Di Mereched el Klungiaol er a Dios
Me alta eng klou a rengud el mengiil er a rubak, eng ngar ngii a bebil er a klengeltengat el di mereched el merkid.
Bebil er a mla memong el rak, ea eim a rekil ngelekam el sechal a mlei er ngak e uasei, “Chedam, Ngar ngii a blak betik er ngii. Ak mla metik er ngii el kmo a di mereched er kau a bai kmal kemanget el taem el mer ngak.”
Sera Rubak malechub a Remesiungel a molekoi el uasei, Ng diak el betok el klebesei malechub eng diak el sal cheroid el taem, eng sebechel belkul a kemanget el taem. A temel a Rubak, el blechoel el Temel, a kakerous ngii ma temed. Kellou el reng a klou a ututelel. A lak a kellou el reng, eng diak el sebeched lochotii a klaumerang er kid er a Dios el kirel a klengar me a osobled. Engdi a cheldechedechak er a chelechal sils a kmo, ma alta eng klou a rengud el mengiil er a Rubak, eng ngar ngii a bebil er a klengeltengat el di mereched el merkid.
Se er a Alma me a rechedal a blel mudechem er tirkel Lamanites e te miluluuch mel bol sebechir el chemiis. Ng dimlak el dil mereched el sebechir el chemiis, engdi sera klou a rengrir el mengiil er a temir el chemiis, ea Rubak a uldarsii a klungiaol me a klengeltengat el di mle mereched el mo er tir. A Rubak a di mle mereched el melemedemk a rengrir tirkel Lamanites meng diak lomekeuad er tir. Ng dirrek el mle smisichii a Alma me a rechedal e milngebekakl a ringel el bla er ngii. Me se er a chiis er a kelbus, e te milrael el mo er a Zarahemla, me te uluchais aikel dilubech el mo er tir me a rechad a mlo mechas a rengrir. A rechad er a Zarahmela mlo mechas a rengrir, me sera lometab er sel di mle mereched el klungiolel a Dios, me a klisichel el lulngeseu er a Alma me a rechal el tuobed … er a kelbus, e te miluluuch e oureng a sulel a Dios.
A di mereched el klungiaol er a Dios e mo er tirkel rokui el tir a omekedeong er a Ngii el meral ngar ngii a rengrir me a mui el moktel a rengrir. Tiang a uldimukl er tirkel kmal blak a rengrir lolengit, sel nger a kora kmal cheroid me a ringel a komengeltang, e merengelang.
Solang ngikal ngeasek el profet a mlo chemau a ringel er tial blil a kelbus meng mocha lemangel e omekedong: “Dios, ke ngar ker? … Oingerang ke me ngosukak … ? Choi, e rubak, oingerang … ?” Sel nger, ea rubak di mlak el dil mereched ngosukii a Joseph, ngbai di mle mereched mesang a budech.
A Dios a dirrek di mle merehed el msa urungulel el mo otobedii er a ringel. Meng uangerang, ngii dil basio, ngara kristo e okiu a kristo eng blechoel ngar ngii a bo doureng el kirel. Di mereched el merkid.
Lemuut el uaisei, ngii a mle yaksok, “A beltkil a renguk a diak a ulebengelel.”
Ngarbab ra rokui, ea beltkil a rengul a Dios a di mereched. Obengkel a Paulus, Ak ouchais el kmo diak ngidil ngerang el sebechel “chorirdid er a beltikelerreng er a Dios el ngar a Jesus Kristus.” Ma kengtid, altang choridid er a Chedaol Reng er Ngii el telkib el taem, eng di ngdiak el sebechel choridid er sel blechoel e mereched el Beltkil a rengul a sel blechoel e mereched el Beltkil a rengul a chedaol Demad.
A ikakid a bebil er a omerolel me a teletelel el “ngii di mereched el loumekngeltengat er [kid].” chelechang, e bo kuchais aikal olisechakl er a chelechal taem, eng soak louchais a teblong el okesiu er a teblo el chad el klengar er tir a olechotel a di mereched el klungiaol a Dios.
Sel taem el ngii a mle ngeasek el redil, ea Emilie a ulusbech a mekngit el kar. Omelasm a rirelii el mo teletelel, ea teletelel a rirelii el mo smau el mlo melai a rak, malta bebil ra taem eng mlo ungil. A Emilie a kmal mlo kerekikl el mertii tial mondelengel, tokubets er a uriul a lebol bechiil e mocha chedil.
Tial uchelel a omekungil er ngii a kora dimlak el sal lungil. Chelsel a tal bung, ea Emilie a ngara medical exam, ea kuk tang, ea ambulance oltak er ngii el mora osbitar. Ng mocha ombibritl a bedengel sel lomadsu el mo cheroid er a rengelkel, bechil, me a blil.
Seikid el kesus, eng di ngil tang el ngara chelsel a mekelekolt, e milekolk el delmerab, ea Emilie mora bebul a dukelel e mocha lemangel. Sel klisichel el merola el mo diak, meng mocha oberedang er a sebekreng, dakt, me tial ilekolk el ngar tial delmerab ma chelsel a bedengel, ea Emilie ulmedasou el kmo mocha medei er tial kesus. Di ngii el tang.
Meng ngar tial ringel, ea Emile mocha smisichii e outekangel el melitai el metengel er a dukelel e mocha outibaruach. . Meng diak lousulecholt er ngii ele tial omeruul a dilubech er aikel mla mo merek el nglunguuch, ngii a kmal di mlo chemau a Rubak e meringel lolengit el kmo, “Dios, Ak kusbech er kau. Kulengit me mngosukak. Ng diak el soak di ngak el tang. A kulengit me mngosukak er rokir tial kesus.”
