1 Me chelechang e betik er a renguk lodam er ngak, chelechang e kuuchais er kemiu el kmo, alsekum eng diak bol mekngit a rengmiu er a kentmiu ea blimiu a di momedechel bachachau.

2 Oi, alsekum eng diak bo mouuchel a rengmiu ea rebechemiu a mo klou uchul ete molmangel er sel sils el bo loltut; le ko mo chemiis e mo diak chomechiis el mo blart er ngii; Oi, me alii er tirkel mo dioll, le te mo obraod meng mo diak el sebechir el chemiis; me te mo merderd er tir e mengoit er tir el mo mad.

3 Oi, alii er tirkael chad lomekedong er tir el kmo chedal a Nephi, le lak boel louuchel a rengrir, e sel boleues aikael lolangch me a mengasireng el mo mocholt er tir; le tir el mle ngellitel chedal a Rubak; Oi, a rechedal a Nephi a mle betik er a rengul meng mlengelebed er tir; Oi, aikel sils er a delngerngerir e te mlechelebed leng mle betik a rengul er tir.

4 Endi ka mosang e rodam er ngak, a rechedal a Laman a mle chetil le omerellir a mle blechoel mekngit, leng mla erngii a mekngit el cheldecheduch el mlara redemerir. Endi a rolel a mo suobel a mla mei er tir lokiu osisecheklir a rechedal a Nephi; me tiaikid a uchul me a Rubak a mla komengetii a sils er tir.

5 Meng soak chomomes el kmo, a betok er tir a ngar er a rael kirel a urerir, me te merael loba blakelreng er medal a Dios, me te kerkikl loltirakl a llechul, me a telbilel me a omesodel a tikingel loltirakl a llechul a Moses.

6 Oi, ak mesubed er kemiu el kmo te betok er tir a meruul aikang, e kmal blak a rengrir el diak bol mesaul losiik rolel me a rokui lodam er tir bolodengelii a klemerang; me a uchul ete ngarngii a rebetok el mouldak er tir er a bek el sils.

7 Me chelechang eko medengei le komla mesang el kmo, tirkei el betok el bebil er tir el mo medengelii a klemerang, e mo medengei a mekngit me a chelebirukel lomerellir a redemerir, me te menga el mo oumerang chedaol llechukl, Oi, me a ulochir chedaol profet el mla meluches, el mo omekrael er tir el mo oumerang er a Rubak, el kirel a uuchelreng, el ngii el klaumerang me a uuchelreng a monguu a beches el reng el mer tir–

8 Me chelechang, e tirkei el mla mo uaisei, chomodengelterir el kmo te mesisiich e diak el mesim er a klaumerang, me a tekoi el ngii auchul ete mla mo mimokl.

9 E kom dirrek el medengei el kmo, te mla dmakl a klekedellir er a mekemad, e medektang el mo melai le te mol mo meruul a klengit; oi, kemiu tial lomes el kmo, temedakt el mo er a klengit meng bai diungil er tir a mo merderd e mo kodall er a cheraro, e diak bol ngai olsengir el mo omtok er tir, leng klaumerang er tir er a Kristo uchul.

10 Me chelechang, e sel klisiichir sel tael boloumerang er sel loumerang er ngii, me a dechal a rengrir sel tael bo lesang a llomes, ng uaisei, a Rubak a moemekngeltengat er tir el mo komengetii a sils er tir, e okor a delngerngerir

11 Oi, me a bolrebet el mo diak loumerang me a Rubak a di mo komengetii a sils er tir, el di mere kmo sel time lullekoi er ngii a redemad, me a Profet Zenos, me a rebetok el bebir er a reprofet, el kirel a semecheklir a rodam er kid er a rechedal a Laman el lmuut el mo medengelii a klemerang.

12 Oi, ak dmuer kemiu el kmo, a uriul taem el telbilel a Rubak a mla mong er a rodam er kid, el rechedal a Laman; meng mo erngii a betok el ringel el mo ertir, me tir a mo morimel mong e mei er bebul a bluulechad, e te mo siokel lokodall, e mo modechelakl e obriid el moer cheroid, el mo diak le betik er a ulengull, a Rubak a mo chubechubchad el moertir.

13 Me tiang a dioltirakl er a ulaoch el kmo, tir a mo mechetakl el mei er a merang el klemedengei, el ngii a klemedengei er a Osobelir, e ngarbab e merang lou charm a sib, me te mo ulecherangel el sib er Ngii.

14 Ma uchul ak melekoi er kemiu, ng baiungil a mo er tir er a mei er kemiu alsekum eng diak bo mouuchel a rengmiu er a kentmiu.

15 Le kamosang, chomko meklou el tekoi el mla mo chemolt er kemiu, a mo chemolt er tir, Oi, moer tirkel mlo diak loumerang le mle teletelir a redemerir, e kemiu tia el di kemiu lomes el kmo, mlo diak el luut el mo diak loumerang.

16 Me a leuaisei a Rubak a dmung: Ng diak bo kulengemed ertir rokui, endi sel sils er a llemesek, etir a lmuut el mei erngak, a Rubak a dmung.

17 Me chelechang e momes, a Rubak a melekoi el kirir a rechedal a Nephi: Alsekum eng diak bo louuchel er a rengrir, e bo le kerkikl el mo meruul a soak, eak mo olekngemed er tir a Rubak a dmung, le tir el diak loumerang, le aikel betok el meklou el tekoi el blakruul er a delongelir; meng kmal di motmaut el uaia Dios el ngar, aikael tekoi a mo erngii, a Rubak a dmung.