Chelsuul a medal a Klaumerang
Alsekum e ke de ngiltii e mo melilt a ngerang a bo dekengei er a chelsel tial chais, ke dokedekii sel domes er a diak a ulebengelel, melechang sel dolia klou el ututelel er a omeruul el de bla deruul er tiang me tiang.
Nguchei er a bol mekerus, e a Jesus a milngai el mor medal a Pilate er sel blai ra kerkeriil. “Kau ke King ra re Udea?” A Pilate a ulemtelub e loker. Ma Jesus a ulenger: “A rengedek a diak el ngar tial beluluechad. … Ak [mlei] er tial beluulechad, me bok sioning e [ra] klemerang. A rokui el chad el loumerang a orenges er ngak.”
A Pilate a ulemededenger e loker, “Ngera Klemerang?”1
Chelechal beluulechad, esel ker el “Ngera klemerang?” a sebechel meringel er ngikel cheltimaim a uldesuel er a tekingel a beluulechad.
Sel dosiik e lokiu a Google ra kmong “Ngera klemerang?”a ochau a betok er a million el nger. Kid a olab a imis el betok el tekoi el ngara ikal cell phone er kid ra kuk ikel hong el seluk er a libreri. Kede kiei e lolab a tekoi ma uldasu el limis e luldingerongel. A olkebai ma mengesuseu el ngor eldi meliuekl er kid ra rokui el taem.
Ke de ngara rauereng er chelechal taem, meng bleketakl el kmo te betok el chad a mla tutii a ikel mildung el tekoi er a eru el telael ma eiim el dart el rak ra memong el dilung a Protagoras el mora Socrates: “A ikel mou merang,” meng melekoi, “a merang e lekor er kau, e a ikel kumerang a klemerang el me rengak.”2
Klemerang lokiu a mla moluut el ebangkelio er a Jesus Kristo
Ke de mlungeltengat e loba mla moluut el ebangkelio ra Jesus Kristo, e aki obang a kle ngariou el reng e ouchais el kmo ngarngii a bebil ra tekoi el bleketakl e meral klemerang. A ikal diak a ulebengelel klemerang a di osisiu el mora rokui el ngelekel a Dios.
A chedaol lechukl a olsisechakl, “A klemerang a medengei a tekoi er chelechang, ma mla memong, ma ikel ngar medad el mei.”3 A klemerang omes el bedul luriul ma ngar medal, e berrokel osengel el kirel tial kekerei el temel omroled.
A Jesus a dilu el kmo, “ Ngak e a rael, e klemerang, e klengar.”4 A klemerang a ochotii er kid sel rael el mora diak a ulebengelel el klengar, e tiang a mei el lokiu er a di chimol el Losobeled, ra Jesus Kristo. Ng diak a ngodech el rael.
A Jesus Kristo a osisecheklid el mekerang a de kiei e, oeak a Tngakireng er ngii ma okisel ra Kodall, e ngodersii a klausubes el kirel a kengtid ma di ngar el mora ulebongel er sel tara klengar. Tiang sel meral klemerang.
A Jesus Kristo a osisecheklid el kmo ngdiak el ior ra kmo ke merau malechub e ke chebuul, metekoked ma lak, kulsemuul malechub e ke hutsu el chad. Ng bai, ngerecheled a rechad a mo melisiich er a klaumerang er kid er a rubak el Jesus Kristo, e melilt er a ungil ra bai mekngit, e mo mengeluolou a Llechul. Me kede soad a ikal beches el tekoi ra science ma kar, e a ikel klemerang el kirel a Dios a chengelakl e ra ikaikid el tekoi.
Meng ngarngii a ultok el kirel a ikel klemerang er a diak a ulebengelel taem, eng di mle blechoel el ngarngii a omengblad el mengeuid er a rengelekel a Dios el mo cheroid er a klemerang. A klautok er a cherarou a blechoel el di osisiu. Morenges aikal, ochotor er ngor er a eru el telael el rak er a mla me mong:
“[Kau] a diak el sebechem el mo medengei a tekoi el diak kom ues. … [A ikel ketmokl a chad] a diak el delngerengel.”
