1 Me chelecha ta er a klebesei ete mirrael melemolm lolsisechakl a tikingel a Dios el mo er a re chad, el mlo soiseb er a chelsel a ikelesia er tir, me a chelsel a blirir; oi, te dirrek el mlo olsisechakl aika el tekoi er a rael er a blurir.

2 Me a ta er a klebesei er a uriul er a klou el blak el reng er a ureor er a delongelir, eng mocha rengii a ungil lurreor er a delongelir a remechebuul, le tirkang a mlodik er a ikelesia leng mle mechut a bilir.

3 Me a uchul eng dimlak le kengei er tir el mo soiseb er a ikelesia el mo mengull er a Dios, le tulusbech el kmo temle kikiongel; le te mle chebuul; oi, a rodam er tir a ulusbech el kmo temle kermechut; le te mle mechebuul er a kloklel a bluulechad; e dirrek el mle mechebuul er a reng.

4 Me chelecha Alma er a lolsisechakl e longedecheduch er a rechad er bebul a ked er a Onidah, ea klou lildois a mle erngii, el tirkael dullekoi er tir, el mle mechebuul a rengrir le tir el mle mechebuul er a klalo er a bluulechad.

5 Mete merema er a Alma; e ngikei el kora mle merreder er tir a dilur ngii: te mo mekerang tirkael bebilrengak, el diak a chad el sorir le te chebuul, oi, oumesind ea re priest; itir a mladikemam er a ikelesia er kemam el kiblo meringel loureor a chimomam lomekedechor er ngii; e tir a mla chodikemam le kemam el kmal chebuul, meng diak a kiboerngii el mo mengull er a Dios er kemam; me a kimo mekerang?

6 Me chelecha Alma ral rengesa ikang, eng mle mereched el meltii el mo chemau ngii, e kmal mlo dmeu a rengul er a lomes; leng mle medengei el kmo a ringel el mloertir a uchul meng mla moriou a rengrir, meng mla mo sebechir el mo rongesii a klumech.

7 Mitia eng dimlak el luut el melekoi el mo er tia el seked; e bai milerk a chimal e uleldiu el mo er tirkael lulemes er tir, el mle chou mekikngit el reng, e dulang er tir:

8 A kumes e kom ngara klengariou el reng; me a le uaisei e kom ngeltengat.

9 A rodam er kemiu a mla dmung, me a kimekerang, le kemam tia el bla loldik er kemam er a ikelesia, meng diak el sebechemam el mengull er a Dios er kemam.

10 Kamrenges e kulekoi, cho momdasu eng diak el sebechemiu el mengull er a Dios, el di merekmo chom nga er a chelsel a ikelesia er kemiu?

11 Ak lmuut, el soak loker, cho momdasu eng diak el sebechemiu el mengull er a Dios, di merekmo tang er a chelsel a tael sandei?

12 Ak mesubed er kemiu, ng bai ungil meko mla modik er a ikelesia er kemiu, me le boriou a rengmiu, me bomsubii a melemalt luldasu; leng klou a ultutlel me bomsubii a melemalt luldasu; leng kemiu el mla modik, el mla mo chetirir a rodam er kemiu le kom kmal chebuul, meng uchul eng mla meriou a rengmiu; leng mlo kirel mengai a rengmiu el meriou.

13 Me chelechang el blamorimel moriou a rengmiu eng klengeltengat chom ngarngii, le chad a lebebil e le morimel mo riou a rengul, eng mo mekngit a rengul er a kentil, e chelechang eng diak leiit el ngikel mo mekngit a rengul er a kentil a mo metik er a klechubechub; e ngikei el metik er a klechubechub e outekangel mo er a ulebongel, ngikei a mo suobel.

14 Me chelechang eng di uaikei el kullekoi er kemiu, ko mlo morimel mo nguu a klengariou el reng me kom mlo ngeltengat, chomomdasu eng diak el luut el ngeltengat tirkei el ditir el ngmai a rengrir el meriou leng tekingel a Dios a uchul?

15 Oi, ngikei merang el di ngii el nguu a rengul el me riou, e mo mekngit a rengul er a kentil, e outekangel mo er a ulebongel, ngikei a mo ngeltengat, oi, lmuut el ngeltengat er tirkel mo morimel moeriou a rengrir le te mo chebuul.

