Mo Beches lokiu Ouchelreng
Eleng sel moktek er a Dios me a Tngakireng er a Jesus kristo, e kid a sebeched el mo klikiid lokiu sel omerolel a ouchel reng.
Tial klengar er a beluulechad a dulsiseb er a chelsel a llechul a beluu me a llechul a Dios. Ng kakerous el teletael a bla kngara chelsel el merritel a oberaod el telmellel a chad er a chelsle aika el eru el llach—el uchelel ak mle chad er a llach er a Court er a Utah e chelechang ak chedal a First Preisdency. A klekakerous er a llechul a chad me a llechul a Dios a mla dochelii a omereng el saul er ngak er a klemerang me a klisichel a Tngakireng er a Jesus Kristo. Sel domes a llechul a beluu, e a chad el tomelii a oberaod el telemall a sebechel mo mekelebus a klengar ngii el rokir er a blil a kelebus e diak el sebechel tuobed. Engdi sel kuk chubechub el moktel a Chedam er a Babeluades kuk ngodech. Ak mla mesang el kmo aikal osisiu el klengit a sebechel mo mousubes er tial klengar el tngkaireng er a Osobel a uchul el kirel a kngterir tirkel “rokui el mo oba ngariou el reng me a delemdemk reng” (2 Nephi 2:7). A Kristo a olsobel, ea Tngakireng er Ngii a merang,
Sel chubechub el beltikereng er a Osobel a mocholt er a chelsel a chelitakl el dirke lulngitakl er ngii a rechad er a chelitakl.
Mei er a Jesus; Ngii a mo rongesau,
El mla soiseb er a ilkolk e mla touchakl.
A beltikereng er Ngii a mo metik er kau e mo omekrael er kau
Lotebedau er a ilkolk el mo er a llomes.1
A tngakireng er a Jesus Kristo a mekengii a chesimer el mo er a “rokiu el chad [el mo] ouchel a rengrir e mei er ngii” (Doctrine and Covenants 18:11; dirrek el mesa Markus 3:28; 1 Nephi 10:18; Alma 34:8, 16). A hong er a Alma ouchais er a ouchel reng me a klausubes luldimukl er tirkel mle mekngit e omekeuad er a rechad (mesa Alma 25:16; 27:27, 30). A klemechek er a chelechal sils a meskid a urunguled, el uldimukel er tirkel mla mengubet a ngklir el diak el chedal a Ikelesia. Kid el rokui a mui er a klengit e sebeched el mo beches lokiu a ouchel reng. “Sel mo ouchel reng a diak el beot,” a Elder Russell M. Nelson a ulsisechakl er sel mlo merek el klou el ongidbel. “Engdi sel nguked a meral ngar ngii a belkul.”2
1. Ouchel reng
A ouchel reng omuchel er a Osobeled, e deureng, ng diak el berraod. Tial mlo merek el Ongeteruich me a ongerul buil el mle Kurismas devotional, ea President Nelson a ulsisechakl el kmo: “A klemerang el ouchel el reng a diak el di kora ngidil teletael. Ng diak a uebengelel techall. Ng klou a belkul er a omerolled me a budech er a uldesued, ongelaod, me a deureng.”3
A bebil er a kmal meklou a belkul osisechakl er a ouchelreng a ngara osischeklel a Alma er a Babier er a Mormon el mora rechad er a Ikelesia el uriul eng millekoi er tir el kmo “te dimlak loumerang,” e “mle ngarbab a rengir…,” e a rengir a ngara “klsuul el kloklel a beluulechad” (Alma 7:6). A bek el chedal tial mla moluut el Ikelesia a kmal betok a lsuub er a ikal osisecheklel a Alma.
Kede omuchel loba klaumerang er a Jesus Kristo le “ngii a mei el me melai a kngtil a beluulechad” (Alma 5:48). Ng kirel mo ouchel a rengud, el uaia lulekoi a Alma, “alsekum eng diak mouchel a rengmiu eng diak bom nguu a rengedel a babeluades” (Alma 5:51). Ouchel reng a klou el belkul el telengtengil a moktek er a Dios. Kid el rokui el ruebet er a klengit er tial klengar e mo cheroid er a rengedel a Dios, meng diak el sebechel a chad el mo “suobel” a lak louchel a rengul (Alma 5:31; dirrek mesa Helaman 12:22).
