Ureor er a Missionari: Omerk Aikel Ngara Rengum.
Diak el ior el kmu kengar ker er tial beluulechad, ng betok a techall el sebeched el lomerek er tial lungil chais er a ebangekelio er a Jesus Kristo.
Tial dirk mlo merek el buil tirkal teruich me a terung a lul ngemedaol er tir a profet er kid, el President Russell M. Nelson, el mo merael lobengkel el mo er a olterekokl er a templo er a Rome Italy. Ma tia er a kurael ak kulemdasou el kirel a Apostol Paulus me a ikel omerolel. Sel temel, sel lorael el mla er a Jerusalem el mo er a Rome, eng mo melai a locha okeua el klebesei. Chelechal sils, el ngara chelsel a kot el soak el skoki, eng di kesai er a edei el sikang.
Remesuub er a chedaol llechukl a omerang el kmo a Paulus a mla er a Rome sera loluches a bebil er a tengami, el ngii a mle olisiich el mo er a rechad er a Ikelesia er sel taem me a dirrekl el mei er kid er a chelechal sils.
A Paulus me a rebebil el chedal sel Ikelesia er a ngara mong, e a Uchei-klebesei el Santo, mle ungil medengelii a teletelel omelenget. Betok er tir a mlo er a meringel el odechelakl, ludimukl er a kodall.
Aikal mla mo merek el eru el dart el rak, ea rechedal a mla moluut el Ikelesia er a Jesus Kristo, er a Uriul-klebesei el Santo, a dirrek el mla soiseb er a betok el bedengel odechelakl. Eng di ngokor er tial omtok (el bebil er a taem e seikid a uchul), e a Ikelesia er a Jesus Kristo er a Uriul-Klebesei el Santo a mla melemolem el meleketek er chelechal sils e kede metik er ngii er a beluulechad el rokir.
Ng Betok a Dirk Keruoll
Eng di, uchei er a derelii a cake, e dengara ungil klebesei, e dechat er kid er tial kmal ungil tekoi, eng locha bai ungil a deluut el telkib el mo ungil mesa tial ulkerulel a ikelesia.
Ngarngii a kmeed el euid me a tedobech el billion el chad er a beluulechad, a dongaisisiu er ngii el mo er a Kmeed el teruich me a elolem el million el chedal a Ikeleisa er a Jesus Kristo er a Uriul-klebesei el Santo—ng kmal kekerei lochur.
Osisiu, a idisir a re Kristiano el chad el ngara beluulechad el rokir a di merael mo kekerei.
Nguldimukl er a chelsel a mla moluut el Ikelesia er a Rubak—eng uaisei el idisir a rechad a di merael mo obdois—eng di te betok tirkel tir a diak el ngai a klengeltengat er a Ikelesia leng diak el blechoel mei.
Ng belkul a kmo, ngii di el ker el omngar ngii er tial beluulechad, eng kmal betok a techall el momerk er a ungil chais er a ebangkelio er a Jesus Kristo el mo er a rechad el omkebetech, omdak el mesuub, me a omdak el kiei malechub omdak loureor e dmak el milil.
Tial mlo merek el rak, eng mla er ngii a klou el techellek el mle mui loureor er a ikel urerir a remisionari er a Ikelesia el mo er a beluulechad el rokir. Ak blechoel melbedebek e meluluuch el kirel sel ngarbab loderchelel a Osobel el mo er a roltirakl er Ngii—el kid, el Ngelekel—kmo “Morael mong, e molisechakl a rokui el beluu, el melecholb er tir el ngara ngklel a Chedam, me a Ngalek, me a Chedaol Reng”
Ak mla omdasou er a ker el kmo “Kede mekerang kid, el chedal a ikelesia me a roltirakl er a Kristo, e mo kudmeklii tial ngarbab loderuchel er a bek el sils er a klengar kid?”
Chelecha el sils e ak siotai er kemiu el mo melbedebek er a osisiu el ker er a chelsel a rengmiu me a uldesuiu.
Sengk el mo er a Ureor er a Misionari
A remengeteklel a Ikelesia a meketeketa el taem lomelekl er sel ngerel okedong el kmo “A bek el chedal a ikelesia a misionari!”el mla mo melai a betok el rak.
