Klisiich el mo Mesisiich er a Cherarou

Mla er a Elder Peter M. Johnson

Er a Chelechad er a Rokeuid

Ke de mekerang e metik er tial budech, e melbedebek el kmo ke de techang, e mo mesiiich er a ikel kldei el D er a cherarou?

Rodam me a rodos, ko mesulang el kirel a rokui el kau a meruul, e olngeseu er a rebebil, e meral mesiungel a Jesus Kristo e oldeu a klengeltengat er a chedaol templo. Ko mesulang er a blak el reng er kemiu. Kom kmal ungil; kau a klebokel.

Nglunguchek me ke de mo ometab aikel odbechel a Chedaol Reng sel kid a mui el medengei el uase kid a ngelekel a Dios. A “Telungalek: Chais el mora Beluulechad” a kmo: “A rokui el chad—sechal me a redil—a ulebeob el uaia Dios. A derstang er tir a mekreos el ngalek er a reng el sechal me a redil el ngelekel a chedam me a chedil er a babeluades, me a, leuaisei, e a derstang er tir a sebecherir el mo ngmai a chedaol teletelir ma blekerdelir.”¹ Kid a “ngellitel el reng el mle kldmokl el medechel e mei er chelechal cherrengelel a taem elmo omuchel er a dodai er a klou el ureor er a uriul-klebesei.”² A President Russell M. Nelson a milekoi: “Kemiu a mlosisechakl er a belurir a rdeleb e milngedmokl er kemiu el kirel a ngiidil ngerang me a rokui el tekoi el bo chelbangel er chelechal uriul-klebesei (mesa D&C 138:56). Tial osisechakl a melemolem lobengkemiu!”³

Kemiu a ngellitel el sechal me a redil ngelekel a Dios. Kau a oba klisiich el mo lomelemii e a cherarou. Tial cherarou, eng di, a medengeii el kmo kau ketechang. Ng medengelii chedaol dikesiu e osiik el mo mengkekerei er a ultekelliu er a beluulechad me a babeluades lousbech a keldei el D:

• Mengeblad

• Mengesang

• Mengedeng

Mengeblad

A cherarou a ulusbech a donguu er a mengetikaik er aikel temel a Moses. A Rubak a dlilung el mo er a Moses:

“Momes, ngkang a ngelkel. …

Ngar ngii a ureor el kirem, … e kau a di uaia ngkel Ditang el Ngelekek.⁴

Uriul er tial chedaol ues, e a Diablong a milngblad er a Moses. A tekoi lousbech er ngii a mengasireng: “Moses, el ngelekel a chad, mongull er ngak.”⁵ A cheleblad a dimlak di longetikaik el mo mengull er a Diablong ng dirrek a cheleblad a lulebang el mesaod er a Moses el uase ngelekel a chad. Molatk, a Rubak a dirk uluchais er a Moses el kmo ngii a ngelkel a Dios, el ulemeob er di chimong el chad.

A cherarou a mle blak a rengul melasm el mengeblad er a Moses, eng di a Moses a mle odngeklii, el millekoi, Bom cheroid er ngak, e Diablong, leng di tal Dios a kungull er ngii, el Dios er a klebkall.⁶ A Moses a mlo medengei el uase ng techang—ng ngelekel a Dios.

A tekingel a Rubak el mora Moses a dirrek el tekingel mo er kau me a ngak. Kid a mle obeob el uaia Dios, e Ngii a ngarngii a ureor bodoruul. A cherarou a melasm el mengeblad er kid me dobes el uase kid ng kmal techang. Alsekum eng diak dodengei el uase kid ng kmal techang, eng meringel a dotebengar sel kired el mor ngii.

Mengesang

A cherarou a melasm el mengesang er kid el mo cheroid er a Kristo me a Rolel er a telbiil. A Elder Ronald A. Rasband a mle ouchais el kmo: “A teletelel a cherarou a mengeuid er kid er a chedaol sioning, e sel kuk soal a Dios a omekellomes er kid el mo meruul a Urerel.”⁷

Chelechal taem, eng kmal betok a mengesang er kid, luldimukl a Twitter, Facebook, me a klekoul, me a lmuut el bebil. Aikal klekedall a kma mengasireng, eng di alsekum eng diak dekerekikl, eng sebechel mo mengesang er a ikel chedaol ngercheled. A dungil lousbech eng sebechel meskid a klisiich er a babeluades e kid a mo sioning ongasireng sel dosiik el mengideb er a Israel er a ikal erul beluulechad.

