Ng Blai el Reng er a Rubak a Kiei er Ngii
Ke mo metik a bebil er a klou el deureng er a urrerem sel moruul er a blim el mo blil a klaumerang er a Rubak el Jesus Kristo me a basio el ngii a omerk a beltikelreng.
Rodam me a rodos er a ngak, ng dmeu a renguk el mokedong el me mengedecheduch er kemiu er tial ngii a 189 el Ngarngii ra Bek el Rak el Klou el Ongdibel er a Ikelesia er a Jesus Kristo er a Uriul-klebesei el Santo. Tiakid el sils er a 1830, e a Joseph Smith a tilketekii a Ikelesia el ble lokiu omengedereder er a Rubak. Tia mileruul er a blirir a Whitmer el kmed er a Fayette, New York. Ng mlar ngii a retelolem el chedal a ikelesia me a kmeed el okeim el chad lulemes er sel sils.
Meng diak kudengei a lullekoi a Profet Joseph Smith ma osengel me a le dilchor ngiier a mederir tirkal mekesai el chad, ng di ak medenge lulemelchesiu tirkel chad el mlarngii a klaumerang er tir er a Jesus Kristo. Te ulemelchesiu er a Chedaol Reng, me te ulemelchesiu el mla er a chedaol basio. Te meral ulemelchesiu el mle uldak loba kltalreng.
Tiaikid el ongasireng el domelchesiu er ngii a soad a bol ngara chelsel a re keblid. Tia sel omelchesiu el mengai er sel losaod er ngii a Paulus el, “okiu a reng.”
A moktek er a chelechal sils a molisechakl a kudengei er a kmo kedemekera bo de blechoel el nguu tial omelechesiu e mengemedaol er ngii me bol medechel meketeket er a chelsel a telungalek er kid. Ko medengei el mla soiseb er ngii, tia diak el beot er kid el rulii. Klautok, kldidai el reng, me a klengit a kirel di ngar cheroid. Sel mechellins el beltikelreng er a Kristo a kirel me soiseb er a chelsel a rengrir tirkel ngara telungalek er kid.
A Adam me a Eve, Lehi me a Sariah, me a rebebil er a roungalek el ngara chedaol llechukl a miltik er ngii el meringel. E ng di ngarngii a ungil okesiul a di ngarngii el deureng er a chelsel a telungalek me a blai el ngii a remutech a rengud. Me a ikal okesiu a mo sebeched el mes a teletael el ngii a sebechel duubech el merkid me a telungalek er kid. Ke lotkii a dilubech el ngara 4 Nephi:
“Eng luutang meng mlo diak a klautok er a beluu, le beltik el reng era Dios a mle kiei er a rengrir a rechad.
“Meng dimlak a chelechei me a kal klakoad, me a ka luldikel, me a ka laokreng me a ka lomengeblad me a ka omekeuad, me a ka ngii dil tekoi er a deleboes; meng dirkak a rengodech el chad el mla er a deuelreng el uaitir er a delongelir a rokui el chad el mla obeob er a chimal a Dios.
“Ng dimlak a re merechorech, me a ka romekeuad, me a lechub el blarngii a rechedal a Laman, me a ka di le ngodech el cheldebechel; te bai di mlo tang el ngelekel a Kristo, el telechull er a mo er a rengedel a Dios.
“Ete kmal mle ngeltengat! Le Rubak a ulemekngeltengat er tir er a rokui loruul; me te mlo ngeltengat e melleketek el mlo lmuut er a rekil a dart me a teruich el a rak; me a kot el telcheroll er a temel a Kristo a ngilemed, e dimlak a klautok er a chelsel a beluu.”
Ko medengei, sei el taem er a deureng a dimlak el sebechel meketeket. Sel cheldecheduch el ngara 4 Nephi a mesaod er a olechotel a chedaol klengar lorael meriou er a delongelir a recheldebechel er a rungil chad. Tiang a teletael el desang er a kelteketel a rak er a chelsir a re bek el bedengir a rechad, chelsel a ikelesia, e a, kot el mekngit a rengud er ngii, a chelsel a telungalek. A dosuub er tial teletael, eng sebeched el mesa el kmo kede mekera dokerreuii e kilungii a omelchelchesuar el beltikelreng er a chelsel a telungalek er kid.
Tiakid sel teletelel lorael moriou ruriul er a erul dart el rak er a lekiei el ngara cherrungel budech el mengai er a ebangkelio.
A kldidai el reng a mlo er ngii.
A rechad a mlo diak lorous a ikel lolab el mora rebebil.
Te mocha omes er tir el ngarbab malechub e te ngariou er a tang.
