Osiik a Llomes lokiu a Chedaol Reng
Ng kired el mesuub el mo sebeched el dongchii a klemerang el diak el di lokiu a uldesued ng dirrekl lokiu sel kmal chelellakl e kekerei el ngor er a Reng.
Rodam me a rodos, a rubak a mla omelekl el melekoi er kid el mo “osiik a llomes lokiu a omesuub me a klaumerang.” Kid a sebeched el ngmai a llomes me a klemedengei el diak el di lokiu a uldesued, ng dirrek lokiu a otireklel me a llomes er a Chedaol Reng.
Tiang a tara uchul e a llomes a dimlak el blechoel tebechedel a klengar er ngak.
A bechik, er a Irene, me a ngak, a mlo chad er a Ikelesia el mla mo 31 el rak er sera ki dirk blo bechiil. Aki mlukeroul er a Colombia, eng di uriul er a sesei el buil er a ki bo bechiil, ea urerek a uchul ea ki millukl el mo er a Germany. Aki mle ngeasek el obekl meng mle klou a kimoureng me a ki mongerchir. Ng kmal mle tokubets el ungil taem el mer kemam.
Me sei e ak kmal mle mechesang er a urerek, ea Irene ulmelchesiu el kmo ngar ngii a tekoi el mer kemam el mla er a babeluades, el dimlak ki modengei el kmong mekerang e oingerang. Me a Irene a mocha mechititerir a rolterau oteruul el merael a blai el me soisb er a blimam lolterau a reua encyclopedia, vacuum, hong er a omeruul el kall, klalou er a uum, ma lemuut el bebil, el eng milngiil er sel tokubets el klumech.
A tara kesus, eng uluchais er ngak el kmo a re terung el sechal loubail a chedelekelek el bail a millengod er a chesimer meng ulmelchesiu el mle bleketakl el kirel lolengit er tir me bel tuu er a chelsel a blai. Te dilung er ngii el kmo ng sorir el mengedecheduch er ngii el kirel a Dios eng di kirir el lemuut el mei sel ngak a ngara blai el dirrek. Tiang locha sel tekoi el ki mongiil er ngii?
Te mocha omechelang loldingel er kemam, maki oltirakl er tir, ea ki milenguiu er a chedaol llechukl e mocha medengelii sel klou a ututelel kirel a Jesus Kristo el Osobeled. Ng mlo ouchel a rengmam el kmo aki miltecholb sera kim tolechoi, el ngii a telbiil el dimlak a omesodam el kirel. Engdi, alsekum aki lmuut el mo metecholb eng belkul a kmo a ki mo chad er tial beches el Ikelesia, me a kot eng mle somam el mo ungil medengei a rokui el kirel.
Engdi ng mekerang aki bo modengei el kmo aika el osisecheklir a re missionari el kirel a Babier a Mormon, ma Joseph Smith, ma moktek er a mo suobel a meral klemerang? Ma leuaisei, aki di mla medengelii a tekingel a Rubak el kmo “Komo medengeleterir lokiu a tekoi el loruul.” Maleuaisei, eng mlara blechebechel, ea ki mocha mesuub er a Ikelesia lomes aikel rodech lomes er ngii lokiu a kmal di uldesuam. Ngerang a ki milesang? Ma leuaisei, aki miles:
-
A ungil rengrir a re chad me a klebokel el telungalek el mle medengei el mo kid a kired el mo omelchesuar a deureng er tial klengar el diak di de ngar a ringel me a klengit el reng.
-
A ikelesia a diak lomdoud er a rechad el meruul a urelel a ikelesia, ngbai tir el chedal a ikelesia a kongei el meruul a ureor me a ngerachel.
-
Ng ikelesia el Jesus Kristo me a telungalek a kelulul a rokui tekoi, el rechad er a ikelsia a olsengerenger el tal taem er a tal buil e oldars el mo er a remechebuul me a re ngesool, me a ungil omengdemeklel a bedenged a loruul, e olsisechakl er kid el diak dolai a mekngit el kar.
