Tngakireng er a Jesus Kristo
A Tngakireng er a Osobel a diak el di lak a ulebengelel er a osenged er a tekoi, ng dirrek el oureor er a ta er kid.
Chelechal taem er a chelsel a rak e kede tokubets el oldeu a rengud e melebedebek el kirel a Tngakireng er a Osobel. Ng uaisei el kot el ngarbab, menglou a uldasou, chubechub e melisiich a reng el osisechakl el tia el beluulechad me a ikrel a beluulechad a medengelii. Ngii a meskid urungulel me a moktek er a klengar er kid.
Meng ngera se el Tngakireng ra Jesus Kristo? A tara omesodel, ngii a uldekial a mla mekedmokl el chedaol el tekoi el ngii a milekdubech er a Sers er a Gethsemane, e milemolem el mora kerus, molmuut er a Okisel a Osobel er a kodall. Ngii a milkedmokl el okiu se el diak el sebeched el metebengar el beltik el reng el mo er a ta me a ta er kid. Ngii a ulusbech er a chad el ngii a mle klikiid el diak a kngtil, el oba kot el ngar er bab el klisiich er a rokui el tekoi—el molmuut er a kodall, ngii a oba a diak a mo torebengii el tekau el mo er a ringel el kirel a rokui el kngtid me a sechered, el ngii a mera er ngii a mle er riou er ngii el rokui. Tia a mle urerel a Jesus Kristo—tia a mle Tngakireng er Ngii.
Meng ngera mle moktek er ngii? Ngii a mo uchul meng sebeched el lmuut el mo kiei el obengkel a Dios, e mo uai Ngii, e mo oba a cherrungel el deureng. Tia a milkedmokl el okiu a mo mesisiich er a eua el ringel:
-
Kodall er a tech
-
Kodall er a Chedaol Reng el uchul a kngtid
-
Ringeled me a telitur er kid
-
Klitechetud me a ngelsengesed
E ng di ng mekera e a Osobel a kudmokl aikang el diak el bo el lolemall a llechul a llemalt?
Okmo me a ta el taem e a chad a el ngii a omdasu er a omechelaol rebetel a orreched el rullii a rengul e di keberul ridekekl er a kekerei el skoki. A uriul er a rellii tiang, e ng di mle mereched el mocha melechesuar er a klebelngul er a ika el omerellel. Ng soal di tabesul se el bel betengel, e ng di ngar er ngii a cherarou—llechul a orrebet. Ng ombereberek a chimal el kmal merngul, el rengul eng sebechel mo suebek, e ng di ng diak el sebechel. Ng mocha merech besul a bedengel el lekong ombibechakl me a lechub e ng mesebesebek el mo meioud el me metengel, e ng di a llechul a orrebet a diak el bo lak ma kal bol bechikii. Ng melasem el osiik a uchul el oba tia el beot el llechul a ngar: “Ak mle cheleuid. Ng meral diak luut.” E ngdi a ongtil a ruebet el mora mechad el ding. A llechul a orrebet a diak lodengelii klechubechub; e diak el kora mesa techall. Mlo ungil a chung er ngii, el uaisei, el ngika el chad a mocha melechesuar er a kmung ngerang el ngara ulekel. A sechelil el mlara skoki, a ulemechesiu a terrekeklel, a mocha nguu a kangasang el loia ra ulkel er a uchei er a le ridekekl. Ng miltik er a lechetel e mocha otemetii. Mecha dikea el sebek a rengul, ng mocha mesebesebek el mekekokil me metengel er a chutem. Kede locha oker, “Se el llechul a orrebet ng locha miltemall, me a lchub e sel kangasang a uluureor er a chelsel tia el llach el mlo uchul a tabesul el me metengel?”
