A Babier Er A Alma
El Ngelekel A Alma

1 Elechang eng mlarngii er a llechul a Mosiah el kmo, ngii di le chad el mle chad er a kerrekeriil er a llach, me a lechub e tirkei el meltutk el mo oukerrekeriil a mo uduudel er a ikel temir el loureor loukerrekeriil er tirkel mei e mukerrekeriil er mederir.

2 Elechang ea lsekum a chad a mle belsel a tang, e diak longkad er ngii er a belsel, meng mlo oltutakl er a chad er a kerrekeriil, me a oukerrekeriil a mlo oba klisiichel e oldurch er a rechad er a llach meng mengai a chad el mer medal; me ngoukerrekeriil er a chad loltirakl er a llach me a mlo chemolt el teletael el melutk el kirel, e a chad a motaut el kirel mo mengkad a belsel, me a lechub eng mechelebed, me a lechub eng modik er a beluu el mengubs e merechorech.

3 Ea oukerrekeriil a mo uduudel er a ikel temel – el senaen er a kolt er a tal sils me a lechub eng senum er a silber el ngii a di uaia tal senaen er a kolt; tiaikid a mle teletael loltirakl er a llach.

4 Elechang a ikakid a ngklel a ikel kakerous el meklungel a kolt er tir me a silber er tir, loltirakl a ngescheklel. Aikang a ngklel er a rechedal a Nephi, leng kuk dimlak loltirakl er a teletelir a re chiJews el mlara Jerusalem, me a dimlak lolebodeb el uaia re chiJews; te ngilodech a teletelir me a omelebodeb er tir loltirakl er a uldesuir me a delengcheklir a rechad er a kakerous el taem el melmuut er a omerreder er a roukerrekeriil el milkedmokl er a King Mosiah.

5 Me a mle teletelel a uai tiang, a senain er a kolt, me a seon er a kolt, sham er a kolt me a limna er a kolt.

6 A senum er a silber, me a amnor er a silber, me a esrom er a silber me a ontai er a silber.

7 A senum er a silber a orkemel a tal senain er a kolt me a lechub eng mecherar a telkael a iiul mungi me a lechub eng telkael a iiul choa bek el bedengel mungi.

8 Elechang ea ildisel a tal seon er a kolt a orkemel erung el sinain.

9 Ea tal sham er a kolt orkemel erung el sean.

10 Ea tang el limna er a kolt orkemel er rokui.

11 Ea tal amnor er a silber a diuaia erung el senums.

12 Ea tal esrom er a silber a uaia klungel eoang el senums.

13 Ea tang el ontai a uaia meklungel er rokui.

14 Elechang e tiakid a meklungel a ikel mekekrei lochur el lulusbech.

15 A siblon a tedobech er a senum; meng tang el siblon a kirel a tedobech el blil a mungi.

16 A siblum a tedobech er a siblon.

17 Ea tang el lia a tedobech er a siblum.

18 Chelechang a ikaikid a ikei el ochur er tir loltirakl a teletelir.

19 Chelechang ea tang el antion er a kolt a uaia klungel a edei el siblons.

20 Me chelecha ng diomengerker a uchul, e tirkang a di uduudel sel loureor, me a uchul me te mlo olderiar er a rechad meng mlorngii a klautok, me a uldikel me a delngerenger meng mo uchul a betok lurreor, me bol sebechir el melai a udoud el kirel a ultutakl el mer mederir; te mlo olderiar er a rechad el mo omtok er a Alma me a Amulek.

21 Me ngikal Zeezrom a mocha oker er a Amulek el kmo: Ng sebechem longer re ngak a mekesai el ker el bo kuker re kau? Chelechang ea Zeezrom a chad el mle chellimosk er a tikingel a diablong, me ngosiik a telemellel a ikel ungil tekoi.

22 Me a Amulek a dula er ngii el kmo, oi, alsekum eng di moungil er a Reng er a Rubak el ngar ngak; leng diak el sebechek el melekoi a ngii di le ngerang lomtok er a Reng er a Rubak. Me a Zeezrom a dula er ngii el kmo, ka mues a ikang el elolem el ontis er a silber, a ikang er rokui ak beskau alsekum, kodngeklii ngike el Ngar Lolab a Bek el Klisiich.

23 Chelechang ea Amulek a dulang el kmo, olkoi, kau el ngalk er a beluu er a ngau, ngerang me ke mengetikaik er ngak? Ng diak modengei el kmo a re melemalt a diak le kengei chouailechang el ongitikaik?

24 Kau koumerang el kmo ng diak a Dios? Ak subedau, ngdiak, kau a medengei el kmo ngarngii a Dios, engdi rengum er a ilteet a lmuut el ngaruchei er a rengum er ngii.

25 E chelechang e kau tiang el mla mulak er medal a Dios el me er ngak. Kau a dilung er ngak el kmo – ka mues a ikang el kellolem el ontais el kmal klou ludoud, ak mo meskau, engdi dimlak er a rengum el omeskak; ng di mle soam ak dul kmo ngdiak el merang el ngar a Dios, mel bor ngii a uchul em temellak. Me chelechang eng tiaikid el klou el mekngit a mouchul e ke mo nguu a blingelem.