Nguldimukl er tiang:
-
Ng mle somam sel mesisiich el omsodel a ulekerulel a chad, tekoi er a omsuub, blakelreng er a ureor, e sebechel di ngii.
-
Aki silubii sel ungil brokuram er a meklou el ngesou.
-
E dirrek el mlo mechas a rengmam el kirel a klou el ongdibel el ngar ngii a klebokel el chelitakl me a dmolech e chedaol el osisechakl el medung.
Sera kimues aikang, eng dimlak kibetik er a ngdi el ngerang el mekngit er a Ikelesia. Ea tara tekoi, ng kmal mle somam a rokui el ki ble mues. Engdi, ng dimlak el sebechemam el tibir el mo metecholb eleng mle somam el mo medengeii a rokui el tekoi er a uchei er a ki metecholb.
Ng uaisei, el ki mulmededenger, eng di a Rubak a milkokil mengedmokl er kemam, Ngii a mesemechokl er kemam, e Ngii a ulngeseu er kemam el mo metik el kmo ng kired el mesuub el mo medengelii a klemerang el diak di lokiu a uldesued eng bai dirrek lokiu sel chelellakl e kekerei el ngor er a Chedaol Reng, el ngii a mengedecheduch el mera rengud.
Tial ngor me a ki blo molchesuar a mlei er a tal kesus er a uriul er a 10 el buil er a omesubel a ebangkelio, el sera ki monguiu er a Mosiah 18: “Kemiu tial el somiu … el mo ngosuir a tang me a tang er a chelengelel me bol kebekakl, … e mengelaod er a rengara klengit el reng, … alsekum tiaikid sel soal a rengmiu, ng diak el somiu el mo metecholb er a ngklel a Rubak?”
Tial bades er a Babier er a Mormon a siliseb er a rengmam me a bedengam, me a ki di mlo omelchesiu e mlo medengei el kmo ng kmal diak a ungil uchul eng diak ki bo metecholb. Aki mlo omtab el kmo aikel soal a reng el mildung er tial bades a dirrek el soal a rengmam a ikal tekoi e ngii a kmal klou a belkul. Ng kuk mle meklou a belkul er a klemedengei er a rokui el tekoi ele aikel ki ble modengei a mle ungil besul. Aki mle blechoel lultuil er sel ongetikaik er a Chedam er a Babeluades e ulumerang el kmo Ngii a mo melemolm el omekrael er kemam.
Me seikid, el osisiu el sils, ea ki tilbir a sils el ki bo metecholb er ngii, meng di mle mereched ea ki kol mocha, miltecholb!
Ngera kisilubii er tial teletael?
A kot, ea ki silubii el kmo ng sebeched el mui loumerang er a Chedam er a Baleuades, el ngii a blechoel melasm lolngeseu er kid el mo ua ngkel chad el Ngii a medengei el kid a sebeched el mo uai ngii. Aki mlo ungil medengelii a dmolech el klemerang er sel tekingel er sera ledung: “Ak mo mesterir a rengelekir a rechad a llach mel sebechir mekoketerir loltirakl; ea klengeltengat a mo er tirkel loltirakl a llechuk, …me te mo mesuub a llomes; eng ngkel loltirakl er ngak ak luut el mesang a betok”
Ongerung, ea ki silubii el kmo, uldimukl er sel tabesul uldesued, sel tara teletael el kirel omelai llomes a sebechel lomekrael er kid e meskid a klemedengei. Ngii a chelellakl e kekerei el ngor er a Chedaol Reng el mengedecheduch el mera rengud me a uldesued.
Ng soak el mengaisisiu er tial osisechakl me a telkelel a osenged. A Demad er a Babeluades a mla meskid a diak el dil chimong ngbai tebelong el chelsul a medad. Ng sebeched lungil lomes loba chimol chelsul a medad, engdi sel ongerul chelsul a medad a meskid a tara ues. Sel ngii el cheru el ues a mo dmak el ngara btelud, eng meskid ongedei el siasing er a ikel meliuekl er kid.
