![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F34%2Fd1%2F34d15d8e3fb129bb4e88fb87bda6e5cfbdeb9819%2F34d15d8e3fb129bb4e88fb87bda6e5cfbdeb9819.jpeg/full/!250,/0/default)
Urrekodel er a Tekingel a Kristo
Mekekid er a tekingel a kristo a sebechel dubech er a ngidil taem me a ngidil belsechel a kmung ngerang, alsekum e kede kudmokl a rengud el mo melai.
A Demad er a Babeluades a betik a rengul er kid. Ngii a mla ochotii a cherrungel el moktek mebo doldeu aikel klengeltengat er Ngii. Chelsel tial klengar, a kede mla siotai el mo er a Kristo e mla nguu sel olutel a ebangkelio er a Jesus Kristo lokiu a techolbechelid, e nguu a sengk er a Chedaol Reng, e blak a rengud loltirakl er a ebangkelio. A Nephi a mesaod el kirel a blakereng er a techolbechelid el mo soisb er a “melmalt e chibutk el rael,” e ulmeklatk er kid el melemolm el “moutekangel merael mo ruchei, … el di urrekodel er a tekingel a Kristo, e outekangel el mo er a ulebongel,” el mouchul a ngeiul aikel rokui el klengeltengat er a Chedam er a Babeluades el ngii olab. (2 Nephi 31:19–20).
A Nephi lemuut el lomeklatk er kid el kmo alsekum kede mo “medinges er a tekingel a Kristo,” eng “molecholt er [kemiu] a ikel kiriu el meruul” (2 Nephi 32:3) meng mo meskid a klisiich el mo mesisiich raikel cherarou el merael bedul kid (1 Nephi 15:24).
Ngerang a Mur?
Sera ak ngeasek, ea kulemdasou el kmo a mur sel klou el belsoil el ngar ngii a beras, sushi, me a sos. Chelechang eak mla mo medengei el kmo a meral mur a kmal klou a belkul el diak el dil omengang a ungil kall. Ngii a omeruul er a deureng, ulekeroul, outkeu, merous, olecholt a beltik el reng el mo er a telungalek me a rebetik a rengud er tir, oureng a saul el mo er a Dios, e meleketek a deleuill sel ungil a rengud el menga a betok, e ungil a telemtemul el kall. Ak kumerang el sel de urrekodel a tekingel a Kristo, eng kired el lomdasou er a osisiu el omeruul. Ourrekodel er a chedaol llechukl a diak el belkul a kmo kedi menguiu er ngii. Ng kirel meskid a meral deureng e meleketek a deluill er kid lobengkel a Osobel.
Tiang a kmal bleketakl a osisechklel er a chelsel a Babier er a Mormon. Molbedebek er sel berrusel a Lehi se er a lesa a kerekar el redechel [a] rulii a chad el mo ungil a rengul. Tial rodech a beltkil a rengul a Dios, me sera lehi el chermii tial rodech, “eng … merekos, ngarbab er a rokui el [ngii] a blal charm.” Ng milkekii a rengul loba deureng meng mocha soual merous er ngii el mo er a telungalek er ngii (1 Nephi 8:10–12).
Sel de ngara mur, e kede mo metik el kmo a idisel a kall malechub eng ngera el kall a ngar ngii a mo diak a belkul alsekum a rengud a mui er a omereng el saul. A telungalek er a Lehi a di milenga a chemadech el tech sera le ngara oreomel, engdi a Nephi a silodii tial ringel, ng dilu, ,“Endi ng mle klou a klengetengat ra Rubak” me a “re bechemam … a mle mesisiich” e mlo sebecherir el “mo otekengelii omerael e diak longiremrum” (1 Nephi 17:1–2).
Al bebil er a taem ea ngara mur a uldimukl er a omelasm me a omengarm. A Alma a melekoi el kirel a tane duubech er a chelsel a rengud. Sel dolasem er ngii, e kemo mtebengii tial tane el “mocha deureng el merngak” (mesa Alma 32:28–33).
Urrekodel er a Tekingel a Kristo
Sel klengeltengat er a urrekodel er a tekingel a Kristo a kmal mesiiich e omekngodech a klengar. Ngar ngii a edei tekoi el soak el siotai er kau me bo mousbech er a chelsel a klengar er kau.
