1 Me chelecha Alma er a lomes er a Zeezrom el di lmukung er a tikingel a Amulek, le Amulek el mla mdechemii er a blulekngel me a chelbeldil soal melemall er ngii, me a lomes er ngii el mocha omritel el kirel a klemedengei er a kngtil, eng mocha mekengii a ngerel mengedecheduch er ngii, el melisiich a tikingel a Amulek, el mo mesaod el muut el mong, el mo lecholt a ngara llechukl el muut el ngar bab er a lulsaod a Amulek.

2 Elecha tikingel a Alma el mo er a Zeezrom a mlorengs er a rechad el mle kmeed, meng mle klou a seked er a lolekoi el kmo:

3 Zeezrom, chelecha e kau tia el mla mo chemolt er a blulekngem me a omerellem, le kau a dimlak di le chad cho momulak er ngii, e ke dirrek el mla omulak er a Dios. Kamosang, ngdi medengei a uldesuem, me kau tiang el medengei el kmo a uldesuem a mo chemolt er kemam lokiu a Reng er ngii.

4 E kau tia lomes el kmo a kimedengei el kmo a uldesuem a kmal mle ungil delechall, lokiu a kldachelbai er a diablong, el omulak e mengeblad er tirkal chad el mo olengasech a rengrir er kemam el mo outoketok e oldik er kemam.

5 Elecha e tiakid a mle uldesuel a cherroem, meng mlo er ngii a klisiichel er kau. Chelechang eng soak chobo modengei el kmo a ikel kulekoi er kau a kulekoi el mo er a rokui.

6 Me chelechang eak mesubed er kemiu er rokui el kmo tiang a mle bedeklel a cheraro, el milkedmokl lomedikl er tirkal chad, meng mo sebechel ngoikemiu el mo chederdall er ngii, me bol sebechel melechet er kemiu er a bombatel er ngii, me bol sebechel mengurs er kemiu el mo metengel er a diak a ulebengelel tellemall loeak a klisichel a klebsengel.

7 Chelecha Alma er a bocha le merek el melekoi a ika el tekoi, ea Zeezrom a kmal mocha klou lomritel, le ngomerolel mocha ungil medengelii a klisiichel a Dios; e dirrek el mocha medengei el kmo Alma me a Amulek a mle medengelii, e mlo medenge el kmo te medenge uldesuel me a ngara rengul; le klisiich a mlo er tir meng mo sebechir el mo medengei a ika el tekoi loeak a reng er a ulaoch.

8 Me a Zeezrom a mocha blak a rengul loker er tir el kirel a klemedengei er a rengedel a Dios. Meng millekoi er a Alma el kmo: ngera belkul a tikingel a Amulek el kirel a okiis er a re mla mad, me a rokui el chad a mo mekiis er a kodall, a re mekedung me a re dengerenger, el mo dechor er a medal a Dios e mo kerioll el kirel omerellir?

9 Me chelechang ea Alma mocha omeketakl a ika el tekoi el mo er ngii el kmo: Te betok el chad a mo mocholt el mor tir a betok el berrotel tikingel a Dios; engdi ngarngii a meringel llach el mo er tir el kmo, te di mo olecholt a ikel tikingel ngikei el Ngii a kongei el kmo ng mong er a chad, el di mo ultuil er a omengull me a ulekerreu er tir el mo er Ngii.

10 Me chelechae ngikei el mo melcherecher er a rengul, a di merael mo mekesai el tekoi a mo er ngii, e ngikei el diak bo lolecherecher er a rengul a di merael mo betok el tikingel a mo chemolt er ngii, me a lmuut el betok el berrotel tikingel a Dios a bo lodengei er rokui.

11 E tirkei el mo melcherecher a rengrir, a di merael mo mekesai el tikingel a mo er tir, me alluut eng dikea ngerang lodengei el kirel a berrotel tikingel; e solae tobdechem er a klisiichel a diablong, meng mo oba rengul lorrurt er tir el kirel a klou el tellemall. Tiaikid a belkul sel tekoi el kmo bombatel er a beluu er a ringel.

12 Me a Amulek a millekoi el bleketakl el kirel a kodall, me a okisel tial mo mad el bedenged el mo diak el luut el mad, me a mor medal a kerrekeriil er a Dios el mo kerioll el kirel omerelled.

13 Endi alsekum a rengud a mlo medecherecher, oi, alsekum kede mla dochercherii a rengud el kirel a tikingel, meng mo diak lemesiik er a chelsel a rengud, a leuaisei e kid a ngara metacherbesul, leng mocha kired el mo medebeakl.