A rechedal a Ikelesia er a Jesus Kristo—er a ngara mong me a chelechal taem— a dimla semeriar e ungil a rengrir lomerk er a ebangkelio el mo er a resechelirir me a lekaodengei el chad. A rengrir a mekerekard er a klaumera er a Jesus Kristo, e kmal sorir a rebebil a bo lolchesuar osisiu el deureng el bla el betik er ngii er a chelsel ebangkelio er a Osobel.
A rebebil chedal a Ikelesia a uaia loba sengk er tiaikid el teletael. Ng kmal sorir loderchelel ebangkelio. Te bleketakl e semeriar el mesiou e omtebechel er tial ureor el chedal a ikelesia el misionari.
Eng di, a rebebil er kid a telkib el kmes. A dosaod er a ureor er a misionari er a chelsel aikel mitilenged er a Ikelesia, e a bdelud a mo tellatel el mo riou, e a medad a ulturk er a chedaol llechukl malechub e ng blutek e kid a tellatel el diak el soad lomes a mederir a rebebil er a rechedal a ikelesia.
Ngera uchul? Ng locha mekngit a tsios er kid el ua lak a klou el ngera el derelii el kirel a berekel ebangkelio. Ng locha diak desal medengei el uase kede mekerang. A lechub e kede ko er a merur le kid el mla mo smau er sel de ngar ngii.
Ak medengelii tiang.
Eng di bo molbedebek el kmo, a Rubak a dirkak a ta me longerchir er a resemmong, e meduch el meruul a ureor er a misionari. Ng bai, “Rubak a mengerchir er a reng me a blakereng er a uldasou.”
Alsekum e ke semeriar er chelechang el meruul a urerel a misionari, e a kulengit me molemolem, e mdechor lokesiu el mo er a rebebil. A Rubak a mo omekngeltengat er kau.
Eng di, alsekum, e komelchesiu el meringel er kau el mo omerk er a klemechel ebangkelio, e msall e kdu kleim el tekoi el rulii a ngii di el chad el mo mededaes e sebechel mo oltaut er sel ngarbab loderchelel Osobel el mo olngeseu el mengideb er a Israel?
Kleim el Beot el Tekoi
A kot, e molekeed er kau er a Dios. Sel kot el ngarbab el llach a mo oubeltikereng er a Dios. Tiaikid a kot el uchul e kid a ngar tial beluulechad. Moker kau, “Ngak ak meral loumerang er a Chedam er a Babeluades?”
“Ngak ngbetik a renguk e oumera er Ngii?”
Sel molekeed el mo er a Demad er a Babeluades, ea llomes me a deureng er Ngii a mo obengkem. A rechad a mo mesa el kmo ngar ngii a kmo ngerang el tokubets e ngodech er kau. E tir a mo oker kau el kirel.
Ongerung, mokekii a rengum er a beltikereng el mo er a rebebil. Tia ongeru el ngarbab el llach. Molasm lomes er a rebek el chad el iliuekl er kau el ngelekel a Dios. Moldingel er tir—el diak el iior er a kmo a ngklir ng llechukl er a babilengem el kirem loldingel er tir.
Mocherchur lobengterir. Mngara deureng lobengterir. Mlangel lobengterir. Mongull er tir. Momekungil, mosebechakl, e molisiich er tir.
Molasm lochotii sel beltikereng er a Kristo e bo moba chubechub el kirir a rebebil—luldimukl er tirkel diak lungil a blekerdelir mo er kau, loltuub er kau e osiik a mekngit el kirem. Moubeltikereng e bo mungil mo er tir le te dirrek el ngelekel a Chedam er a Babeluades.
Ongedei, molasm el merael er a rolel a roltirakl. Sel lorael mo dmolech a beltikereng er kid el mo er a Dios me a Rengelekel, me a blakereng er kid el mo oltirakl er a Jesus Kristo meng mo dmolech.
Kau a subii a Teletelel sel mosuub a Tekingel e morrenges e moltirakl osischeklir a reprofet me a reapostol er chelechal taem. Kau a mo blekebek e mesisiich a rengum loltirakl er Ngii sel mongedecheduch er a Chedam loba mosisechakl el reng.
A merael er a rolel a roltirakl a kired el mesuub—er ngii el tekoi er a bek el sils, el mekekokid, loba krasia el mo er a krasia, “kerbai el mo er a kerbai.” A bebil er a taem eng eru el domakes el bedul uchei e telbakes el bedul uriul.
