Keldmokl el mo Melai aikel Bek el Ulsbechall
Ak sioning el kmo a klengeltengat a morngii sel dolasm el meruul aikel ngercheled el mo mesuub e oubeltikelreng er tial mla moluut el ebangkelio er a Jesus Kristo.
A brokuram me a teletael er a Ikelesia er a Jesus Kristo er a Uriul-klebesei el Santo a mocha chomuchel ra blai ea Ikelesia a olngeseu loldubech, lolechotel a aikel teletael el mlocholt er sel dirk mlo merek el ongdibel. President Russell M. Nelson a ulisechakl er kid el kmo: “Ng kmal dirk kebetok a merael mei. … Mongang a kerum el vitamin. Bo molenguul a bedengem. Ng mo ungil a renugd.”
Ak meluluuch e siotai er a ngelsuil a Chedaol Reng er chelechal bo domes a bebil ra otutel aikal ngarngii el lomelodecher ar tial mla moluut el Ikelesia er a Rubak.
Omuchel er a Blai e Oba ngeseou er a Ikelesia er a Omesubel a Ebangkelio
A Elder Craig C. Christensen a mle keldemek er tial dirk mlo merek el ongdibel er a priesthood leadership, e ngii a ulusbech a cherul beot el ker el smisichii sel osisechakl el ngii omuchel er a blai loba ngeseu er a Ikelesia. Ngii a ulechotii a uldesuel el kmo sel bomrei ruriul er a miting er a Ikelesia e bai lak mo ker el kmo, “Ngera omsilubii el kirel a Osobel me a ebangkelio er Ngii sera omngara Ikelesia?” ngbai kired loker sel omngara Ikelesia el kmo, “Ngera omsilubii el kirel a Osobel me a ebangkelio er Ngii a omngara blim er a chelechal sandei?” Klebechel rorel a dongull er a Chedaol sils, beches el teletael er a omesuub, me a milsemechokl el temel a miting a rokui el sebechel ngosukid el mesuub er a ebangkelio a dengara blid me a ikelesia.
A bek el chad er a Ikelesia er a Jesus Kristo er a Uriul-klebesei el Santo a ngar ngii a ngerchelir el mo mesuub e oltirakl a osisecheklel a Rubak e mo ngmai lokiu a telutk el klisiiich a chedaol ruoll el kirel a olsobel me a diak a ulebengelel klengar. Ngdiak el kired el mengerchiill er a Ikelesia el ngii a chelechad el mo olisachkl malechub ngouchais er kid a rokui el tekoi el kired el mo medengei e mo meruul mebo dungil mesiungel a Rubak e le blak a rengud el mora ulebongell. Ng bai kirel, ngercheled el mo mesuub aikel kired el mesuub, e mo kiei el uai kel dodengei el teltael el kmong mekera de kiei, e mo ngkel ngii a Mastang a soal a debo deuai ngii. A rekeblid a ngii a blil a omesuub, klengar, me a roled el moungil.
Sera lengalek, ea Joseph a Smith a silubii a Dios lokiu a telungalek er ngii. Sel dechal a rengul el mo sikii sel soal a rengul a Dios el kirel a rirelii a Joseph el mo osiik er a klemerang er a delongelel a betok el kakerous el klechelid, e blak a rengul mesuub a chedaol llechukl, e mla er ngii a rengul meluluuch el mora Dios. Sera ngeasek el Joseph Smith le kaieri el mo remei ra le ngara Sacred Grove er sera lesa Chedam me a Ngelekel, eng mle kot el mo mengedecheduch er a delal. Sera “lultuil er a blil a ngau, [ea] delal a uleker el kmo ngera mengesang er ngii. [Joseph] a ulenger, ‘Ngdiak, a rokui a di ungil—Ngak mak di ungil.’ [Ngii] a dilu el mo [er a] delal, ‘Ak mla subii el kirek.’” Tial okesiul a Joseph a olechotel a mesisiich el teletelel a omesuub el ta ma ta er kid a kired el meruul er ngii. Kid meng kired el mesuub me ke de nguu a klemedengei el kired.
