Chelechad: El Basio er a Renged
A Rubak a obekau el mekedecherur a mesisiich el chelechad. Ma sel roruu er a renglkel, te ousbech er a basio er a renged me a ulekeroul.
Sera 2010, a Andre Sebako a mle ngeasek el chad el losing er a klemerang. Meng dirkak a tal loluluch loba rengul er a uchei, ng mle meililt el mo melasem. Uriul er a kedeb el taem, eng mlo kebetech lobengterir a remisionari. Te mileski a kekerei el babier el ngar ngii a siasing er a Babier er a Mormon. A Andre a mlo melchesuar er a kmu ngerang meng ngulker er tirkal missinorai mel loterur tial hong el mor ngii. Me te de dilu er ngii el kmo ng sebecherir el nguu el mesang alskum eng mo er a Ikelesia.
Ma Andre a mlo sel ngii a dirk mlo er ngii el branch er a Mochudi er a Botswana, er a Africa, el di ngii el tang. Tial branch a mle oubeltik el reng, kmes-uldak el ngar ngii a locha 40 el chad er a ikelesia. Te mle mengemedaol er Andre loba blok el chim. Ng siluub a suobel er missionary e miltecholeb. Ng kmal mle ungil!
Eng ding ngerang? Ng mekerang a Andre a melemolem el mo er a ikelesia? Techang a sechebel mo ngosukii el mo lomelemiil a chedaol el rael? A tal nger el mor tial ker a chelchad er a priesthood el ngar er ngii!
Bek el chad loreked er priesthood, diak el ior er teletael el lengar ngii, a ngmai a klungiaol er a mesisiich el chelchad. Ngeasek el rodam er ngak loba Aaronic Preisthood, a Rubak a obekemiu el mo rulii a mesisiich el chelchad, basio el blingerir a rebek el ngeasek el sechal, ng basio el ngii a delbengel a Rubak a ngar ngii, ng basio el ngii a rokui el chedal a chelchad a outkeu e klou a ultuterir. Ma Rubak a oldak er rengelekel, te ousbech er a basio el ngii belingelir e omekeroul.
A derta er kemiu el chedal a omerredel er tia el chelchad a omekrael er a rael e osiik a ungil tekoi e omekdubch a beltik el reng me a klrodam er a delongelir a rechedal tia el chelchad. Ke meskii a osengem el mo er tirkel tir a beches el chad er ikelesia, tir a diak lomais el mo er a ikelesia er a bek el taem, me a lechub eng tirkel ngar ngii a tokubets el lousbech er ngii. Lobengkel a klisichel a priesthood, ke mekedecherur a mesisiich el chelchad. E a mesisiich, tmak el chelchad a rulii a klou el omengodech er a chelsel klengar er a ngeasek el sechal.
Me sera Ikelesia ouchais er tial beches el omuchel er a blai el omesubel a ebangkelio, bebil er a udeseuir er a rechedal a ikelesia el di ua Andre a uleker, “E mekera tirke el rengeasek el tir a mengai er a obliil el ebangkelio a diak el mosisechakl e dirrek el diak el blil a omesuub me a klechad er a ebangkelio? Te mo medechel uriul?”
Diak! Ng diak a chad el mo medechel! A Rubak a betik a rengul er bek el ngeasek el sechal me a ngeasek el redil. Kid, el loreked er a priesthood, a chimal a Rubak. Kid a mesiou er a Ikelesia el kirel a olengeseu er a omuchel er a blai el omelasem. Sel ngar ngii a kesai el omesiou er a blai, ea chelchad er a priesthood me a bebil er a meredel me a sechelid a omes e mesiou er a dersta chad me a telungalek sel lousbech er ngii.
Ak mla mesang tial lureor. Ak mla rulii tial omeruul. Se er ak ellolem a rekik, a rechad er a blik a mlo diak lebechiil e a demak a chilitii a delak lobngekel a reteim el ngalek. A delak a ulemuchel el loureor el mesiou er kemam. Ngulusbech er a ongerung el lureor er a tal taem, me a dirrekl el dechelel a suobel. Ng di mle kekerei el taem a mla er ngii el losmechokl. Eng di a rechad er a bill, okdemelel, me a becherir a okdemelel, bisob, me a roldingel a blai a mlo olengeseu er a ngkal anghel el delak.