A klou a belkul a tekoi a kmo ng diak mkimer; ke melemolem el melasm el rulii el mo ungil. Seikid e kau a merael mo meduch er ngii, e mo dmeu a rengum, e mo bleketakl. A mongedecheduch er a rebebil el kirel a klechelid er kau a mo kse er kau e mo beot er kau. E a mera er ngii, a ebangkelio a kmal mo klou a belkul, e mekreos el telengtengil a klengar kau el mo diak el sebechem el diak l lak mosaod er ngii el mo er a rebebil. Tia locha diak di el mereched el dubech el tekoi—ng ureor er a chelsel a klengar kid el rokir. Eng di ng mo duubech.
Ongeuang, mouchais aikel ngara rengum. Ngak a diak du el kmo bom dechor er a tkul a rael e moba olkeiungel e moldiu a bades er a chelsel a Babier er a Mormon. A kulekoi er ngii a kmo ke mo blechoel meiusech osengem er a techall el mochotii a klaumera er kau er sel ngii a teletelem lobengterir a rebebil—tirkel mkaseues mad malechub e kom online. A kulekoi er ngii a kmo kede mo “dechor el sioning” er a klisichel ebangkelio er a bek el taem—e a le kirel e mongedecheduch.
Ng “ebangkelio er a Kristo … el ngii a klisichel a Dios el kirel a mo suobel a uchul,” eng sebechem el mo blekebek, mesisiich a rengum, e ngariou a rengum sel momerk er ngii. A bleketakl, mesisiich el reng, me a klengariou el reng a sebechel uaia le ko er a ultok el blekeradel, eng di ng diak. Ng bai olchotel ongtil Osobel el diak domart er a ungil osisechakl er a ebangkelio ke bai ochotii a llomes el mobang, me a ungil urerem bol kebkellii a Demam el ngara Babeluades.
Ng betok a ungil teletael el doruul er tiang, luldimukl a ungil omeruul er a bek el sils el mo er a chisel a klaumera er kid el delecha er a rua YouTube, Facebook, Instagram, malechub a Twitter me a dirrek el beot el cheldecheduch lobengterir a rechad el omkebetech. Chelechal rak e kede mesuub er a Beches el Renged er a rekeblid me a Sandei Skuul. Ng meral klebokel el techall el msiotai er a resechelim me a retonari er kau el mei er a ikelesia me a blim el mo mesuub el kirel Osobel lobengkem. Mouchais er tir el kirel a Gospel Library app, el sebechir el metik er sel hong el Mei, e Moltirkal er Ngak. A omodengelterir a rengeasek el chad me a telungalek er tir, e besterir sel babier el Kirel a Klisischir a Rengeasek e msiotai er tir el mei e lesa el kmo te mekera rengeasek el ngeleked a lolasm loltirakl aika el osisechakl.
Alsekum e ngar ngii a chad loker kau el kirel tial mlo merek el sandei er kau e lak mkes louchais el kirel aikel milkedmokl er a chelsel a ikelesia. Mouchais el kirir a remekekerei el ngalek el mlo dechor mederir a rechad e mengitakl me a teletelir el melasm el mo uaia Jesus. Mosaod el kirir a recheldebechel er a rengeasek el chiloit a temir lolngeseu er a remechuodel el meluches a reksi er tir. Mosaod el kirel aika el dirk mlengodech el temel a mitilenged a le Sandei e mekera e mla omekngeltengat er a telungalek er kau. A lechub e msodii a uchul e kede kmo tiakid a Ikelesia er a Jesus Kristo e kid a Uriul-klebesei el Santo, el di ua tirkel mle chedal a Ikelesia er a irechar el dirrek el mle okedongall el Santo.
Ngii di el teletael me a omeruul el ungil er kau, e mouchais er a rechad el kmo ngera uchul me a Jesus Kristo me a Ikelesia er Ngii a klou a ultutelel mo er kau. Msiotai er tir el “mei e lomes.” E sola mongelechel er tir el mei e olngeseu. Ng betok a techall er a rechad el mo olngeseu er a chelsel a Ikelesia er kid.