[A Dios a diak el lomekngeltengat er kau, engdi] a [rokui el chad a di seiko] e loltirakl er [sel] lemsel.”5
“Ng diak a uchul e tiang el moua … Kristo … [mo] ngelekel a Dios.” 6
“[Sel moumerang er ngii a klebelung el omeruul me a] mongodech er a kau [uldasou].”7 di ua chelechang taem, eng diak?
Lobengkel tial mla miluut el ebangkelio, dios a mla mes kid a rael el mo mesuub e medengei a chedaol klemerang: ke mesuub aikang lokiu a chedaol lechukl, lokiu a nglunguuch me a omeruul el bla mruul, lokiu a osisechklel a ngar er a profet me a apostles, e okiu a omekrael er a chedaol reng, techang a sebechel ngosukid el mo “medengelii a rokui el klemerang.”8
Klemerang a chedaol dongchii
Ng sebeched elmo medengei a ikel tekingel a Dios sel dosiik e lokiu a reng. A Paulus a dilu el kmo, “A ikel tekingel a Dios a diak el lodengelii a chad, a lak el lobang a Reng er a Dio. … [Leng] ngoeak a reng a kede mo medengei.”9
Mesa tial sunga ra Michael Murphy. Sel domes er ngii, eng diak ke doumerang el kmong milcheduib el lokiu er a osengel a chad. Engdi, sel momes a ikel chelduib el lokiu a tara rael, e ke mesa sel klebekelel a urellel ngikal chad er a sunga.
Meng diosisiu, kede mes a ikel reng ra klemerang er a Dios e lokiu sel losengel a lomes a klaumerang. A Apostol Paulus a dillii a klemerang: “A di klechad a diak el ngai a tekingel a reng er a Dios: ele ng klebelung el mor ngii: ma dirrek el diak bo lodengei, ele ng kirem el obang a reng e kau a mo medengei.”10
Chedaol llechukl, nglunguched, omeruul el bla deruul, profet er a chelechal taem, me a sengk er a chedaol reng a meskid a chedaol uldasou er a klemerang er a tial omeroled er a beluulechad.
Tial chais lokiu a chelsuul a medal a klaumerang
Me domes er tial chais er a telungalek lokiu a chelsuul a medal a klaumerang.
A President Gordon B. Hinckley a ulchotii “The Family: A Proclamation to the World” lobengkel a cheldechedal: “Lobengkel klautok el moikri a klemerang, lobengkel a klou el mengitaik el kirel a meral teletael me a llach er a kldung, mengasireng me a olechau el mo mekokil el mengeisch er a beluulechad, ak ki melchesuar el mo mellach [kau].”11
A uchelel tial chais: “A rokui el chad—el sechal me a redil—a ulebeob el di uaia teletelel a Dios. A derstang er tir a mekreos el ngalek er a reng el sechal me a redil el ngelekel a chedam me a chedil er a babeluades, me a, leuaisei, e a derstang er tir a sebecherir el mo ngmai a chedaol teletelir ma blekerdelir.”
A ikang a diak el bo lak el klemerang. Kau me ngak a diak kede milcheuid e de mei.
Ng soak a ikakid el tekoi: “Sera uchelel, e a rengalk er a reng a mle medengelii e milnguul ra Dios el kmong Demerir el mora Ulebongel e kilngei ersel moktek er Ngii.”12
Kede mle ngar e ruchei er a de mechel. A klechad er kid a di mla ngarngii el dolab el mo cherechar. Ng tekoi el kid a diak dungil medengelii, a chedaol ulkuruled er tial beluulechad er a klengar er a uchei a mo ngodechid er tiang.13 Kede kilngei er sel moktek er a Dios. Kede mle medengei el kmo kede mo obangel a ongarm, ringel, ma klengit el reng er tial beluulechad.14 Ke de dirrekl el medengei el kmo a Osobel a mo mei e sel dochotii el kmo ke de klikiid, ke de mo mekiis er a kodall, e mo “dochelii a klebkall er a [beduld] el mo er a cherechar.”15
A chais a melmalt: “Aki ouchais el kmo sel uchul a blebelel a klengar tial beluulechad a kmal ulterekokl el chedaol. Aki smisichii el kmo a klengar a chedaol e kmal klou a belkul er sel diak a ulebengelel el uldesuel a Dios.”