Tiang a dimla mosisechakl er a uchelel. A Rubak a dilu er a Adam, “Molisechakl er ngii el mora rengelekem, me a rokui el chad, er a rokui el basio,a kirir el mo ouchel a rengrir, le lak eng diak bol siseb er a rengedel a Dios, leng diak a diak el mo er sei, malechub e bol siseb er a rengedel” (Moses 6:57). Ng kired el rokui el mo ouchel a rengud er a kngtid—rokui el omerelled malechub aikel deruul lomtok a llechul a Dios. Ng diak a chad el diak lulsiseb. Sera kesus ea President Nelson a millekoi er kid el kmo, “Rodam, kid el rokui a kired el mo ouchel a rengud.”4
Sel bo do mekbeches lokiu a ouchel reng, eng kired el lobes a kengtid e kombesar el mo er a Rubak e ngii a mo meritel er kid (mesa Doctrine and Covenants 58:43). A Alma dirrek el mle olisechakl el uase kid a kired el “mo melemalt a ungil omerelled” (Alma 5:35). Aika el rokui a telengtengil sel chedaol el siotai el mei er a Kristo.
Ng kired el melai er a sakrament er a bek el Chedaol sils. Tiaikid el chedaol ruoll e kid a mo meruul a telbiil e ngmai a klengeltengat el ngosukid el mo mesisiich er a ikel omeruul me a soal a rengud el ngii a mengeroid er kid er a ikel ongtil a Osobel (mesa Matthew 5:48; 3 Nephi 12:48). Sel kid a “otngakl er [kid] er a rokui el mekngit, e oubeltikereng el mo er a Dios loba [uldesued] el rokir, rengud,me a klisiched,” e seikid, e kid a mo “cherrungel er a Kirsto” e mo “klikiid” lokiu a Rsechel e mo “chedaol, e diak a telemall er kid” (Moroni 10:32–33). Ng meral yaksok! Ng meral ongasireng! Ng meral klengeltengat!
II. Ngercheled me a Omerritel er tial Klengar
A tara moktek er a uldesuel a Dios er tial klengar er a beluulechad a mo “skeng” er kid el “uase [kid] kedemo meruul aikel rokui el Rubak el Dios er [kid] a mla dmung er [kid] el meruul” (Abraham 3:25). Meng sel telengtengil tial moktek, e kid a ngercheled el mora Dios me tirkel mla mengilt el Mesiungel a Dios, me tirkel loungerachel chedaol kerkeriil er tial klengar.
Chelsel a Ikelesia er a Rubak, a kerkeriil el mora rechedal a ikelsia a mekedmokl lokiu a roungerachel el tir osiik chedaol ulekrael. Ng ngerchelir el meritel er a chad el ngii a osiik el mei er a Kristo el mo nguu a klisichel a Tngakireng er Ngii er sel rolel a telbiil el bedul a diak a ulebengelel klengar. Sel omeritel er a klechad a mo melib el kmo ngkal chad ng keldmokl el mo soisb er a techolbechelid. Ngkal chad ng keldmokl el mo nguu a babier er a mora templo? Ngkal chad el ngklel a mla mesuld er a rekord er a Ikelesia ng meral mla ouchel a rengul lokiu a Tngkaireng er a Jesus Kristo el sebechel muut el mo nguu a tehcolbechelid?
A chad loukerkeriil el mla mokedong er a Dios a kongei er a chad a techellel, el mora templo, eng diak el belkul a kmo ngkal chad a cherrungel, e dirkak el mousubes a kngtil. A Elder Spencer W. Kimball a mle olisechakl el kmo uriul er a chad a “lemousubes [a] kelebsengel” e ngkal chad a “kirel somecheklii er medal a Dios er a babeluades sel ulebongel el ouchel reng, e di ngii a sebechel lousubes.”5 Eng di alsekum a kngtil a chad a di medechel el diak louchel a rengul kirel el mol muut er a Ulebongel el Kerkeriil sils, e a chad el dirkak louchel a rengul er a kngtil a melemolem el diak el klikiid. Sel ngarbab el ngerachel, ludimukl er sel ulebongel lomekbeches el uchul a ouchel reng, a di delongelel a dersta er kid me a Dios.
