Si Cristo: Ang Kapawa Nga Nagasiga sa Kadudulman
Kon pamatyagan ninyo nga ang kasanag sang inyo testimonya nagapiraw kag nagalapit na ang kadulom, magpakaisog. Tumana ang inyo mga promisa sa Dios.
Ang akon opisina sa Relief Society Building nagaatubang gid sa Templo sang Salt Lake. Kada gab-i, sa natalana nga oras, ang mga suga sa gwa sang templo nagasiga sa kasisidmon. Ang templo isa ka dalayon, nagapasalig nga kasanag sa gwa lang sang akon bintana.
Isa ka gab-i sining nagligad lang nga Pebrero, indi kinaandan nga nangin madulom ang akon opisina sa pagtunod sang adlaw. Sang paglantaw ko sa gwa sang bintana, kadulom sang templo. Wala mapasiga ang mga suga. Pamatyag ko gulpi lang ako nga ginsubuan. Indi ko na makita ang mga tore sang templo nga ginatan-aw ko tagsa ka gab-i sa malawig nga tinuig.
Ang magtan-aw sa kadulom imbes sang ginapaabot nga kasanag nagpadumdom sa akon nga isa sa tig-una nga kinahanglanon naton para magtubo amo ang magpabilin nga konektado sa ginakuhaan naton sing kasanag—si Jesucristo. Sia ang ginhalinan sang aton gahum, ang Kapawa kag Kabuhi sang Kalibutan. Kon wala ang mabaskog nga koneksyon sa Iya, amat-amat kita nga mapatay sa espirituhanon. Nga nakahibalo sina, ginatinguhaan ni Satanas nga gamiton ang kalibutanon nga mga kabudlayan nga aton tanan ginaatubang. Nagahikot sia agud nga magdulom ang aton kasanag, gub-on ang koneksyon, utdon ang ginakuhaan sang kasanag, nga ginabilin kita nga nagaisahanon sa kadulom. Ining mga kabudlayan kinaandan nga kahimtangan sa kabuhi sa duta, pero si Satanas nagapangabudlay para painon kita kag hambalan kita nga kita lang ang nagaeksperiyensya sang amo sini.
Ang Iban sa Aton Indi na Makahulag tungod sa Kasubo
Kon abtan kita sang mga trahedya, kon ginasakit kita sang kabuhi sa punto nga daw indi na kita makaginhawa, kon daw ginkastigo kita pareho sang tawo sa dalanon pa-Jerico kag ginbayaan lang sa dalan, nagaabot si Jesus kag ginabutangan sang lana ang aton kapilasan, mahinalungon kita nga ginapatindog, ginadala kita sa dalayonan, ginaatipan kita. Sa aton nga ginasuboan, nagasiling Sia, “Pahapuson ko … ang mga lulan nga ginbutang sa inyo mga abaga, nga bisan indi gani ninyo mabatyagan ang mga ini sa inyo mga likod, … nga mahimo ninyo nga mahibal-an sing pat-od nga ako, ang Ginuong Dios, nagaduaw sa akon katawhan sa ila mga kapipit-an.” Si Cristo nagaayo sang mga pilas.
Ang Iban sa Aton Ginakapoy na Gid
Si Elder Jeffrey R. Holland nagsiling: “Wala gintuyo nga magdalagan kita sing mas madasig sangsa aton masarangan. … Pero [sa pihak] sina, nakahibalo ako … nga madamo sa inyo ang nagadalagan sing [tuman,] kadasig kaayo kag [ang] kusog kag emosyonal nga reserba kon kaisa halos mawad-an na.” Kon ang mga ginapaabot halin sa aton nagapalanglapaw, sarang kita nga magpundo kag magpamangkot sa Amay nga Langitnon kon ano ang buy-an. Bahin sang aton eksperiyensya sa kabuhi amo ang hibal-on kon ano ang indi paghimuon. Pero bisan pa sina, kon kaisa makakalapoy ang kabuhi. Si Jesus nagapasalig sa aton, “Palapit kamo sa akon, tanan kamo nga ginabudlayan kag ginabug-atan, kag papahuwayon ko kamo.”