A moktek er a Demad a smisichid a re kaubuch el mo omechell ra rengalk el mera beluulechad e mekngerchelid elmo mengedecheduch el mesebechakl er a re direke ngara diil.
Osisechakl er tial chais a klebokel el uldak
Alsekum ke de melilt e momelilt aikel debo dekengei er tial chais, ke de dokedekii a osenged er a diak a ulebengelel, loliang a klou a ututelel er a bo doruul er tiang me a chelechang. Sel moluluch el kirel tial chais lokiu a chelsuul a medal a klaumerang, e ke de moungil medengei el kmo nguangerang a osisechakl a klebokel el uldak, mesiou er a dersta er kid, ochoti a uldesuel a demad el mo er a rengelkel.16
Ng kired el mo mechas a rengud sel reprofet a ochoti a urelel me a, bebil, ker a di medechel? Chochoi, bebil a otengakl er a ngor er a profeta el di mereched,17 eng di mo er a rebebil el meluluuch el mo er a melemalt el ker-ker el ngii a mo oileklii loba klloureng me a mad er a klaumerang. Alsekum tial chais a mlo cholt er a ngodech el taem, eng mlo er ngii a ngodech el ker, ng kuk di ngodech er a chelechal taem. Tal el moktek er a profet a mo olngeseu er kid er aikal meliukel er kid er a meral ker.18
Uchei er a lebo el President er a Ikelesia, President Russell M. Nelson a dilung: “A profet a mes a ngara medal. Te mes aikel ngii a dengerenger er a cherarou el mla mor ngii mecha lechub eng dirkak el bor ngii er a roled. A profet a dirrek el mes aikal meang el techal mes kengri el mengiil er tirkel tir el lorrenges loba reng el mo olengesenges.”19
A kuchais er a klemerang ma mesisiich el reng er a di tal ngor ra First Presidency me a Cheldebechel er a re Teruich ma terung.
A beluulechad a omakes el morcheroid
Elsel a klengar er ngak, e kede mla mesang a klou el lomeldechel a osengel a beluulechad el kirel a betok er a ikel llach e lolsisechakl sel subed. Sera ak ngeasek ma direke blok bechiil, eng klou ra beluulechad a mlo diak e loltirakl ersel lechul a Rubak el domekedong er ngii el llechul a delboes, el kmo a mesisiich el deleongel a kirel di dubech er a delongelel a sechal ma redil el tir a bechiil e lokiu a llach. Sera ak lluich el mo okedei a rekik, e te obdois a mlo ikrii sel chedaol el losebecheklel a re direke ngara diil el ngalek, e a omekeuad er a ngara diil a mlo subed. E a ikal direke mlo merek el rak, e te betok a mlamo ikrii a lechul a Dios el kmo a chebechiil a chedaol el deliongel el delongelel a sechal ma redil.20
Omes er a rebetok el lomakes el mo cheroid er a olitechel a rubak a mla omeklatek er kid er sel sils er a Capernaum ser a Osobol el louchais er sel chedaol er ngii me a omekngit el reng er a “betok el mesiungel... a ulmakes el mo [cheroid].”
A Osobel a ulbult el mo er a reteruich me a erung: “Me kau ke direkl el morcheroid?”
A Petru a ulenger:
“Rubak, ng techa kibo er ngii? kauia olab a rokui el tekoi ra diak a ulebengelel el klengar.
