Ko Hono Tuku ki Hotau Laumālié ke Ne Puleʻi Hotau Sinó
Ko e taha ʻo e ngaahi meʻa mahuʻinga taha ʻe lava ke tau ako ʻi he moʻui ní ko e founga ke fakamamafaʻi hotau natula fakalaumālie taʻengatá pea mapuleʻi ʻetau ngaahi holi koví.
Siʻoku kāinga ʻofeina, ʻi he ofi ki he konifelenisi lahi ʻo ʻOkatopa ʻo e taʻu kuo ʻosí, naʻá ku teuteu ʻeku leá ke fakamamafaʻi ʻa e taʻu ʻe 100 ʻo e mata meʻa-hā-mai ki he maama fakalaumālié naʻe foaki kia Palesiteni Siosefa F. Sāmita ʻi he ʻaho 3 ʻo ʻOkatopa 1918.
Hili ha ngaahi ʻaho mei heʻeku ʻave ʻeku leá ke liliu leá, naʻe ngata e moʻui fakamatelie ʻa hoku hoa ʻofaʻanga taʻengata ko Papulaá ka ne hiki atu ki he maama tataliʻanga ʻo e ngaahi laumālié.
ʻI he fakalau ʻa e ngaahi ʻahó ʻo hoko ko e uiké, pea ki he māhiná, pea kuo lava ʻeni ha taʻu ʻe taha ʻo e mālōlō ʻa Papulaá, kuó u houngaʻia lahi ange ʻi he potufolofola ko ʻení: “Ke mou nofo fakataha ʻi he ʻofa, ʻo aʻu ki hoʻomou tangi koeʻuhi ko e mole ʻa kinautolu ʻoku maté.”1 Ne mohu tāpuekina au mo Papulā ke ma “nofo fakataha ʻi he ʻofa” ʻi ha taʻu ʻe 67. Ka kuó u ako ʻi ha founga moʻoni ʻaupito ʻa e ʻuhinga ke “tangi koeʻuhí ko e mole” ʻa kinautolu ʻoku tau ʻofa aí. ʻOku ou ʻofa lahi ʻaupito kiate ia!
Mahalo ko ha tokolahi ʻiate kitautolu ʻoku ʻikai ke tau houngaʻia ʻi he meʻa ʻoku fai ʻe he niʻihi kehé maʻatautolú kae ʻoua kuo nau puli atu. Naʻá ku ʻiloʻi ne femoʻuekina maʻu pē ʻa Papulā, ka naʻe ʻikai mahino kakato kiate au ʻa e ngaahi fiemaʻu ʻa e fāmilí, Siasí, mo e tukui koló ʻa hono taimí. Ne lahi e ngaahi ngāue makehe ne tā tuʻo lahi hono fakahoko ʻi he ngaahi taʻu kuo hilí ʻa ia naʻá ne tauhi homau fāmilí ke maʻumaʻuluta. Pea ʻi he meʻa kotoa ko iá, ne teʻeki ai pē ke fanongo ha taha ʻi homau fāmilí ki haʻane tafulu pe lea taʻeʻofa.
Kuo lahi fau e ngaahi manatu melie kuó u fakakaukau ki ai ʻi he taʻu ko ʻeni kuo ʻosí. Kuó u fakakaukau ki he fili faingataʻa fakatuʻasino ko ia naʻá ne fai ke hoko ko ha faʻē ki ha fānau ʻe toko fitú. Ko e ngāue maʻuʻanga moʻui pē naʻá ne fie maʻú ke ne hoko ko ha tauhiʻapi, pea naʻá ne taukei ʻaupito ai ʻi he tapa kotoa pē.
Naʻá ku faʻa fifili pe naʻe anga fēfē ʻene kei lava ʻo tokangaʻi au mo ʻema fānaú. Ko ha ngāue mafatukituki moʻoni e feimeʻatokoní ʻataʻatā peé, kae hiliō aí ʻa hono fai e ngaahi ʻekitivitī hangē ko hono fai e fō ne fokotuʻuna ʻo homau fāmilí he uike kotoa pē mo hono tokangaʻi ke feʻunga lelei e sū mo e vala ʻo e fānaú. Ne mau kumi tokoni kotoa pē meiate ia ʻi he ngaahi palopalema kehekehe ne mahuʻinga kiate kimautolú. Pea koeʻuhí ne mahuʻinga ia kiate kimautolu, ne mahuʻinga foki ia kiate ia. Ko ha tokotaha ia naʻe fisifisimuʻa—ʻi hono fatongia ko ha uaifi, faʻē, kaungāmeʻa, kaungāʻapi, mo ha ʻofefine ʻo e ʻOtuá.