Si Cristo handa nga updan kita sa pagkarga sang gota kag magguyod agud magmag-an ang aton mga ginadala. Si Cristo ang kapahuwayan.
Pamatyag sang Iban sa Aton Wala Kita Nagasunod sa Tradisyunal nga Hurmahan
Sa lainlain nga mga rason, pamatyagan naton wala kita ginabaton ukon indi mabaton. Ang Bag-o nga Katipan nagapakita sang dako nga pagpaninguha ni Jesus agud lab-uton ang tanan nga klase sang mga tawo: mga aruon, mga manugsukot sang buhis, kabataan, mga taga-Galilea, mga makihilawason, mga babayi, mga Fariseo, mga makasasala, mga Samariahanon, mga balo, mga soldado sang Roma, mga makilahion, ang mga ginakabig mahigko suno sa Layi ni Moises. Sa halos tagsa ka istorya, nagalab-ot Sia sa tawo nga sa kinaandan wala ginabaton sa sosyedad.
Ang Lucas 19 nagasugid sa aton parte sa istorya sang puno nga manugsukot sang buhis sa Jerico nga ginhingadlan nga si Zaqueo. Nagsaka sia sa kahoy agud makita si Jesus nga nagalabay. Empleyado si Zaqueo sang gobyerno sang Roma kag ginkabig nga dayaon kag makasasala. Nakita sia ni Jesus sa ibabaw sang kahoy kag gintawag sia, nga nagasiling, “Zaqueo, panaog ka sing dalidali, tungod kay madayon ako sa imo balay karon nga adlaw.” Kag sang makita ni Jesus ang kaayo sang tagipusuon ni Zaqueo kag ang mga butang nga iya ginhimo para sa iban, ginbaton Niya ang iya halad, nga nagasiling, “Ang kaluwasan nag-abot sa sining panimalay karon nga adlaw, [kay] ini sia kaliwat man ni Abraham.”
Malulo nga ginhambalan ni Cristo ang mga Nefinhon, “Nagsugo ako nga wala sing isa sa inyo nga magpalayo.” Nabaton ni Pedro inang gamhanan nga rebelasyon sa Mga Binuhatan 10 sang sia magsiling, “Ang Dios nagpahayag sa akon, nga indi ko pagkabigon ang bisan sin-o [nga tawo] nga mahigko ukon nadagtaan.” Isa ka wala nagabag-o nga rekisitos sa Cristohanon nga mga disipulo kag mga Santos sa Ulihing mga Adlaw ang pagpakita sang matuodtuod nga pagpalangga sa kada isa. Ginapalab-ot ni Jesus ang pareho nga imbitasyon sa aton sa Iya ginhatag kay Zaqueo: “[Yari karon], nagatindog ako sa pwertahan kag nagapanuktok: kon [kamo] makabati sang akon tingug kag mag-abri sang pwertahan, magasulod ako sa [inyo] balay, kag magakaon upod sa [inyo], kag [kamo] magakaon upod sa akon.” Nakita kita ni Cristo sa aton kahoy.