26 Me a Zeezrom a dula er ngii el kmo, kau ke kmo ngarngii a merang e ngar el Dios?

27 Me a Amulek a dilur ngii el kmo, oi ngarngii a merang e ngar el Dios.

28 Me a Zeezrom a dulang er ngii el kmo, te ngarngii a re betok el Dios?

29 Me ngulenger el kmo, ng diak.

30 Me a Zeezrom a liluut el dmu er ngii el kmo, ke kemekera e mo medengei a ikael tekoi?

31 Meng dilul kmo, a anghel a mla ocholt el mer ngak.

32 Me a Zeezrom a liluut el loker el kmo, ng techang ngikei el dirk mei? Ngelekel a Dios?

33 Meng diluer ngii el kmo oi.

34 Me a Zeezrom a liluut el loker el kmo, ng mo olsobel er a re chedal el ngar er a kngterir? Me a Amulek a ulenger e dilung er ngii el kmo ak subedau el kmo ng diak, leng diak el sebechel mo omtok a tikingel.

35 Me chelechang ea Zeezrom a dilung er a re chad el kmo, momtab me lak mobes a ikal tekoi; ngikakid el diluel kmo ngarngii a ditang el Dios; e dirrek el dilung el kmo a Ngelekel a Dios a dirke mei, engdi diak bo lolsobel er a re chedal, el diuaia le ngarngii a klisiichel loldurech er a Dios.

36 Elechang ea Amulek a luutang el dula er ngii el kmo, chelechang e kau tiang el mla omulak, kau tiang louchais el kmo, ak mengedecheduch el uaia le ngarngii a klisiichek el oldurech er a Dios le ngak el dilung el kmo ng diak bo lolsobel er a re chedal el ngar er a kngterir.

37 Ak lmuut el subedau el kmo ng diak el sebechel mo olsobel er tir a lengar er a kngterir; leng diak el sebechek el lodngeklii a tikingel, e Ngii a mla dmung el kmo, ng diak a kikiongel tekoi el mo soiseb er a rengedel babeluades; me ke mekerae mo suobel a llak obomsiseb er a rengedel babeluades? Mi seia uchul meng diak el sebechem el mo suobel el ngar er a kngtim.

38 Me a Zeezrom a dulaer ngii: A Ngelekel a Dios ng ngii a Diak a Uebengelel Edam?

39 Me a Amulek a diluer ngii el kmo; oi, ngii ngikei el Diak a Ulebengelel Edam er a ianged me a chutem, me a rokui el tekoi el ngar ngii; ngii a uchelel e ulebongel, e kot e uriul;

40 Me ngii a mei er a beluuelchad el mo olsobel er a re chedal; e mongmai a kngterir tirkei el mo oumerang er a ngklel; me tirkaikid tirkei el mo nguu a diak a ulebengelel klengar, e diak a ngodech el mo suobel.

41 Me chelechang ea re dengerenger a mo medechel, el diuaia le mlak le ngar ngii a rael mo suobel, a ditang el mortir a ngbetel a rengedel a kodall; le kamosang, a sils a mei el rokui el chad a mo mekiis er a kodall e mo dechor er medal a Dios e mo er a kerrekeriil kirel omerellir.

42 Chelechang e ngarngii a kodall el ngklel a kodall er a tech; me a kodellel a Kristo a mo kodoked a lechetel tiaikid el kodall er a tech, me a rokui a mo mekiis eri tiang el kodall er a tech.

43 A reng me a tech a lmuut el mo dmak el kmal cherrungel; a rokui el klekedellel me a omechelel a lmuut el mo ruebet er a olsechelel, el di uai kid er chelechang el taem; e solae kid a mengai el mo dechor er medal a Dios, el di uaia klemedengei er kid er chelechang, e kmal moungil mo lmatk aikei el rokui el kngtid.

44 Chelechang e tiang loltel a rokui a mei a re mechuodel me a re ngeask, a re sibai me a mimokl, me a re sechal me a redil, me a re dengerenger me a re mekedung; e dirrek el diak a ditang el chui er a btelud el mo remiid; le rokui a molmuut er a smechel cherrungel, el uai chelechang er a chelsel a bedenged, e mo mengai el mo dechor er medal a Kristo el Ngalek, me a Dios el Edam me a Edaol Reng el ditang el Diak a Ulebengelel Dios el mo er a kerrekeriil kirel a omerellir el kmo ngungil, ng mekngit.

45 Chelechang e kamomes, ak mla melekoi er kemiu el kirel a kodellel a bedenged er a tech, me a dirrek el kirel okiis er a bedenged er a tech. Ak uchais er kemiu el kmo, tiaikid el mo er a kodall el bedenged a mo mekiis el mo diak le mad el bedenged, er a dikea kodall, meng ngara kot el kodall el mo er a klengar, el dikeael luut el mad; me a reng er tir a mo dmak ngii me a bedengir, e dikea el luut el mo kakeakl; me a cherrengelel a mo reng el lobengkel a dikeael lluut el mad el bedenged, meng dikeael luut el mo mechut.

46 Elecha bocha le merek el melekoi a ika el tekoi a Amulek, ea rechad a liluut el mo mechas a rengrir, me a Zeezrom a dirrek el mlo omritel. Tia mlo ulebongel er a tikingel a Amulek, ng di mlo ikaikid ak liluches.