Ng di mle mereched, uaisel ngii a rirelii el mo er a Petrus, a Jesus a uldersii a chimal e ngosukii. A Emilie a mlo omelchesiu el chelelakl, outkeu, kellou el reng, me a beltik el reng. Tial delmerab a mlo diak el mekelkolt, ngii a mlo medengei el kmo ngdiak el dil ngii el tang, ea chelsel a kot el taem el uai sera 14 a rekil, a Emilie a mlo medengei el kmo ngdi mo ungil besul a rokui tekoi. E ngii a “milekiis el mo chemau a Dios,” e a Emilie a mlo mechiuaiu el ngara budech. Me ke de mesang el kmo “alsekum ko mo mekngit a rengmiu el kirel a kentmiu e diak molcherecher a remgniu, eng di mereched ea klou el tekoi er a rolel a osobeliu a mei er kemiu.”
Ng mlo melai a kemanget el taem el Emilie a ulmekungil—mlo melai a buil el ngara ukeruul, osisechakl, omengedecheduch, el chelsel tial taem ea Rubak a ulngeseu er ngii loba di mereched el klungiaol. Esel klungiolel a Rubak a millemolm lobengkel sera lebol soisb er a templo lobengkel a bechim me a reterung el ngelekir el mo merenged er tir el telungalek el mo cherechar. Di ua tirkel rechad er a Zarahemla, ea Emilie a oureng a saul sel lolbedebek er sel di mle mereched el klungiaol er a Dios me a Klisichel el lulngeseu er ngii el mo cheroid er a kerior.
Chelchang, eng klengar er a tara chad el bekeu loumerang. Sera December 27, 2013, ea Alicia Schroeder a ungil a rengul mengemedaol er a resechelir, el Sean me a Sharla Chilcote, el di mle kiul me dum er a blil. A Sean, a mle bishop er a Alicia, a ngilu a cell phone el mesang e uasei, “Alicia, ng betik a rengmam er kau. Ng kirem el longer er tial dengua.”
A bechil a Alicia el Mario, a mlara dengua. Ngii a mlara cheroid el basio lobengkel a rebebil er a rengelkir el mlo ou snowmobile. Ng mlo ngar ngii a kengaol el accident. A Mario a miltemall, e ngkel teruich a rekil ngelekir el sechal, el Kaleb a mla mad. Sera Mario medidengelangel e louchais er a Alicia el kirel a kodellel a Kaleb, eng kmal mlo mekngit a rengul el bebil er kid a diak bo lodengelii. Ngulbitelek. Me tial kengtil a rengul, a Alicia a diak el sebechel louedikel a bedengel malechub eng mengedecheduch.
A Bishop me a Sister Chilcote a di mle mereched el kiderii e olngeseu er ngii.. Te lilangel e kmal mle imis el mekngit a rengrir el telkib el taem. A Bishop Chilcote a milsang a klengeltengat el mo er a Alicia.
Sel dilubech a diak a metebengii alak a bebil er a klaumodengei el kirel a Tngakireng er a Jesus Kristo ma di mereched el klungiaol er a Dios. A Bishop Chilcote a ngiluu a chimal loia er a bebul a bdelul a Alicia, meng ngombibritel a oto er a ngerel, e mocha mengedecheduch. A Alicia a rirenges a cherul tekoi el uaia a Dios a milekoi. Kot, eng rirngesii a ngklel, Alicia Susan Schroeder. E mocha rongesii a bishop el meluluuch lolengit er a klisichel a Dios. Ng kmal di mle mereched — sera lemedung a ngklel me a klisichel a Dios —ea Alicia a mlo mui melchesuar er a budech, beltik el reng, omengelim, me a deureng. E millemolem lobengkel.
Chelchang, uaisei,ea Alicia, Mario, me a telungalek er tir a melemolem el mekngit a rengrir e di melatk er a Kaleb. Ng kmal mle meringel! Sel kungedecheduch er tir, e a Alicia mo mui a chiuosech er a medal e ouchais er ngak el kmo ng betik a rengul e di melatk er ngkal kekerei el ngelekel sechal. A medal a melemolm el medidelangel e ouchais er ngak el kmo milkerang ea Dios a ulngeseu er ngii er tial ringel el bla er ngii, lomuchel er sel klungiolel a Dios el mo er ngii sera lengara klengit el reng e melemolem el loureng er sel luut el mo kebetech el ngii el “sils a diak el sal cheroid.”
Ak medengei el kmo omerolel a klengar a lebebil er a taem eng mor ngii a uldikel ma rau el reng el rulii meng meringel a dolai, omtab, malechub e doreked a bedengel a le ngesou el mlo er a Emilie me a Alicia. Ng a mla mo chemau aikal teletael. Ak kuuchais el kmo, a ikekid el taem, ea ikel lomtebechel er kid a delmedemk me a mesisiich el locholt er a klungiolel a Dios. Ka momtab, se er a ngara mong e a Israel a mlo tuobed er a kelbus el “diosisiu el dios el meketeketang lomtebechel er tir” er a bek el sils.
Ak sioning el kmo a Jesus Kristo ngii a Osobel, e okiu a Ngklel, e ak yaksok el kmo sel bom chau el mo er Ngii el ngar ngii a rengum me a mui el moktel a reng, Ngii a mo ngosukau er a ngidil ngerang el ngii a omekringel malechub eng melemall er a klengar er kau malechub eng deureng. Alta tial olsobel a locha kmal kamengetang er sel taem el ngii a bai soam—maltang locha bai sel temel a klengar malechub eng lemuut el kemanget er tiang. Solang, omeskau a omengelim, blak el reng, me a oureng el lolngeseu e melisiich er kau el morsel taem er a osobelem, E ak kulengit e ouchais er sel di mereched el klungiaol a Dios oba ngklel a Jesus Kristo, amen.