Ang Iban sa Aton Ginatublag sang mga Pamangkot
Pila lang ka tuig ang nagligad, ginabug-atan ako kag nagaugtas sa mga pamangkot nga indi ko makita ang mga sabat. Temprano pa isa ka Sabado sang aga, may diutay ako nga damgo. Sa damgo makita ko ang isa ka palasilungan, kag nahangpan ko nga dapat ako magkadto kag magpasilong didto. May lima ini ka arko nga nagapalibot sini, pero ang mga bintana human sa bato. Nagreklamo ako sa akon damgo, nga indi ko gusto nga magsulod kay daw kapuot kaayo didto. Dayon nagsulod sa akon panghunahuna nga ang utod ni Jared pasensyoso nga nagtunaw sang mga bato agud mangin klaro nga kristal. Ang kristal isa ka bato nga nagbaylo ang kinaiya. Sang gintandog sang Ginuo ang mga bato para sa utod ni Jared, nagsiga ini sa sulod sang madulom nga mga barkasa. Gulpi lang napuno ako sang handum nga makadto sa amo nga palasilungan sangsa diin pa man. Amo ato ang lugar—ang solo nga lugar—para matuodtuod ako nga “makakita.” Ang mga pamangkot nga nagatublag sa akon wala madula, pero mas klaro sa akon kaisipan ang pamangkot sang magbugtaw ako: “Paano mo patubuon ang imo pagtuo, pareho sa utod ni Jared, agud nga ang imo mga bato mabayluhan sang kasanag?”
Ang aton tawhanon nga utok ginhimo agud magpangita sang paghangop kag kahulugan sing amat-amat. Wala ko mahibal-i ang tanan nga rason kon ngaa ang tabon sa mortalidad tama ka damol. Indi ini ang halintang sa aton wala katapusan nga pag-uswag nga mabaton naton ang tanan nga sabat. Ini ang halintang kon sa diin nagatubo ang aton pagsalig (ukon kon kaisa ang aton paglaum) sa ebidensya sang mga butang nga indi makita. Ang pasalig nagaabot sa pamaagi nga indi masami mahapos tungkaron, pero may kasanag sa aton kadudulman. Si Jesus nagsiling, “Ako ang kapawa, kag ang kabuhi, kag ang kamatuoran sang kalibutan.” Sa mga nagapangita sang kamatuoran, mahimo nga sa primero daw pareho ini sang binuang nga pagkapuot sa mga bintana nga human sa bato. Pero upod ang pasensya kag matinuohon nga mga pamangkot, sarang ni Jesus nga bayluhan ang aton mga bintana nga human sa bato sang kristal kag kasanag. Si Cristo ang kasanag para makakita.
Pamatyag sang Iban sa Aton nga Indi Gid Kita Mangin Kaangay-angay
Ang pula nga lugom sa Daan nga Katipan indi lamang maduagon kundi madukot man, buot silingon nga ang masiri sini nga kolor nagtapik gid sa de-lana kag indi ini magpug-is bisan kapila pa ini labhan. Ginagamit ni Satanas ining rason agud ipabatyag sa aton nga indi na kita mapatawad: ang puti nga de-lana nga namantsahan sang pula indi na magbalik sa puti. Pero si Jesucristo nagsiling, “Ang akon [mga pamaagi] mas mataas sangsa inyo [pamaagi],” kag ang milagro sang Iya grasya amo nga kon maghinulsol kita sang aton mga sala, ang Iya mapula nga dugo magabalik sa aton sa katinlo. Wala ini sa lohika, pero wala sapayan matuod ini.
Litrato halin sa iStock.com/iinwibisono
“Nagpula ikaw tungod sang dagta sang sala, pero tinloan ko ikaw nga magputi gid kaayo; bisan pa ang dagta sang imo sala tama kapula, pero manginmaputi ka subong sang bulbol sang karnero.” Ang Ginuo maathag nga nagasiling: sia “nga naghinulsol sang … mga sala, ang amo man ginapatawad, kag ako, nga Ginuo, wala na nagadumdum sang ila mga sala.” Sa malip-ot: Dali, athagon ta ini nga butang. Nakahimo kamo sang mga sayop; ang tanan nagkabos. Magpalapit sa akon kag maghinulsol. Indi ko na pagdumdumon ang sala. Sarang kamo nga mangin matinlo liwat. May buluhaton Ako para sa inyo. Ginapaputi ni Cristo ang de-lana.
Pero ano ang praktikal nga mga tikang? Ano ang yabi sa pagpakig-angot liwat sa gahum ni Jesucristo kon kita nagapiraw? Si Pangulong Russell M. Nelson nagsiling sini sing tama kasimple: “Ang yabi amo ang maghimo kag magtuman sang sagrado nga mga kasugtanan. … Indi ini komplikado nga pamaagi.” Himoa si Cristo nga sentro sang inyo kabuhi.
