Manu’a
I faigata o tofotofoga faalelalolagi, ia agai i luma ma le onosai, ma o le a aumaia ia te oe e le mana faamalolo a le Faaola le malamalama, malamalamaaga, filemu, ma le faamoemoe.
I le aso 22 o Mati, 2016, a o le’i taina le 8 i le taeao, e lua ni pomu a le au faatupu faalavelave na pāpā i le malaevaalele o Brussels. Na ave e Elder Richard Norby, Elder Mason Wells, ma Elder Joseph Empey ia Sister Fanny Clain i le malaevaalele mo le malaga i lana misiona i Cleveland, Ohaio. E tolusefulu lua tagata na maliliu ai, ma na manunu’a uma faifeautalai.
O le faifeautalai na sili ona ogaoga le manu’a o Elder Richard Norby, e 66 tausaga le matua, na auauna atu ma lona faletua, o Sister Pam Norby.
Sa toe mafaufau Elder Norby i lena taimi:
“Sa vave ona ou iloa le mea na tupu.
“Sa ou taumafai e tamo’e mo le saogalemu, ae sa vave ona ou pa’ū i lalo. … Sa mafai ona ou iloa atu sa matua’i manu’a lo’u vae agavale. Sa ou [matauina] se pauta uliuli o tautau ifo i o’u lima e lua toeitiiti lava pei o se upega apogāleveleve. Sa ou tosoina lemu, ae sa ou iloa ai sa lē o se pauta ae o lo’u pa’u lea na mu. Sa lanu mumu lo’u ofutino mai se manu’a i lo’u tua.
“Ina ua ou iloaina mea na faato’a tutupu ua faatumulia ai lo’u mafaufau, sa ou [maua] se manatu malosi lava: … sa silafia e le Faaola le mea sa ou i ai, le mea na faato’a tupu, ma le [mea] sa ou o’o i ai i lena taimi.”
Sa i ai ni aso faigata i luma atu mo Richard Norby ma lona faletua, o Pam. Sa avatu ia te ia ni fualaau e faagase ai o ia i se koma, sosoo ai ma taotoga, faama’i, ma le lē mautonu tele.
Sa faasaoina Richard Norby, ae o lona olaga o le a lē toe tutusa lava. I le lua ma le afa tausaga mulimuli ane, o loo faamaloloina pea ona manu’a; o se fusi o loo suia ai le vaega o lona vae ua toesea; o laa taitasi ua ‘ese nai lo le taimi muamua i lena malaevaalele o Brussels.
Aisea na tupu ai lenei mea ia Richard ma Pam Norby? Sa la faamaoni i a la feagaiga, auauna atu talu ai i le misiona o Ivory Coast, ma sa tausia se aiga matagofie. E mafai ona faapea mai se tasi ma le malamalama lelei, “E lē fea! E lē sa’o lenei mea! Sa la tuuto atu o laua ola mo le talalelei a Iesu Keriso; e mafai faapefea ona tupu lenei mea?”
O Le Olaga Faaletino Lenei
E ui o le a eseese ia faamatalaga, o faalavelave, o tofotofoga ma suega e le’i faamoemoeina, faaletino uma ma faaleagaga, e oo mai ia i tatou taitoatasi ona o le olaga faaletino lenei.
Ao ou mafaufau i lenei taeao i failauga o le sauniga lenei o le konafesi, na ou iloa ai e toalua ua maliliu fanau ma le toatolu ua maliliu fanau a fanau o e na faafuasei ona toe faafoi atu i lo latou aiga faalelagi. Sa leai se tasi sa faasaoina mai le ma’i ma le faanoanoa, ma e pei ona laugaina, o le vaiaso lava lenei, sa maliu ai se agelu i le lalolagi tatou te alolofa uma i ai, o Sister Barbara Ballard, ua laa filemu atu i le veli. Peresitene Ballard, o le a lē galo ia i matou lau molimau i lenei taeao.