Ka ko ʻeni kuó ne hiki atu, ʻoku ou fiefia naʻá ku fili ke u tangutu ʻi hono tafaʻakí ʻi he taimi ne u foki ai ki ʻapi mei ʻofisí lolotonga e ngaahi māhina fakaʻosi ʻo ʻene moʻuí, ke puke hono nimá ʻi heʻema toutou siofi e fakaʻosinga ʻo e ngaahi faiva hiva naʻá ne manako taha aí—naʻá ne toutou sio ai he naʻá ne Loto Ngalongalo ʻo ʻikai ke ne manatuʻi naʻá ne toki sio pē ai ʻi he efiafi kimuʻá. ʻOku fuʻu mahuʻinga fau kiate au he taimí ni ʻa e ngaahi manatu melie ki he ngaahi taimi piki-nima makehe ko iá.
ʻE kāinga, ʻoua muʻa naʻa mou tukuange ha faingamālie ke mou vakai ai ki he kau mēmipa ho fāmilí ʻi he ʻofá. ʻE fānau mo e ngaahi mātuʻa, mou fetokoniʻaki mo fakahaaʻi homou ʻofá mo e houngaʻiá. Mahalo ʻe ʻi ai hamou niʻihi ʻe hangē ko aú, ʻo toki hahaka hake kuo mole atu ʻa e faingamālie ki he fetuʻutaki mahuʻinga peheé. Nofo fakataha he ʻaho kotoa pē mo ha loto ʻoku fonu ʻi he houngaʻia, manatu melie, ngāue tokoni, mo e ʻofa lahi.
Lolotonga e taʻu ko ʻeni kuo mahili atú, kuó u fakalaulaulotoa fakamātoato ange ʻi ha toe taimi kimuʻa ki he palani ʻa ʻetau Tamai Hēvaní. ʻI hono akoʻi ʻe ʻAlamā hono foha ko Kolianitoní, naʻá ne ui ia ko e “palani lahi ʻo e fiefiá.”2
Ko e foʻi lea ʻoku haʻu ki hoku ʻatamaí ʻi he taimi ʻoku ou fakakaukau ai ki he palaní ko e “toe fakataha.” Ko ha palani ia naʻe faʻu heʻetau Tamai Hēvani ʻofá, ʻoku ʻi hono ʻelitó ʻa e faingamālie fakaʻeiʻeiki mo nāunauʻia ʻo e toe fakataha fakafāmilí—ʻa e toe fakataha taʻengata ʻa e ngaahi husepānití mo e uaifí, mātuʻá mo e fānaú, mei he toʻu tangata ki he toʻu tangata ʻi he fale ʻo e ʻOtuá.
ʻOku ʻomi ʻe he fakakaukau ko iá ha fakafiemālie mo ha fakapapau te u toe fakataha pē mo Papulā. Neongo naʻá ne mamahi fakatuʻasino ʻi he fakaʻosinga ʻo ʻene moʻuí, ka naʻe mālohi, fakaʻeiʻeiki, mo haohaoa ʻa hono laumālié. Naʻá ne mateuteu ʻi he meʻa kotoa pē koeʻuhí ka hokosia ʻa e taimí, te ne lava ʻo tuʻu ʻi he ʻao ʻo e “fakamaau lelei ʻo e ʻOtuá,”3 ʻokú ne fonu ʻi he loto-falala mo e fakapapau fakanonga. Ka ko ʻeni, te u taʻu 91 ʻi he ʻaho ʻe ua ka hokó, mo ʻeku kei fifili pe, “ʻOku ou mateuteu nai? ʻOku ou fai nai ʻa e meʻa kotoa pē ʻoku fie maʻu ke u faí ke u lava ai ʻo toe puke hono nimá?”
Ko e tefitoʻi fakapapau faingofua taha ʻeni ʻo e moʻuí: Kuo pau ke tau mate kotoa. Tatau ai pē pe te tau mate toulekeleka pe kei talavou, faingofua pe faingataʻa, koloaʻia pe masiva, ʻofaʻi pe tuenoa, ʻoku ʻikai ha taha ʻe hao mei he maté.