Te mocha merael mo kekerei a klaumera er tir er a Jesus Kristo.
Te mocha oltuub.
Te mocha meruul a bek el bedengel a klengit.
A remellomes a rengrir loungalek a kerekikl el mes aikal blekeradel sel borngii er a delongelir el telungalek. Tir, a uaisei, el mo suebek a rengrir. Engdi te mo medengei el kmo a uchul tiang a Diablong el mengetikaik e melasem lomekrael er a re ungil chad el metengel er a rael el mo meruul a klengit mel bo lak a klisichel Chedaol Reng er tir. A melomes el chedam me a chedil a mo mesang sel techal el ngara medal el mo omekrael er bek el ngelkir, tir, e mo muut el kongei er a mengemdaol er a rubak el mo er ngii.
Kau a sebechel ngarngii omrelii el olengit er a ngalek el mo ouchel a rengul, el kirel a ua tial tekoi, er a kldidai el reng. Ng sebechem el melasem el mengeluch er a rengalek el mo oldars a betok el ngarngii er tir. Ng sebechem lolengit er tir me bolak lomdasu er tir el kuk kungil er a tang er a chelsel a telungalek. Eng di kemei er a tekoi el ngii ak kulsaod er ngii er a uchei e “te ulemuchel el mo klou el klaumerang er a Jesus Kristo.”
Ngarngii a tekoi el mo ngoikau el mo omekrael er a telungalek er kau el ngosechekl el mo er sel chedaol basio el kau a soam a leborngii—e kau el dirrek el mo obengterir. Me sel molngeseu er tir lomekeroul a klaumerang er tir er a Jesus Kristo el ngii a Osobelir, e tir a mo melchesuar el sorir el mo ouchel a rengrir. Sel loruul el uaisei, ea klengariou el reng a mo mtechir a kldidai el reng. Sel bo lomuchel melchesiu a ikel blal besterir a Rubak, eng mo sorir el merous a betok. A kaiueribech el mo ngarbab me a chetengakl a mo diak. A otuub a mo motitech el mo diak lokiu a beltikelreng. E sel ulebongel, el di uaisel milkedmokl el mo er tirkel chad el mle obult lokiu a King Benjamin, el klemeriar reng el mo meruul a ungil a mo melisiich er tir lomtok a ngibesereng el mo meruul a klengit. A chedal a King Benjamin a uluchais el kmo the mla “diak debskii a techal el mo er a mekngit.”
Sel domekedechor er a klaumerang er Jesus Kristo e uchelel a diak el moluut er a mo merek el chedaol er a telungalek er kau me a chelsel a blim. Me a klaumerang a sebechel luchul a mo ouchel er a bai osisecheklem er a bek el blekerdelel a chedaol klengar el dimerael mo kekerei.
Ngungil a omomekrael lokiu okesiu. A rechedal a telungalek me a re kuk rebebil a kirir el mesekau el merael mo klou a klaumerang er kau er a Jesus Kristo me a ebangkelio er ngii. Kau a kmal dirk ngilai a betook el ngesou. A roungalek el ngara Ikelesia a mla mukngeltengat er a mlukrael el suobel el mora telungalek me a mora di chimol chad. Mesel mousbech er ngii, e ke mekerulii a klaumerang er kau me a klaumerang er a rengelekem er a Rubak el Jesus Kristo.
Mukeroul el ngara Klaumerang
A klaumera er kau er a Osobel a mlukeroul er sera motireklii a tekingel a President Russell M. Nelson el lemuut el mo choieuii a Babier er a Mormon. Ke lilia olangch ra bades ma tekoi el ngii a melutk el kirel Osobel. A klaumera er kau er a Jesus Kristo a mlukeroul. Di ua beches el delomel, uaia klaumerang er a Jesus Kristo a mo mechuut alsekum e ke metik er a real el ke melemolem el mo omdasou e mo smiich er a meluluch.
A okesiul a okerulem er a klaumerang a locha mo diak el motirakl ra rokui el chedal a telungalek er kau er chelechang. Eng di bol klou a regnum lokiu sel teletael el dilubech el mora kekerei el Alma. Sera lesal meringel lousbech ouchelreng me a klausubes, eng mlo dobedebekii a klaumerag er a demal er a Jesus Kristo. A re ngelekem a locha mo dobedebekii a klaumerang er kau er a Osobel er sel taem el tir a kmal lousbech er a ouchelreng. A Alma dilii tiang el kirel seikid el taem:
“Meng mlo uaisei me sera kungarm er a ringel, me ak meringel el kirel a betok el kngtik, e mesang, ak dilbedebekii el dirrek el rirengesii a demak lomlaoch er a ta el Jesus Kristo, el Ngelekel a Dios, el mo melngakireng a kngtil a beluulechad.
