Bililhong mga Gasa gikan sa Dios
Ang kinabuhi mahimong mapuno sa pagtuo, kalipay, kamaya, paglaum, ug gugma kon mopakita kita og gamayng matang sa tinuod nga pagtuo diha ni Kristo.
Mga kaigsoonan, bag-ohay lang kitang miapil sa maligdong nga katiguman, usa ka buluhaton nga masubay balik sa Biblia sa dihang ang karaang Israel nagpundok aron mobati sa presensya sa Ginoo ug mosaulog sa Iyang mga panalangin. Kita adunay pribilehiyo nga magpuyo sa usa ka panahon nga kining karaang buluhaton gipahiuli pinaagi ni Propeta Joseph Smith. Giawhag ko kamo sa pagrekord diha sa inyong personal nga journal kon unsay inyong gibati kalabut niining labing sagrado nga okasyon nga inyong naapilan.
Bag-ohay lang, nanamilit kita sa atong minahal nga higala ug propeta, si Presidente Thomas S. Monson. Bisan kon kitang tanan gimingaw kaniya, mapasalamaton kaayo kita nga ang Ginoo mitawag og bag-ong propeta, si Presidente Russell M. Nelson, aron sa pagdumala sa Iyang Simbahan. Sa han-ay nga paagi nagsugod kita karon og bag-ong hugna sa kasaysayan sa atong Simbahan. Usa kini ka bililhong gasa gikan sa Dios.
Samtang ang matag usa kanato mipaluyo kang Presidente Nelson pinaagi sa atong gipaisa nga mga kamot, nagbarug kita isip mga saksi sa atubangan sa Dios ug miila nga siya ang tukmang sumusunod ni Presidente Monson. Pinaagi sa gipaisa natong mga kamot, misaad kita nga mopatalinghug sa iyang tingog samtang nagdawat siya og direksyon gikan sa Ginoo.
Ang Ginoo nag-ingon:
“Ikaw maminaw ngadto sa tanan niya [nga nagpasabut sa Presidente sa Simbahan] nga mga pulong ug mga sugo diin siya mihatag nganha kanimo ingon nga siya nakadawat kanila … ;
“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.”
Nakaila ko sa atong bag-ong propeta nga presidente sulod na sa 60 ka tuig. Nakaserbisyo ko uban kaniya diha sa Korum sa Napulog Duha sulod sa 33 ka tuig, ug usa ko ka saksi nga ang kamot sa Ginoo miandam kaniya aron mahimo natong pangulong apostol ug propeta sa pagdumala sa tanang mga yawe sa balaang priesthood dinhi sa yuta. Unta ang matag usa kanato hingpit nga mopaluyo kaniya ug sa iyang mga magtatambag ug mosunod sa ilang direksyon. Mainiton usab natong giabi-abi sila si Elder Gong ug Elder Soares isip mga sakop sa Korum sa Napulog Duha ka mga Apostoles.
Human sa Pagkabanhaw ni Jesus, usa ka panghitabo nga atong gisaulog niining mahimayaong tapus sa semana nga Pasko sa Pagkabanhaw [Easter], mipakita Siya ngadto sa Iyang mga disipulo ug miingon, “Ang kalinaw magauban kaninyo: maingon nga gipadala ako sa Amahan, mao man usab igapadala ko kamo.” Bantayi ang duha ka aksyon—gipadala sa Dios ang Iyang Anak. Ang Anak mipadala sa Iyang mga sulugoon—mortal nga kalalakin-an ug kababayen-an—aron sa pagtuman sa Ilang buhat.
Dili kita angayang matingala nga masayud nga kadtong mga indibidwal nga gitawag sa paghimo sa buhat sa Ginoo dili hingpit sa tawhanong paagi. Mga istorya diha sa mga kasulatan nagdetalye sa mga panghitabo mahitungod sa kalalakin-an ug kababayen-an nga gitawag sa Dios aron motuman og mahinungdanong buhat—buotan nga mga anak sa atong Langitnong Amahan nga gitawag nga moserbisyo diha sa ilang mga assignment sa Simbahan, naningkamot sa pagbuhat sa ilang labing maayo, apan wala pay usa kanila ang nahimong hingpit. Mao usab kini ngari kanato karon.
Kay tinuod man ang atong tawhanong mga kahuyang ug mga kasaypanan, unsaon man nato sa pagpadayon sa pagsuporta ug pagpaluyo sa usag usa? Magsugod kini sa pagtuo—tinuod, sinsero nga hugot nga pagtuo diha ni Ginoong Jesukristo. Ang hugot nga pagtuo diha sa Manluluwas mao ang unang baruganan sa doktrina ug ebanghelyo ni Kristo.
Pipila ka tuig na ang milabay mibisita ko sa Balaan nga Yuta. Samtang nagbiyahe mi nga nakaagi og tanom nga mustasa, ang direktor sa BYU Jerusalem Center nangutana kon nakakita na ba ko sukad og liso sa mustasa. Wala pa ko makakita mao nga mihunong mi. Gipakita niya nako ang mga liso gikan sa tanom nga mustasa. Labihan gayud kini ka gagmay.