III. Okiis er a Kodall me a Ulebongel el Kerkeriil
A kerkeriil el blechoel losaod er ngii a chedaol llechukl a sel Ulebongel el Kerkeriil ruriul er a Okiis er a kodall (mesa 2 Nephi 9:15). Betok el bades er a chedaol llechukl a melekoi el kmo “kid a mo dechor e ngara kerkeriil er medal a Kristo” (Romans 14:10; dirrek el mesa 2 Nephi 9:15; Mosiah 27:31) “e mo mukerkeriil er a omerellir [el] milkedmokl er a lengara beluulechad” (Alma 5:15; dirrek mesa Ocholt 20:12; Alma 41:3; 3 Nephi 26:4). A rokui a mo mukerkeriil “loltirakl a urerir” (3 Nephi 27:15) e dirrek el “lultuill er a ikel mle soal a rengrir” (Doctrine and Covenants 137:9; dirrek mesa Alma 41:6).
A moktek er tial Ulebongel el Kerkeriil a mo olterekokl el uase kede mla mo er sel teletael el Alma mesaod er ngii el kmo “ng mesisiich lomelodech er a reng” (mesa Alma 5:14, 26), el kid a mla mo beches el chad, el “diak er a rengud a meruul a mekngit, kede di melemolem el meruul a ungil” (Mosiah 5:2). Ng kel loukerkeriil er tiang a Osobeled, el Jesus Kristo (mesa John 5:22; 2 Nephi 9:41). A uriul er Ngii a oukerkeriil e kid a mo kombesar “el kmo a kerkeriil er ngii a melemalt” (Mosiah 16:1; dirrek mesa Mosiah 27:31; Alma 12:15), le Llemesel (mesa 2 Nephi 9:15, 20) a msang a cherrungel el klemedengei er a rokui el omerelled me a soal a rengud, tirkel melemalt malechub e tirkel mla ouchel a rengrir, me a tirkel diak louchel a rengrir me a diak el mengodech.
A chedaol llechukl a smodii a teletelel sel Ulebongel el Kerkeriil. A Alma olisechakl el kmo a kerkeriil er a Dios er kid a kmo sel Okiis er a Kodall e a “rokui el tekoi a mo moluut el mo er sel teletelel er a uchelel” (Alma 41:2). “Alsekum a urerir a mle ungil er tial klengar, me a soal a rengrir a mle ungil, … e sel uriul klebesei [e te mo] moluut el mo er sel ngii a ungil” (Alma 41:3). Osisiu, “alsekum a urerir [malechub a soal a rengrir] a mekngit e te mo moluut el [mo] er sel ngii a mekngit” (Alma 41:4–5; dirrek mesa Helaman 14:31). Osisiu, e a profet Jacob a mle olisechakl el kmo sel Ulebongel el Kerkeriil e “tirkel mle melemalt a mo melemolem el melemalt, e tirkel kuk mle mekngit a mo melemolem el mekngit” (2 Nephi 9:16; dirrek mesa Mormon 9:14; 1 Nephi 15:33). Tiang sel omerelel el Moroni a omekedong er ngii “a ungil tebelel a ngarbab el Jehovah, el diak Ulebngelel el Oukerrekeriil er a rengar me a remla mad” (Moroni 10:34; dirrek mesa 3 Nephi 27:16).
Me sel bo klou a rengud el kmo kede mo beches er a medal a Dios, eng kired el mo ouchel a rengud er a uchei er sel Ulebongel el Kerkeriil (mesa Mormon 3:22). El uaia tekingel a Alma el mo er a meruul a klengit el ngelekel sechal, el kmo ng diak el sebeched el mart a kngtid er a Dios, “e a lak mouchel a rengum ea ikal kngtid a mo sioning el mei er kid er a uriul klebesei” (Alma 39:8; smisichii a belkul). A Tngakireng er a Jesus Kristo a meskid a di chimol rael el mo nguu sel dousbech er ngii lomekbeches er kid lokiu ouchel reng, e tiaikid el klengar a di chimol taem el dongedmokl el kirel. Kid a mla mosisechakl el uase a ouchel reng a sebechel melemolem er a belurir a redeleb (mesa Doctrine and Covenants 138:31, 33, 58), eng di diak desal medengelii a teletelel. A Elder Melvin J. Ballard a ulsisechakl: “Ng bai beot a douchel a rengud e dosiou er a Rubak sel ledak a bedenegd me a delbenged el di chimog. Tiaikid a taem el chad a sebechel kmal oureor e ngara ongetikaik. … Tiaikid el klengar a taem er a ouchel reng.”6}
Sel douchel a rengud, eng sebeched el mo oumerang el uase a kngtid, luldimukl a omerelled me a ikel soal a rengud, a mo mesuld e ngike el chubechub el ulebongel el mo merritel e rekid a “diak luut el dobedebek” (Doctrine and Covenants 58:42; dirrek el mesaIsaiah 1:18; Jeremiah 31:34; Hebru 8:12; Alma 41:6; Helaman 14:18–19). Omekbeches lokiu a ouchel reng, e kid el rokui el soad a diak a ulebengelel klengar, el King Benjamin a milsaod er ngii el kmo “kede [mo] kiei lobengkel a Dios er a sel diak a ulebengelel deureng” (Mosiah 2:41; dirrek el mesa Doctrine and Covenants 14:7).