“Me chelechang e bocha kudesuii tial tekoi, e ak lilangel er a chelsel a renguk: Jesus, kau el Ngelekel a Dios, bom chebkak, el ngara klou el ringel, el iliuekl er a bambatel er a diak a ulebengelel kodall.
“Me chelechang, mesang, sera kudesuii tiang, eng mlo diak kulebedebek a ringel el ngar ngak; oi, a berraod er a ringel el mlara uldesuek a mlo diak.”
Meluluuch loba beltikelreng
A tara mo obengkel a okesiul a ulekerulel a klaumera er kau, a ngara nglunguuch el telungalek el ngii a klou a ultutelel el rulii a blai el chedaol basio. A imol chad a blechoel mengilt el mo melekoi er a nglunguuch el kirel a telungalek. A nglunguuch sel bleketakl el mora Dios el kirir tirka el chad el outubaruach e orrenges, e a klaumerang a mukeroul er a chelsir el rokui. Ng sebecherir lomelchesiu er a olechotel a beltikelreng el mora Chedam er a Babeluades me a Osobel. E a chad el ngii a meluluuch a mo duli tirkel tira mo outinaruach er tirkel tir a ousbech a ngesou, rokui a sebechel melchesuar er beltik el reng el mo er tir me a bek el chad er a telungalek.
Ngii mesel le chedal a telungalek lak el kiei lobengterir, a nglunguuch a sebechel toketekii a kmes el beltikelreng. A nglunguchel a telungalek a sebechel merkii a beluulechad. Ng betok er a tang el blo kudengei el chedal a telungalek el cheroid a miluluuch er a osisiu el taem el kirel osisiu el tekoi ngii me a ngak. A denguu er ngak, e tial meketeketa el tekoi el “A telungalek el dmak el meluluuch a di dmak” a sebeched el kilungii el mo “A telunglek el dmak el meluluuch a di dmak, ngii mesel le chacheroid.”
Olisechakl er a Di Merechel el mo Ouchel
Leng diak a ta er kid el cherrungel ma rengud a beot el metemall, a uchul e a telungalek a sebechel mo chedaol basio eldi merekmo bo douchel di mereched el ngara rengud. A roungalek a sebecherir el mo okesiu. Oberaod el tekoi ma mekngit luldasu a sebechel bo douchel el mereched el ngara rengud. A di beot el “Komeng” a sebechel omekungil a telemall e msa klausubes me a beltikelreng.
A Profet Joseph Smith a mle olecholt er kid sera bol charm a ringel, diak lungil chad, me a dirrek el klautok er a tulngalek er ngii. Ng di mle mereched el lousubes, e ngii a di mle medengei el kmo ng kal chad er a mekingt a lemuut el omecherabech. Ng ullengit a klausubes, e mle mimokl el ousubes.
Omekeroul er a Reng er a kle Missionary
A rengelekel a Mosiah el sechal a mle balk a rengrir el omerk er a ebangkelio el mora rokui el chad. A klemeriar reng er tir a mlo er ngii er sera bo louchel a rengrir. Ng meringel er tir sel lomdasu er a ngii di el chad el ngara ringel er a kngterir el mle uaitir. Me te mlo chemau a betok el rak el loldngakl er tir, chuarm, me a kengaol el mo omerk a ebangkelio er a Jesus Kristo el mora re cherreuir. Chelsel tial omerael, e te miltik a deureng er a rebetok el mlo ouchel a rengrir e ngiluu a deureng er a klausubes lokiu a Tngakireng er a Jesus Kristo.
A telunglek er kid a mo mukeroul a klemeriar reng er tir el mo omerk er a ebangkelio sel bo lolechesuar er a deureng er a klausubes. Tia sebechel mouaisei sel lomekbeches a telbiil sel bo lolai ra sacrament.. A reng er a kle misionari a mukeroul er a rekeblid sel rengalek me a roungalek lomelchesiu er a deureng er a klausubes er a ongdibl er a sacrament. Okiu olechotel omengull, ea roungalek me a rengalek a sebechir el kaingeseu el mo melchesuar a deureng. Tial deureng a sebechel mo kemanget el mult a re ke blid el mo blil omesuub el mo misionari. Locha diak el rokui a mora mission, engdi a rokui a mo melchesiu er a klemeriar reng el mo omerk er a ebangekelio, el ngii a mla ngoititerir el mo melchesuar a kalusubes me a budech. Ng diak el iior el kmo te mui el mesiou malechub eng diak, te rokui el sebechir el melchesuar a deureng er a berkel ebangkelio el mora rebebil.
