Falala ki he ʻEikí
Ko hotau falalaʻanga paú pē ke falala ki he ʻEikí mo ʻEne ʻofa ki Heʻene fānaú.
Siʻi kāinga ʻofeina, naʻá ku maʻu kimuʻa atu ha tohi te ne fakafeʻiloaki e kaveinga ʻo ʻeku leá. Naʻe fakakaukau e taha naʻe faitohi maí ke mali mo ha tangata kuo ʻosi mālōlō hono hoá. ʻE hoko ia ko e uaifi fika uá. Naʻá ne fai mai e fehuʻi ko ʻení: ʻe lava nai ke ne nofo ʻi hono fale pē ʻoʻona mo hono fāmilí ʻi he moʻui ka hokó, pe ʻe pau ke nofo fakataha ia mo hono husepānití mo hono ʻuluaki uaifí? Naʻá ku talaange pē ke falala ki he ʻEikí.
Te u hoko atu ʻaki ha aʻusia naʻá ku fanongo ai ʻi haku kaungā-ngāue mahuʻinga, pea kuó ne fakangofua au ke u vahevahe ia. Hili e mālōlō hono uaifi mo e faʻē ʻofeina ʻo ʻene fānaú, ne toe mali ha tamai. Naʻe mālohi ʻaupito e ʻikai loto ha niʻihi ʻo e fānau lalahí ke to e malí pea nau kumi faleʻi ai ki ha kāinga ofi, ko ha taki ʻi he Siasí naʻe fakaʻapaʻapaʻi. dHili ʻene fanongo ki he ngaahi ʻuhinga ʻo ʻenau taʻelotó, ʻa ia ne nofotaha ʻi he ngaahi tuʻunga mo e fehokotaki ʻi he maama tataliʻanga ʻo e ngaahi laumālié pe ʻi he ngaahi nāunau ʻi he ʻosi ʻa e Fakamaau Fakaʻosí, naʻe pehē ange leva ʻe he takí ni: “ʻOku mou hohaʻa ki he ngaahi meʻa hala. ʻOku totonu ke mou hohaʻa pe te mou aʻu koā ki he ngaahi potu feituʻu ko iá. Tokanga taha pē ki he meʻa ko iá. Kapau te mou aʻu ki ai, ʻe fakaʻofoʻofa ange ʻa e meʻa kotoa ʻi he meʻa ʻoku mou fakakaukauloto atu ki aí.”
He toki akonaki fakanonga moʻoni ia! Falala ki he ʻEikí!
ʻI he ngaahi tohi kuó u maʻú, ʻoku ou ʻilo ai ʻoku ʻi ai mo ha niʻihi ʻoku nau palopalemaʻia ʻi ha ngaahi fehuʻi fekauʻaki mo e maama tataliʻanga ʻo e ngaahi laumālie te tau nofo ai kimuʻa pea tau toki toetuʻú. ʻOku pehē ʻe ha niʻihi ʻe kei hokohoko atu ʻi he maama tataliʻanga ʻo e ngaahi laumālié ha konga lahi ʻo e ngaahi tūkunga fakatuʻasino mo e ngaahi palopalema ʻoku tau foua ʻi he moʻui fakamatelie ko ʻení. Ko e hā ʻoku tau ʻilo pau fekauʻaki mo e tūkunga ʻi he maama tataliʻanga ʻo e ngaahi laumālié? ʻOku ou tui naʻe tonu e fakamatala ʻa ha palōfesa BYU he lēsoni fakalotú ʻo pehē: “ʻI heʻetau fehuʻi pē kiate kitautolu pe ko e hā ʻoku tau ʻilo fekauʻaki mo e maama tataliʻanga ʻo e ngaahi laumālié ʻi he ngaahi folofola ʻe fā ʻa e Siasí, ko e talí ʻoku ʻikai fuʻu lahi ʻo hangē ko ʻetau faʻa fakakaukaú.’”1