ʻI he ngaahi taʻu kuo mahili atú, naʻe lea ʻaki ʻe Palesiteni Kōtoni B. Hingikelī ha meʻa ʻoku ʻuhingamālie kau ki he meʻá ni: “Hono ʻikai fakafiefia ʻene mahinó, fakafiemālie ʻa e nonga ʻoku maʻu mei he ʻilo kapau te tau mali totonu mo moʻui totonu, ʻe hoko atu ʻetau feohí, neongo e pau ke hoko ʻa e maté pea mo e lōloa ʻo e māvaé.”4
Ko e moʻoni naʻe tonu ʻeku malí. ʻOku ʻikai ha toe veiveiua ia ai. Ka ʻoku ʻikai feʻunga ia, fakatatau ki he lea ʻa Palesiteni Hingikelií. Kuo pau foki ke u moʻui totonu.5
ʻI he ʻaho ní, ʻe lava ke hoko ʻa e “moʻui totonú” ko ha fakakaukau fakafihi ia, tautautefito kapau ʻokú ke fakamoleki ha taimi lahi ʻi he mītia fakasōsialé, ʻa ia ʻe lava pē ʻe ha taha ʻo talaki ha ngaahi moʻoni totonu pe fakakaukau hala fekauʻaki mo e ʻOtuá pea mo ʻEne palani ki Heʻene fānaú. Ko e meʻa mālié, ʻoku maʻu ʻe he kāingalotu ʻo e Siasí ha ngaahi tefitoʻi moʻoni taʻengata ʻoku moʻoni ʻa e ongoongoleleí ke tau ʻiloʻi ai ʻa e founga ke moʻuí koeʻuhí ke tau mateuteu lelei ange ʻi he taimi kuo pau ke tau mate aí.
ʻI ha ngaahi māhina siʻi kimuʻa pea fanauʻi aú, naʻe fai ʻe heʻeku kuitangata ko ʻAposetolo ʻEletā Melivini J. Pālatí ha lea ne fakamatalaʻi ai ʻa e natula totonu ʻo e moʻui angatonú. Ko e taumuʻa ʻo ʻene leá “Ko e Fefaʻuhi ʻa e Laumālié [The Struggle for the Soul],” naʻe nofotaha ʻene leá ʻi he fetauʻaki taʻemamotu ʻa hotau sino fakamatelié mo hotau laumālie taʻengatá.
Naʻá ne pehē, “Ko e fakakikihi lahi taha ʻe aʻusia ʻe ha tangata pe fefine … ko e tau ʻokú ne fakahoko pē mo iá,” ʻo ne fakamatalaʻi ʻoku ʻohofi kitautolu ʻe Sētane, “ko e fili hotau laumālié,” ʻo fakafou ʻi he “ngaahi holi koví, uʻá, ngaahi fakaʻamu ʻo e kakanó.”6 Ko ia ko e fetauʻakí ʻoku hoko ia ʻi he vahaʻa hotau natula fakalangi mo fakalaumālié pea mo e tangata fakakakanó. Kāinga, manatuʻi, te tau lava ke maʻu ʻa e tokoni fakalaumālié ʻo fakafou ʻi he tākiekina ʻa e Laumālie Māʻoniʻoní ʻa ia te ne “akoʻi ʻa kimoutolu ʻi he meʻa kotoa pē.”7 ʻE malava foki ke maʻu ʻa e tokoní ʻo fakafou ʻi he mālohi mo e ngaahi tāpuaki ʻo e lakanga fakataulaʻeikí.
Te u fehuʻi atu leva, ʻoku fēfē nai ʻa e tau ko ʻeni ʻoku mou takitaha fakahokó?
