Kerekikl me a Omekbeot
Me a teletael er a beluulechad el di merael mo obdois loltirakl er a diablong, e kid a kired el melasm elmo blak a rengud el ngara rael el ngii a ngoikid el mo er a Osebeled.
Ng mle ta el kisa llechukl el bereked er a mado er a stouang el kmo: “Deureng, $15.00.” Ng mle melemlim a renguk el soak elmo medengei el kmo ngua ngeral klungel el deureng a sebechek el mecherar loba $15.00 mak mlo tmuu er a chelsel tial stouang. Ak miltik a betok el mekekerei el klalou me a kora di omiange—ng dimlak a ngera el kisang el sebechel meskak a deureng el tial llechukl er a mado a melekoi el kirel! Chelsel aika el mereko el rak, eng betok el taem el bla kulbedebek er tial tekoi e meral el uaia le beot a dosiik er a deureng er a ikel beot a cheral malechub eng metetemall el klalou. Sel de chedal a Ikelesia er a Jesus Kristo er a Uriul-klebesei el Santo, e kede ngeltengat el medengei el kmo ng mekera dosiik er a meral deureng. Kede metik er ngii sel dekerekikl loltirakl er a ebangkelio el mlekedmokl er a Rubak e Osobeled, el Jesus Kristo, me sel dolasem el merael mo uai Ngii.
Ngarngii a kmal sechelimam el lulureor lomekall a ksia. A tara klebesei er a lomekall er a ksia el merael, eng milsa er medal a mlai el ngara tial rolel a ksia. Ng mlo melchesuar el kmo tial mlai a mla kosio e dikea el sebechel mo imuul er a bitang. Ng di mle mereched el metir a botang lolchotel a bkaischemrungel, me a burek er tial ksia a millebusech el kmeed el edei mile a cherredel er a mesil ngara ruriul, loltak a kmeed el 6,500 el bond el klalou (5,900 metric tons). Ng dimlak a techellel tial ksia el mo stob ruchei er a lesbechii er tial mlai. Te ngeltengat a rechad el mla er tial mlai, el rirngesii a debsechel a ksia me te chiliis el tuobed ruchei er a lesbechii er tial mlai. Ngika lomekall a ksia el sechelimam er a longedecheduch er a bulis, e a kmal kesib a rengul redil a dumiang er tir. Ng kesib a rengul e melekoi el kmo ng milsa tial rokir el teletael el ngika el omekall a ksia a dimlak lolasm el mesiulii ongeu me lak el sbechii er tial mlai!
Ng bleketakl, el omko ngika el sechelimam a milsiulii ongeu me tial ksia tuobed er a rolel me lak el sbechii er tial mlai, e ngii me tirka el chad el rokui a locha di miltemall e tial ksia di lolemolem el merael eng locha kmal mo klou a telmellel a di lengii el mo stob. Ng ngeltengat, le rolel a ksia el rurt er bebul a ulereked aika el ochil a ksia meng melemolem el merael er sel kirel merael er ngii el diak el iior er a ngii di el ngerang el ngar medal. Kid me kede ngeltengat, el ngara rael, el rael er a telbiil el de tilbir el ngarngii er sera de metecholb el mo chedal a Ikelesia er a Jesus Kristo er a Uriul-klebesei el Santo. Meng uaisei el bo dechebangel a olibesongel, eng di tial rael a sobecheklid el melemolem el merael el bedul a diak a ulebengelel klengar alsekum e kede melemolem el mesisiich el merael er tial rael.
