Tumau ma Mausali i le Faatuatua o Keriso
O le tumau ma mausali faifaipea i le faatuatua o Keriso e manaomia ai ona ulufia e le talalelei a Iesu Keriso le loto ma le agaga o le tagata.
I le talafaasolopito o le Feagaiga Tuai, tatou te faitau ai i vaitau faamanuiaina pe a faamamaluina e le fanauga a Isaraelu le latou feagaiga ma Ieova ma tapuai atu ia te Ia ma o isi taimi pe a latou le amanaiaina lena feagaiga ma tapuai atu i tupua po o Paala.
O le nofoaiga a Aapo o se tasi o vaitau o le liliuese i le malo i matū o Isaraelu. I se tasi taimi na ta’u atu ai e le perofeta o Elia i le Tupu o Aapo ia faapotopoto mai le nuu o Isaraelu faapea ai ma perofeta po o faitaulaga a Paala i le Mauga o Karamelu. Ina ua o mai faatasi tagata, sa fai atu Elia ia i latou, “Pe tou te faaletonu i manatu e lua seia afea? [Pe i nisi upu, “O afea ea tou te filifili tonu ai?”] afai o Ieova o le Atua ia, … mulimuli atu ia te ia; ae afai o Paala, … mulimuli atu ia te ia. A e le tali mai le nuu ia te ia i se upu.” Ona faatonu lea e Elia ia pena uma e ia ma perofeta a Paala se tamai povi ma tuu i luga o faaputuga fafie i a latou lava fatafaitaulaga ae “aua nei avane ai le afi.” Ona, “Valaau atu lea o outou i le igoa o outou atua, ou te valaau atu foi i le suafa o Ieova: o le Atua na te tali mai i le afi, o le Atua lea. Ona tali mai lea o le nuu uma, ua faapea mai, Ua lelei lau upu.”
Tou te manatua sa alalaga atu ma le malosi faitaulaga a Paala i lo latou atua e leai se ola mo le tele o itula e aumai le afi, ae “sa leai se leo, e leai se na tali mai, pe faalogo mai.” Ina ua oo i le taimi o Elia, sa ia toefaaleleia le fata faitaulaga a le Alii na solo i lalo, tuu i ai fafie ma le taulaga i ona luga, ona faatonu lea o tagata uma ia sasaa i ai le vai, e le faatasi ae faatolu. Sa leai se masalosalo e na te le mafai po o se isi lava malosiaga faaletagata soifua ona faamuina le afi.
“Ua oo i le itula e fai ai le taulaga afiafi, ona faalatalata atu ai lea o Elia le perofeta, ua faapea atu, Ieova e, le Atua o Aperaamo, ma Isaako, ma Isaraelu, ia faailoa i lenei aso, o oe o le Atua o Isaraelu, o a’u foi o lau auauna, ma ua ou faia o nei mea uma e tusa ma lau afioga. …
Ona pa’ū ifo lea o le afi a Ieova, ma faaumatia ai le taulaga mu, ma fafie, ma maa, ma le eleele, ua mitiia ai foi le vai sa i le utu.
“Ua iloa e le nuu uma, ona faapa’ū’ūfaō ai lea o i latou, ua faapea, O Ieova, o le Atua ia, o Ieova o le Atua ia.”
O le asō atonu e faapea mai Elia:
-
Pe o i ai le Atua, lo tatou Tama Faalelagi, pe leai, ae afai o loo i ai o Ia, tapuai atu ia te Ia.
-
Pe o Iesu Keriso o le Alo o le Atua, le Togiola toetu o tagata uma, pe leai, ae afai o Ia, mulimuli ia te Ia.
-
Pe o le Tusi a Mamona o le afioga a le Atua, pe leai, ae afai o le afioga a le Atua, ona “faalatalata atili atu lea i le Atua e ala i le [suesueina ma le] ola ai i ona mataupu.”
-
Pe na vaai Iosefa Samita ma talanoa ma le Tama ma le Alo i lena aso o le Tautotogo o le 1820, pe leai, ae afai e moni, ona mulimuli lea i le tiute faaperofeta, e aofia ai ki o faamauga lea na faaee atu e a’u, o Elia i ona luga.