Nahinumdom dayon ko sa mga pagtulun-an ni Jesus: “Kay sa pagkatinuod magaingon ako kaninyo, Nga kon may pagtuo kamo nga ingon og liso sa mustasa, makaingon kamo niining bukid, Bumalhin ka gikan dinhi ngadto didto; ug kini mobalhin; ug walay magamakuli alang kaninyo.”
Kon kita adunay pagtuo sama ka gamay sa liso sa mustasa, ang Ginoo makatabang kanato nga mabalhin ang kabukiran sa pagkasagmuyo ug pagduha-duha diha sa umaabut natong mga buluhaton samtang magserbisyo kita sa mga anak sa Dios, lakip na ang mga sakop sa pamilya, mga miyembro sa Simbahan, ug kadtong dili pa mga miyembro sa Simbahan.
Mga kaigsoonan, ang kinabuhi mahimong mapuno sa pagtuo, kalipay, kamaya, paglaum, ug gugma kon mopakita kita og gamayng matang sa tinuod nga pagtuo diha ni Kristo—bisan ang usa ka liso sa mustasa sa pagtuo.
Si Elder George A. Smith nahinumdom sa tambag nga gihatag ni Propeta Joseph Smith kaniya: “Siya miingon kanako nga ako kinahanglan dili gayud mawad-an og paglaum, bisan unsa nga matang sa kalisud nga mobilanggo kanako. Kon ako iunlod sa kinailadman sa Nova Scotia ug ang tanan nga mga Batoon nga Kabungturan ipatong-patong pagdat-og kanako, ako dili angay mawad-an og paglaum apan makigbisog, mogamit sa hugot nga pagtuo, ug dili kawad-an sa maayong paglaum ug ako kinahanglan makalingkawas gikan niini nga tanan sa katapusan.”
Kinahanglan natong hinumduman ang pamahayag ni Pablo: “Mahimo ko ang tanang butang pinaagi kang Kristo nga nagapalig-on kanako.” Ang pagkasayud niini laing bililhong gasa gikan sa Dios.
Agig dugang sa mga gasa nga ako nang nahisgutan, adunay daghan, daghan pa. Maghisgot ko karon og pipila lamang—ang gasa sa adlaw nga Igpapahulay, sa sakrament, pagserbisyo sa uban, ug ang dili hitupngan nga gasa gikan sa Dios sa atong Manluluwas.
Ang gahum sa adlaw nga Igpapahulay mao ang pagsinati diha sa simbahan ug sa panimalay sa kahimuot, sa kalipay, ug sa kainit sa pagbati sa Espiritu sa Ginoo nga walay bisan unsa nga pagkabalda.
Daghan kaayo ang mitugot sa ilang kaugalingon nga hapit na lang mogahin sa tibuok nilang kinabuhi diha sa internet gamit ang ilang mga smart device—ang mga screen nga magdan-ag sa ilang panagway sa adlaw ug gabii ug motaud sa ilang mga dunggan og mga earphone nga mobabag sa ligdong, hinagawhaw nga tingog sa Espiritu. Kon dili kita mangita og panahon sa pagtangtang sa mge electronic device, mahimong mawala kanato ang mga oportunidad nga makapaminaw sa Iyang tingog kinsa miingon, “Humilum kamo, ug ilhon ninyo nga ako mao ang Dios.” Karon, walay sayop sa pagpahimulos sa kalamboan sa teknolohiya nga dinasig sa Ginoo, apan kinahanglan gayud nga magmaalamon kita sa paggamit niini. Hinumdumi ang gasa sa adlaw nga Igpapahulay.
Ang panalangin sa pagdawat sa sakrament kinahanglang dili gayud mahimong naandan na lang o usa lamang ka butang nga atong buhaton diha sa sakrament miting. 70 minutos lamang kini sa tibuok semana sa dihang makahunong kita ug makakaplag og dugang nga kalinaw, kalipay, ug kamaya sa atong kinabuhi.
Ang pag-ambit sa sakrament ug pagbag-o sa atong mga pakigsaad usa nato ka timailhan ngadto sa Ginoo nga kanunay kita nga nahinumdom Kaniya. Ang Iyang Pag-ula usa ka gasa uban sa pagkamabination gikan sa Dios.
Ang pribilehiyo sa pagserbisyo sa mga anak sa Langitnong Amahan usa ka oportunidad sa pagsunod sa ehemplo sa Iyang Hinigugmang Anak pinaagi sa pagserbisyo sa usag usa.
Ang ubang mga oportunidad sa pagserbisyo pormal—diha sa atong pamilya, sa atong mga calling sa Simbahan, ug sa atong pag-apil sa mga organisasyon sa pagserbisyo sa komunidad.
Ang mga miyembro sa Simbahan—kalalakin-an ug kababayen-an—kinahanglan nga dili magduha-duha, kon sila nagtinguha, sa pagdagan alang sa usa ka pampublikong katungdanan sa bisan unsang ang-ang sa panggobyerno bisan asa sila nagpuyo. Ang atong mga tingog gikinahanglan karon ug importante diha sa atong mga eskwelahan, atong mga siyudad, ug atong mga nasud. Kon anaa ang demokrasya, ato kining katungdanan isip mga miyembro sa pagbotar sa halangdong kalalakin-an ug kababayen-an nga andam nga moserbisyo.