Se el doruul a a klengit, e kede di ua ngika el meterekakl el chad el silchesokl er a skoki. Eng di ng uaisei el rokui el tekoi el doruul, a telemall er a mo metengel a mengiil er kid. Kid a ruul el kirel tia el llechul a llemalt, el ngii, el uaia llechul a orrebet, el kltukl e diak el chubechub. Ng di sebeched el mo suobel el Osobel a uchul, el okiu a Tngakireng er Ngii, el chubechubechad el meskid a se el reng el di uaia urerel a kangasang. Alsekum eng ngar er ngii a klaumerang er kid er a Jesus Kristo e mo ouchel a rengud er a kngtid (el belkul a kmo kede rullii se el ngii a ngercheled el mo otemetii a lechetel), e a omelekau el klisichel a Osobel a mo er ngii el me er kid, e mo sebeched el mo ungil el me metengel el diak de mekesakl.
Tia a di sebechel el mekedmokl, el uaisei, el le uchul a Osobel a mlo mesisiich er a ike el eua el ringel el ngii a sebechel merrob a techelled el meleketek er a chedaol tekoi er a reng.
1. Kodall Ngii a mlo mesisiich er a kodall el okiu a klebeokel el Okisel er a Kodall. A Apostol el Paulus a ulsisechakl: “El okiu a Adam e a rokui a mo mad, e uaisei el okiu a Osobel e a rokui a sebechel di ngar.”
2. Klengit A Osobel a mlo mesisiich er a klengit me a ouchel el reng el kirel tirke el rokui el tir a ouchel a rengrir er a kngterir. El kmal dmolech e meteu se el klisichel el mengikiid el Isaiah a mle iaksok, “El kngtim a bekekerkard, ngii a mo becheleleu el uaia yuki.”
A ta el belsechel, e ak mlo medengelterir a rungil re Santo el tir a meringel er tir a ousubes er tir, el tir a dimlak lodengei e mla locha merrob er a klechubechub el klisichel a Osobel. Diak lolechesuar, te mla miteklii a diak a ulebengelel el Tngakireng el mo ngar er ngii a terebengel el ngii a mo olengesonges el uchul aike el kltukl el kngterir me a chelitecheterir. E ngdi ngii a diak a ulebengelel el Tngakireng e leng melemosem e olekebai a rokui el klengit me a chelitechut, me a dirrek el rokui el omekcharm me a lechub eng uchul a ringel er a rebebil.
A Truman Madsen a rirellii tia el kmal mengelaod a reng el ultab:
“Alsekum e ng ngar er ngii a ta er kemiu el tir a mla mecheblad el oba mesisiich el klaumerang el kmo ke kmal mla mo cheroid … e kau a di mla obang a dok er a klengit el ngii a mo uchul e ng diak el sebechem el mo uaisei el kau omdasu eng mlo sebechem el mo uaingii—em rengesak.
“Ak olcholt er a klaumerang el kmo ng diak el sebechem el rusors el mo cheroid er a llomes e oriik a llomes el sebechel a Jesus Kristo el morngii. Ak olecholt er a klaumerang el kmo ngidi lengar er ngii a kekerei el ngeuil a meral reng er a mo ouchel a reng er a klengit me a okedong, e Ngii a ngar er ngii. Ng dimlak el dil le betengel el mo ngara ikel omngar er ngii; ng mlo ngar er riou er ngii el dirrek, meng mo uchul eng Sebechel el mo ngara rokui el tekoi e mo chuarm a rokui, llemesel a klemerang.’ [Doctrine and Covenants 88:6.]”
A tara uchul a kmal klou a ultutelel el dodengelii a Tngakireng er a Osobel me a ike el diak a ulebengelel el urerel a kmo se el donglou a klemedengei er kid e ng mo uchul a muut el klou el klemeriar el reng er kid el di kid el ousubes er kid me a rebebil.
El uaisei el de locha oumerang er a Kristo me a klisichel el melikiid, a nger a blechoel el me duum: “Ak mekerang e medengei el kmo ak mla mousubes er a kngtik?” Se el dolechesuar er a Chedaol Reng, seikid a ngii a olechotel el kmo kede mlausubes, me a lechub e se el telengtengil a ousubes a oureor. A President Henry B. Eyring a ulsisechakl, “Alsekum e kau a mla melechesuar er a omelodech er a Chedaol Reng … , e ke sebechem el nguu el oba el olechotel el kmo a Tngakireng a oureor er a chelsel a klengar er kau.”