Kon pamatyagan ninyo nga ang kasanag sang inyo testimonya nagapiraw kag nagalapit na ang kadulom, magpakaisog. Tumana ang inyo mga promisa sa Dios. Magpamangkot. Pasensyoso nga tunawa ang bato agud mangin kristal. Magliso kay Jesucristo, nga nagapalangga gihapon sa inyo.
Si Jesus nagsiling, “Ako ang kasanag [nga] nagasilak sa kadulom, kag ang kadulom indi makahangop sini.” Buot silingon sina nga bisan ano pa ang pagpaninguha sini, ang kadulom indi gid makapalong sinang kasanag. Bisan san-o. Makasalig kamo nga ang Iya kasanag mangin ara para sa inyo.
Kita, ukon ang mga tawo nga aton ginapalangga, mahimo nga magadulom sing temporaryo. Sa kaso sang Templo sang Salt Lake, ang manugdumala sang pasilidades, nga si Brother Val White, nakabaton halos gilayon sing tawag. Nakatalupangod ang mga tawo. Ano ang natabo sa mga suga sang templo? Una, personal nga ginkadtuhan sang tinawo ang tagsa ka plangka sang kuryente sa templo kag mano-mano nga ginpasiga ang mga suga. Dayon ila gin-islan ang mga baterya sa unay nga suplay sang kuryente kag gintestingan ini agud mahibal-an kon ano ang nagpalya.
Mabudlay ibalik liwat ang kasanag nga ikaw lang. Kinahanglan naton sing mga abyan. Kinahanglan naton ang kada isa. Pareho sang tinawo sa pasilidad sang templo, mabuligan naton ang kada isa paagi sa pagpakita sing personal, pagkarga liwat sang aton espirituhanon nga mga baterya, pagkaayo sang kon ano ang naguba.
Ang aton indibidwal nga kasanag mahimo nga isa lamang ka suga sa puno. Pero sa gihapon ginapasiga naton ang aton gamay nga kasanag, kag sing tingob, pareho sang Temple Square sa tion sang Paskwa, nagaganyat kita sang minilyon nga mga tawo sa balay sang Ginuo. Pinakamanami sa tanan, pareho sa ginapaisog ni Pangulong Nelson, sarang naton dalhon ang kasanag sang Manluluwas sa aton mga kaugalingon kag sa mga tawo nga importante sa aton paagi sa simple nga buhat sang pagtuman sang aton mga kasugtanan. Sa lainlain nga pamaagi, ginapremyohan sang Ginuo inang matinuohon nga buhat sang gahum kag sang kalipay.
Nagapamatuod ako nga ginapalangga kamo. Nahibal-an sang Ginuo kon daw ano ang inyo pagtinguha. Nagaprogreso kamo. Padayon lang. Nakita Niya ang tanan nga tago ninyo nga sakripisyo kag ginaisip ini para sa inyo kaayuhan kag sa kaayuhan sang tanan ninyo nga pinalangga. Indi mangin walay kapuslanan ang inyo buluhaton. Wala kamo nagaisahanon. Ang Iya mismo nga ngalan, nga Emanuel, nagakahulugan sang “Ang Dios kaupod naton.” Matuodtuod nga kaupod Sia ninyo.
Magtikang pa gid paabante sa dalan sang kasugtanan, bisan pa nga indi ninyo makita ang unhan. Magabalik siga ang mga suga. Nagapamatuod ako sang kamatuoran sang mga pulong ni Jesus, kag puno ang mga ini sing kasanag: “Magpalapit sa akon kag magapalapit ako sa inyo; pangitaa ako sing matutum kag makita ninyo ako; magpangayo kag magabaton kamo; magpanuktok kag pagabuksan ini sa inyo.” Sa ngalan ni Jesucristo, amen.