Mui er a Klengeltengat
Osisiu el teletael betok el klengeltengat el soal a Dios lomeskid a kired loureor el kirel—el omeruul lultuil er a klaumerang er kid er a Jesus Kristo.
Rodam me a Rodos er ngak, a demad er a babeluades me a Jesus Kristo a semeriar lomekngeltengat er kid. A ker el mekerang a dengai e dolab aikal klengeltengat a dibla losaod erngii a remeduch er a tekoi er a klechelid e dirrek el meketeketang a rechad el mesaod el kirel. A bebil a melekoi el uase a klengeltengat a kereker; kid a ngmai lokiu a urered. A rebebil a kuk melekoi el uase a Dios a mle melilt e rtirkel Ngii a mo omekngeltengat er tir—e ikang a diak el mengodech. Aikal erung el uldasou a diak el merang. A klengeltengat er a babeluades a diak el cheleuid e dengai “lokiu a ungil omeruul” malechub e dongiil er a taem el bol chung er kid el nguu a klengeltengat er a udoud. Ng diak, a klemerang a lmuut el bleketakl eng di ngultuil er a deleuill er a oubeltikereng el chedam er a babeluades me a tirkel mo olab a Kloklel—el kid. A mla moluut el klemerang ochotii el kmo ngdiak dongerker a klengeltengat, ng bai omeruul lultuil er a klaumerang er kid, er chelechang e melemolem, el klou a ultuelel.
Sel domdasou el uase ng mekerang a dengai a klengeltengat er a Dios, e msall e domekesiu a klengeltengat er a babeluades el mora cheldull el betok el kerrekar. Momtab er sel belngel a cheldull el kerrekar, el chachisois a mekekerei el kerrekar er a bebul. A sengsongd a ongerung el mong, eng mekiklou el kerrekar, eng mochu ikel meklou el kerrekar. Tial cheldull el kerrekar a ousbech er a klou el cheluch, el mo sebechel tmaut a ngau e mengeald el tela el klebesei. Ka momtab er a chimol chetul a mases el ngara bitara ikal cheldull el kerrekar, aikel mases el doleius.
Sel uchul eng tmaut a ngau er a ikal idungel, eng kired el meleius er a mases meng kmard. Aikel sengsongd a mereched el tmaut a ngau er ngii meng mo sebechel metaut aikal meklou el idungel. Sel omuchel el tmaut a ngau, eng di melemolem el dimereko lobetaut aikal rokui el idungel el mo diak a ngeuil tial ngau.
A melius er a mases e omekard a idungel a mekekerei el tekoi ngdi ng sebechel metaut a meklou el idungel. A lak el meluis a masez, eng diak a ngera el duubech, ng diak el iior er a iidisel a idungel. Alsekum a mases a mesius e diak mnguu loiia er a idungel, e a ngeuil me a klisichel a ngau a kekerei e a ikal idungel a melemolem el medechel el diak el taut a ngar er ngii. A lak a mo omekard er ngii dil taem, e a klisichel a ngau a mo stob.
Osisiu el teletael, betok el klengeltengat el soal a Dios lomeskid a kired loureor el kirel—el omeruul lultuil er a klaumerang er kid er a Jesus Kristo. A klaumerang er a Osobel a osisechakl er a omeruul me a klisiich. A kot e kede ngara omeruul lultuil er a klaumerang; e seikid a klisiich a mei—er sel soal me a temel a Dios. A blechebechel a klou a belkul. Aikel kired el meruul, eng di, a blechoel kmal kekerei a domekesiu er ngii el mo er a klengletengat el dengai ruriul.
Ka momtab er ngike el mekerekard, el suebek el bersoech er a bel duum er a rechad er a Israel er a irechar er a omerollir el mora beluu er a telbiil. A bengchel ngkal dok el bersoech a mle omekodall. Ng di a chad lobangch a sebechel mo ungil alsekum eng omes er sel bleob el chaus el bersoech el telcherakl er a kerrekar luleba Moses. Ngua ngera klungel klisiich a dousbech lomes er a kmo ngerang? Tirkel rokui lulemes a ngilai a klisiich er a babeluades e mlo ungil. A bebil er a re Israelites lulebangch a dimlak lomes er tial bleob el chaus el berseoch me te mlad. Ng locha dimlak a klaumerang er tir lomes. Ng locha dimlak loumerang el uase tial beot el tekoi a sebechel uchul a klengeltengat el mor tir. A lechub eng mle medecherecher a rengrir e dimlak lorrenges er a tekingel a profet er a Dios.
A osisechakl el melisiich a klengeltengat el ngara Dios el mei a diak a ulebengelel. Kid a uai tirkel chad er a Israel er a ngaramong, el kired el mo ultuil er a klaumerang er a Jesus Kristo mebo dengeltengat. A Dios a mla kmo “ngarngii a llach el milkedokl er a babeluades ruchei er a uchelel a beluulechad, el uchul a rokui el klengeltengat e sel dengai a klengeltengat er a Dios, eng ultuil er a blekongesenges er kid er tial llach el mla medung.” Ma tia mla medung, ng diak mongerker er a klengeltengat-tial omeruul a diak el klemerang-eng di ng kirem el mo meduch er ngii. A osobeled a mei lultuil er a kalumerang me a krazia er a Jesus Kristo. A delchel a tngkaireng er ngii a diak a telkelel; me a mekekerei el omerelled a diak el sebechel mo mengaisisiu er ngii. E tir a diak el zero, e tir a diak el lak a ututelir; chelsel a ilekolk a dichel a mases a sebeched el mesang er a cheroid. Mal uaisei, tiang a sebechel moues er a babeluades le kekerei el omeruul er a klaumerang a ousbech er a omuchel er a skeng er a Dios.