Sel moktel a Chedam er a Babeluades el mora Rengelkel a mo uai Ngii. Meng uaisei, Ngii a meskid a meklou a belkul techall me bo de mukeroul e dolemolel el merael mo ungil. Sel blakelreng er kid el mo mesuub e kiei loba klemerang a kmal klou a belkul er a beluulechad el ngii a “ngara uldikel” e ngara rau el reng me a klengit. Ngdiak el kired el mengerchir el kmo kede mora miting ra Ieklesia e teloi ra brokuram er ngii me kede mo mukeroul er a chedaol tekoi e nguu a selbechakl el ngosukid el mo “mesisiich er sel sils er a klengit.”
“A chedam me a chedil a ngar ngii a chedaol ngerchelir el mo omekeroul er a rengelkir loba beltik el reng ma llemalt.” A rulekrael el merredel er a Ikelesia, resensei, me a omeruul a ngosouir a tal chad me a klisichel a telungalek mebol mukeroul er a chedaol teletael. Meng uaisei el kid el rokui el ousbech a ngeseu el melemolm lomakes el moruchei el ngara rael er a tebliil, engdi sel klou a belkul ngerachel lolngeseu a chedaol klisiich me a dechal a rengud a kmal di ultuil er a ta ma ta er kid.
Ka momtab er a Nephi, el ngelekel a pofet Lehi, a mla rengii a rengul el mo omes, orrenges, e mo di ngii el medengei lokiu a klisichel a Chedaol Reng aikel tekoi el demal a siluub er sel ues er a kerekar er a klengar. A Nephi a bleketakl el soal mo medengei e mo mukngeltengat sera lengeasek lokiu a okesiu me a osisecheklel a “kedung el demal me a delal.” Mal uaisei, el diuai a Joseph Smith, eng mle semeriar el mo mesuub e mo medengei el di ngii.
Alsekum kemiu el rokui malechub eng ngak a klemedengei er kid er a Jesus Kristo me a oluutel a ebangkelio er Ngii a lolsisechakl el merkid a rebebil malechub e te ouchais er kid, ea delcherul a klaumerang er kid el er a Chedam me a klebokel el Urelel er tial Uriul-klebesei a dechor er a chelechol. Ng diak el sebeched el di ultuill malechub e kede meleng a llemsel a ebangkelio me a klaumodengei er a rebebil er a rechad—luldimukl er tirkel betik a rengud e oumerang er tir.
Klou a ututelel, el Profet Joseph Smith a ulisechakl el kmo bek el Uriul-klebesei el Santo a kirel mo medengei el di ngii “a teletelel me a moktek er a Dios sel demei er tial beluulechad.”
“Ng sebeched el menguiu e mtab aikel rokui el mla meluches er sera temel a Adam, me sel delongelel a chad el mo er a Dios me a re anghel er a ngarmederir el taem, a kired el medengelii a telkib er ngii. Omengiued er a klengar er a rebebil, malechub eng ocholt el mlo er tir, a kmal diak el sebechel meskid a ungil osengel a teletael el de ngarngii me sel meral deleuill er kid el mo er a Dios. A klamedengei el kirel aikal tekoi a di tal sebechel mo er ngii lokiu a omerelled el meruul a chedaol ruoll er a Dios el ngii a mekedmokl el kirel seikid el moktek.”
Sel mo kudmeklii tial ngarbab e chedaol moktek el mo er a dersta el chad me a telungalek a tara uchul ea brokuram me a omeruul er a Ikelesia er a Jesus Kristo er a Uriul-klebesei el Santo a mocha omuchel er a blai e loba ngeseu er a Ikelesia el di kirel chelechal taem el ngii a rengedel a cherrungel el team.
Omesodel a Omuchel er a Blai e Loba Ngesou er a Ikelesia el Omesuub
Soak louchais a bebil er a beot el omesodel a omesubel a ebangkelio el ngii a merolang el mo klou el omuchel er a blai loba ngsou er a Ikelesia.
Sel kot el bill omesuub el mo misionaari a ngara re keblid; a ongerung el blil omesuul el mo misionari a ngara Provo, Manila, Mexico City, me a bebil er a basio. Sel kot lungil osisechakl er a Sandei Skuul a sel omesubel a tal chad me a telungalek el mesuub er a rekeblirir; ulsbechall engdi ongerung a class er a Sandei Skuul el ngar ngii er a ikelesia.