Naʻe pehē ʻe Palesiteni Tēvita O. Makei, “Ko e moʻui ʻa e tangatá he māmaní ko ha sivi pe ʻe tuku taha ʻene ngāué, hono ʻatamaí, mo ʻene moʻuí ki he ngaahi meʻa ʻoku tokoni ki hono fakatōliʻaʻi mo fakahōhōlotoʻi ʻa hono anga fakaekakanó, pe ʻe tulifua ʻa e [taumuʻa] ʻo ʻene moʻuí ke maʻu ʻa e ngaahi ʻulungaanga fakalaumālié.”8
ʻOku ʻikai ko ha meʻa foʻou ʻa e tau ko ʻeni ʻi he vahaʻa hotau natula fakakakanó mo e fakalaumālié. ʻI he malanga fakaʻosi ʻa e Tuʻi ko Penisimaní ki hono kakaí, naʻá ne akoʻi “ko e tangata fakakakanó ko e fili ia ki he ʻOtuá, pea kuo pehē ai pē ia talu mei he hinga ʻa ʻĀtamá, pea ʻe pehē ai pē, ʻo taʻengata pea taʻengata, kae ʻoua kuó ne talangofua ki he ngaahi fakahinohino ʻa e Laumālie Māʻoniʻoní, pea liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí.”9
Naʻe akoʻi ʻe he ʻAposetolo ko Paulá ʻo pehē “ko kinautolu ʻoku ʻo e kakanó, ʻoku nau tokanga ki he ngaahi meʻa ʻo e kakanó; ka ko kinautolu ʻoku ʻo e Laumālié, ki he ngaahi meʻa ʻo e Laumālié.
“He ko e loto fakakakanó, ko e mate ia; ka ko e loto fakalaumālié, ko e moʻui ia mo e melino.”10
ʻOku hā mahino mai kiate au ko e taha ʻo e ngaahi meʻa mahuʻinga taha te tau lava ke ako ʻi he moʻui ní ko e founga ke fakamamafaʻi ai hotau natula fakalaumālie taʻengatá pea mapuleʻi ʻetau ngaahi holi koví. ʻOku ʻikai totonu ke faingataʻa ʻeni. Hili ko iá, ko hotau laumālié, ʻa ia naʻe fuoloa ange ʻene moʻuí ʻi hotau sino fakamatelié, naʻe ʻosi lavameʻa ia ʻi hono fili ʻa e anga māʻoniʻoní kae ʻikai ko e koví ʻi he maama fakalaumālié. Kimuʻa pea faʻu e māmaní, naʻa tau nofo ʻi he maama fakalaumālié ko e ngaahi foha mo e ngaahi ʻofefine ʻo ʻetau Ongomātuʻa Fakalangí, ʻa ia naʻá na ʻofa ʻiate kitautolu pea ʻokú na kei ʻofa pē ʻiate kitautolu he taimí ni.
Pea ko e moʻoni, naʻe pau ke tau fai ha ngaahi fili liliu-moʻui ʻi he maama fakalaumālie ko iá. Ko e tokotaha kotoa pē kuo moʻui pe ʻe moʻui ʻi he māmani ko ʻení, naʻá ne fai ha fili mahuʻinga ke tali ʻa e palani ʻa e Tamai Hēvaní ki hotau fakamoʻuí. Ne tau omi kotoa leva ki he māmaní mo ha lekooti ne fakamoʻoniʻi ai ha natula lavameʻa fakalaumālie mo e ikuʻanga taʻengata.
Kiʻi fakakaukau angé ki aí. Ko hota tuʻunga totonú ʻeni pea mo e tuʻunga kuó ke maʻu maʻu peé: ko ha foha pe ʻofefine ʻo e ʻOtuá, ʻokú ke maʻu ha fakavaʻe fakalaumālie ʻi he taʻengatá pea mo ha kahaʻu ʻoku fonu mahuohua ʻi he ngaahi faingamālie taʻefaʻalauá. ʻOkú ke—ʻuluaki hoko, pea mahuʻinga tahá ko hoʻo hoko maʻu ai pē—ko ha tokotaha fakalaumālie. Pea ko e taimi ʻoku tau fili ai ke fakamuʻomuʻa hotau natula fakakakanó ʻi hotau natula fakalaumālié, ʻoku tau fili leva ha meʻa ʻoku fehangahangai mo hotau tuʻunga totonu, moʻoni, falalaʻanga mo fakalaumālié.