A rebebil a mla oker, “E ng di alsekum ak mlausubes, ngera me a uchul ak dirk melechesuar er a chelebechobel?” E ng uaisei el denguu er a klechubechub er a Dios e se el omelebedebek el kirel a chelebechobel a uleklatk, ngii a chedaol el “olengchelel a stob” me a ikel uaingii, er a chelsel a taem, el ngii a melekoi se el sekum e a muut el bebil er a ongetikaik a me duum er kid: “Lak bom rebet er se el rael. Ke medengelii a ringel el obang.” Ngar tia el uldasu, e ng ngerchelel el mengkar er kid, ng diak el kelebsenged.
Meng sebechel, el uasei, el kid a di medengei a kngtid e dirk nglubet er a chebechebled?
Alma a lilalt a kngtil, el mo lmuut er a betok el rak el uriul er a le bla lousubes a kngtil. E ngdi sera llangel el mora Jesus el olengit a klechubechub, e ng milekoi, Ng mla mo diak kulbedebek a ringelek; choi, ak mlo diak el meringel a uldesuek el kirel a omeletkek el kirel a kngtik.
Ng mekera e medengei a kngtil e diak a ringel me a lechub e ng chelebechobech er a ngii? Leng uaisei el se el douchel a rengud er a kngtid, e kid a “mechell er a Dios.” Kede mo, uaikel medung er a chedaol llechukl, “beches el chad” er a Kristo. El oba cherrungel el klemerang e ng sebeched el melekoi, “Ngak a diak ngike el sechal me a lechub eng redil el ngii a riruul aikel el mla mo merek el klengit. Ngak a beches e mla mengodech el chad.”
3. Ringeled me a Telitur er kid. Alma a ulemlaoch el kmo Kristo a mo merael, el chuarm a ringel me a telitur me a ongetikaik er a rokui. E le ngerang? Meng mo uchul e a delechil a mo mui er a klechubechub, … meng mo medengei el kirel a tech el kmo ng mekerang e olengeseu er a rechedal lokiu aike el cherreuir.
Ng mekera e kudmeklii tiang? Bebil e Ngii a melubet a ringel, bebil e Ngii a melisiich er kid mekede sebeched el outekangel e mo mesisiich, me a lebebil e ng meskid a osenged el kirel a diak a ulebengelel el ngii a mo rullid meke mo ungil medengei el kmo aika a di tekoi er a klechad. Uriul er a Joseph Smith a kmal merengela er ngii er a le ngara blil a kelbus er a Liberty el kmeed el eru el buil, e ng mocha lemangel el melekoi, “Kau el Dios, kau ke ngar er ker?” Er a lebai lemereched el sobecheklii, e a Dios a ulenger, “Ngelekek, budech lebera rengum; me a cherreuem me a ringelem a ngar er ngii e ng di ng di telkib el taem; e uaisei el sekum e ke outekangel er ngii el mo ungil, e a Dios a mo osobelau er a kot el ngar er bab el renged.”
A Joseph a mocha medengei el kmo tia el meringel el omeruul a di ua dimech er a chelsel se el diak a ulebengelel el rael. Loba tia el bleketakl el ues, e ngii a milluches el mora re Santo er tia el osisiu el blil a kelbus, “Betik er a renguk el rechedak, mei mede dmeu a rengud el meruul a rokui el ngii a ngar er ngii a klisiched er ngii; e mei mede dechor el chelellakl, el oba se el klou el omeketakl el reng, el mo mesa a se el olsobel er a Dios.” Le ng uchul a Tngakireng er a Osobel, e ng sebeched el oba se el diak a ulebengelel el ues el ngii a meskid a belkul aika el ringel me a deureng el kirel a osebechakl.
Klitechetud me a Ngelsengesed Uchul a Tngakireng er Ngii, e a Osobel a oba se el lomeskid el klisiich, el bebil e kede omekedong er ngii el kmo krasia, el ngii a sebechel el ngosukid el mo mesisiich er a klitechetud me a ngelsengesed e olengeseu er kid er a omerolled el mo uai Ngii.