A blil a reksi er a telungalek a ngara rekeblid. Aikel bebil er a ngeseu el kirel a skel a reksi er a telungalek a debetik er a ikelesia.
Sel klou a ututelel el class el kirel a omengedmekled el mora temlpo meng ngara rekeblid; klou ututelel engdi ongerung el class er omengedmekled el mora templo a dirrek el ngar ngii er a ikelesia.
Meruul a rekeblid el ngii a basio el sel dengar ngii eng sebeched el dechor er a chedaol basio a klou a ututelel er aikal uriul klebesei. Meng uai sel klou a ututelel a omuchel ra blai e loba ngesou er a Ikelesia er a omesuub a kirel a chedaol klisiched e mesebechakl er kid er a chelechal taem, e kmal lemuut el mo klou a ututelel er a ngar medad el taem.
Omuchel er a Blai e Loba Ngesou er Ikelesia Lomesuub me a Omengedmeklel a mora Templo
Kulengit me momtab el kmo ngmekerang sel osisecheklel a “omuchel er a blai e loba ngesou er a kelesia ” a sebeched lousbech el kirel a kedmeklel a tal chad el klikiid el mo melai a chedaol ruoll me a telbiil er a blil a Rubak.
Ng uaisei, a kedmeklel a mora templo a kot el kiter er a chelsel a reblid. Engdi betok el chad er a ikelesia a omedednger el kmo ngera kired el melekoi ma diak el kired el melkoi el kirel a dulruul er a templo sel be de tobed templo.
A President Ezra Taft Benson a uluchais el kmo ngera uchul me tial rau el reng a ngar ngii:
“A templo a chedaol basio, ma ruoll er a templo a chedaol omeruul. Ele ngii el chedaol mesel bebil ra taem e ngdiak el soad el mesaod a ngii dil ngerang el kirel a templo el mora rengelked ma rengelkir a rengelked.
“Mi sei ea uchul, e te betok a diak bol ngar ngii ra rengrir a mora templo, malechub eng oingerang e te mong, meng diak el sal medengei el kmo te mekerang e mengedmokl er tir el mo melai a ngerachel me a telbiil.
“Ak kumerang er a tabesul klemedengei a kmal klou a lengesouir el kudmekelterir a rengeasek el mora tmeplo … [e] dualm er a rengrir a klemeriar reng el mo smiik aikel klengeltengat er a priesthood el di uai a Abraham sera losiik el mora klengar er ngii.”
Teblong el beot el tekoi el omekrael a sebechel ngosukid el mo ngmai a tabesul klemedengei el President Benson a kmal lolsiich.
Kot el omekrael Eleng betik a rengud er a Rubak, eng kired el blechoel mesaod el kirel a chedaol el Blil loba omenguull. Ng diak el kired louchais malechub e kede olecholt aikel omeruul el lobengkel a telbiil el dengai er a chedaol omeruul er a templo. Ng dirrek el diak el kired el mesaod aikel chedaol tekoi el ngii a ble deyaksok er a chelsel a templo el diak kired louchais.
Ongerung el omekrael A templo a blil a Rubak. A rokui el ngara chelsel a templo a melutk er kid el mora Osobel, el Jesus Kristo. <92>Ng sebeched el mesaod a beot el moktek er a osisecheklel ma suobel obengkel a ruoll er a templo me a telbiil .
President Howard W. Hunter a millelach: “Bo douchais er a rengeleked aikel chedaol tekoi el dulmelchesiu er a chelsel a templo. E bol blak a rengud lolisechakl er tir er a ikel tekoi el ngii a sebeched el melekoi el kirel a moktek er a blil a Rubak.”