Ko e moʻoni, ʻoku tau ʻilo mei he folofolá, ka hili e mate hotau sinó ʻe hoko atu ʻo tau moʻui ko ha ngaahi laumālie ʻi he maama tataliʻanga ʻo e ngaahi laumālié. ʻOku toe akoʻi foki ʻe he folofolá ʻoku vahe ua e maama tataliʻanga ko ʻeni ʻo e ngaahi laumālié ʻiate kinautolu naʻe “angatonu” pe “failelei” he lolotonga ʻo e moʻuí mo kinautolu naʻe faiangahalá. ʻOku nau toe fakamatalaʻi foki e founga ʻoku akoʻi ai ʻe ha niʻihi ʻo e ngaahi laumālie faivelengá e ongoongoleleí kiate kinautolu naʻe faiangahala mo fakafetaú (vakai, 1 Pita 3:19; Tokāteline mo e Ngaahi Fuakava 138:19–20, 29, 32, 37). Ko e mahuʻinga tahá, ʻoku fakahaaʻi ʻe he fakahā ʻo onopōní ʻoku hoko atu e ngāue ʻo e fakamoʻuí ʻi he maama tataliʻanga ʻo e ngaahi laumālié (vakai Tokāteline mo e Ngaahi Fuakava 138:30–34, 58), pea neongo ʻoku naʻinaʻi mai ke ʻoua naʻa tau fakatoloi ʻetau fakatomalá lolotonga e moʻui fakamatelié (vakai, ʻAlamā 13:27), ka ʻoku akoʻi kitautolu ʻoku malava pē ke kei fakahoko ai ha ngaahi fakatomala ʻe niʻihi (vakai, Tokāteline mo e Ngaahi Fuakava 138:58).
ʻOku kau ʻi he ngāue ʻo e fakamoʻui ʻi he maama tataliʻanga ʻo e ngaahi laumālié hono fakatauʻatāinaʻi ʻo e ngaahi laumālié mei he meʻa ʻoku faʻa fakamatalaʻi ʻe he folofolá ko e “nofo pōpula.” Ko kinautolu kotoa ʻi he maama tataliʻanga ʻo e ngaahi laumālié ʻoku nau ʻi ha faʻahinga tuʻunga nofo pōpula. ʻOku fakamahino ʻe he fakahā maʻongoʻonga ko ia ʻa Palesiteni Siosefa F. Sāmita ʻoku ʻi he vahe 138 ʻo e Tokāteline mo e Ngaahi Fuakavá, ko e kau pekia māʻoniʻoní, naʻa nau ʻi he tuʻunga ʻo e “melinó” Tokāteline mo e Ngaahi Fuakava 138:22) ʻi heʻenau nofo ʻo ʻamanaki atu ki he Toetuʻú (vakai, Tokāteline 138:16), “[ʻnaʻa nau] lau ʻa e mavahe fuoloa ʻa honau laumālié mei honau sinó, ko ha nofo pōpula” (Tokāteline mo e Ngaahi Fuakava 138:50).
ʻOku toe tofanga foki ʻa e kau angahalá ʻi ha nofo pōpula ʻe taha. Tuʻunga ʻi he ngaahi angahala naʻe ʻikai fakatomalaʻí, ʻoku nau nofo ai ʻi ha tuʻunga naʻe ui ʻe he ʻAposetolo ko Pitá ko e “fale pōpula” fakalaumālie (1 Pita 3:19; vakai foki, Tokāteline mo e Ngaahi Fuakava 138:42). ʻOku fakamatalaʻi ʻa e ngaahi laumālié ni ko ha “kau pōpula” pe “kau haʻisia” (Tokāteline mo e Ngaahi Fuakava 138:31, 42) pe faʻahinga naʻe “kapusi ki tuʻa … ki he fakapoʻulí” ʻa ia ʻoku “ʻi ai ʻa e tangí mo e ngalá, mo e fengaiʻitaki ʻo e nifó” lolotonga ʻenau tatali ki he toetuʻú mo e fakamāú ( ʻAlamā 40:13–14).