Sel bodengai a soad el klengeltengat er a dios, e doruul ngara klauemerang, lultuil a ngesou er a babeluades el kirel ngii el klengeltengat. Okesiu, a tara telengtengil a nglunguuch a olengit a klengeltengat el Dios a soal omeskid eng ding ultuil er a ongtid el mo rngii. Okesiul tiang, a alma, a lilangel loengit ra chubechub me a ringel el blara chelsel; meng mlo diak lolbedebek el kirel a kngtil. A deureng er ngii a mlo ngarbab er a ringel—el blarngii le ngii el lilangel loba klaumerang el mo er a Jesus Kristo. A klisiich el kid ousbech er ngii a kirel mo mesisiich a klaumerang er kid er a Jesus Kristo e meral lolngit er a Dios el ngara nglunguuch e kongei er sel Soal me a temel kirel a nger.
Oumesingd, e sel klisiich el dousbech er ngii er a klengeltengat a lmuut el ngarbab er a di omes malechub eng di olengit; a melemolem, e blelekl, el omeruul lultuil er a klaumerang a usbechall. Sera 19th century, a Brigham Young a ulbeteterir a cheldebechel er a Uriul-klebesei el Santo el mo omes e kiei er a Arizona, me a bebil er a kmeed el beluu er a North America. Sera lebora Arizona, e tial cheldebechel er a rechad a mlo diak a imelir el ralm me temlo medakt el kmo te mad. Te ulelengit er a Dios me lengesuterir. Telkib e a chull me a snow, a miltengel el mekeek a blil a imelir er a ralm me a lousbech a cheremir. Te mlo mui er a deureng e mesisiich a rengrir, e luueta el mo ra Salt Lake City el dmeu a rengrir er a klungiolel a Dios. Sera lebong, ete ulechais a teletelel omerollir el mora Brigham Young e millekoi el kmo a Arizona a diak a rechad er ngii.
Uriul er a rengesii tial chisir, e a Brigham Young a uleker er a tara chad el ulebengterir er a uldesuel kirel tial omerael me a ongasireng el tekoi el dilubech. Ngkal chad, el Daniel W. Jones, a lilangel e ouchais el kmo, “Ng mle sebechek el muut lomeek a ralm, e melemolem el merael, e lmuut el meluluuch.” A Brother Brigham a urekedii chimal a Brother Jones a kmo, “Ngkaikid a chad el mo oungerachel er sel muut lomerael el mora Arizona.”
Kid a medengelii a taem el dultekangel e liluut el meluluuch e mlo—metik a klengeltengat. A teletael dilubech el mo ra michael me a marian holmes a meketeklii tial osisechakl. A Michael me ngak a dmak el mesiou er a Area Seventies. Ng blechoel ungil a renguk sel ngii a mokedong el mo meluluuch sel ki moumiting le dmolech el chedaol klechad er ngii a bleketakl; leng mle medengei el uase ng mekera longedecheduch er a Dios. Ng soak lorrenges er ngii sel loluluuch. Sera uchelel a chebechielir, e a Michal, me a Marian a dimlak loluluuch malechub el ngara Ikelesia Te kmal mle mechesang er a retedei el ngelekir me a siobai er tire r a omeruul blai. A michael a ulmechesiu el diak el chedal a chelid el chad. A tal kesus, e a bisop er tir a mlei er a blirir a milngelechel er tir el mo omuchel el meluluuch.
Uriul ra lorael a bisop, e a Michael me a Marian a omdesua el uase te mo melasm el meluluuch. Uchei er a bol mechiuaiu, e te mo outubaruach er a tkul a dusall, e kora di mekngit a tsios er ngii, e a Michael omechelang meluluuch. Uriul er a kora diak el sal ungil nglunguchel, e a Michael a mlo diak loluluuch, e kmo, “Marian, ng diak el sebechek.” Sera bol dechor olekong merael, e a marian a urekedii a chimal, e otemetii el muut el mo outubaruach, e kmo, “Mike, ng sebechem. Ka mluut el melasm!” Mlo kora mesisiich a rengul, me a Michael a dilii a kedeb el nglunguuch.
Tial telungalek er a Holmes a mocha blechoel meluluuch. Te kilengei er a ongterir a retonari er tir el mo ra ikelesia. Sera lorael soiseb er a ikelesia e lorrenges a chelitakl, e a Chedaol Reng a milngelulau er tir, “Tia klemerang.” Uriul, el dimlak a mesang me a dimlak a melekoi er ngii, e a Michael a ngilai a komi el mlara ikelesia. Sera lolai a komi, eng mlo omelchesiu el kmo, “Tiang a Blik.”