Sel tara telengtengil “a moktek er a oluut” er a Dios (Alma 41:2), e a Okiis er a Kodall a mo oluut a “rokui el tekoi … el mo er sel ngii a meral cherrungel el teletelel ”(Alma 40:23). Tiang a uldimukl er a cherrengelel a rokui el tekoi er a tech el ngesegesel me a telemelel el dengai er tial klengar, luldimukl er a cheroll alechub eng serch.
Tial oluut ng rulid el mo cherrungel er a ikel rokui el diak el chedaol malechub eng mekngit el blekerdelel me a mekngit el kse el kirel? Tia diak el sebechel. Kid a mla mosisechakl el uase kid a mo mukerkeriil lultuil er a soal a rengud me a dirrek el omerelled (mesa Alma 41:5; Doctrine and Covenants 137:9) e dirrek el uldimukl a uldesued a bo demukerkeriil el kirel (mesa Alma 12:14). Ng diak el kired “lomosech er a sils er a ouchel reng er [kid]” el mo er a kodall, a Amulek a ulsisechakl (Alma 34:33), e le sel osisiu el delbengem el ngara chelsel a bedengem er chelechal klengar— a loltirakl er a Dios malechub e ngoltirakl er a mekngit—a “mo er ngii a klisichel er a [bedenged] er sel merael mei el beluulechad” (Alma 34:34). A Osobel a ngar ngii a klisichel e keldmokl el mo omekbeches er kid er a klengit. Chelechang sel taem el dosiik a Ngelsuir el mo ouchel a rengud er a mekngit lomerreled malechub eng mekngit el soal a rengud me a uldesued bol klikiid el keldmokl el mo dechor er a medal a Dios er sel Ulebongel el Kerkeriil.
IV. Chubechub el Chim
Sel kmal techel a moktek er a Dios me a rokui el Llechul a sel beltikereng er Ngii el mo e ra dersta me a dersta er kid, el ngii a “kot el kesiokel er a rokui el tekoi … e kot el ngarbab el deureng el mo er a rengul a chad” (1 Nephi 11:22–23). A profet Isaiah a melekoi el uase molmuut er tirkel kmal mekngit a sel “lobult el mo er a Rubak … e ngii a mo chubechub el kirir … [e] ousubes er tir” (Isaiah 55:7). A Alma mle olisechakl, “Oi, ngii a siotai el mo er a rokui el chad, le chubechub el chim a berrokel el kirir” (Alma 5:33; dirrek el mesa 2 Nephi 26:25–33). A mle mekiis er a kodall el Rubak a dilu er a re Nephites, Oi, a chubechub el chimak a uldars el kiriu, ea ngii di el chad el mei, a bok nguu (3 Nephi 9:14). A ikang me a bebil er a betok el osisecheklel a chedaol llechukl, e kid a medengei el kmo a oubeltikereng el Osobeled a blok a Chimal el mo melai er a rokui el sechal me a redil lultuil er a ikel Ngii a mla dmung el tekoi me bol ngai a ngarbab el klengeltengat er a Dios el kirir a Rengelekel.7
Ngultuil er a moktek er a Dios me a Tngakireng er a Jesus Kristo, e a kuuchais loba “cherrungel e mui el urungulek” el kmo a Dios a betik a rengul er kid e sebeched el mo beches lokiu a teletael er a ouchel reng. Kid a mla nguu a yaksok el kmo “alsekum [kid] a melemolem el merael, el mesuub a tekingel a Kristo, e outekangel el mora ulebongel, oi, a Chedam a mla dmu el kmo: Komo nguu a diak a ulebengelel klengar” (2 Nephi 31:20). Bo deuaisei el rokui, a ongtik e nglunguchek, el ngara ngklel a Jesus Kristo, amen.