I le konafesi aoao talu ai nei lava, na folafola mai ai e Peresitene Russell M. Nelson e faapea: “E te le tau mafaufau solo po o le a le mea e moni [tagai i le Moronae 10:5]. E te le tau mafaufau po o ai e mafai ona e faatuatuaina ma le saogalemu. E ala mai i faaaliga faaletagata lava ia, e mafai ai ona e mauaina lau oe lava ia molimau o le Tusi a Mamona o le afioga a le Atua, o Iosefa Samita o se perofeta, ma o le Ekalesia lenei a le Alii. Po o a lava tala po o mea e fai e isi, e leai se tasi e mafai ona aveesea se molimau na fanau a’e i lou loto ma le mafaufau e uiga i le mea e moni.”
Ina ua folafola mai e Iakopo e faapea o le Atua e “foai tele mai i tagata uma ma le le toe tautaua” o e saili i Lona atamai, sa ia lapatai mai foi:
“A ia ole atu ma le faatuatua, ‘aua lava ne‘i masalosalo. Aua o lē masalosalo e tusa ia ma le peau o le sami ua sousou i le matagi ma felafolafoaiina.
“Aua lava ne’i manatu lea tagata na te maua se mea e tasi mai le Alii.
“O le tagata faalotolotolua e faaletumau ia i ona ala uma.”
O lo tatou Faaola, i le isi itu, o le faataitaiga atoatoa lea o le tumau. Sa Ia fetalai, “E le tuua a’u e toatasi e le Tama, aua ou te faia pea o mea e lelei ia te ia.” Mafaufau i faamatalaga nei mai tusitusiga paia e uiga i alii ma tamaitai o ē, e pei o le Faaola, sa tumau ma mausali:
“Na liliu mai [i latou] i le faatuatuaga moni; ma sa latou le fia o ese mai ai, ona sa latou [tumau, ma] mausali, ma lē maluelueina, ma sa latou loto ma le filiga atoatoa e tausi poloaiga a le Alii.”
“Ua mausali o latou mafaufau, ma ua latou tuu atu o latou faalagolago i le Atua e le aunoa.”
“Ma faauta, ua outou iloa mo outou lava, ona ua outou molimauina, o le toatele o i latou o e ua aumai i le malamalama o le upumoni … ua tutumau ma mausali i latou i le faatuatua, ma i mea ia ua faasaolotoina ai i latou.”
“Ua tumau pea i latou i le mataupu a le au aposetolo, ma le mafuta faatasi, ma le tofitofiga o le areto, ma tatalo.”
O le tumau ma mausali faifaipea i le faatuatua o Keriso e manaomia ai ona ulufia e le talalelei a Iesu Keriso le loto ma le agaga o le tagata, o lona uiga e le avea le talalelei na o se tasi o le tele o faatosinaga i le olaga o se tagata ae o le taulaiga manino atoa o lona olaga ma uiga faaletagata. Ua fetalai le Alii:
“Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maaa ai o outou tino, ma ou avatu ia te outou le loto aano.
“Ou te tuuina atu lo’u Agaga i totonu ia te outou, tou te savavali ai i a’u tulafono, tou te anaana foi i a’u faamasinoga, ma outou faia.
“Ma … e fai outou mo’u nuu, e fai foi a’u mo outou Atua.”
O le feagaiga lenei tatou te faia e ala i a tatou papatisoga ma i sauniga o le malumalu. Ae o nisi e lei mauaina atoatoa lava le talalelei a Iesu Keriso i o latou olaga. E pei ona fai mai Paulo, e ui na “tatanu faatasi i tatou ma [Keriso] i le papatisoga,” o loo misi lava le vaega e faapea “pei ona toe faatuina mai o Keriso nai e ua oti … , [e faapena foi ona tatou] … savavali i le ola toefuataiina.” E le’i faauigaina lava e le talalelei i latou. E le’i faatotonugalemuina lava i latou ia Keriso. E ai filifili i latou i aoaoga faavae ma poloaiga o le a latou mulimuli ai ma le mea ma le taimi o le a latou auauna ai i le Ekalesia. I se eseesega, o loo i ai i le tausiga o a latou feagaiga ma le sa’olele e faapea o i latou “o e ua filifilia e tusa ma le feagaiga” e aloese mai mea taufaasese ma tumau mausali i le faatuatua o Keriso.