A chedaol ues er a kerrekar er a klengar a ochotii er kid sel di domekbeot leng sebechel ngoikid elmo cheroid ersel rael ra telbiil. Ka momtab er sel iron el baeb me a melemalt e chibutek el rael, malechub a rolel a telbiil, el ngoikid el mo er a kerrekar er a klengar, el rokui el klengeltengat el bla lekedmokl a Osobel me a Tngakireng er Ngii a medechel kirir a remelemalt. A dirrek el mlocholt er tial ues a omeuachel ra ralm lolchotel a klekikingelel a beluulechad. A chedaol llechukl a smodii el kmo tial omeuachel a “remurt” er a tkul tial rael el “telkib” lengelakl er tial kerrekar, ng diak el bedul ngii. A beluulechad a mui er a olibesongel el sebechel mengesuseu er a rechad luldimukl er a rengellitel, el rulterir el mo diak el sal kerekikl loltirakl a telbilir e di ngoiteterir el mo kmeed er tial kerrekar, eng di diak le bo er ngii. Alsekum eng diak dekerekikl el blak a rengud loltirakl a telbiled, e do mekbeot a tekoi eng sebeched el mechetakl el soiseb er a ngodech el rael malechub e kede mo teloi er tirkel seluk er a cheslel sel klou e meteteu el blai. A lak dekerekikl eng dirrek el sebeched el tuchelbakl er sel kikiongel lomeuachel.
Ngarngii a klebechel ma di beot el teletael er a rokui el tekoi, luldimukl e ra de klekar er a ebangkelio. Sel dosaod er a blakereng er kid el kirel Osobel, e kid kede kerekikl e a lechub e kede di omekbeot a tekoi? Kid el di chad a uchul, e sel bebil ra taem eng diak el di kid el mesebechakl a blekerdeled, el bebil ra taem e kid omrachem er a ungil er a kmo ngerang el diak el sal ungil? Bek el taem el de dul kmo, “eng di,” “a lak,” malechub “omko” sel dosaod oltirakl ra reprofet malechub a dekerekikl loltirakl er a ebangkelio, e kid a melekoi el kmo, “Tial tekoi a diak lolutk el kirek.” Ng sebeched el mesebechakls, eng di a mera er ngii, ng diak a ungil rolel a doruul a mekngit!
A kerbai er a rengeasek er a 2019 a mengai er a Johanes 14:15, el Rubak a melekoi el kmo, “A le betik a rengmiu er ngak, e moltirakl a llechuk.” Alsekum eng betik a rengud er Ngii, eng sebeched lochotii tial beltikereng el mo telkib el kerekikl loltirakl a Llechul?
A kerekikl loltirakl er a ebangkelio a diak el sal belkul a kmo kede kmal ungil malechub eng betok a ngera er kid. Ng belkul a kmo ng bleketakl a uldesued me a omerelled el chad loltirakl er a Jesus Kristo. Sel dolbedebek er a klekakerous er a kerekikl me a do mekbeot sel de klekar er a ebangkelio, e a ikakid a bebil er a tekoi el dolatk:
Kede kerekikl el mengull er a Chedaol sils e mengedmokl er kid el kirel a sakrament er a bek el sandei?
Ng sebeched el muut elmo kerekikl a nglunguched me a omesubed er a chedaol llechukl malechub e demui el mesuub er a Come Follow Me—For Individuals and Families?
Kid kede kerekikl el mengull sel de ngara templo e kerekikl el lolitrakl a telbiil el de riruul er a techolbechelid me a chelsel a templo? Kid kede kerekikl a teleteled a doubail, oumesingd ra chelsel aikel chedaol basio me a teletael? Kid kede kerekikl a teleteled a doubail a chedaol bail er a templo? A lechub e a teletael e ra beluulechad a bai mengederedel a blekerdeled el di omekbeot a tekoi?
Kid kede kerekikl a teleteled a doldingel er a rebebil me a ngercheled er a chelsel a Ikelesia, e a lechub e kede di omekbeot er a okedong el mlei er kid el mo mesiou?
Kid kede kerekikl malechub e kede di omekbeot a ikel donguiu me a domes er a rua tibi me a dengua er kid? Kid kede kerekikl a tekoi el dolekoi? E a lechub eng di beot er kid el mesaud a mekngit el lomelekoi?
Sel babier er a For the Strength of Youth a olab a teletael, el ngii a doltirakl, eng meskid a betok el klengeltengat e ngosukid el ngara rael e ra telbiil. Ng uaisei el milluches el kirel a klungiolir a rengeasek, eng di ng llach el diak el ngemed sel de tobed er a prokuram er a Young Men me a Young Women. Ngosisiu el tekoi el melutk elmo er a dersta er kid er a bek el taem. A omesubed er a ikal llach a locha sebechel rullid el mengai el mo kerekikl el loltirakl er a ebangkelio.