Tatou te saili mo le fiafia. Tatou te moomoo mo le filemu. Tatou te faamoemoe mo le alofa. Ma e faamanuia i tatou e le Alii i le anoanoai o faamanuiaga ofoofogia. Ae faatasi ai ma le olioli ma le fiafia, e tasi le mea e mautinoa: o le a i ai taimi, o itula, o aso, o nisi taimi o le tele o tausaga o le a lagona ai e lou agaga le manu’a.
Ua aoao mai tusitusiga paia o le a tatou oo uma i taimi tiga ma taimi fiafia ma o le a i ai le “faafeagai o mea uma.” Na fetalai mai Iesu, “[O lo outou Tama] e na te faaoso i lona la i e ua amio leaga atoa ma e ua amio lelei, ua ia faatoto ifo foi le ua i e ua amiotonu ma e ua amioletonu.”
O manu’aga o le agaga e le tulaga ese i le mauoa po o le mativa, se aganuu se tasi, se malo se tasi, po o se tupulaga se tasi. O [manu’a] e oo mai i tagata uma ma o se vaega o le aoaoina tatou te maua mai i lenei aafiaga faaletino.
E Le’o Tuusaunoaina E Amiotonu
O la’u savali i le asō e faapitoa ia i latou o ē o tausia poloaiga a le Atua, tausia a latou folafolaga i le Atua, ma, e pei o le au Norbys ma le toatele o isi alii, tamaitai, ma fanau i lenei aofia i le lalolagi atoa, o loo fetaia’i ma tofotofoga ma luitau sa le’i fuafuaina tiga.
O o tatou manu’a atonu e oo mai i se mala faalenatura po o se faalavelave e lē talafeagai. E ono oo mai mai se tane po o se avā e lē faamaoni, ua matuā faaleagaina ai le olaga mo se toalua amiotonu ma le fanau. E ono oo mai ni manu’a mai le pogisa ma le le fiafia o faanoanoaga, mai se gasegase e le’i faamoemoeina, mai mafatiaga po o le maliu talavou o se tasi tatou te alolofa i ai, mai le faanoanoa o se tagata o le aiga ua tuua lona faatuatua, mai le tuuatoatasi pe a le aumaia e tulaga se soa e faavavau, pe mai isi mau faigata faavaivailoto ma tiga “[faanoanoaga] ua lē ma va’aia.”
Ua tatou malamalama uma o faigata o se vaega o le olaga, ae pe a latou oo patino mai ia i tatou lava ia, e mafai ona tatou ofo ai. E aunoa ma le fefe, e manaomia ona tatou saunia. Na fai mai le Aposetolo o Peteru, “Aua tou te ofo i le tofotofoga pei o le afi, ua oo ia te outou, peiseai o se mea fou ua oo ia te outou.” Faatasi ai ma lanu sesega o le fiafia ma le olioli, ua lalaga mau atu i ai ma fasi ie pa’aūli o tofotofoga ma faigata i le ie tele o le fuafuaga a lo tatou Tama. O nei tauiviga, e ui e faigata, ae masani lava ona avea ma a tatou lesona silisili ona taua.
A faamatalaina le tala faavavega o fitafita talavou e 2,060 a Helamana, tatou te fiafia i lenei mau: “E tusa ma le agalelei o le Atua, ma lo matou ofo tele, ma le olioli foi o la matou autau atoa, sa leai se tagata e toatasi o i latou na fano.”
Ae e faaauau pea le fuaiupu: “Pe sa i ai foi se tagata e toatasi i totonu o i latou sa lei oo i ai ni manua e tele.” Na maua e [fitafita] taitoatasi e 2,060 manu’a e tele, ma o i tatou taitoatasi o le a manunu’a i le taua o le olaga, pe faaletino, pe faaleagaga, po o mea uma e lua.
O Iesu Keriso o lo Tatou Leoleo Mamoe Lelei
Aua le fiu—po o le a lava le loloto o manu’a o lou agaga, po o le a lava lo latou mafuaaga, po o fea ae po o le a foi le taimi e tupu ai, ma po o le a lava le puupuu po o le umi e tumau ai, e le o faamoemoeina oe ina ia fano faaleagaga. Ua faamoemoeina oe ina ia e sao mai faaleagaga ma fua mai i lou faatuatua ma faalagolago i le Atua.