ʻOku fakapapauʻi ʻe he Toetuʻu ʻa Sīsū Kalaisí ʻe toetuʻu e tokotaha kotoa pē ʻi he maama tataliʻanga ʻo e ngaahi laumālié (vakai, 1 Kolinitō 15:22), neongo ʻene hoko ʻi ha ngaahi taimi kehekehe ki ha ngaahi kulupu kehekehé. ʻO ka hokosia e taimi ko iá, ʻoku meimei ke fekauʻaki pē ʻa e meʻa ʻoku talamai ʻe he folofolá kau ki he maama tataliʻanga ʻo e ngaahi laumālié, mo e ngāue ʻo e fakamoʻuí. ʻOku siʻi ha meʻa kehe ʻe toe fakahā mai. ʻOku malangaʻi e ongoongoleleí ki he kau taʻeʻiló, niʻihi ʻoku ʻikai fakatomalá, pea mo e angatuʻú, ke lava ʻo fakatauʻatāinaʻi kinautolu mei honau pōpulá pea laka atu ki he ngaahi tāpuaki kuo teuteu ʻe ha Tamai Hēvani ʻofa maʻanautolú.
Ko e nofo pōpula ko ia ʻi he maama tataliʻanga ʻo e ngaahi laumālié ʻa ia ʻoku fekauʻaki mo e ngaahi laumālie angatonu kuo uluí, ko e fie maʻu ia ke nau tatali—pea mahalo naʻa fakangofua ke nau ueʻi—ke fakahoko honau ngaahi ouau fakafofongá ʻi māmani ke lava ʻo papitaiso kinautolu mo nau maʻu e ngaahi tāpuaki ʻo e Laumālie Māʻoniʻoní. (vakai, Tokāteline mo e Ngaahi Fuakava 138:30–37, 57–58).2 ʻOku fakamālohia foki kinautolu ʻe he ngaahi ouau fakafofonga ko ʻeni ʻi he matelié ke nau laka atu ʻi he mafai ʻo e lakanga fakataulaʻeikí, ʻo fakatokolahi e kau māʻoniʻoni te nau lava ʻo malanga ʻaki e ongoongoleleí ki he ngaahi laumālie ʻi he fale fakapōpulá.
Makehe mei he ngaahi meʻá ni, ʻoku siʻi ʻaupito ha meʻa ʻi heʻetau ngaahi folofolá ʻoku fekauʻaki mo e maama tataliʻanga ʻo e ngaahi laumālie ko ia hili ʻa e maté pea kimuʻa ʻi he Fakamaau Fakaʻosí.3 Ko e hā mo ha toe meʻa ʻoku tau ʻilo fekauʻaki mo e maama tataliʻanga ʻo e ngaahi laumālié? Kuo maʻu ʻe ha kau mēmipa tokolahi ʻo e Siasí ha ngaahi vīsione pe ngaahi ueʻi fakalaumālie ke fakahā kiate kinautolu ʻa e founga ngāue pe fokotuʻutuʻu ʻi he maama tataliʻanga ʻo e ngaahi laumālié, ka ʻoku ʻikai totonu ke mahino pe akoʻi e ngaahi aʻusia fakalaumālie fakataautaha ko ʻení ko ha tokāteline totonu ʻo e Siasí. Ko e moʻoni foki, ʻoku hulu fau ha ngaahi fakamahamahalo ʻa ha kāingalotu mo ha niʻihi kehe ʻi he ngaahi maʻuʻanga tokoni kuo pulusí hangē ko e ʻū tohi ki he ngaahi aʻusia he ofi ke maté.4
Ko hono fakalukufuá, ʻoku mahuʻinga ke tau manatuʻi e ngaahi fakatokanga fakapotopoto ʻa ʻEletā D. Toti Kulisitofasoni mo ʻEletā Niila L. ʻEnitasoni ʻi he ngaahi malanga konifelenisi lahi kimuʻá. Naʻe akoʻi ʻe ʻEletā Kulisitofasoni ʻo pehē: “ʻOku totonu ke manatuʻi ʻoku ʻikai ko ha tokāteline ʻa e lea kotoa pē ʻoku fai ʻe ha taki ʻo e Siasí, neongo pe naʻe ʻi he kuohilí pe lolotongá ni. ʻOku angamaheni ʻaki ʻi he Siasí ʻa e mahino, ka fakahoko ʻe ha taki ha lea ʻi ha meʻa ʻoku hoko, ʻokú ne faʻa fakafofongaʻi ʻe ia ha fakakaukau fakafoʻituitui naʻe fakakaukauʻi fakalelei, ka ʻoku ʻikai ʻuhinga ia ko ha meʻa pau pe ʻe haʻisia kotoa ki ai ʻa e Siasí.”5