Mora templo
Mo er tirkal chedam me a chedil me a tengalek, a templo a ungil techal el mo ngmai a reng me a beltik el reng er a chedaol basio. Tia kmal klemerang sel dirk le mekekerei a rengalek. A rengalek a mechell loba Llemesel a Kristo. A tolechoi a dirrek el sebechel melchesuar er a templo el chedaol. E le a roungalek a betik a rengrir er a mekekerei el ngelekir, a templo a olechotel a urungulir el mo sebechir lobetiterir a rengelekir e oubeltikelreng er tir er a diak a ulebengelel—telungalek.
A bebil rekemiu a ngarngii a siasing er a templo er a rekeblimiu. Chelecha bocha lobdois a templo lomerk ra beluulechad, ng sebechel a betok el oungalek el mo oldingel a templo lobengterir a telungalek er tir. A remekesai a locha sebechir el mora open house sel bol dechor a templo. A roungalek a sebecherir loker ra rengelekir er a ble lomelchesiu sera lekeed malechub el lengara chelsel a templo.
A bek el oungalek a sebecherir louchais a loumerang er a ultutelel a templo el mo er tir. A President Ezra Taft Benson, el kmal soal a templo, a blechoel louchais er a lomes ra delal el mekekokil melabek a bilel er a templo. Ng dirrek luluuchais er a le ngalek e lomes er a rechad ra blil er a lorael el mora templo.
Sera le President er a Ikelesia, eng mlo ra templo er a osisiu el sils er a bek el sandei. Ng mle blechoel el meruul a ruoll ra templo el kirir a rebeldekel. Tia mlengai er a okesiul a demal me a delal.
A Klaumerang er Ngak
Ke mo metik er rebebil er a ungil reng er sel omelasem er kau el mo rulii a blim el basio er a klaumerang er Rubak el Jesus Kristo e basio el ngii a omerk loba beltik el reng, dmolech el beltik el reng er a Kristo. A Olutel a ebangkelio a ulemuchel er a beot el ker el mludasou er a hutsui el blai, e sebechel melemolem er a derta er aikal blid sel dolemolem el omuchel e oltirakl a suobel er a ebangkelio er a chelsel. Tia di mla urunglek el mle kot el soak er se er ak dirk kekere el buik. Kom rokui el mla mes a uaika el obliil. E a rebetok er kemiu a, uleba ngesou ra Rubak, e kildmokl.
A rebebil a mla melasem el mui a rengrir el kirel tial klengeltengat, engdi dirkak el nguu. A yaksok er ngak el merkemiu a le bilskak a tara chedal a Chelechad er a Teruich me a terung el Apostol. A yaksok er ngak el merkemiu a le bilskak a tara chedal a Chelechad er a Teruich me a terung el Apostol. Ng dilu el kmo, alsekum a kungil dobedebek, “Kau a simbai er a cheleuid el tekoi. Di bom kiei el klikiid el kirel a rengedel a celestial, e a semecheklel a telungalek a mo ulis el klebokel el kau a diak el sebechem el metebengii.”
A kumerang el kmo ngii a mo odersii tial deureng er a oureng el mera ngii di el ta er kid el ngar tial beluulechad el mla remuul a rokui el sebeched el mo nguu a diak a ulebengelel klengar kid me a chedal a telungalek er kid. Ak medengei el kmo a uldesuel a Demad er a Babeluades a uldasou er a deureng. A kuchais el kmo a uldesuel a rulii meng mo sebechel a bek er kid el ngii a mla remuul aikal tkul rebab el sebechelir el mo merengues el telungalek el mo cherechar.
Ak medengei el kmo a kiis er a priesthood el mlo luut el mora Joseph Smith a mlodelid el diak el meloched el mora President Russell M. Nelson. A ikaikid el kiis a rulii meng sebechel a omerenged el telungalek er chelechang. Ak medengei el kmo a Chedam er a Babeluades a betik a rengul er kid, a re ngelekel er a reng, loba cherrungel el beltikelreng. Ak medengei el kmo nguchul sel Tngakireng era Jesus Kristo, eng sebeched el mo ouchel a rengud, mo beches, e mo klikiid el kiei er a ungil telungalek el mo cherechar lobengkel a Demad er a Babeluades me a Betik ra Rengul el Ngelekel, el Jesus Kristo. Ak olecholt er a klaumerang er ngak loba ngklel a Jesus kirsto, amen.