Ka, ʻoku ʻikai toe loi ʻa hono fakafaingataʻaʻiaʻi ʻe he ngaahi holi fakakakano mo fakamāmaní ʻa ʻetau faituʻutuʻuní. Koeʻuhí ko e veili ʻokú ne fakangaloʻi ʻa e maama fakalaumālié mei he māmani fakamatelié, ʻe lava ke ngalo ʻi ha taha ʻa hotau vā fetuʻutaki ki he ʻOtuá mo hotau natula fakalaumālié, pea ʻe lava ke fakamuʻomuʻa ʻe hotau natula fakakakanó ʻa e meʻa ʻoku tau fie maʻu he taimi ní. Ko e ako ko ia ke fili ʻa e ngaahi meʻa ʻo e Laumālié ke muʻomuʻa ʻi he ngaahi meʻa ʻo e kakanó ko e taha ia ʻo e ngaahi ʻuhinga lalahi ʻoku fakakau ai ʻa e moʻui fakamatelie ko ʻení ʻi he palani ʻa e Tamai Hēvaní. Ko e ʻuhinga foki ia ʻoku langa ai ʻa e palaní ʻi he fakavaʻe fefeka mo pau ʻo e Fakalelei ʻa e ʻEiki mo e Fakamoʻui ko Sīsū Kalaisí, koeʻuhí ke lava ʻo ikunaʻi ʻetau ngaahi angahalá, ʻo kau ai e ngaahi fehalaaki ʻoku tau fai ʻi he taimi ʻoku tau fakavaivai ai ki he kakanó, ʻo fakafou ʻi he fakatomala maʻu peé pea lava ai ke tau moʻui ʻo tokanga taha ki he ngaahi meʻa fakalaumālié. Ko e taimi ʻeni ke tau puleʻi ai hotau uʻa fakakakanó ke fenāpasi mo e tokāteline fakalaumālie ʻo Kalaisí. Ko hono ʻuhinga ia kuo pau ke ʻoua naʻa tau fakatoloi ai e ʻaho ʻo ʻetau fakatomalá.11
ʻOku hoko leva ʻa e fakatomalá ko ha meʻatau mahuʻinga ʻi heʻetau fetauʻaki pē mo kitautolú. ʻI he konifelenisi lahi fakamuimuí, naʻe lave ai ʻa Palesiteni Lāsolo M. Nalesoni ki he tau ko ʻení peá ne fakamanatu mai “ko e taimi ʻoku tau fili ai ke fakatomalá, ʻoku tau fili ke liliu! ʻOku tau fakaʻatā ke liliu kitautolu ʻe he Fakamoʻuí ki hotau tuʻunga lelei tahá. ʻOku tau fili ke tupulaki fakalaumālie mo fiefia—ʻa e fiefia ʻo e huhuʻi ʻiate Iá. Ko e taimi ʻoku tau fili ai ke fakatomalá, ʻoku tau fili ke tatau ange mo Sīsū Kalaisi!”12
ʻI heʻeku toe vakaiʻi hoku ʻahó ʻi he lotu ʻi he pō kotoa pē mo ʻeku Tamai ʻi Hēvaní, ʻoku ou kole ke fakamolemoleʻi au ʻo kapau naʻá ku fai ha meʻa hala peá u palōmesi te u feinga ke toe lelei ange ʻapongipongi. ʻOku ou tui ʻoku tokoni ʻa e fakatomala fakaʻaho ko ʻení ke fakamanatu ai ʻe hoku laumālié ki hoku sinó ʻa e tokotaha ʻokú ne puleʻi aú.
Ko e maʻuʻanga tokoni ʻe taha ʻa e faingamālie fakauike ʻoku tau maʻu ke toe fakafoʻou fakalaumālie kitautolú ʻaki ʻetau maʻu ʻa e sākalamēnití ko ha fakamanatu ki he Fakalelei mo e ʻofa haohaoa ʻa hotau ʻEiki mo e Fakamoʻui ko Sīsū Kalaisí ʻiate kitautolú.
ʻE kāinga, ʻoku ou tapou atu ke mou kiʻi nofo hifo ʻo fakakaukau ki he tuʻunga ʻoku mou ʻi aí ʻi hono ikunaʻi homou natula fakakakanó mo hono fakamālohia homou natula fakalangi mo fakalaumālié koeʻuhí ka hokosia e taimí, te mou lava ʻo hiki atu ki he maama fakalaumālié ke toe fakataha fiefia mo homou ngaahi ʻofaʻangá—ko ʻeku fakamoʻoní ia mo ʻeku lotu ʻi he loto fakatōkilalo ʻi he huafa toputapu ʻo e ʻEiki ko Sīsū Kalaisí, ʻēmeni.