2:3

Ang Gahum sang Nagatib-ong nga Pagtuo

Ni Pangulong Henry B. Eyring

Ikaduhang Manuglaygay sa Unang Panguluhan

Sa pagbayaw sang inyo kamot sa pagtib-ong, nagahimo kamo sang pangako sa Dios, nga ginaalagaran sang mga ini, nga pagatib-ungon ninyo sila.

Madamo nga beses nga nabatian ko ang mga lider sa priesthood nga nagapasalamat para sa nagatib-ong nga pagtuo sang ila mga ginaalagaran. Gikan sa emosyon sa ila mga tingug, mahibal-an mo nga ang ila pagpasalamat madalom kag matuod. Ang katuyuan ko sini nga adlaw amo ang magpahayag sang pagpasalamat sang Ginuo para sa inyo pagtib-ong sa Iya mga alagad sa Iya Simbahan. Kag pagpaisog man sa inyo sa paggamit kag pagtubo sa sinang gahum sa pagtib-ong sa iban upod ang inyo pagtuo.

Antes kamo matawo, ginpakita na ninyo ang amo nga gahum. Panumduma kon ano ang nahibaluan naton parte sa kalibutan sang mga espiritu antes sang mortalidad. Ang aton Amay nga Langitnon nagpresentar sang isa ka plano para sa Iya mga anak. Yara kita didto. Si Lucifer, ang aton utod nga espiritu, nagpamatok sa plano nga magahatag sa aton sing kahilwayan sa pagpili. Si Jehova, ang Hinigugma nga Anak sang Amay nga Langitnon, nagtib-ong sang plano. Si Lucifer nanguna sang isa ka rebelyon. Ang nagatib-ong nga tingug ni Jehova ang nagpangibabaw, kag nagboluntaryo Sia nga mangin aton Manluluwas.

Ang kamatuoran nga yari kamo sa mortalidad karon nagapasiguro nga gintib-ong ninyo ang Amay kag ang Manluluwas. Nagkinahanglan sing pagtuo kay Jesucristo agud itib-ong ang plano sang kalipayan kag ang papel ni Jesucristo diri kon sa diin tuman kagamay sang inyo nahibaluan sa mga hangkat nga inyo pagaatubangon sa mortalidad.

Ang inyo pagtuo sa pagtib-ong sang mga alagad sang Dios ang yara man sa tunga sang inyo kalipayan sa sining kabuhi. Sang inyo ginbaton ang pagpanghangkat sang isa ka misyonero nga pangamuyuan agud mahibaluan nga ang Libro ni Mormon amo ang pulong sang Dios, may yara kamo sang pagtuo agud itib-ong ang isa ka alagad sang Ginuo. Sang inyo ginbaton ang pangagda nga magpabunyag, gintib-ong ninyo ang isa ka mapainubuson nga alagad sang Dios.

Sang gintugtan ninyo nga itakdong sang isa ka tawo ang iya mga kamot sa inyo ulo kag magsiling, “Batuna ang Balaan nga Espiritu,” gintib-ong ninyo sia bilang nagakapot sang Melchizedek Priesthood.

Sugod sang adlaw nga ato, kamo, paagi sa matutom nga pagserbisyo, nagatib-ong sang tagsa ka tawo nga nagtangdo sang priesthood sa inyo kag sa tagsa nga nag-ordin sa inyo sa isa ka palangakuan sa sina nga priesthood.

Sang bag-o pa sa inyo inagihan sa priesthood, ang tagsa ka pagtib-ong isa ka simple nga kahiwatan sang pagsalig sa alagad sang Dios. Sa karon, madamo sa inyo ang nagsaka na sa lugar kon sa diin ang pagtib-ong nagapangayo pa sing masobra pa.

Ginapili ninyo kon bala itib-ong ang tanan nga ginatawag sang Ginuo— sa bisan ano nga ginapahimo sang Ginuo sa ila. Inang pagpili nagakahanabo sa mga komperensya sa bug-os nga kalibutan. Natabo ini sa sining komperensya. Sa sining mga miting, ang mga ngalan sang kalalakin-an kag kababayin-an—mga alagad sang Dios—ginalawag kag ginaagda kamo sa pagbayaw sang inyo kamot sa pagtib-ong. Mahimo kamo nga indi magtib-ong, ukon mahimo kamo magpangako paagi sa inyo nagatib-ong nga boto. Paagi sa pagbayaw sang inyo kamot sa pagtib-ong, nagahimo kamo sang pangako. Nagasaad kamo sa Dios, nga ginaalagaran sang mga ini, nga pagatib-ungon ninyo sila.