Kot, tekingel a Kristo a sebechel ngosukid el “smisichii [kid] chedaol el techall el mo nguu a ocholt” (Russell M. Nelson, “Ocholt el mora Ikelesia, Ocholt el mora Klengar er Kid,” Liahona, May 2018, 96) me a kerkikl el omekrael er a klengar kid. A Mormon a ulsisechakl el kmo a tekingel a Kristo a ngar ngii a “klisichel el mo omekrael er a rechad el mo meruul [a] tabesul” el ngii a kmal mesisiich er a ngidil ngerang “el saider a sebechel remuul” (Alma 31:5). Me sel kusiik a llemesel a Dios e le ak chemau a cheliseksikt, ak blechoel, el melasem el “keldung er a tekingel a Dios” (Alma 31:5), e ak mle mukrael e sebechel el meruul a melemalt el tekoi, mo mesisiich er a omengetikaik, e mo omekngeltengat er a klengar er ngak loba klou el klaumerang er a Kristo me a beltik el reng el mo er tirkel meliuekl er ngak. A profet er kid, el Russell M. Nelson, a ulsisechakl er kid el kmo “a ikal mermang el sils, eng diak el sebeched el mo suobel er a chedaol tekoi a lak a omekrael, mengetikaik, mengelim, me a odbechelel a Chedaol Reng” (“Ocholt el mora Ikelesia, Ocholt el mora Klengar er Kid,” 96). Ulsbechall el ues a mei sel dolasm a “keldung er a tekoi,” me a tial tekoi a mo mesisiich er a ngidil ngera el debedesuii.
Ongerung, sel dengara ringel el kirel a olechoted e diak a klaumerang er kid, e sel ungil tekingel a Dios (Jacob 2:8) el ngara chelsel a chedaol llechukl a mo ngosukid el mo medengelii a olechoted e mo meskid a klisiched el kuk klou er a ikel dolab. Ultebengel a olechotek el ngelekel a Dios a mle ta er sel kot lungil omeruul el dilubech el merngak. Serak ngeasek, eng dimlak kudengei a ngidil osisecheklel a Osobel. Serak kot el choiuii a Beches el Renged, ea tekingel a Kristo a meral lulmekungil er sel telemall el renguk. Ak mlo medengei el kmo ngak a diak el dil ngak el tang e ngak a ngelekel a Dios. Sera bo kumtab er a meral olechotek er medal a Dios, e ak mlo medengei a diak el ngemed el sebechek el mo uaingii lokiu a Tngakireng er a Kristo.
Uai a Enos el uluchais er sel okesiu el dilubech el mo er ngii el llomes a mo er ngii era uriul er a meringel uldasou er a tekingel a Dios. A Enos a uluchais a osisecheklel a demal el mo er ngii el kirel a “diak a ulebengelel klengar, me a deourengg er a re santo, a mle [soiseb] el mo er a chelsel a renguk” me a delbengel a mlo “songerenger; e [ngii] outubaruach er medal a [Milebii] … el loba mesisiich el nglunguuch” (Enos 1:3–4). Sel nglunguchel e ngii a mlo medengelii a Osobel e mlo medengei el kmo ng a klou a belkud, e oubeltik el reng e sebeched el mousubes a chelitechetud, e meral ngelekel a Dios.
Ongedei, ng sebeched lokiis a klengar er a rebebil lokiu a tekingel a Kristo. Di uai a Enos el mla er ngii a temel me a basio sera tekingel a Kristo a mlei ra chelsel a rengul, ea Rubak a mo rutechii a rengrir tirkel tir a soad el louchais er a ebangkelio el mo er tir. Ng betok er kid a mlo mekngit a rengud sera de siotai er a rechad el mo orrenges er a ebangkelio eleng dimlak el sorir lorenges. Lak kom simbai, a Rubak a siotai er kid el rokui el mo mok a ngered e ouchais er a ebangkelio el mo er tir.