14 Le tekoi er a ngered a mo omtok er kid, oi, me a chomerelled meng mo omtok erkid; ng modiak de mucholt el klikiid; le uldesued meng mo omtok er kid; me a bocha leuaisei e kede mekerae ongeng a medal a Dios er kid; kede bai moureng el kmo, omko ng sebeched lokedong a bad me a risois me lemei lotelechid me bolak dosang.

15 Endi diak a rolel; kid a kired el me dechor er medal er a didiichel, me a klisiichel, me a siich er ngii me a klebkall elle ngarngii, me a omerreder, e kongei el kirel a diak a ulebengelel rur er kid el kmo, a kelulul a melemalt; me Ngii a melemalt er a rokui lurrerel, e dirrek el klou a klechubechub er Ngii el mo er a rengalk el chad, e dirrek lolab a rokui el klisiich el mo olsobel er a ngii dilechad el mo oumerang er a ngklel, e mo nguu a rodech el mo kirel a uuchel reng er a klengit.

16 Chelechang eka morrenges e kulekoi er kemiu, e solae ngii a meremang a kodall, a ongerung el kodall, el ngii a kodall er a reng; tiakid sel taem el ngikei el mad e ngar er a kentil er a tekoi er a kodall er a tech, a dirrek el mo mad er a kodall er a reng; oi, ng mo ulekeuad el kirel a tekoi er a llemalt.

17 Tiaikid sel time el ringel el mo ertir adi mouaia le ngara diosch el ngau me a mekeald el bad, el ngeuil a di kmard el diak a ulebngelel mo cherechar; tiaikid sel taem el bo le melechet er a bombatel e mo er a diak a ulebengelel tellemall, loltirakl er a klisiichel me a kellebsengel a Satan, lengii a mla mo oungerachel ertir lokiu sel soal.

18 E solae kuchais er kemiu, a teletael mo er tir adi mo waia lemlak le meketmokl a rolel a mo suobel; leng dikeael sebechir el mo suobel loltirakl er a llemalt er a Dios; e dikeael sebechir el mad, leng mla mo diak a ngerang el mo mechut.

19 Chelechang e tia er a bocha lemerek a Alma el melekoi a ikael tekoi, ea rechad a kmal mlo mechas a rengerir;

20 Endi ng mlarngii a tang el Antionah el mle ngarbab el merreder er tir, el mlei e millekoi er ngii: Ngera tiang el molekoi er ngii el kmo a chad a mo mekiis er a kodall, e tiang el mo er a kodall el bedengel a mo ngodech el mo diak el luut el mad, e kmo reng a diak lemad?

21 Ngera belkul sel ngara llechukl el kmo, a Dios a ngiluu a cherubim me a ngau el saider el loia er a ongos er a ngeaol er a Eden, le llak ea kot el edam me a edil a moelsoiseb el kolii a redechel a kerrekar er a klengar e mo ngar el diak a ulebengelel? Me chelechang e kid a medengei el kmo, ng dimlak a rolel el sebechir el ngar el mo cherechar.

22 Chelecha Alma dula erngii: Tiaikid sel tekoi el bochu kusaod er ngii. Chelechang e kid a medengei el kmo, a Adam a rirebet leng killii a blul rodech, el oltirakl a tikingel a Dios; me chelechae kede medengei el kmo, a rebetel a Adam a uchul me a rokui el chad a ririid e mlo urrebet el chad.

23 Chelecha kamomes e kuuchais er kemiu el kmo, alsekum eng mlo sebechel a Adam el mlo kolii a redechel a kerrekar er a klengar er sel taem, eng mlo diak a kodall, me a tikingel a Dios adi mlo mechoit, meng uaia bo lebulak a Dios, leng dilung: Alsekum eke mo kolii e ke moer a kodall.

24 Mekid tiael omes el kmo kodall a mei er a rokui el chad, oi, a kodall el ullekoi er ngii a Amulek a ngii a kodall er a tech; endi ngarngii a techall el modars el mo er a chad me bol sebechel mouuchel a rengul er a kentil; misei auchul e tiael klengar a mlo temed el dime ultab; e mengetmokl er kid el momes er a Dios; ng temed el mengetmokl er kid el kirel a diak a ulebengelel el blaki molekoi er ngii, el ngii a uriul er a lebekiis er a kodall a remlamad.