Indi ini sila perpekto nga mga tawo, kasubong sa inyo. Ang pagtuman sang inyo pangako nagakinahanglan sang indi mauyog nga pagtuo nga gintawag sila sang Ginuo. Ang pagtuman sadtong mga pangako nagadala man sang wala katapusan nga kalipayan. Ang indi pagtuman sini magadala sang kasubo sa inyo kag sa inyo mga pinalangga—kag bisan pa gani sang mga kapirdihan nga mas labaw pa sa inyo sarang hunahunaon.

Mahimo nga napamangkot na kamo, ukon pagapamangkuton kamo, kon bala ginatib-ong ninyo ang inyo bishop, stake president, ang Pangkabilugan nga mga Awtoridad, kag ang Pangkabilugan nga mga Opisyales sang Simbahan. Mahimo nga matabo ini sa tion nga pangabayon kamo nga itib-ong ang mga opisyal kag mga lider sa isa ka komperensya. Kon kaisa matabo ini sa interbyu kaupod ang bishop ukon stake president.

Ang laygay ko amo nga ipamangkot na ninyo nga daan sa inyo kaugalingon, upod ang mahinalungon kag mainampuon nga tagipusuon. Sa inyo paghimo sini, mahimo ninyo balikan ang inyo mga pamensaron, hinambalan, kag binuhatan sining nagliligad. Panumduma kag balaya ang mga sabat nga inyo ihatag sa tion nga interbyuhon kamo sang Ginuo, nga nakahibalo nga himuon gid Niya ini sa pila ka adlaw. Mahimo kamo maghanda paagi sa pagpamangkot sang inyo kaugalingon sang mga masunod:

Nagpanumdom bala ako ukon naghambal parte sa mga kahuyang sang mga tawo nga ginpangako ko nga itib-ong?
Nagpangita bala ako sa ebidensya nga ang Ginuo nagagiya sa ila?
Matutom kag tampad ko bala nga ginasunod ang ila liderato?
Ginhambal ko bala ang ebidensya nga akon nakita nga mga alagad sila nga Dios?
Regular ko bala sila nga ginapangamuyo nga ginasambit ang ngalan kag may pagpalangga?

Inang mga pamangkot, para sa kalabanan sa aton, magadala sa aton sang pagkatublag kag sang kakinahanglan maghinulsol. Ginsugo kita sang Dios nga indi maghusga sa iban sing indi matarong, apang sa buhat, nabudlayan kita maglikaw sini. Halos sa tanan naton nga ginahimo sa pagtrabaho upod sa mga tawo nagapadulong sa aton pagtakos sa ila. Kag sa halos tanan nga aspeto sang aton kabuhi, ginakomparar naton ang aton kaugalingon sa iban. Mahimo nga ginahimo naton ini bangod sa madamo nga rason, ang pila sini may punto, pero sa masami nagaresulta ini sa aton pagkritiko.

Si Pangulong George Q. Canon naghatag sang paandam nga akon man ipaandam sa inyo. Nagapati ako nga matuod ang iya ginhambal: “Ginpili sang Dios ang Iya mga alagad. Ginaangkon Niya nga Iya kinamatarong nga kondenahon sila, kon kinahanglanon nila nga kondenahon. Wala Niya ginhatag sa aton ang diber bilang mga indibidwal nga sawayon kag pakalainon sila. Wala sing tawo, bisan ano pa kabakod sa pagtuo, bisan ano pa kataas sa Priesthood, ang pwede maghambal sang malain sa mga pinili sang Ginuo kag magpangita sil-an gamit ang awtoridad sang Dios sa kalibutan nga indi mag-agom sang Iya pagkadisgusto. Ang Balaan nga Espiritu magahalin sa amo nga tawo, kag magapadulong sia sa kadulom. Sa amo sini, indi bala ninyo makita kon daw ano kaimportante nga dapat kita maghalong?”

Ang napanilagan ko amo nga ang mga miyembro sang Simbahan sa bug-os kalibutan masami nga tampad sa kada isa kag sa ila nga nagapanguna sa ila. Ugaling, may mga pag-uswag nga sarang kag kinahanglan gid naton himuon. Sarang kita nga magtaas pa sa aton gahum sa pagtib-ong sa kada isa. Nagakinahanglan ini sing pagtuo kag pagpaninguha. Yari ang apat ka mga panugyan ko agud aton aktohan sa sining komperensya.