E ngak a mla er ngii a chelechad el ngar er ngii. Ng kmal dmeu er a renguk er resechelik-rodam er ngak- el tir a betik a rengrir e mesiou er ngak. A chelchad er ngak a basio el ngak a belingelel. A rebebil a ulumedasou el kmo ng diak a techelek luchul a teletelel a telungalek er ngak. Ak locha mle uaisei. Eng di a chelchad er a priesthood a ngildechii tial teletael. A chelchad er ngak e miliuekl er ngak e omekngeltengat er a klengar er ngak.
Ng er ngii a diak a techelir el meliuekl er kid. Malechub e kid er rokui a ngara chimo el teletael me a lechub eng tang. Eng di a bek er kid el ngar tiang a ngar ngii a chelechad, basio el ngii a sebeched el nguu a klisiich e mesang a klisich. A chelchad a “ rokui el mo er a tang e tang el mo er a rokui.” Ngii a basio el kid a olsisechakl er dersta er kid, mesiou er dersta er kid, e mo dmak el rodam el mesiou er a Dios. Tiang sel basio el ongasireng a duubech er ngii.
Ng soak el louchais er a ikel bebil er a mengasireng el ngii a dilubech er a chelsel a chelchad er a Andre el ngara Mochudi. Me sel kuchais er aikal olecholt, momes er aikel osisiechakl el ngii a melisiich er a rebek el chelchad er a priesthood el ngii a ngar ngii a relii el mo er tir.
Uriul er lemetecholb a Andre, ng ngulebeterir a remissionari re le lusisechakl er reteua el ngeask el sechal, el tir a direkl el mlo metecholeb. Chelechang eng ngar ngii a reteim el ngeasek el sechal. Te ulemuchel el melisiich er dersta er tir me a branch er tir.
A ongelolem el ngeask el sechal, el Thuso, a mle metecholeb. Thuso a ulemerek er ebangkelio el mo er a retedei el sechelil, me a ngar medal taem eng mo er ngii retetiu.
Mesiungel a Jesus Kristo a blechoel el mo tmak er tial el rael- mekesai er a bebil er a taem, el mle mengedaol lokiu a resechelirir. Ngara mong, del Andrew a metik er a Osobel,eng mle mereched el mo er a odam er ngii er a Simon e “ngulba Jesus el mor ngii.” Ngosisiu, uriul er a Philip el blol mesiungel a Kristo, eng mle mengedaol er a sechelil el Nathanael el “mei e omes.”
Chelsel a Mochudi, e a ongeteruich el ngeasek el sechal a mochu chedal a ikelesia. A remissionari a miltik er a ongetruich tang. E a ongeteruich me a ongerung el ngeasek el sechal a mo metecholb Sera lesa ngedechel a ebangkelio er a resechelil.
A rechedal a branch er a Mochudi a kmal mlo dmeu e rengrir. Tirkal ngeasek el sechal a mle “obult el mo er a Rubak, e…motmak lokiu a Ikelesia.”
A Babier er a Mormon a kmal mle klou el ututelel er a beltir. A Thuso melatk, “Ak kulmuchel el menguiu er a Babier er a Mormon … bek el taem el kmededaes, ngara blai, skuul, me a ngidi el ker.”
Oratile a milchetakl el mo er a ebangkelio luchul a okesiu er a sechelil. Ng silodii, “[Te] kora di mlo ngodech el di ua mengesebeklel a chim. … Ak kulmedasou el kmo ng locha … ngar er ngii a rellel er se el kekerei … el hong el tir a ulemuchel el lobang el meliuekl … er a skuul. Ng sebechek el mesang el kmo te mo ungil el chad. … Ng mlo soak el mo ngodech el dirrek.”
Tirkal rokui el ongeteruich me a terung el ngeasek el sechal a mle tmak e metecholb er a chelsel a eru el rak er a delongelir. Dersta er tir a di mle tir el tang el chedal a Ikelesia er a chelsel a telungalek er tir. Engdi a rechad er a Ikelesia a mle mesiou er tir, luldimukl er a President Rakwela. Branch president er tir; Elder me a Sister Taylor, meklou el teru el obekel el misionari; me a bebil er a rechedal a branch.
Brother Junior, a meredel er a chelchad, a mle mengedaol er tirkal ngeasek el sechal el mo er a blil er a tal sueleb er a Sandei e olsisechakl er tir. Tirkal ngeasek el sechal a mlo tmak el mesuub a chedaol el lechukl e mlo blechoel el meruul er a ngara blai a lekebesengei.