Bo dekerekikl e lak el beot a rengud er a usbechellel a technology.⁸ Dolemlem losiik a teletael el technology a ngoikid el mo kmeed er a Osobel e ngosukid el kudmkelii a Urerel sel dongedmokl el kirel Ongerul Lemei.

Mengedeng

A ulebongel, a cherarou a soal a bol mechedeng a rengud. Ng sebechel mo mechedeng a rengud sel sekum e kid omekesiu er kid el mora rebebil a lechub e kid omelchesiu el diak doruul uai tir, luldimukl aikel ngercheled.

Sera kumuchel er a omesubech er a keltoktang, ak mlo omelchesiu el mechedeng a renguk. Tial prokuram a di kilngei er a teua le ngalek er tiaikid el rak, e a bebil er a rengalk a mle mellomes a rengrir. Ng mle ngarbab a teng er tir er a test me a duch er tir er a ureor er tial techall er a ureor, e mla ngarbab a duch er tir. Uriul er a erul sandei el kngar tial brokuram, eng mlo rrau a renguk e oumededenger el kmal mlo imis el meringel er ngak.

Ak mlo omdasou el uase alsekum eng soak el rokir tial eual rak el prokuram, eng kirek el mo menguiu er a Babier er a Mormon er a bek el semester. Bek el sils el kunguiu, eak mlo metebengar a tekingel Osobel el uase a Chedaol Reng a mo osischeklak a rokui el tekoi e mo ocholt a rokui el tekoi er a ldesuek.⁹ Ng mle smisichii er ngak el kmo ak ngelekel a Dios, e mekletngak el diak kungaisiu er ngak el mora rebebil, e silbecheklak er sel chedaol ngerchelek el mo ungil.¹⁰

Kemiu el sechelik, a kulengit me lak becherei a kmo ngtechang melcheridii a deureng e rkemiu. Diak mongaisisiu er kemiu el mora rebebil. A kulengit molbedebek a tekingel Osobel: “A budech ak beskemiu, budech er ngak ak beskemiu: ng diak el beluulechad a meskemiu, ngak a nguu el meskemiu. Bol chelellakl a rengmiu e lak louedikel, me a diak komedakt.”¹¹

Meng mekera doruul er ngii? Ke de mekerang e metik er tial budech, e melbedebek el kmo ke de techang, e mo mesiiich er a ikel kldei el D er a cherarou?

A kot, molatk aikel kot el ngarbab e ungil el llach a mo betik a rengud er a Dios loba rengud, klisiich, udesued, me a klisiich.¹² Rokui el tekoi el doruul a kirel mruul loba beltkil a rengud el mo er Ngii me a Ngelkel Sechal. Sel deteketekii a beltikereng er kid el mo er Tir lokiu a oliterakl a Lecherir, eng sebeched el di kid el mo betik a rengud er kid me a rebebil a obdois. Kid omuchel el mesiou a telungalek, resechelid, tonari er kid le kid el mesterir el uaia Osobel sel lomes er tir el—sechal me a redil ngelekel a Dios.¹³

Ongerung, moluluuch el mora Chedam el ngara ngklel a Jesus Kristo er a bek el sils, bek el sils, bek el sils.¹⁴ Ngokiu a nglunguuch eng sebeched el melchesuar a beltikereng er a Dios e ochotii a beltkil a rengud el mo er Ngii. Ngokiu a nglunguuch e kid ochotii omereng el saul e olengit a klisiich me a duchelreng el kongei er a soal a Dios e mo mukrael er a rokui el tekoi.

Ak mengelechel er kemiu el mo “meluluuch el mora Chedam loba rokir klisichel a rengum, me bo mui er tiaikid el beltikereng, … me bom sechal [me a redil] ngelekel a Dios; me sel lemei e kid a mo uai ngii.”¹⁵

Ongedei, monguiu e mosuub er a Babier er a Mormon er a bek el sils, bek el sils, bek el sils.¹⁶ A omesubek er a Babier er a Mormon a meral mo ungil sel sekum ak menguiu e ngarngii a ker er a uldesuek. Ma dongui el ngarngii a kerid, eng sebeched el ngmai ocholt e mtebengar el kmo a Profet Joseph Smith a millekoi a klemerang er a ledu el kmo, “A Babier er a Mormon [a] kot el meral hong el ngara beluulechad, … e a sechal [malechub a redil a mo] kmeed er a Dios sel loltirakl osisechakl er a chelsel, er a ngii dil hong.”¹⁷ A Babier er a Mormon olab a tekingel a Kristo el ngosukid el mo medengei el uase kede techang.