Mahimo kita nga magpili sang pat-od nga mga aksyon nga irekomendar sang mga manughambal kag sugdi ini nga himuon sini nga adlaw. Sa paghimo naton sini, ang aton gahum sa pagtib-ong sa ila magadugang.
Mahimo kita nga magpangamuyo para sa ila samtang nagahambal sila agud nga ang Balaan nga Espiritu magadala sang ila mga pulong sa mga tagipusuon sang pat-od nga mga tawo nga aton ginapalangga. Kon mahibaluan naton sa ulihi nga ang aton pangamuyo ginsabat, ang aton gahum sa pagtib-ong sinang mga lider magadugang.
Mahimo kita magpangamuyo nga ang pat-od nga mga manughambal pagabugayan kag padakuon samtang nagahatag sila sang ila mga mensahe. Kon makita naton sila nga ginpadako, magatubo kita sa aton pagtuo agud itib-ong sila, kag magalawig ini.
Mahimo kita nga magpamati sang mga mensahe gikan sa mga manughambal nga mahimo mga sabat sa aton personal nga mga pangamuyo para sa bulig. Kon mag-abot ang mga sabat, kag magaabot ini, magatubo kita sa aton pagtuo agud itib-ong ang tanan nga mga alagad sang Ginuo.

Dugang pa sa pagpauswag sa pagtib-ong sadtong mga nagaalagad sa Simbahan, matun-an naton nga may isa pa ka lugar kon sa diin sarang kita magatubo sa amo nga gahum. Mahimo pa ini gani magdala sang mas dako nga bugay sa aton. Yari ini sa puluy-an kag panimalay.

Nagahambal ako sa mas bata nga nagakapot sang priesthood nga nagapuyo upod sa iya amay. Sugiran ko kamo gikan sa akon eksperiyensya kon ano ang bili sa isa ka amay nga mabatyagan ang inyo nagatib-ong nga pagtuo. Mahimo nga may kompiyansa sia sa inyo panulok. Pero madamo sia sang ginaatubang nga mga hangkat sangsa inyo nahibaluan. Kon kaisa indi niya makita ang alagyan sa tunga sang mga problema nga yara sa iya atubang.

Ang inyo pagdayaw sa iya makabulig sa iya. Ang inyo pagpalangga para sa iya mas makabulig pa gid. Pero ang bagay nga pinakamakabulig amo ang sinsero nga mga tinaga pareho sini: “Tay, nagpangamuyo ako para sa imo, kag nabatyagan ko nga ang Ginuo magabulig sa imo. Mangin maayo ang tanan. Nahibal-an ko ina.”

Ang mga pulong kasubong sina may yara man sang gahum sa pihak nga bahin, tatay pakadto sa anak. Kon ang isa ka anak nakabuhat sang seryoso nga kasaypanan, mahimo nga sa espirituhanon, mahimo nga nagabatyag sia nga nalugaw-an. Bilang iya amay, sa sina nga tion, posible nga makibot kamo kon, pagkatapos ninyo magpangamuyo kon ano ang himuon, ang Balaan nga Espiritu magabutang sining mga pulong sa inyo baba: “Anak, yara lang ako sa imo likod. Palangga ka sang Ginuo. Upod sang Iya bulig, makabalik ka gid. Nakahibalo ako nga masarangan mo kag sarangon mo. Palangga ta ka.”

Sa korum sang priesthood kag sa panimalay, ang mas dako nga pagtuo agud itib-ong ang kada isa amo ang paagi nga aton mapasad ang Sion nga luyag sang Ginuo nga aton ipasad Upod ang Iya bulig, masarangan naton kag mahimo naton. Kinahanglan nga tun-an naton nga palanggaon ang Dios sa bug-os mong tagipusuon, kabaskog, hunahuna, kag kusog kag palanggaon ang kada isa pareho sang pagpalangga naton sa kagalingon.

Sa aton pagtubo sa sinang putli nga gugma ni Cristo, ang aton mga tagipusuon magahumok. Ang inang gugma magapaubos sa aton kag magtulod sa aton nga maghinulsol Ang aton kompiyansa sa Ginuo kag sa kada isa magatubo. Kag dayon magaidog kita pasulong padulong sa pag-isa, subong nga ginasaad sang Ginuo nga mahimo naton.

Nagasaksi ako nga ang Amay nga Langitnon nakakilala kag nagahigugma sa inyo. Si Jesus amo ang buhi nga Cristo! Amo ini ang Iya Simbahan. Nagakapot kita sang Iya priesthood. Pagatamdon Niya ang aton pagpanginguha kita nga magtubo sa aton gahum paghimo kag sa pagtib-ong sa kada isa. Nagapamatuod ako sa ngalan ni Jesucristo, amen.