A Michael me a Marian a kilengei okedong er a Ikelesia e milesiou er a chelsel a ward me a stake er tir. Te mlo moak el terung, me a tedei el ngelkir a mlo merenged el lo lobengterir. Betok er a rengalek a mle ruriul, me a iidisir a rengelekir a mlo 12. A lmuut el bebil er a rengalek a mle ruriul, me a iidisir a rengelekir a mlo 12.
Sel kot el delebdeb el nglunguuch a mle kekerei eng di mui er a klaumerang lomeruul a mlo uchul a klengeltengat er a babeluades. A re Holmes a killungii a ngau lokiu a mlora ikelesia er tir me a omesiou. A blakereng er tir loltirakl er a chelsel a betok el rak a mla choisisii a klaumerang er tir el mei ra chelchal sils.
A ngau, a kirel, blechoel dolechang a idengelel meng melemolem el kmard el mo klou. Uaisel teletelel a Michael me a Marian Holmes, a klaumerang er a Jesus Kristo a kirel ultuil er a omeruul meng sebechel melemolem el mo mesisiich. A mekekerei lomeruul a smisichid el mo merael er a rolel a telbiil e kid a mo metik a ngarbab el klengeltengat el Dios a meskid. Eng di a klisiich a di oureor sel dolemolem el louedikel. Bebil er a taem eng kired el rulii a balech me a medal a balech ruchei er a lemei chedaol ocholt er sel bo dosiik a kall er ngii. Bebil er a taem eng kired el remuul a dongu ruchei er a lemei ocholt el uase ng mekera doruul er a bilas. Ea bebil er a taem eng ultuil er a tekingel a profet er a Rubak, eng kired el rulii a kekerei el cake lousbech a kesai el cheluch me a merikengko el mo sebeched el ngmai a betok el cheluch me a baket el merikengko. A kuk bebil er a taem eng kired el mo “chelellakl e mo medengei el kmo a [dios a] ngii a dios,” e oumerang er sel temel.
Sel mngai a ngiidil klengeltengat er a Dios, eng sebechem el mo medengei el uase ke mla otirakl a diak a ulebengelel llach el kirel tial klengeltengat. Di molatk el kmo sel “dimla mekedmokl er a uchelel” llach a ousbech a taem, el belkul a kmo a kelngeltengat a mei lokiu a temel a dios. Me tirkel profet er a recheuodel lulsiik er a blirir e ra babeluades a “mlad el ngara klaumerang, el dimlak el ngai a yaksok, eng di temiles ruchei … [e] ulebult … e mlo urrekodel.” Alsekum a soam el klengeltengat er a Dios a —dirkak— mnguu eng diak el kirem el mo kebelung a bdelum, el uase ngera lmuut el bebil er a kirem el meruul. Ke bai, oltirakl er a tekingel a Joseph Smith el mo “ngara deureng e meruul a rokui el tekoi el [kau] ngara klisichem; e sola … bom chelellakl, el mui el medengei, e mesa … chimal a [Dios] locholt er kau.” A bebil er a klengeltengat a medechel el mo uriul, luldimukl er tirkel kmal mesisiich el ngelekel a Dios.
Elolem el buil er a memong e a uldasou er a omesuub el omuchel er a blai, lobengkel a ngesou- er a Ikelesia el kirel omesubel a osisechakl, melisiich er a klaumerang, e melisiich er a dersta el chad me a telungalek a mlocholt. A President Russell M. Nelson a mla yaksok el uase aikal ngeldechel a teletael a mo ngosukid, e choisisii a deureng er kid er a ebangkelio, e dolechii a belted el mo era chedam er a babeluades me a Jesus Kristo. Ngdi ng di iior kid el mo ngmai aikal klengeltengat. Ngerchelel a dersta er kid el mo mekengii e mesuub er a Mei Moltirkal er Ngak—Mo er a Dersta el Chad me a Telungalek, lobengkel a bebil er a chedaol llechukl me a bebil er a osisechakl el ngara Mei, Moltirakl er Ngak Ng kired el mesaod el mora telungalek er kid me a rsechelid e sumecheklii a Chedaol sils el mo idengelel a ngeuid. A lechub e kede mechei aikal klekedal meng di medechel er a rekeblid me a klisichel a di medechel er a chelsel.
Ak siotai er kemiu el mo blak a rengmiu lultuil er a klisiich er a babeluades el mo ngmai a klengeltengat er a Dios. Multuil er a klaumerang el meleius er a mases e mokerdii a ngau. Molemolem lolsiu er a ngau e mongiil er a temel a Rubak Aikaikid el ongit, e nglunguchek me a chedaol reng bo lomekrael er kemiu, me luchul e bom, uai ngkel “mui er a klaumerang el chad” el ngara chisel a Proverb, bol “uchul a klengeltengat.” A kuchais el kmo a Demad er a Babeluades me a betik er a rengul ngelekel, e ra Jesus Kristo, a ngar, e meltak el kired, e sorir el omekngeltengat er kid, el ngara ngklel a Jesus Kristo, amen.