Brother Junior a ngilteterir el mo oldingel er a rechad er Ikelesia, rechad el tir a missionaries a olsisechakl er tir, me a ngi di el chad el tir a ousbech er a odingel. Tir el rokui el teruich me a terung el ngeasek el sechal a ngmasech er a rebai er a torak et Brother Junior. Ng mlo ngodeterir er a blil a klaukledem el terung me a lechub eng keldei e mo oltak er tir er a uriul.
Me tirkal ngeasek el sechal a dirk milsuub el kirel a ebangkelio e the milecheseuar el kmo the diak lodengei a betok, Brother Junior a dilu er tir me touchais a tang malechub eng eru el tekoi el tir a medengelii el mo er tirkel tir a loldingel er tir. Tirkal loreked er a priesthood el ngeasek el sechal a ulisechakl, meluluuch, e olengeseu el lomes er a Ikelesia. Te lilemolem a deruchelir er a priesthood e mlo melechesuar er aikel deureng er a omesiou.
Andre a dilu, “Aki tmak el kausekool, tmak locherchur, tmak el lemangel, aki mlo rodam.” E merang, te ulmekdong er tir el “Selmosem el Rodam.”
Te dilak e tilbir a moktek el kmo tir rokui a mo er a mission. Me tir el di mle ta el chad er ikelesia er a telungalek er tir, ng kmal mle betok a olibesongel el kirir el mo mesisiich, eng di te mle kaingeseu er a ta ma tar tir er a ikel rokui.
Tang ma tang, tirkal ngeasek el sechal a ngilai a okedongall er a missionary. Tirkel tir a mle kot el merael a milluches a tengami er tir el mo er a beluulir el mo er tirke el dirk mengetmokl er tir, e ouchais er a ikal teletael el tir a mla remuul e oldubech er tir el mo mesiou. Teruich ma tang er tirkal ngeasek el sechal a mlo er mission.
Tirkal ngeasek el sechal a mle omerk er ebangkelio el mo er a telungalek er tir. Chedil, rodos, rodam,klausechelei, me a tirkel chad el tir a lulsisechakl er tir er a mission, a ulebult e metecholb. Mengasireng a dilubech e diak a uchelngar el klengar a mlo mokngeltengat.
Ng sebechek el rongesii a tar kemiu el lomdasou el kmo aikal mengasirang a kuk di duubch er a beluu er a Africa, mengoias el beluu el ngii a oldak er a Israel a orechudel. Eng di, ak kouchais aikel olsisechakl el ngii a milruul er a Branch er Mochudi a merang er a ngi di el basio. Dial el ior el kmo ke ngar er ker, a chelchad er kau a sebechel mekeroul lokiu a sureor e omerk er ebangkelio. Mese el ta el chad el oltirakl a mo er a sechelil, e a tang a sebechel el terung. Terung a sebechel mo teuang. Teuang a sebechel mo Teai. E a teai a sebechel mo teruich me a terung. A branch er Ikelsia a sebechel mo wards.
A Osobel a ulsisechakl,”Me sel terung malechub e te tedei [malechub eng betok] a mo tmak el ngara ngklek, … Mesang, Ngar sei e ngak a ngar er a delongelir.” A Demad el ngara babeluades a mengetmokl er a udesuir me a rengrir a rechad el meliukl er kid. Ng sebeched el loltirakl a olangch, oldars a chim el mo er tang, omerk er a klemerang, mengemdaol er a rebebil el mo menguiu er Babier er Mormon, e oubeltik el reng e mesiou er tir sel tir a mo medengelii a Osobel.
Ng mechu teruich el rak sera Ulak el Rodam er a Mochudi a ulemuchel er a omerollir, e tir a dirk ulak el rodam.
Katlego a dilu, “Ke di locha blii lokiu a cherroid, eng di kid a blechoel ngar er ngii el mo er a tang.”
Ng nglunguchek el kmo kid a kongei er sel ongtil a Rubak el mo tmak lobengkel er chelsel a chelchad er apriesthood me a ikel dersta el chlechad a sebechel mo basio er a renged, basio er a ongdibel, basio er omekeroul.
Jesus Kristo a Osebeled, e tiang a Urelel. Ak olecholt er a klaumerang er ngak loba ngklel a Jesus Kristo, amen.