Ng diak di moluluuch el kirir a remisionari mel betik er tirkel melilt. E bom mngara nglunguuch er a rengum er a bek el sils mebo betik er tirkel tir a mei e lomes, mei e olngeseu, e mei e mkiei. Molatk lousbech er tirkel mui el misionari me bo lobengkem. El tir a di uai a reanghel, el keldmokl el mo olngeseu!
Me sel mouchais er tial ungil chais, e bo moba beltikereng me a kllouelreng. Alsekum e kede mengedecheduch er a rechad el moktek er kid a oreched er tir lotuu a becheleleu el bail e dosiik er a kot el kmeed el blil a techolbechelid, e ng diak el melemalt a doruul er ngii.
A rebebil mei e omes a locha, diak el bol chedal a Ikelesia; e a rebebil a mo chedal a ikelesia e ra uriul taem. Tia di ior tir el melilt. Eng di tia diak el ngedechii a beltkil a rengud el mo er tir. E diak el ngedechii a blakereng er kid el melemolem el siotai er a dersta el chad me a telungalek el mei e lomes, mei e lolngeseu, e mei e mkiei.
Ongeim, e moumera er a Rubak el mo remuul ongasireng er Ngii. Bo modengei el kmo ng diak el ngerchelem lomult er a rechad. Tiang a urerel a Chedaol Reng. A ngerchelem a mo ouchais aikel ngara rengum e mkiei loltirakl aikel moumerang.
Me lak bol mekngit a rengum alsekum a chad a diak el mereched el kongei er a klemechel ebangkelio. Ng diak el telitur kau.
Se kuk di delongelel a chad me a Chedam er a Babeluades.
A ngerchelem a di mo oubeltikereng el mo er a Dios me a retonari er kau, el Ngelekel.
Moumerang, moubeltikereng, e moruul.
Moltirakl er tial teletael, e a Dios a mo remuul ongasireng lokiu kau el mo omekngeltengat er a remekreos el Ngelekel.
Aika el kleim el tekoi a ngosukau el mo meruul aikel luruul a roltirakl er a Jesus Kristo er a irechar. A ebangkelio me a Ikelesia er Ngii a kmal meklou a ultutelel er a klengar kau me a teletelem me a blekerdelem el chad. Maleuaisei, e msiotai er a rebebil el mei e lomes e lemei e lolngeseu, e a Dios a mo meruul a Urerel lolsobel, e tir a mei el kiei.
Eng di Alsekum Eng Meringel?
“Egn di,” ke locha kmo, “omko meruul aika el rokui e a rechad a diak el kengei? Ke le el mekngit a uldesuir el kirel a Ikelesia? Ke le bolak el sechelik?”
Choi, tia sebechel duubech. A irechar, e a roltirakl er a Jesus Kristo a mle belchoel modechelakl. A Apostol Petrus a dilu el kmo, “Bo mngara deureng … e kau a ngara ringel lobengkel a Kristo.” Tirkel Santo er a uchelel a mla er a deureng “me te mlucherangel el klikiid el mo otekau a mekngit lomelekoi el kirel.”
Bo momtab, a Rubak oureor er a ngeldengodech el teletael. Sel ungil blekerdelem el uaia Kristo el mededaes a rengum a le kotouar kau a sebechel domedemekii a medecherel el reng.
Me ngak el Apostol er a Jesus Kristo, e ak meskau a klengeltengat el mo blekebek e mkiei lolchotel a klemrang er a ebangkelio, e bol mesisiich a rengum el blechoel medangch el chedal a Ikelesia er a Jesus Kristo er a Uriul-klebesei el Santo, e dirrek el bo moba ngariou el reng el mo olngeseu er tial Urerel el ngii olchotel a beltkil a rengum el mo er a Chedam er a Babeluades me a Rengelekel.
Kemiu a resechelik, kau a mo ngara deureng el medengei el kmo ng klou a ultutelem er tial meketeketang lulaoch el kirel omengidb er a Israel, el mengedmokl er a luut er a Kristo se lemei loba “klisiich me a klebkall lobengterir a rechedaol anghel.”
A Chedam er a Babeluades a medengel kau. A Rubak a meral betik a rengul er kau! A Dios a mo omekngeltengat er kau. Tial ureor a Ngii a mla chemedolii. Tia a sebechem el rulii. Kid rokui a sebeched el dmak e rulii tiang.
Ak kuuchais el ngara ngklel a Jesus Kristo, amen.