E le’i foafoaina e le Atua o tatou agaga ina ia ola e aunoa ma Ia. O lo tatou Faaola ma le Alii, o Iesu Keriso, e ala i le meaalofa e lēmafaamatalaina o Lana Togiola, e le gata ina laveai ai i tatou mai le oti ma ofo mai ai ia i tatou, e ala i le salamo, faamagaloga mo a tatou agasala, ae ua tu saunia foi o Ia e laveai i tatou mai faanoanoaga ma tiga o ō tatou agaga ua manu’a.
O le Faaola o lo tatou Samaria Agalelei, na auina mai “e faamalolo i e loto momomo.” E afio mai o Ia ia i tatou pe a pasi ifo isi ma matamata mai. Ma le agaalofa, e tuu e Ia Lona aao faamalolo i luga o ō tatou manu’a ma fusi i ai. E tauave e Ia i tatou. E popole o Ia mo i tatou. Ua Ia fetalai mai ia i tatou, “O mai ia te au … ma o le a ou faamaloloina [outou].”
“Ma o [Iesu] o le a … [mafatia] i tiga ma puapuaga ma faaosoosoga o ituaiga eseese uma; … ia … [mafai ai] e ia ona ave i ona luga tiga ma ma’i o ona tagata. … [ave i Ona luga o tatou] vaivaiga, [i le] faatumuina … i le alofa mutimutivale.”
I se taimi o mafatiaga tele, na ta’u atu ai e le Alii i le Perofeta o Iosefa, “O nei mea uma e te maua ai le poto masani, ma o le avea mo ou lelei.” E mafai faapefea e manu’a tiga ona avea ma ō tatou lelei? I faigata o tofotofoga faalelalolagi, ia agai i luma ma le onosai, ma o le a aumaia ia te oe e le mana faamalolo a le Faaola le malamalama, malamalamaaga, filemu, ma le faamoemoe.
Aua Lava Nei Fiu
Tatalo ma lou loto atoa. Faamalosia lou faatuatua ia Iesu Keriso, i Lona moni a’ia’i, i Lona alofa tunoa. Taofimau i Ana afioga, “O lo’u nei alofa tunoa e lava lea e fesoasoani ia te oe, aua o le vaivai e faaatoatoaina ai lo’u mana.”
Manatua, o le salamo o se vailaau mamana faaleagaga. Tausi poloaiga ma ia agavaa mo Lē Faamafanafana, ia manatua o le folafolaga a le Faaola, “Ou te le tuua outou o mātuaoti, ou te sau ia te outou.”
O le filemu o le malumalu o se pulu pasama malū i le agaga ua manu’a. Toe foi atu i le maota o le Alii faatasi ai ma lou fatu ua manu’a ma igoa o lou aiga i le faatele e mafai ai. E fesoasoani le malumalu ia tatou malamalama i le mea e tupu i le taimi puupuu o lo tatou olaga faaletino mai i se vaaiga e faavavau.
Toe tepa i tua, ma manatua sa e faamaonia atu lou agavaa i lou muai olaga. O oe o se atalii po o se afafine toa o le Atua, ma e faatasi ai ma Lana fesoasoani, e mafai ona e manumalo i taua a lenei lalolagi pa’ū. Sa e faia muamua, ma e mafai ona e toe faia.
Tepa i luma. O outou mafatiaga ma faanoanoaga e moni lava, ae o le a lē tumau e faavavau. O le a aveese lou po pogisa, ona “[ua toetu mai] le Atalii … ma le faamalologa i ona apaau.”
Sa ta’u mai e le au Norbys ia te a’u, “E fai a ma oo mai le lē fiafia i lea taimi ma lea taimi ae ma te lē faatagaina e nofomau.” Sa saunoa mai le Aposetolo o Paulo, “Ua puapuagatia i matou … a e le faaatuatuvaleina; ua fememeai, a e le matuā fememeai; ua sauaina, a e le tuulafoaiina; ua lafotuina i lalo, a e le fano.” Atonu e te vaivai, ae aua lava ne’i fiu.