O le toatele o i tatou e iloa i lenei taimi o loo i ai i se mea i le va o le auai i le talalelei e uunaia e agafesootai i le tasi itu ae i le isi itu ua atiae atoatoa ai le tuuto FaaKeriso i le finagalo o le Atua. I se mea i le aluga o lena ala, e ulufale mai ai le tala fou o le talalelei a Iesu Keriso i o tatou loto ma pulea o tatou agaga. Atonu e le tupu i se taimi vave, ae e tatau ona tatou agai uma i luma i lena setete faamanuiaina.
E luitauina ae e taua le tumau ma le mausali pe a tatou iloa i tatou lava ua faamamaina “i le ogaumu o puapuaga,” o se mea e vave pe tuai foi ona oo mai ia i tatou uma i le olaga faitino. A aunoa ma le Atua, o nei aafiaga pogisa e oo atu i le leai o se faamoemoe, faanoanoa, ma le lototiga. O le i ai o le Atua, e suia ai e le mafanafana le tiga, o le filemu e suia le vavaō, ma e suia e le faamoemoe le faanoanoa. O le tumau mausali i le faatuatua o Keriso o le a aumaia ai Lona alofa tunoa tumau ma le lagolago. O le a Ia liliua tofotofoga i le faamanuiaga ma, i upu a Isaia, “e foaiina atu … le matagofie e sui a’i le lefulefu.”
Se’i o’u ta’ua ni faataitaiga se tolu lea e i ai so’u iloa patino:
E i ai se tamaitai o loo mafatia i se faama’i lamatia faaumiumi e ui i togafitiga faafomai, faamanuiaga faaleperisitua, ma anapogi ma tatalo. E ui i lea, o lona faatuatua i le mana o tatalo ma le moni o le alofa o le Atua mo ia e le faaitiitia. E agai pea o ia i luma i lea aso ma lea aso (ma o nisi taimi o lea itula ma lea itula) e auauna atu ai e pei ona valaauina ai i le Ekalesia ma, e faatasi ai ma lana tane, e tausi lo la aiga talavou, e mata’ata’ata i le tele na te mafaia ai. E loloto lona agaalofa mo isi, ma e faaleleia e ona ia lava mafatiaga, ma e tele ina tuu atu atoa o ia e auauna ai i isi. E faaauau pea ona mausali, ma e lagona e tagata le fiafia pe a i ai o ia.
O se alii na ola a’e i le Ekalesia, sa auauna atu o se faifeautalai faamisiona, ma sa faaipoipo atu i se tamaitai lelei sa faate’ia ina ua amata ona talanoa nisi o ona uso ma tuafafine ma faitioina le Ekalesia ma le Perofeta o Iosefa Samita. I le mavae ai o se taimi sa latou tuua le Ekalesia ma taumafai ai e tauanau o ia e mulimuli atu. E pei lava ona tupu soo i tulaga faapenei, sa latou osofaia o ia i talafatu, faasalalauga, ma vitio e faia e tagata faitio, o le toatele o i latou o tagata feitai na avea muamua ma tagata o le Ekalesia. Sa faatauemu ona uso ma tuafafine i lona faatuatua, ma ta’u atu ua faaseseina ma taitaiseseina o ia. Sa le’i i ai ni ana tali i a latou tuuaiga uma, ma na amata ai ona maluelue lona faatuatua ona o le tetee faifai pea. Na ia mafaufau pe tatau ona ia le toe auai i le lotu. Sa ia talanoa atu i lona toalua. Sa ia talanoa atu i tagata na ia faatuatuaina. Sa tatalo o ia. A o ia manatunatu loloto i lenei tulaga atuatuvale o le mafaufau, sa ia manatua ai ni taimi sa ia lagonaina ai le Agaga Paia ma maua ai se molimau o le upumoni e ala i le Agaga. Sa ia faai’uina e faapea, “Afai ou te faamaoni ia te a’u lava ia, e tatau ona ou tautino atu na ootia a’u i le Agaga e sili atu ma le faatasi ma o le molimau a le Agaga e moni.” Sa i ai sona lagona faafouina o le fiafia ma le filemu na faasoaina faatasi ma lona toalua ma le fanau.