16 Misei a uchul ete ngeltengat tirkei el ditir el moeriou a rengrir, meng diak bo le morimel moe riou a rengrir; me a lechub eng kmo ngeltengat ngikei el mo oumerang a tikingel a Dios, meng mo metecholb el diak longididai er a rengul, oi, meng diak le bole morimel el mo medengelii a tikingel a Dios, me a lechub e bole morimel el mo medengei er a uchei er a bo loumerang.

17 Oi, te betok a melekoi el kmo: alsekum e kochotii olangch el mla er a ianged, ea ki moungil medengei me a kimochu oumerang.

18 Me chelechang e kuker, tiang klaumerang? Merenges e kulekoi, ng diak; le lsekum a chad a medengelii a tekoi, eng diak a belkul loumerang leng medengelii.

19 Me chelecha e nguangera kllungel el dellebeakl a mo er ngikei el medengelii a soal a Dios e diak loltirakl er ngii, er ngikei el loumerang me a lechub eng di melsim el mo oumerang e ruebet el mo er a klengit?

20 Chelechang e tiaikid sel kiriu lomdasu er ngii. Kamosang, ak subedemiu el kmo, aikei el mo duubech er bitang el chimam a di moesisiu ngii me a mo er a bitang; le a ikei el mo er a chad a di mo ultuil er a chomerellel.

21 Elechang ea ku kirel aikei el kullekoi el kirel a klaumerang – a klaumerang a diak le cherrungel klemedengei er a tekoi; me a lsekum e ngarngii a klaumerang er kau, e kau a oureng el kirel a tekoi el diak le moes, eng di klemerang.

22 Me chelechang, e mrengesak e kuuchais er kemiu, ng soak chomlatk a kmo, a Dios a kmal chubechub el mo er tirkei er rokui el oumerang er a ngklel, misei a uchul eng soal a dile kot e bo mo eumerang, oi, er a di tikingel.

23 Me chelechang ea tikingel a le besterir a reanghel el mo er a resechal, oi, ng diak dile sechal me a redil me te dirrek. Chelechang eng diak dil tirkang; a rengalk meng dirrek el mla mo er tir a tekoi el mla mo betok el taem, meng mo rrau a rengrir a re mellomes a rengrir me a re ngarngii a skulir.

24 Me chelecha e betik er a renguk lodam er ngak, kemiu tiang el somiu el mo medengei el kmo ngera tekingek el kiriu el kmo, komo mekerang le ko mla mo chuarm e modik – me chelecha eng diak el soak chobo mousbech el kmo ak oukerrekeriil er kemiu, le ak di mo oltirakl er a klemerang.

25 Me a belkul a tikingek a diak el dul kmo, kemiu er rokui a mlo morimel el mo nguu a kle ngariou el reng; le kmal oumerang el kmo te ngarngii er a delongeliu a di mlo tir el ngmai a rengrir el meriou, me di le boer sel teletael le ngarngii.

26 Me chelechang aikel kdilung el kirel a klaumerang el kmo, ng diak le cherrungel klemedengei – el di uaia ikang el tikingek. Ng diak bo modengelii a bleketeklel ruchei el mo cherrungel, el di uaia klaumerang el ngii a diak le cherrungel klemedengei.

27 Endi kamrenges, alsekum komekiis, e cholekar a uldesuiu el mo melasm a tikingek, e mo ousbech er a di telkib er a klaumerang, oi, me a lechub e di le boerngii a di klemeriar reng er kau el mo eumerang, e mkengei er tiai kid el klemeriar me bo loureor er a chelsel a rengum, me bo moumerang el sokom el demedesii a rengum el kirel a bebil er a tekingek.

28 Chelechang e kid a mo omkesiu er a tekoi me a tane. Chelechang ea lsekum kemsa basio er a tane meng duubech er a chelsel a rengum, chelechang alsekum ngii a merang me a lechub e ngii a ungil tane, meng diako mchitii leng mo diak moeumerang, me bo momtok er a Reng er a Rubak, mosang e lorael mo klou er a chelsel a ulum; e sel mo melchesiu er a kllungel meremang, e ke mo melekoi er a rengum – tia locha ungil tane, me a lechub a tekoi a ungil, le tiakid el mla rullii a reng er ngak el mo klou; oi, ngomechelang el mocha mellomes a uldesuek, oi ngomerolel mocha deuel reng el merngak.

29 Me chelechang, tiang diak le kilungii a klaumerang er kau? Ak subedau Oi; endi tiang a dirkak lorael mo klou el mo cherrungel klemedengei.