“Me kemam a oumerang e ungil medengei el kmo kau ia Kristo, el ngelekel a ngar el Dios.”21
Ng diak el rokui a mo ulsedomel er tial chais
Ngar er ngii a kmal betok, remekerei me a remecheuodel, tirkel tir a melmolem el mesiou me a me rang el mo er a enangkelio er a Jesus Kristo, ma lokiu a omeruuler tir a meruul a diak el kletmokel a diak letuu er a chelsel a tial chais er a telungalek: rengalek el klengar tir a metemal lokiu a dertel a chebechiil: rengeasek el lomekaku er a lechull a klikiid er a teletael er a delboes; dertel a chebechiil er a redil me a sechal el ngii a kmal mla metemal er a laouk el reng er a bechiil; buch el sechal me a redil el diak el sebecherir loungalek; buch el sechal me a redil el bechiil el mo bechecherir el diak el losisiu a klaumerang er tir er tial mla miluut el ebangkelio; mesobil el redil me a sechal el tir, el kmo ngera uchul, a di mlak el sebecherir el mo bechil.
A tara sechelik el mla mo bekord el lluich el rak, el kmal chetengii, a diak el bechiil e leng ngodech a soal. Ng kaikid er a loltirakl a telbiil ra temple, ng mla melketek a dechal er a ureor, e mla mesiou e lungil ra Ikelesia ma buai. Ng direke milekoi er ngak, “Ng sebechek e lungil mesterir tirkel ngar tial kngarngii el melilt el diak el loltirakl er a llach ra delboes er tial beluulechad el de kiei er ngii. Eng di a Kristo ng dimlak el lolengit er kid ‘mel ke doltirakl e er tial beluulechad’? Ng bleketakl el kmo a lechul a Dios a ngodech er a ikel tekoi ra beluulechad.
Llechul a chad a blechoel el louedikl er a ikrel a olitchel aikel llach a Dios a ririul. Tirkel sorir el mo omotech er a Dios, klaumerang, klourreng, me a blakelreng a lousbech.22
A bechik, er a Kathy, me ngak a medengelii a mesobil el odos, er chelechang eng okeuang a rekil, el meduch er a urellel e ungil mesiou er a ward er ngii. Ngii el dirrekl a ulereked er a llechul a Dios. Ng miluches:
“A kureng er sel sils el bok el ngeltengat el morngii a bechik ma rengelekek. Ak direke mengiil. A bebil ra taem, e a tekoi el kngar ngii a meskak sel reng el kmo ng diak a lotkak e di ngak, eng di ak melasem el lomtebechel er a osengek el mo cheroid er sel diak er ngak, e bai omes er a ngarngii er ngak e mekerang a bo kulngeseu ra re bebil.
“Omesiou el mora rechedak, ma ward er ngak, ma templo a mla ngosukak. Ng diak a mla bes er ngak malechub el di ngak el tang e le ngak a telkib, me kid el bekl el chad a telkib er a, klou el telungalk.”
Ngar ngii kel chimong el medengei
A bebil a mo melekoi el kmo, “Ng diak ke modengelii a tekoi el ngarngii.” Ak locha diak, eng di akuchais el kmo ngar ngii a chimong el ngii a medengeii.23 Ngar ngii a chimong el ngii a medengelii a ringel el omngarngii le sel blol charm er ngii el rirelii er a sers me a ngar er a kerus a uchul. Mesel mosiik er Ngii e mngeluoleu a lechul, e ak yaksok er kau el kmo Ngii a mo omekngeltengat er kau e kmird a ikel beraod el kmal mo beraod eldi kau e loltekau. Ngii a mo meskau a rsechelim el mora ulebongel ma techall el mo mesiou. Kot el klou a ututelel, ngii a omekeek er kau loba mesisiich e deleb er a chedaol reng e melidich er kau er a chedaol el Ke feo er ngii. Diak a ullelitel, diak a ngodech el rael el ngii a kotouar er a chelmengel a chedaol reng malchub eng klengeltengat er a diak a ulebengelel a klou a belekul a domdasou er ngii.
Ak medengei el kmo a Osobel a ngar. Ak sioning el kmo ngii e a uchul a rokui el klemerang el ngarngii a ututelel e ngii a mo toketek a bek el telbiil el ngii a mle yaksok el mo er tirkel tir a mengeluolou a llechul. Lobang a ngklel a Jesus Kristo, amen.