A ulebongel, bom ngara nglunguuch e molai er a sakrament er a bek el sandei, bek el sandei, bek el sandei. Ngii a okiu ruoll er a telbiil me a priesthood, luldimukl er a sacrament, e a klisichel a kledios a morngii er a klengar kid.¹⁸ A Elder David A. Bednar a ulsisechakl: “A chedaol ruoll er a sakrament a blelekl el chedaol ongit el mo meral ouchel a rengud e lmuut el mo beches er a chedaol tekoi. A teletael er a kuk di melai er a sakrament, el diak a ngerang, a diak el suld a kngtid. Sel demui el medengei e dognedmokl er kid el kirel tial chedaol ruoll loba ngariou el reng me a delemdemk reng, e a yaksok a kmo kede mo blechoel loba Reng er a Rubak lobengked.”¹⁹

Sel doba ngariou el reng e dolai er a sakrament, e kid a melatk a ringel el blel chau a Jesus er sel chedaol sers lokedongall el Gethseman e Ngii a mlo chuarm er a kerus. Kede ochotii omereng el saul el mora Chedam luldureklii a Di Chimol Ngelekel, Lolsobel er kid, e ochotii a blakereng er kid el mo oltirakl a Llechul e blechoel melbedebek er Ngii.²⁰ Ngarngii chedaol llomekellomes lobengkel a sakrament—el kuk di mora chad, el mesisiich, e ngii a ulsbechall.

Kemiu a rsechelik, ak yaksok el uase sel dolasm el mo betik a rengud er a Dios loba rengud rokir, e meluluuch el ngara ngklel a Jesus Kristo, e mesuub er a Babier er a Mormon, e ngara nglunguuch sel dlai er a sacrament, eng mo sebeched, lokiu a klisichel a Rubak, el mo mesisiich er a cheleblad lomeruul er a cherarou, e kosadel a mengesang el ngii a tomer kid er sel chedaol ultekelled, e mo odngakl a mengedeng el ngii a mengesang er a techelled el mo melchesuar a beltikereng er a Chedam er a Babeluades me a Ngelekel Sechal. Kede mo mui el medengei el kmo kede techang el sechal me a redil el ngelekel a Dios.

Rodam me a rodos, Ak kuchais er kemiu a beltik er reng er ngak e ochais a sioning er ngak el kmo ak medengei el kmo a Demad el ngara Babeluades a ngar e a Jesus a Kristo. Betik a renguk er Tir. A Ikelesia er a Jesus Kristo er a Uriul-klebesei el Santo a rengedel a Dios el ngara beluulechad. Kid a ngarngii a chedaol omeruul el mo mengidb er a Israel e mengetmokl er a beluulechad er a Ongerung el Olutel a Messiah. El ngara a ngklel a Jesus Kristo, bol uaisei.

Uleklatk

1. “Telungalek: Chais el mora Beluulechad,” Liahona, May 2017, 145.

2. Mesa Doctrine and Covenants 138:53; dirrek el mesa Doctrine and Covenants 138:54–56.

3. Russell M. Nelson, “Stand as True Millennials,” Liahona, Oct. 2016, 48.

4. Mesa Moses 1:4, 6.

5. Mesa Moses 1:12.

6. Mesa Moses 1:20; dirrek el mesa Moses 1:16–19, 21.

7. Ronald A. Rasband, “Lest Thou Forget,” Liahona, Nov. 2016, 115.

8. Mesa Becky Craven, “Careful versus Casual,” Liahona, May 2019, 9–11.

9. Mesa Johanes 14:26.

10. A chedaol ngercheled a mo nguu a diak a ulebengelel klengar el diak el iior er ikel lengai a chad el kloklel a beluulechad. A Chedaol Reng a mekletkid er a chedaol ngercheled er sel kid a sebeched el morngii alsekum e kid a melemolem el ngara rolel a telbiil, e mo mesisiich er a ongetiakik, lultuil er a ngesou er a Rubak.

11. Johanes 14:27; smisichii a belkul.

12. Mesa Mateus 22:37–38.

13. Mesa Johanes 3:16; 1 Johanes 4:19; Mosiah 2:17.

14. Mesa 3 Nephi 18:18–21.

15. Moroni 7:48smisichii a belkul.

16. Mesa Kevin W. Pearson, “Stay by the Tree,” Liahona, May 2015, 114–16.

17. Uchelel omesodel a Babier er a Mormon.

18. Mesa Doctrine and Covenants 84:20–21.

19. David A. Bednar, “Always Retain a Remission of Your Sins,” Liahona, May 2016, 61–62.

20. Mesa Moroni 4:2–3; 5:1–2; Doctrine and Covenants 20:76–79. A kulengit me bomodengei el kmo kede kiei er a taem el desal lousbech er a Chedaol Reng er Ngii el mo blechoel lobengked.