E o’o lava i ou lava manu’a tiga, o le a e aapa atu i isi, ma faatuatua i le folafolaga a le Faaola: “A o le faamāumau lona ola ona o a’u, e maua ai e ia.” O ē manunu’a o loo togafitia manu’aga o isi, o agelu ia a le Atua i le lalolagi.
I ni nai minute, o le a tatou faalogo atu ai i lo tatou perofeta pele, o Peresitene Russell M. Nelson, o se tamalii e tumu i le faatuatua ia Iesu Keriso, o se tamalii o le faamoemoe ma le filemu, e alofagia e le Atua ae sa le’i saoloto mai manu’aga o le agaga.
I le 1995 o lona afafine o Emily, a o maitaga i se pepe, sa maua i le kanesa. Sa i ai ni aso o le faamoemoe ma le fiafia ina ua fanau mai lana pepe malosi. Ae sa toe foi mai le kanesa, ma na tuua e le latou pele o Emily lenei olaga i le lua vaiaso i le maea ai o lona aso fanau lona 37, tuua ai lona toalua agaalofa ma le fanau laiti e toalima.
I le konafesi aoao, i le mavae ai o lona maliu, sa ta’u mai e Peresitene Nelson: “O o’u loimata o le faanoanoa sa maligi faatasi ma moomooga maimau pe ana mafai ona ou faia nisi mea mo lo ma afafine. … A na faapea e ia te a’u le mana o le toetu, semanu e faaosoosoina a’u e toe faafoi mai [o ia]. … [Ae] e umia e Iesu Keriso na ki ma o le a faaaogaina mo Emily … ma mo tagata uma i le taimi a le Alii.”
I le masina ua te’a, a o asiasi atu i le Au Paia i Puerto Rico ma manatuaina le Afā faataumaoi o Maria, sa saunoa atu ai Peresitene Nelson ma le alofa ma le agalelei:
“O se vaega [lenei] o le olaga. O le mafuaaga lea ua tatou i ai iinei. Ua tatou i ai iinei ina ia maua se tino ma ina ia tofotofoina ma suesueina. O nisi o na suega e faaletino; o nisi e faaleagaga, ma o o outou tofotofoga iinei o mea uma e lua o le faaletino ma le faaleagaga.”
“Tou te le’i faavaivai lava. Ua matou mitamita [tele] ia te outou. O outou o Au Paia faatuatua ua tele mea ua ma’umauina, ae e ala i nei mea uma, ua outou atiaeina ai lo outou faatuatua i le Alii o Iesu Keriso.”
“E ala i le tausia o poloaiga a le Atua, e mafai ona tatou maua le olioli i le lotolotoi o o tatou tulaga sili ona leaga.”
O Le A Soloieseina Loimata Uma
O’u uso ma tuafafine, o la’u folafolaga ia te outou o le faateleina o lo outou faatuatua i le Alii o Iesu Keriso o le a aumaia ai ia te oe le malosi faaopoopoina ma le faamoemoe sili atu. Mo outou, o ē amiotonu, o le Fomai o ō tatou agaga, i Lana lava taimi ma i Lana lava ala, o le a faamalolo i o outou manu’a uma. E leai se amioletonu, leai se sauaga, leai se tofotofoga, leai se faanoanoa, leai se lototiga, leai se mafatiaga, leai se manu’a—po o le a le loloto, po le a le lautele, po o le a le tiga—o le a taofia mai le faamafanafanaga, filemu, ma le faamoemoe tumau ia te Ia e ona aao mafola ma aao sa manu’a o le a faafeiloaia mai i tatou i Lona afioaga. I lena aso, ua molimau mai ai le Aposetolo o Ioane, o ē amiotonu “e [o mai] nai le puapuaga tele” o le a laulaututū “ua faasinasinaina o latou ofu … i luma o le nofoalii o le Atua.” O le Tamai Mamoe o le a “ia te i [tatou] … e sōloieseina foi e le Atua o loimata uma nai o [outou] mata.” O le a oo mai lenei aso. Ou te molimau atu ai i le suafa o Iesu Keriso, amene.