25 Chelecha lsekum eng mlo diak a rolel e kid a mo suobel, el di mla mekedmokl er a uchelel a bluulechad, eng mlo diak lebor ngii okiis er a kodall er a remla mad; endi ng mla erngii a rolel a mo suobel milkedmokl, el ngii a mo uchul okiis er a kodall er a remla mad, el mla mesaod.

26 Chelecha lsekum eng mlo sebechel, me a mle kot el demad me a delad a mlo sebechir el kolii a redechel a kerrekar er a klengar, ete mlo er a chelbuul diak a ulebngelel, leng mlo diak a temir el mengedmokl ertir; me a leuaisei ea uldasu er a rolel osobel a mlo diak loureor, me a tekingel a Dios a mlo mechoit el mlo diak a belkul, e diak a rellii.

27 Endi ka mosang, ng dimlak boel uaisei; ng bai meltutk el mo er a chad el kmo tir a mo er a kodall; ea uriul er a kodall, eng kirir el mo er a kerrekriil, el ngii sel kerrekriil el dullekoi er ngii, el ulebongel.

28 Me a uriul er a Dios er a loterkokl aikang el kmo ngmo er a chad, eng mlo mesa el kmo ng kirir a rechad el mo medengei aikael tekoi el mla metutk el mortir;

29 Miseia uchul e nguleldurch er a reanghel mo mengedecheduch er tir, el mlo uchul ea chad a mlo sebechel mesang a klebkellel.

30 Miseikid e temlo omuchel lomekedong er a ngklel a Dios; me a Dios a mlengedecheduch er a rechad, e ulochotii er tir a rolel e tir a mo suobel, el dimla mekedmokl er a uchelel a bluulechad; e tiang a mlo chemolt er tir el oltirakl er a klaumerang er tir, me a bole mekngit a rengrir er a kenterir, me a chedaol urerir.

31 Misei ng ngilai a llach el mesterir a rechad, le tir el di mle uchul e te tomellii a kot el llach el kirel a tekoi er a klechad, mete mlo uaia Dios el medengelii a ungil me a mekngit, meng mla mo sebechir el meruul a tekoi loltirakl a uldesuir me a sorir el kmo temo er a mekngit me a lechub e ngungil–

32 Miseia uchul a Dios a milsterir a llach er a uriul er a lochotii er tir a rolel a mo suobel, el kmo, ng diak bo loruul a mekngit, le blals ongerung el kodall, el ngii a diak a ulebengelel kodall er a kuk kirel a tekoi er a llemalt; me a bocha leuaisei, ea uldasu er a rolel a mo suobel a dikea klisiichel, le urerel a llemalt a diak el sebechel metemall, loltirakl er a ngarbab el klungiolel a Dios.

33 Endi a Dios a ulemkedong er a rechad loba ngeklel a Ngelekel kmo: Alsekum komo chouuchel er a rengemiu a kentmiu, e diak bol medecherecher a rengemiu, eak mo chubechub el chad el kiriu, lokiu a Ditang el Ngelekek.

34 Misei a uchul e ngikei el mo mekngit a rengul er a kentil, e diak lolcherecher er a rengul, ngikei a morngii a lemeltel kirel a kle chubechub er ngak lokiu a Ditang el Ngelekek, meng mo mengubet a kentil; tirkaikid a mo soiseb er a ulengellek.

35 Ea ngii dile chad el mo melcherecher er a rengul el di mo meruul a mekngit, kalbong, me kdung el ngesechel a renguk el kmo, ng diak bolsiseb er a ulengellek.

36 E chelechang e rodam er ngak, ka merengesak e kdur kemiu el kmo, chobo molcherecher a rengmiu eng diak bo msiseb er a ulengellel a Rubak; le kentmiu a mla ongesechii a rengul meng mla odureklii a dellebeakl el mer kemiu el di uaia kot el ngasch reng. Oi, el di oltirakl a tikingel er a mlo merek el ngasech reng el di uaia kot, el mo er a diak a ulebengelel telemellel a delbengiu; meng di mo oltirakl a tikingel kirel a uriul kodall, el di uaia kot.

37 Me chelechang e rodam er ngak, e kid el mla mo medengei el kmo, aikael tekoi a klemerang, mei me bo denguu a uuchel reng el kirel a kentid, e llak dolecherecher a rengud, me do ngesechii a rengul a Rubak el Dios er kid, me lotengelii a dellebeklel mer kid er a ikael ongerung le llechul el bla lebeskid; bai mei me bo desiseb er a ulengellel a Dios el mla mekedmokl loltirakl a tikingel.