Ngara betook el telecheroll, lomuchel er a Profet Joseph Smith e l mera President Russell M. Nelson, e sel moktek er a osisechklel er a chedaol ruoll er a templo me a telbiil a mla mui el mosisechakl er a remerredel er a Ikelesia. Betok el olisechakl a ngarngii el llechukl, dorrenges, omes, ma bebil ra teletael el ngosukid el mesuub el kirel a ruoll ra uchelel omengedaol, sengk ra klisiich, chebechiil, me a bebil er a chedaol ruoll er a omerenged. Ng dirrek el ngar ngii a mui el omesodel kirel a otireklel a Osobel sel bo dolai e dongull a telbiil el mo oltirakl er sel llach er a keldung, llach er a tenget, llach er a ebangkelio, llach er a klikiid , ma llach er a odars. A rokui el chad er a Ikelesia a kirir el mo medengei a ikal ungil klekedall el debetik er sel temples.ChurchofJesusChrist.org.
A President Russell M. Nelson a mle smisichii sel klou a belkul e tabesul el tekingel a chedaol teletael el omeruul el ngar a templo ma meklou a belkul el tekoi el kirel a templo el mla mocholt lokiu a Ikelesia el ngii a klemerang, ungil a omsodel, e mo er a rokui el chad. “Ak kulengit er a rechad er a ikelesia … me longuiu aikel llechukl er a chelsel a Bible Dictionary el ngii a mesaod er a templo, el uai a ‘Mengedaol,’ ‘Telbiil,’ ‘Tenget, ma ‘Templo A tang a locha dirrek el soal mo menguiu er a Exodus, 26–29 el bliongel, ma Leviticus, 8 el bliongel . Chuodel el Renged, ma dirrek el babier er a Moses ma Abraham el ngara chelsel a Pearl of Great Price, el ouchais a olechoel a ureor er a templo me a chedaol ruoll.”
Me, ka momdasu el ngelekem el secham malechub eng redil oker,“Ngar ngii a chad el mlara skuul louchais er ngak el kmo ngar ngii a ngodech el bail el moubail er a chelsel a templo. Tiang ngmerang?” A kedeb el video a ngarngii el kirel a templo.ChurchofJesusChrist.org entitled “Sacred Temple Clothing.” Tial lungil klekedall a ouchais el kmo ng mekerang er sera irechar ea resechal me a redil ousbech a chedaol chelitakl, kakerous el teletael ra omeluluuch, ulecholt el bail er a klechelid, teltael, me a chedaol lomeruul el olecholt aikel ngara chelsel a rengrii er a blak el reng er tir el mo er a Dios. Sei a uchul, ma Ikelesia a oldubech er sel omuchel er a blai el mengedmokl el kirel sel klebokel el klengeltengat er a templo lokiu a beot el osisechakl ma ungil klekedall el uai tial video. Meklou belkul el mui el omesodel a dirrek el sebechem el ngmai.
Sel doutekangel el merael loba kle ngariou el ngara Reng er a Rubak, e kid a mo mukngeltengat el mo medengei e remuul a re keblid aikel ulsbechall er a delongelel a kmo ngera ungil me a ngera diak lungil el dosaod el kirel a chedaol ruoll er a templo me a telbiil.
Yaksok me a Klaumerang
Ak kumelchesiu el kmo bebil er kemiu a kora omdedrenger alsekum osisechekliu er a ebangkelio a mla mo omuchel er a blai e loba ngeseu er a Ikelesia. Alta kau a di chimol chad er a Ikelesia el ngara blim, malechub a bechim diak lolngeseu er kau, malechub eng di kau ma rengelkem, malechub e ke mesobil malechub e kau a Uriul-klebesei el Santo el mla medort a chebechilem, meng nglocha ngar ngii a kerim el kmo ngmekerang e aikal osisechakl a sebechem el meruul. Ke locha kasues kau ma bechim e oker el kmo, “Tiang sebeched el rulii?”
Choi, ng sebechem el rullii! Ak yaksok el kmo sel klisichel a klengeltengat a merkau e mo klou a belkul er a klengar er kau. A chesimer a mo obok. A llomes a mo melidiich. Ke mengai el mo sebechem el mo mesisiich el blak a rengum el outekangel e klou a rengum.
Ak dmeu a renguk el sioning el kmo a klengeltengat a morngii sel dolasm el meruul aikel ngercheled el mo mesuub e soad tial mla moluut el ebangkelio er a Jesus Kristo. Ng meral mo sebeched el “mo keldmokl e melai aikel bek el ulsbechall el tekoi.” Ak yaksok e ouchais loba chedaol ngklel a Rubak el Jesus Kristo, amen.