Daghang oportunidad nga moserbisyo dili pormal—walay assignment—ug moabut samtang motabang kita sa uban nga atong mahimamat dinhi sa biyahe sa kinabuhi. Hinumdumi nga si Jesus nagtudlo sa abogado nga kinahanglan natong higugmaon ang Dios ug ang atong silingan sama sa atong kaugalingon gamit ang Maayong Samarianhon isip ehemplo.
Ang pagserbisyo mohatag og kahigayunan diin atong masabtan ang kinabuhi ug pangalagad ni Kristo. Mianhi Siya aron moserbisyo, sama sa gitudlo sa kasulatan, “maingon nga ang Anak sa tawo mianhi dili aron siya pag-alagaron kondili sa pag-alagad, ug sa paghalad sa iyang kinabuhi sa pagpakamatay ingon nga lukat alang sa daghan.”
Mahimong nahatag ni Pedro ang labing maayo nga paghulagway sa mortal nga pangalagad sa Manluluwas sa lima ka pulong sa dihang gipasabut niya nga si Jesus, “[n]agpangadto-adto sa paghimog mga kaayohan.”
Si Jesukristo mao ang atong pinakabililhon sa tanang gasa gikan sa Dios. Si Jesus miingon, “Ako mao ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako.”
Gipahayag ni Nephi ang kaimportante sa atong Manluluwas sa dihang siya namahayag, “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala.” Kinahanglan gayud nga himoon nato si Kristo nga sentro sa atong kinabuhi sa tanang panahon ug sa tanang dapit.
Kinahanglan natong hinumduman nga Iyang ngalan ang anaa sa atong mga dapit sa pagsimba; gibunyagan kita pinaagi sa Iyang ngalan; ug kita nakumpirmahan, naordinahan, na-endowed, ug na-sealed sa kaminyoon pinaagi sa Iyang ngalan. Moambit kita sa sakrament ug mosaad nga modala diha kanato sa Iyang ngalan—ug mahimong tinuod nga mga Kristiyano. Sa katapusan, gihangyo kita diha sa pag-ampo sa sakrament nga sa “kanunay mohinumdom kaniya.”
Samtang mangandam kita alang sa Dominggo sa Pasko sa Pagkabanhaw ugma, atong hinumduman nga si Kristo ang labaw sa tanan. Siya ang matarung nga Maghuhukom, ang atong matinud-anong Manlalaban, bulahan nga Manunubos, maayong Magbalantay, gisaad nga Mesiyas, tinuod nga Higala, ug daghan pa gayud. Siya sa pagkatinuod usa ka bililhon kaayo nga gasa ngari kanato gikan sa atong Amahan.
Sa atong pagkadisipulo, mahimong aduna kitay mga panginahanglan, mga kabalaka, ug mga buluhaton. Hinoon, ang ubang mga kalihokan kinahanglang anaa gayud sa sentro sa atong pagkamiyembro sa Simbahan. “Busa,” ang Ginoo mimando, “pagmatinud-anon; barug diha sa buhatan nga Ako mitudlo nganha kanimo; tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang.”
Mao kini ang Simbahan nga naglihok! Mao kini ang lunsay nga relihiyon! Mao kini ang ebanghelyo sa tinuod niining kahulugan samtang kita motabang, mopataas, ug molig-on niadtong anaa sa espiritwal ug temporal nga panginahanglan! Ang pagbuhat sa ingon nagkinahanglan nga mobisita kita kanila ug motabang kanila, nga ang ilang mga pagpamatuod sa hugot nga pagtuo diha sa Langitnong Amahan ug kang Jesukristo ug sa Iyang Pag-ula lig-on nga maestablisar diha sa ilang kasingkasing.
Hinaut nga ang Ginoo motabang ug mopanalangin kanato sa paghatag og bili sa daghan natong mahinungdanong gasa gikan sa Dios, lakip na ang atong pagkamiyembro sa Iyang gipahiuli nga Simbahan. Ako nag-ampo nga mapuno kita sa gugma alang sa tanang anak sa Langitnong Amahan ug makakita sa ilang mga panginahanglan ug andam nga motubag sa ilang mga pangutana ug mga kabalaka mahitungod sa ebanghelyo sa klaro ug mabinationg mga paagi nga makapalambo og panabut ug pagdayeg alang sa usag usa.
Mopamatuod ko nga si Jesukristo mao ang atong Manluluwas. Unsay itudlo ngari kanato atol niining kinatibuk-ang komperensya moabut kanato pinaagi sa inspirasyon gikan sa mga apostoles ug mga propeta, gikan sa mga General Authority, ug mga lider nga sister kinsa Kinatibuk-ang mga Opisyales sa Simbahan. Hinaut nga ang kalipay ug kalinaw sa Ginoo magauban sa usag usa mao ang akong pag-ampo sa pangalan ni Jesukristo, amen.