Naʻe akoʻi ʻe ʻEletā ʻEnitasoni ʻi he konifelenisi hono hokó, ʻa e tefitoʻi moʻoni ko ʻení: “ʻOku akoʻi ʻa e tokāteliné ʻe he kau mēmipa ʻe toko 15 ʻo e Kau Palesitenisī ʻUluakí mo e Kōlomu ʻo e Toko Hongofulu Mā Uá. ʻOku ʻikai fufū ia ʻi ha palakalafi fakapulipuli ʻo ha lea pē ʻe taha.”6 Ko e fanongonongo ʻo e fāmilí, ʻa ia naʻe fakamoʻoni hingoa ai kotoa ʻa e kau palōfita, kau tangata kikite, mo e kau tangata maʻu fakahā ʻe toko 15, ko ha fakatātā lelei ia ʻo e tefitoʻi moʻoni ko iá.
Makehe mei ha faʻahinga meʻa mahino hangē ko e fanongonongo ʻo e fāmilí, ʻoku hoko foki e ngaahi akonaki fakapalōfita ʻa e Kau Palesiteni ʻo e Siasí, ʻa ia kuo poupouʻi ʻe he kau palōfita mo e kau ʻaposetolo kehé, ko ha sīpinga ia ʻo e meʻá ni. Naʻe fai ʻe he Palōfita ko Siosefa Sāmitá ha ongo akonaki, ofi ki he ʻosi ʻo ʻene ngāué, fekauʻaki mo e ngaahi tūkunga ʻi he maama tataliʻanga ʻo e ngaahi laumālié, kuo toutou akoʻi ʻe kinautolu kuo nau fetongi iá. Ko e taha ai ʻa ʻene akonaki ʻi he malanga ʻa e Tuʻi ko Fōletí (King Follett), ʻe fakataha e kau mēmipa ʻo e fāmilí naʻe angatonú ʻi he maama tataliʻanga ʻo e ngaahi laumālié.7 Ko e tahá ko e fakamatala ko ʻení ʻi ha meʻa fakaʻeiki ʻi he taʻu fakaʻosi ʻo ʻene moʻuí: “Ko e laumālie ʻo e angatonú ʻoku hākeakiʻi ia ki ha ngāue maʻongoʻonga mo nāunauʻia ange … [ʻi] he maama tataliʻanga ʻo e ngaahi laumālié. … ʻOku ʻikai ke nau mamaʻo meiate kitautolu, pea ʻoku nau ʻilo mo mahino kiate kinautolu ʻetau fakakaukaú, ngaahi ongó, mo e ngāué, pea ʻoku nau faʻa loto mamahi ai.”8
Kae, fēfē leva ha fehuʻi hangē ko ia ne u fai kimuʻa fekauʻaki mo e feituʻu ʻoku nofo ai e ngaahi laumālié? Kapau ʻoku ngali faikehe pe taʻeʻaonga ʻa e fehuʻi ko iá kiate koe, fakakaukau ki ha niʻihi ʻo hoʻo ngaahi fehuʻi pē ʻaʻaú, pea naʻa mo ia kuó ke ʻahiʻahi ke tali fakatatau mo e ngaahi meʻa kuó ke fanongo ai mei ha taha kehe ʻi he kuohilí. ʻOku ou fokotuʻu atu ha tali ʻe ua ki he ngaahi fehuʻi kotoa pē fekauʻaki mo e maama tataliʻanga ʻo e ngaahi laumālié. ʻUluakí, manatuʻi ʻoku ʻofa ʻa e ʻOtuá ʻi Heʻene fānaú pea te Ne fai e meʻa ʻoku lelei tahá maʻatautolu takitaha. Uá, manatuʻi e akonaki faka-Tohi Tapu angamaheni ko ʻení, ʻa ia kuo tokoni lahi taha kiate au ʻi ha ngaahi fehuʻi lahi teʻeki talí:
“Falala ki he ʻEikí ʻaki ho lotó kotoa; pea ʻoua naʻá ke faʻaki ki ho poto ʻoʻoú.