Erul rak e ra mla memong, ea Rubak a rirtechii a rengul a delak, meng ngilsuir el tilbir el mo nguu a chedaol ruoll el techolbechelid. Ak mla mengiil el 35 el rak el kirel tial sils el mo dubech. Sel ngii a mo rulii meng mo tibir el rulii, eng mle betok el chad er a Ikelesia a uleldingel er ngii el uai teletelel a Kristo. Tara Sandei, eng mlo melchesuar el kmo ng kirel el mo er a Ikelesia. Ngultirakl er a tial odbechel. Me sera le dengchokl el ngara medal e longiil er a temel a sakrament lomuchel, ea eua rekil el buik a mlo dechor er a medal e omes er ngii. A delak a mlo klidmechur e outkeu er ngii. Ngikal buik a ulebult e merael el mo er a kingellel, el mlara teliang er tial blel dengchokl er ngii a delak. Ngikal buik a mla er ngii a lenguu e luueta el mera delak e nguu el msang e lemuut el mo er a kingellel. A delak a miles a babier er a chelitakl el ngara bek el kingall er a chelsel a ikelesia. Ng kmal di mle sebechel beot er ngii a nguu a chimong el ngara bebul a kingall el kmeed er ngii. Engdi, ng kmal mle chemat er ngikal buik er a ungil omerellel, el ngii a siluub er a blil me a ikelesia. Ng dil medemekii a rengul a delak. Ng kmal mlo mesisiich a uldesuel el kmo a Dios a siotai er ngii el mei er a Osobel e oltirakl er Ngii. Ng mlo lmechesuar el kmo ngkirel el mo metecholb. Ng mlo lmechesuar el kmo ngkirel el mo metecholb. Tial lungil teletelel a kmal mle klou a relii el mo ngodechii a rengul a delak.
A tekingel a Dios a mo dmolech el remutech a reng e mok a mederir tirkel tir a diak el lesang. Sel rael el mo er a Emmaus, ea re teru el mesiungel a milrael lobengkel a Jesus. Te mle mekngit a rengrir e leng dimlak lomtab el kmo a Osobel a mlo mesisiich er a kodall. Meng mekngit a rengrir, a uchul eng dimlak lodengei el kmo a ngar el Kristo a obengterir el merael. Me a Jesus a “milsaod el mor tir a ikel rokui el lolekoi a chedaol llechukl el kirel,” te kmal dirrekk el diak el dengchii el Osobel el milkiis er a kodall el mo lmuut er a bol dengchokl el lomached a blauang lobengkel. Seikid e ngii a ulebok a “mederir”. Me sel kid—malechub eng resechelid, dodengterir el chad, me a re tonari—a omengur e mechedii a blauang Lobengkel, ea medad er a klemedengei a mo obok. Me tirkal mesiungel ra le ngara Emmaus e te ulmedasou er sel temir sera lobengkel a Osobel mla mekiis er a kodall, me te dilung el kmo ng kor a kilard a rengrir er ser a losaod er tir a chedaol llechukl (mesa Luke 24:27–32). Tiang a mo klemerang el merkid rokui.
Ulebongel
A ulebongel, eak kuchais el kmo a urrekodel er a tekingel a Kristo a sebechel dubech er a ngidil taem me a ngidil belsechel a kmung ngerang, alsekum e kede kudmokl a rengud el mo melai. Urrekodel er a tekingel a Kristo a mo ocholt a ues el ulsbechall er tial klengar, e smisichii a meral olechoted me a belkud er a medal a Dios el ngii a Ngelekel, e mo omekrael er a resechelid el mo er a Kristo me a diak a ulebengelel klengar. Ng soak el mengesimer el lemuut el melekoi er sel siotai er a Nephi sera ledung: “Misei a uchul eng kiriu loutekangel di merael mo ruchei el mla tibir a rengum el kirel a Kristo e bleketakl a ongilem, me a beltikelreng el mo er a Dios me a rokui el chad. Malsekum, e ko moutekangel merael mo ruchei, el mekekid er a tekingel a Kristo, e outkangel mo er a ulebongel, ea, Chedam a dilung el kmo: ko mo nguu a diak a ulebengelel klengar” (2 Nephi 31:20). Lobang a ngklel a Jesus Kristo, amen.