A Babier Er A Helaman

1 Me chelechang e tiang el taem ete mla erngii a mle betok el rirenges a tikingel a Samuel, el rechedal a Laman, el lullekoi er bebul tiael sersel a beluu. Me tirkei el betok el mlo choumerang a tikingel, a mirrael el a mlo osiik er a Nephi; metia er a lebetik er ngii, ete mlo olecholt er ngii a kenterir el dimlak lomulak, leng mlo sorir el mo metecholb el mo er a Rubak.

2 Endi tirkei el betok el mlo diak loumerang a tikingel a Samuel a mlo kesib a rengrir er ngii; me tulemetech a bad el moerngii er bebul tiael sersel a beluu, me a rebebil a ulemalech er ngii er bebul tia el sers; endi Reng er a Rubak a ulebengkel meng dimlal el sebechii er ngii otechir el bad me a kelel a belechir.

3 Me chelecha losengel kmo ng diak el sebechir el tomellii, ete betok er tir a mlo oumerang a tikingel, me te mirrael mlo er a Nephi el mo metecholb.

4 Le Nephi a millecholb, er a rechad e chomlaoch, e ullisechakl, loldiu a uuchelreng el mo er a rechad, lolecholt olangch, me a mengasireng, e meruul a tekoilechelid er a delongelir a rechad, me bo lodengei el kmo Kristo di kmeedkung mei.

5 Louchais er tir er a tekoi el di kmeed kung mei, me bo lodengei e llatk sel lemei el kmo ng di mla mocholt er tir ruchei, me bol sebechir loumerang; e sola e tirkei el mlo oumerang a tikingel a Samuel, a merrael moerngii el mo metecholb, le te mlei el ouuchel a rengrir e cholecholt a kenterir.

6 Endi bai betok er tir a dimlak loumerang a tikingel a Samuel; mesei er a losengei el kmo ng diak el sebecherir el tomellii er a otechir el bad me a kelel a belechir, e tuleldiu el mo er a remerreder er tir el kmo: Mnguu ngikael chad el mo lochetii, le ngikang a ngarngii a diablong er ngii; me a klisiichel a diablong el ngarngii auchul meng diak el sebechemam el nguklii er a otecham el bad me a kelel a belecham; me bomnguu el mo lochetii e mokodir.

7 Me a lorolang el mo omdechem er ngii, eng silchesokl el moriou er a sersel a beluu e chiliis el tuobed er a blurir, oi, el mlo er a belual, el mocha olisechak, e omlaoch er a delongelir a rechedal.

8 E solae mlo diak le morenges chisel er a delongelir a rechedal a Nephi; me a ikaikid a mle teletelir a rechad.

9 Mitiang a mlo ulebongel er a okai me a elolem el rak er a omengedereder er a rechad er a kerrekeriil mo er a rechedal a Nephi.

10 Tiang a direk el mlo ulebongel er a okai me a euid el rak er a omengedereder er a rechad er a kerrekeriil, me a betok er a rechad a dirke nga er a keldidai el reng me a delengerenger, e di mle mekesai er tir a mirrael lultebechel er medal a Dios.

11 Me a ikaikid a mle teletael dirrek er a okai me a eai el rak lorreder a rechad er a kerrekeriil.

12 Edi mle telkib a mongodech er a teletelir a rechad, ete bai rechad a mirrael lmuut el mo medecherecher er a mekngit, el mirrael mo betok el betok a omerellir lomtok a llechul a Dios, er a okai me a etiu el rak er a lorreder a rechad er a kerrekeriil.

13 Endi tia dilubech er a oketiu el rak er a omengedereder er a rechad er a kerrekeriil, meng mlo erngii a meklou lolanch el mloer a rechad, me a ongasireng; me a tekingir a reprofet a mocha omuchel mo tmaut.

14 Me a reanghel a mlo chemolt er a rechad, a re mellomes el chad, e uluchais el moertir a ungil chais er a klou el deuelreng, meng tiaikid el rak ea llechukl a mocha tmaut.

15 Endi a rechad a bai mocha medecherecher a rengrir, te bai dimle tirkel kmal mle oumerang er a rechedal a Nephi me a rechedal a Laman, mete mocha ultuir er a di klisiichir me a di klemedengei er tir, e kmo:

16 A bebil er a tekoi el lulemdasu a mlo tmaut, er a chelsel a kmal betok; endi kid a medengei el kmo aikang el rokui el meklou e mechas a rengud er ngii el tekoi a diak a rolel e lemei, aikel mla medung.

17 Me te mocha mesaod e kautitekangel er a delongelir el kmo:

18 Ng diak el teletelel a klemerang me a chouaia Kristo el chad a mei; a leuaisei, el Ngii a Ngelekel a Dios, el Demal babeluades me a chutem, el diuaia mla medung, e ngerang meng diak belochotii er kid el diuai tirkei el ngara Jerusalem.

19 Oi, ngerang meng diak lochotii er tiael beluu el diuaia beluu er a Jerusalem?

20 Endi elechang e kid a medengei el kmo tiang a mekngit el cheldecheduch el mle er kid lokiu a redemad el kmo, ng kired el mo oumerang a bebil meklou e mechas a rengud er ngii el tekoi el kirel mo erngii, endi diak lemei er kid, ngbai dimo er a cheroid el beluu, a beluu el diak dodengelii; me nguchul eng diak a ngerang el dodengei, leng diak el sebeched el momes er a medad me bo dodengei el kmo ng klemerang.

21 Etir a mo ousbech omengeblad me a berotel klisiichel a mekngit, el mo meruul a bebil er a meklou el mengasireng el diak bo dodengei, me kerdi ngariou e mo sibil a tekingir, e dirrek el mesiungir, le kid lousbech er tir lolsisechakl er kid er a tekoi; tiaikid a rolel e torreked er kid meng di diak a ngerang el dodengei, alsekum e kid a kongei er tir, el mo er a ulebongel er a klengar er kid.

22 Me a lmuut el betok el tekoi a rechad a dimle tir el mdasu er a rengrir, el mle klebelung e diak le merang; me te kmal mla er a uldikel, le Satan a ulderiar er tir el di blechoel meruul a mekngit; oi, ng mirrael lomerk a tlulechoid, me a klautok er a chelsel a beluu er rokir, me boluchul e boel medecherecher a rengrir a rechad el mo omtok a klungiaol me a ikel tekoi el merekung.

23 Ng di mlo delbesel olangch me a ongasireng lurruul er a delongelir a rechedal a Rubak, me a betok el tekoi el chelid luruul. A Satan a mle mesisiich a chimal lorreked a rengrir a rechad er a chelsel a beluu er rokir.

24 Mitiang a mlo ulebngelel oketiu el rak er a omengedereder er a rechad er a kerrekeriil el mo er a rechedal a Nephi.

25 Mitiang a mo ulebongel er a babier er a Helaman el oltirakl a cheldecheduch el liluches a Helaman me a rengelekel.