Ngosisiu, e kede mla ngmai a eru el uchul a omelekoi, lokiu a teletael er a tech me a chedaol teletael. A uldeused a ochotii sel imong el ues lokiu a ulsbechelel a bedenged me a omesoded. Engdi ngokiu a sengk er a Chedaol Reng, ea Chedam a mla meskid sel ongerung el ues, el ngii a kot el klou a ultutelel e di chimong el merang, ele ng melelmalt el mla er Ngii. Eng di sel omengelulau er a Chedaol reng a blechoel chelelakl, ea betok el chad a diak lomelchesuar ngii el tara olechotel a tekoi.
Aika el eru el ues sel boldak er a rengud, ea chimong a ochotii sel siasing er a tekoi el ngii a meral ngar sel teletelel. Ng klemerang, ngokiu sel tara ues el Chedaol Reng, ea bebil er a “meral teletael,” a kmal di chemolt er sel klemedengei er a uldesued, el ngii a sebechel lochotii el kmo ngcheleblad malechub eng chelbirukl. Bo molatk a tekingel a Moroni: “Le ngoeak a klisiichel Chedaol Reng e kau a mo medengelii a klemerang er a rokui el tekoi.”
Chelsel tial mla mo okedei me a ta el rak el kchad er a Ikelesia, eng betok el taem e ak mlo chemau a teletael el kmo alsekum e kid a kmal di ultuil er a uldesued e diak dekengei malechub eng diak dousbech er sel chedaol klemedengei el denguu lokiu a omengelulau me a odbechel a Chedaol Reng, eng kora di uai alsekum kid a merael er tial klengar el di chimong a chelsul a medad. Engdi a kora di melekoi, kid a meral bileskid a teblong el chelsul a medad.” Ng di sel uldekial a eru el ues a sebechel meskid a merang e cherrungel el siaising er a rokui klemerang ma rokui el kid a mla mo chemau er a klengar er kid, ma dirrek el dmolech el klemedengei er a olechoted me a moktek el ngelekel a ngar el Chedam er a Babeluades.
Ak mo lotkii sel osisecheklel a President Nelson er tial mlo merek el rak sera ledung “a ikal merael mei el klebesei, eng mo meringel a bo desobel er a chedaol tekoi a lak a mengetikaik, omekrael, omengelaod, me a blechoel odbechel a Chedaol Reng.”
Ak kmal mla mo ungil medengei el kmo:
-
Ngar ngii a Demad er a Bableuades, e kid el rokui a kilengei el mer tial beluulechad eleng tebedechel sel chedaol moktek.
-
Ea Jesus a Kristo; Ngii a ngar e ngii a Osobelek.
-
Ak medengei el kmo a Joseph, el mle ngariou a rengul el buik er a sers, a mlokedong el mo mesisiich el profet el rirelii tiang, el olutel a ebangkelio er tial klengar, lolab a rokui el kiis, klisiich, me a klisichel a chedaol priesthood er a Dios.
-
Ak medengei el kmo a Babier er a Mormon a ongeru el sioning er a Jesus Kristo ea re telungalek a kmal kirir el dmak el mo cherechar.
-
E ngak a medengei el kmo a Rubak, el Jesus Kristo, a mengetikaik er tial, mla moluut el Ikelesia er Ngii, lokiu a ngar el profet, el President Russell M. Nelson, er a chelechal taem.
Aikang me a bebil er a mekreos el klemerang a teketekel a chedaol teletael el Rubak a ulngeseu er ngak el mo uai ngii. E ngak a mad el tmuil el mo er a betok el beches el osisecheklel el Ngii a soal ngak—me a kau—a bo dengai sel dorael er a chelsel tial klebokel el klengar e “mesuub … el mesuub el loba klaumerang.”
Ak medengei el kmo aikang a klemerang ma kuuchais el kirel loba ngklel a Jesus Kristo, amen.