Ng diak dolenganget a llechud el mo osisiu malechub e doruul er a mo klungiolel a tara rechad. Kid a oltirakl er a Jesus Kristo, ma le uaisei eng kired el mesebechakl er a rebebil, el ngoiteterir el mo re bab, el mora chedaol basio me bo lengai a ngarbab el klengeltengat.
A kulengit er a dersta er kid me bo doltirakl a ulekrael er a Chedaol reng el mo medengei el kmo ngera kired el mesmechokl er a klengar kid el lmuut elmo kerekikl a telbiled. Ak dirrek lolengit er kemiu me lak morritel er a rebebil el tir a ngara osisiu lomerael. “Ngak a oukerkeriil, ng millekoi a Rubak.” Kede rebek el chad el ngara teletael er a ulekeroul me a omelodech.
A cheldecheduch er a chelsel a Babier er a Mormon el kirel a rebetir a re Amlicites a mengasireng. Ng uaia lolchotii el mo er a rebebil el kmo ng mla mo diak el chedal a Jesus Kristo me a Ikelesia er Ngii, me te millechang a bekerekard el tengetang er a medal a bdellir me a rokui el chad el lomes. A kuk domes er ngii, e kid loltirakl er a Jesus Kristo, eng ua ngera a olengcheled? A rebebil ng sebechir el mesa Lecheklel er a osenged e medengei el kmo kid kede omtechei er a techang e lokiu a teletelel a klengar kid?
Mesel de chad el ngara telbiil, eng diak el kired el mo teloi er a beluulechad. Kid a mla mokedong el ngellitel el chad—ng meral lungil tekoi! Me a teletael er a beluulechad el di merael mo obdois loltirakl er a diablong, e kid a kired el melasm elmo blak a rengud el ngara rael el ngii a ngoikid el mo er Osobeled, e tmengii a delongelel a telbiil doruul me a teletelel a beluulechad.
Sel kulbedebek er a diak a ulebengelel deureng, eak metik el kmo a bebil er a taem e kede metik er kid el ngara ilkolk. A kereklel a ilkolk a kmal klou sel dorael er a rolel a telbiil. A ongetikaik ma di domekbeot a tekoi a sebechel rullid el touchakl er a rael el soiseb er a ilkolk era beluulechad e choridid er a rolel a telbiil. A taem el sebechel duubech tiang, e a betik er a rengud el profet, el President Russell M. Nelson, a mla mengelechel er kid el lmuut el mora rolel a telbiil, e lorchedid el kutmeklii. Ak mereng a saul er a sengk er a ouchel reng me a klisichel a Tngakireng er a Osobeled.
Ng diak el sebeched el mo kiei er a cherrungel el klengar. Ng di mle chimol chad a mle sebechel kiei er a cherrungel el klengar er a le ngara tial beluulechad. Ng Jesus Kristo. Ng uaisei el diak decherrungel, e rodam me a rodos, ng di ng sebeched el mo klikiid: klikiid el melai er a sakrament, klikiid el mo ngmai a klengeltengat er a templo, e klikiid el ngmai a chedaol ocholt el kired.
A King Benjamin a uluuchais el kirel a klengeltengat me a deureng el mo er tirkel tir a kerekikl loltirakl er a Osobel: “A leuaisei, e ak dmu er kemiu el mo omtab er tirkel mlo ngeltengat e mla er a deureng el chad le tir lultirakl a llechul a Dios. A le uaisei, e tir a ngeltengat er a rokui el tekoi, a tekingel a klechad me a reng; e alsekum e tir outekangel el mo er a ulebongel e te mora babeluades, e mo kiei lobengkel a Dios el ngara diak a ulebengelel deureng.”
A deureng ng sebeched el rukemii e loba $15? Ng diak, ng diak el sebechel. A dmolech e diak el ngemed el duereng a mei lokiu a blakereng e kerekikl loltirakl er a ebangkelio er a Jesus Kristo. Lobang a ngklel a Jesus Kristo, amen.