kemiu aikang el tekoi; oi, ng dilu er ngak el kmo: Moldiu el mo er tirkel chad el kmo, bo mouuchel er a rengmiu e mongedmokl er a rolel a Rubak.

10 Engdi chelechang eng ngak a chedal a Laman el melekoi er kemiu aikal tekoi el Rubak a mla oderchak, me ngii el meringel el mei er kemiu, meng kesib a rengmiu er ngak, e somiu el melemall er ngak, e mla odikak er a delongeliu.

11 Me ko mo remenges a tikingek, le tiaikid a uchul me ak mlei er bebul tia el sersel tia el beluu, me bol sebechiu el remenges me bo modengelii a kerrekeriil er a Rubak el mengiil er kemiu le kngtemin a uchul, e dirrek el bo modengelii a rael mo er a uuchelreng;

12 Me a dirrek el bo modengelii a lemei er ngii a Jesus Kristo el Ngelekel a Dios, el Demal a ianged me a chutem, lulemeob a rokui el tekoi er a kot luchul; me ko mo medengei olangch er sel lemei, me bo el sebechiu el mo oumerang er a ngklel.

13 Ea lsekum e kau a mo oumerang er a ngklel, eng mo mekngit a rengum er a rokui el kentmiu, me bol sebechel mengubet loeak a klisiichel.

14 Ka morrenges e kluut el meskemiu a taer olanch, oi, a olangech er a kodellel.

15 Le kamosang, Ngii a merang el kirel mo mad me le bo er ngii a roled el mo suobel; oi, ngmle ngerchelel, el mlo kirel mo mad, me bol sebechel mo er ngii chokiis er a kodall, me bol sebechel a chad el mengai el mo er medal a Rubak.

16 Oi, tiaikid el kodall a mouchul okiis, e olsobel er a rokui el chad er a kot el kodall, sei el kodall er a reng; le rokui el chad er sera rrebet a Adam ete mildort er medal a Rubak, me a uchul e kede kmo tir a ulekeuad el kirel a tekoi er a tech me a tekoi er a reng.

17 Engdi ka mosang, a okiis er a Kristo mlo olsobel er a rokui el chad, e ngoititrir el lmuut el mer medal a Rubak.

18 Oi, meng mlouchul eng mo sebechel a uuchelreng, me ngikei el mo mekngit a rengul er a kngtil a diak bol muukel el obidokl el mo er a ngau; e ngikei el diak bol mekngit a rengul er a kngtil a mo muukel e obidokl el mo er a ngau; e ngii a lmuut el mei er tir a kodall er a reng, oi, ongerung el kodall, le te luutang el medort er a tekoi el kirel a llemalt.

19 Mi seia uchul e bo mouuchel a rengmiu, bo mouuchel a rengmiu, le chelechang el bla bo modengei aika el tekoi e lak moltirakl, e kom di kemiu el mo er cheungel a dellebeakl me ko mong er tiang el ongerung el kodall.

20 Engdi chelechang ea ikel kdilung er kemiu el kirel tia el olangch, el olangch er a kodellel, chelechang e sel sils el ngii a mo er a kodall ea sils a mo milkolk e mo diak le beskemiu a didiichel; me a direk el buil me a btuch; e mo diak a ngerang el kmard er tia el chimol beluu, lomuchel er sel lemad, el molmuut er a ongedei el klebesei er sel lebekiis er a kodall.

21 Oi, sel le bochal temel tuobed a delbengel, eng morngii a drumk me a bisebusech el betok el sikang, me a beluulechad a mo melmesim e olsesengchongch; me a risois el ngar bebul a chutem, a ngar bebul me a ngar cheungel a chutem, el modengei er chelechang el medecherecher, me a lechub eng klou er ngii a cherrungel el medecherecher, a di mo metutiud.

22 Oi, ngdi mo metutiud er a belngel, me a uriul e kerdi momes kung el di urael, e blebeu e berberiid er bebul a beluuelchad er rokir, oi, er bebul a chutem me a cheungel.

23 Ka morrenges, ng mo er ngii a mesisiich el iolt, me a betok el rois a meriou el mo kliokl me a betok el chutem el dodengei er chelechang el kliokl a ngii a mo rois, el mo ngarbab a keldidiul.

24 Me a betok el meklou el rael a mo metemall, me a betok el meklou el beluu a mo diak a rechad el kiei er ngii.

25 Me a betok el debull a mo obkais, e me tuobed a rebetok el mla mad; me a betok el santo a mochemolt er a rebetok.

26 Me a ikaikid a mle tikingel a anghel mler ngak; ng diluer ngak el kmo, ng mo er ngii a drumk me a bisebusech el betok el sikang.

27 E dilu er ngak el kmo, sel taem el ngarngii a drumk me a besebasech, me a mesisiich el iolt, tiaikid el lengarngii, ea ilkolk a me mechelechebii a bluulechad er rokir el edei el klebesei.

28 Me a anghel a dilu er ngak el kmo, te betok a mo mes a lmuut el meklou el tekoi er a ikang, meng mo uchul ete moumerang el kmo, aikang el olangch me a mengasireng a mo erngii er bebul tial beluu, meng mouchul eng mo diak a diak loumerang er a rengalk el chad.

29 Me tiang a moeuchul e ngikei el mo oumerang a mo suobel, e ngikei el diak bo loumerang, a mo melemalt el bliongel a mei er tir; me a lsekum e te mo medebeakl eng di mletir el korker a dellebeklir.

30 Me chelecha e lak mobes, lak mobes e rodam er ngak el kmo ngikei el mo remiid a mo remiid el di mlo ngii a uchul; me ngikei el meruul er a mekngit a dingii el meruul er ngii el kirel; le kemiu a mimokl; meng sebechemiu el di kemiu el meruul a somiu; le Dios a mla meskemiu a klemedengei, e rullemiu me komimokl.

31 Ngii a mla rullemiu me bo modengelii a ungil me a mekngit, e mla meskemiu meng sebechemiu el melilt er a klengar me a kodall; meng sebechiu el rullii a ungil me komo mesmechokl el mo er a ungil, me a lechub a ungil a moluut el mer kau; me a lechub e kau a mo meruul a mekngit, me a mekngit a mo moluut lekong er kau.