O se tane ma se ava o ē sa mulimuli fiafia ma le tumau i le fautuaga a le Usoga i o la olaga, sa faanoanoa i le faigata na la oo i ai i le mauaina o fanau. Sa la faaaluina ni tupe se tele e galulue ai ma fomai atamamai ma, i le mavae ai o se taimi, sa faamanuiaina i latou i se atalii. Peitai, i se faalavelave, i le mavae ai i le na o se tausaga, sa aafia le pepe i se faalavelave faafuasei lea e leai se tasi e tuua’ia ai ae sa tuua ai o ia i le koma, ma se aafiaga tele i le faiai. Sa ia maua le tausiga silisili, ae na le mafai ona iloa e fomai pe o le a faape’i le gasologa i le agai i luma. O le tamaitiiti sa matua galulue ma tatalo malosi ai lenei ulugalii ia aumai i le lalolagi, i so la lagona, ua aveese atu, ma la te le iloaina pe o le a toefoi mai ia i la’ua. Ua la tauivi nei e faafetaia’ia manaoga ogaoga o le la pepe a o faataunuuina ai foi isi o la tiutetauave. I lea taimi silisili ona faigata, na la liliu atu ai i le Alii. Ua la faalagolago atu i le “meaai e tatau ma le aso” ua la maua mai ia te Ia. Sa fesoasoani atu i ai ni uo ma aiga agaalofa ma sa faamalosia e faamanuiaga faaleperisitua. Ua atili ai ona la latalata o le tasi i le isi, masalo o le la faatasiga ua matua malosi atu nei ma sili ona atoatoa nai lo le se isi auala e ono mafai ai.
I le aso 23 o Iulai, 1837, sa tuusa’o atu ai e le Alii se faaaliga ia Thomas B. Marsh i le taimi lea sa avea ai ma Peresitene o le Korama a Aposetolo e Toasefululua. O loo i ai mea nei:
“Ma tatalo mo ou uso o le Toasefululua. Apoapoai malosi atu ia te i latou ona o loʼu igoa, ma ia apoapoaiina i latou ia latou agasala uma, ma ia e faamaoni i loʼu igoa i oʼu luma.
“Ma a mavae atu o latou faaosoosoga, ma puapuaga e tele, faauta, o Aʼu, o le Alii, o le a Ou tautagotago i latou, ma afai latou te lē faamaaa o latou loto, ma lē faamalo o latou ūa e faasaga mai ia te aʼu, o le a faaliliu mai i latou, ma o le a Ou faamaloloina i latou.”
Ou te talitonu o mataupu faavae o loo ta’ua i nei fuaiupu e faatatau ia i tatou uma. O faaosoosoga ma puapuaga tatou te oo i ai, faaopoopo i ai ma soo se tofotofoga ua silafia e le Alii e talafeagai ona tatou oo i ai, e mafai ona taitai atu i lo tatou liua atoatoa ma le faamalologa. Ae faato’a tupu lenei mea pe afai, tatou te le faamaaa o tatou loto pe faamalō o tatou ua e tetee ia te ia. Afai tatou te tumau ma mausali, po o a lava mea e oo mai, tatou te ausia le liua na faamoemoeina e le Faaola ina ua Ia fetalai atu ia Peteru, “Pe a liua mai oe, ona e faamalosi ai lea i lou uso,” o se liua e matua atoatoa e le mafai ona toe suia. O le faamalologa folafolaina o le faamamaina ma le faapaiaina lea o o tatou agaga ua manunu’a i le agasala, e faia i tatou ia paia.
Ou te manatua le fautuaga a o tatou tina: “Ai au fualaau aina; o le a e lelei ai.” E sa’o lava o tatou tina, ma i le aano o le mausali i le faatuatua, “o le taumafaina o au fualaau aina” o le tatalo e le aunoa, ia taumafa fiafia i tusitusiga paia i aso taitasi, ia auauna atu ma tapuai i le Ekalesia, ia taumafa ma le agavaa i le faamanatuga i vaiaso taitasi, ia alofa atu i lou tuaoi, ma ia ave lou satauro i le usiusitai i le Atua i aso taitasi.
Ia manatua e le aunoa le folafolaga o mea lelei e oo mai, i le taimi nei ma le lumanai, mo i latou e tumau ma mausali i le faatuatua o Keriso. Ia manatua le “ola e faavavau, ma le olioli o le au paia.” “E, outou uma e o e loto mamā, ia ea ia o outou ulu ma tali le afioga malie a le Atua, ma taumamafa fiafia i lona alofa; aua tou te mafai, pe afai e mausali o outou mafaufau, e faavavau.” I le suafa, o Iesu Keriso, amene.