“Ke ke fakaongoongo kiate ia ʻi ho hala kotoa pē, pea ʻe fakatonutonu ʻe ia ʻa ho ngaahi ʻalungá” (Lea Fakatātā 3:5–6).
Naʻe fakaʻosi ʻaki foki ʻe Nīfai ʻene tohi maʻongoʻongá e ngaahi lea ko ʻení: “ʻE ʻEiki, kuó u falala kiate koe, pea te u falala kiate koe ʻo taʻengata. ʻE ʻikai te u falala ki he nima ʻo e kakanó” (2 Nīfai 4:34).
Te tau lava kotoa ʻo fifili fakafoʻituitui ki he ngaahi tūkunga ʻi he maama tataliʻanga ʻo e ngaahi laumālié pe aleaʻi ʻeni pe ko ha ngaahi fehuʻi kehe ʻoku ʻikai tali ʻi he fāmilí pe ʻi ha ngaahi toe feituʻu fūfūnaki. Kae ʻoua muʻa naʻa tau akoʻi pe fakaʻaongaʻi ko ha tokāteline ʻa e meʻa ʻoku ʻikai ke ne aʻusia e tuʻunga ʻo e tokāteline totonú. He ʻikai ke paotoloaki e ngāue ʻa e ʻEikí ʻi heʻetau fai iá pea mahalo te ne fakalotosiʻi ha niʻihi fakafoʻituitui mei heʻenau fekumi ki ha tuʻunga fakafiemālie pe fakamaama ʻo fou ʻi he fakahā fakafoʻituitui ʻoku ʻomi ʻe he palani ʻa e ʻEikí maʻatautolu takitahá. ʻE lava foki ke tohoakiʻi kitautolu ʻe he tōtuʻa ko ia ʻo ʻetau fakafalala ki he ngaahi akonaki pe fakamahamahalo fakafoʻituituí, mei heʻetau tokanga taha ki he ako mo e ngaahi ngāue ko ia te ne fakalahi ʻetau mahinó mo tokoniʻi kitautolu ke tau laka atu ʻi he hala ʻo e fuakavá.
Ko e falala ki he ʻEikí ko ha akonaki angamaheni mo moʻoni ia ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e akonaki ia ʻa Siosefa Sāmita ʻi he taimi naʻe foua ai ʻe he kau fuofua Kāingalotú e ngaahi fakatanga mamahi mo ngali taʻemalavá.9 ʻOku kei hoko pē ia ko e tefitoʻi moʻoni lelei taha te tau lava ʻo fakaʻaongaʻi ʻi he taimi ʻoku hoko ai ha ngaahi palopalema ʻi heʻetau feinga ke ako pe feinga ke maʻu ha fakanonga ʻi he ngaahi meʻa ʻoku teʻeki ai fakahā pe teʻeki tali ko ha tokāteline totonu ʻo e Siasí.