30 Endi kamerenges; a omerolel a tane el mo klou, el me melum leng klungang, eng kirem el mocha kmo a tane ungil; leng mla chomkuuk, el mla melum, el omechelang el mocha klou. Me ka mrenges, tiang diak le sisichii a klaumerang er kau? Oi, ng mo smisichii a klaumerang er kau: le kau el mo kmo, ak medengei el kmo tiang a ungil tane; le tiakid el mla melum e morolang el moklou.

31 Me chelechang eka momtab, kau ke kmal medengei el kmo tiang a until tane? Ak subedau el kmo, Oi; a rokui el tane a mo mekdebechii a diuaingii.

32 Me chelechang ea lesekum a tane a merael el mo klou eng ungil, ea llak bole klou eng mekngit, meng mo mechoit.

33 Me chelecha e kamosang, ng kau el mlo melasm, e mlo dolmii a tane, meng mlo omkuuk e mle melum e mirrael mo klou, meke mlo medengei el kmo a tane ungil.

34 Me chelechang, tia el klemedengei er kau ng cherrungel? Oi, a klemedengei er kau a cherrungel el kirel sel tekoi, me a klaumerang er kau a mla mo chelellakl; le kau el mla mo medengei, ke mla mo medengei el kmo a tekoi a mla mkukii a rengum, me kau a mlo medengei el kmo ngmle melum, me a klemedengei er kau a mirrael mo mellomes, me a uldesuem a mirrael mo klou.

35 Me a leuaisei, e tiang diak le klemerang? Ak subdemiu, Oi, le ngii le llomes; ea ngii di le llomes a ungil, leng sebeched el mo medengelii, misei a uchul eke mla mo medengelii el kmo ng ungil; me chelechang e kamrenges, a uriul er chobla mecheremii a llomes, a klemedengei er kau ng cherrungel?

36 Ak mesubed er kemiu el kmo, Ng diak; me a kele moridii kung a klaumerang er kemiu, le kemiu a di mlo ousbech er a klaumerang er kemiu e mlo dolmii a tane el di mlo melasm losiik el kmo kele ngungil tane.

37 Me chelecha lorael a dellomel mo klou, eke kmo: mei mebo dungil mengedmokl er ngii, mel dubech a risel, me lorael mo klou ebo lomeskid a rodech. Me chelechang, chobomungil mengedmokl e mosiou er ngii, eng moduubech a risel, e mo klou, e mo meskau a rodech.

38 Endi chobo mekngit er a dellomel, me llak bo momdasu omengedmeklel, eng diak le borngii a risel, me a kleldelel a sils a lemei eng durur, leng diak a risel meng mo merat, me komedelii e nguu el choitii.

39 Elechang e tia diak le belkul a kmo a tane dimlak lungil, me a lechub a redechel a diak bol soad; tiang a mo uaisei le chetemem a cheliliik, me kau a diak mongedmokl er a dellomel me a uchul eng diak bo mongib a rodech.

40 Chelechang ea lsekum eng diak mongoeas a tikingel a Dios, lomes el mo er medad loba mad er a klaumerang el kirel a rodech, eng diak el sebechem el mo mengib a redechel a kerrekar er a klengar.

41 Engdi alsekum e kau a mo mongoeas a tikingel a Dios, oi, mo mongoeas er a dellomel sel lorael mo klou, loba klaumerang er kau me a klou el ulekerreu, me a klou el reng el omes el mo er medad el kirel er a rodech, eng mo merael a risel el mo klou el kerrekar el mo er a diak a ulebengelel klengar.

42 Meng blakelreng er kemiu me a klaumerang er kemiu me a kellou el reng er kemiu el kirel a tikingel a Dios el mongoeas er ngii, meng mo sebechel mo melalm a risel er a rengum, me chelecha ta er a klebesei e kau a mo mengib a redechel, el kmal meringel chad el merekos er a rokui el merekos, el becheleleu er a rokui el becheleleu. Oi, e bliochel er a rokui el bliochel; me ke mo kolii tia el rodech e mo medinges, meng diak bom sengerenger, me a ka bo le meched a rengum.

43 E solae odam er ngak, ke mo mengib a omuksullel a klaumerang er kau, me a blakelreng er kau, me a kllou el reng er kau, me a klteket er a ringel, el mengiil er a dellomel mo meskau a rodech.