Moroni a ulsisechakl: “Oi, mei er a Kristo, me bo mecherrungel er ngii, …me ngoeak a chubechub er Ngii e kau a mo cherrungel er a Kristo.” Ng kora ua lengar er ngii a teblo el rael me a lechub e ng omeruul el mo ngosukid er a ike el meskid a klisiich el ua bo el longikiid—e dirrek el mo mengerrungel—er kid.
Kot, olsobel el chedaol ruoll. A chedaol llechukl a ouchais er kid, “Chelsel a chedaol ruoll, e a klisichel a kldios a mo mucholt.” Bebil er a taem, e kede locha omdasu el kmo a chedaol ruoll a kora di bldeklel a tekoi el kirel mekedmokl—el mo uchul a mo suobel, e ngdi a klemerang a kmo a ta er ngii a mo kodekedii a klisichel a kldios el ngii a mo ngosukid el mouaia Kristo. El uaia:
-
Se el de nguu a techolbechelid e nguu a sengk er a Chedaol Reng, e kid a mo klikiid—e mo chedaol el uaia Dios.
-
Uldimukl er tiang, ngokiu a Chedaol Reng, e a uldesued a locha mo mellomes me a rengud a mo delemedemek meng sebeched el omdasu e melechesuar el uai Ngii.
-
E se el de bo de merenged el kaubuch, e ked emo nguu se el llemelted el mora korone, renged, osisechakl, me a dirrek el klisiich el ua le sengk el mlara Dios.
A ongeru el rael a ike el omeskid a klisiich el sengk er a Chedaol Reng. Le ng uchul a Tngakireng er a Kristo, e kid a sebeched el mo ngmai aike el sengk er a Chedaol Reng me aike el ngii a obengkel el chdaol sengk. Aika el sengk a mengai er a kldios; el uaisei, bek el taem el denguu a sengk er a Chedaol Reng, e kede mo uaia Dios. Ng diak a omededenger el uase tia a uchul e a chedaol llechukl a olisechakl er kid er a betok el ngii a mla duubech el tekoi el mo osiik aika el sengk.
A President George Q. Cannon a ulsisechakl: “Ng diak a chad el lekong melekoi el kmo, ‘Choi ng diak el sebechek el mekerang er tiang; ng kuk di ngara klechad er ngak.’ Ngii a diak el diak el ngar er ngii a ungil uchul el kirel, el mo uchul el Dios a mla yaksok el mo omeskid a sengk el ngii a mo melubet a [klitechetud]. … A ngidi el ta er kid el ngii a diak el cherrungel, ng ngercheled el meluluuch el kirel a sengk el ngii a mo rullid mekede mo cherrungel.”
Me a mo uldekial, a Tngakireng er a Osobel a meskid a ngar er a kodall, “klebekelel a bas,” omekungil er a rengara ringel, me a mengerrungel a chelitechut. Ng kerul a babeluades el mora ike el ringel me a ongarm er tia el beluulechad.
Chelsel aike el ulebongel el sandei er a klechad er a Osobel, Ngii a milekoi, “Chelsel tia el beluulechad e k emo chemau a ringel: e ng di bo lungil a rengum; Ngak a mlo mesisiich er tia el beluulechad.” Le ng uchul a Osobel a rirellii a Tngakireng er Ngii, ng diak a ngidi el ngodech el omelodech me a tekoi el mekdubech me a lechub eng chad—diak a kngtil, kodellel, me a diak bolak el bechiil—aike a sebechel lorremelid meng diak bol sebeched el mo nguu a diak a ulebengelel, el uaisei el doltirakl a llechul a Dios. Oba tia el klaumedengei, e ng sebeched el omakes el bedul uchei el oba ungil reng me a kmal bleketakl el kmo a Dios a obengked er tia el chedaol el siik.
Ak sioning el kmo a Tngakireng er a Osobel a diak el di lak a ulebengelel er a osenged er a tekoi, ng dirrek el oureor er a ta er kid—el diak el dil rullii mel sebeched el lemuut el mo kiei el obengkel a Dios, ng dirrek el ngosukid el mo uai Ngii—se el kot el ngar er bab el ngerchelel a Tngakireng er a Kristo. Tiaikid ak kuuchais er a omereng el saul e sioning el ngara ngklel a Jesus Kristo, amen.