Ko e tefitoʻi moʻoni tatau pē ʻoku ʻai ki he ngaahi fehuʻi ʻoku teʻeki tali fekauʻaki mo e ngaahi silá ʻi he moʻui kahaʻú pe ko ha ngaahi liliu ʻoku fie maʻu koeʻuhí ko ha ngaahi meʻa ne hoko pe ngaahi maumau fono ʻi he moʻui fakamatelié. ʻOku lahi fau e meʻa ʻoku ʻikai ke tau ʻiló, pea ko hotau falalaʻanga paú pē ke falala ki he ʻEikí mo ʻEne ʻofa ki Heʻene fānaú.
Fakaʻosí, ko e meʻa pē ʻoku tau ʻilo fekauʻaki mo e maama tataliʻanga ʻo e ngaahi laumālié, ko e hokohoko atu ai e ngāue ʻo e fakamoʻuí, ʻa e Tamaí mo e ʻAló. Naʻe kamata ʻe he Fakamoʻuí e ngāue ki hono fakahoko ʻa e tauʻatāiná ki he pōpulá (vakai, 1 Pita 3:18–19; 4:6; Tokāteline mo e Ngaahi Fuakava 138:6–11, 18–21, 28–37), pea ʻoku hokohoko atu e ngāue ko iá ʻi hono malangaʻi ʻe he kau talafekau moʻui taau mo feʻungá e ongoongoleleí, ʻo kau ai ʻa e fakatomalá, kiate kinautolu ʻoku nau kei fie maʻu hono ola faifakamaʻá (vakai, Tokāteline mo e Ngaahi Fuakava 138:57). Ko e taumuʻa ʻo e ngaahi meʻá ni kotoa ʻoku fakamatalaʻi ia ʻi he tokāteline totonu ʻo e Siasí, ʻa ia kuo ʻomi ʻi he fakahā ʻo onopōní.
“Ko e kau pekia ko ia ʻoku fakatomalá ʻe huhuʻi ʻa kinautolu, ʻo kapau te nau talangofua ki he ngaahi ouau ʻo e fale ʻo e ʻOtuá,
“ʻPea ʻo ka hili ʻa ʻenau totongi ʻa e tautea ʻo ʻenau ngaahi maumau-fonó, pea fufulu ʻa kinautolu ʻo nau maʻá, te nau toki maʻu ha totongi ʻo fakatatau ki heʻenau ngaahi ngāué, he ko e kau ʻea-hoko kinautolu ki he fakamoʻuí” (Tokāteline mo e Ngaahi Fuakava 138:58–59).
Ko hotau fatongiá fakataautaha ke akoʻi e tokāteline ʻo e ongoongolelei kuo fakafoki maí, tauhi e ngaahi fekaú, ʻofa mo fetokoniʻaki, mo fakahoko e ngāue ʻo e fakamoʻuí ʻi he ngaahi temipale māʻoniʻoní.
ʻOku ou fakamoʻoni ki he moʻoni ʻo e meʻa kuó u lea ʻakí pea mo e moʻoni ʻo e ngaahi moʻoni kuo akoʻi mo tau ʻamanaki atu ʻe akoʻi ʻi he konifelenisi ko ʻení. ʻOku malava kotoa ʻeni tuʻunga ʻi he Fakalelei ʻa Sīsū Kalaisí. Hangē ko ia ʻoku tau ʻilo mei he fakahā ʻo onopōní, ʻokú Ne “fakaongoongoleleiʻi ʻa e Tamaí, mo fakamoʻui ʻa e ngaahi meʻa kotoa pē kuo ngaohi ʻe hono nimá” (Tokāteline mo e Ngaahi Fuakava 76:43; tānaki atu hono fakamamafaʻí). ʻI he huafa ʻo Sīsū Kalaisí, ʻēmeni.