Tiang Ngoikid el Morker?
Kede remuul a ungil tekoi sel domes e domtab aikel bek bedengel a teletael el sebechel duubech.
A mla moluut el ebangkelio er a Jesus Kristo a omeksemeriar er kid el momdasu el mora ngar medad el taem. Ng smodii sel moktek er tial klengar mesel meral klengar el kirel motirakl. Ngosisecheklid er a meklou luldasu el kirel a ngar medad el taem elmo omtebechel a omerelled er chelechang.
Sel tara ues, e kede rokui el medengterir a rechad eldi medengelii chelechal taem: mchitii er chelechang, moldeu er a rengum er chelechang, el lak ke momdasu el kirel a klukuk.
Chelechang ma klukuk a moungil alsekum e kede blechoel lomdasu el kirel a ngar medad el taem. Mesel douedikel a ikel tekoi er chelechang, eng kired el blechoel el loker, “Tiang ngoikid el morker?”
I.
A bebil ra uldasu a melilt el kirel a mo meruul ra kmung ngerang malechub eng diak a doruul erngii. Ak rirengesii a okesiu er a uai tial tekoi er a ongdibel ra stake er a Beluu ra Merikel ra betok el rake r memong.
Ng dilubech er a klebokel el basio er a daingak. A delbechelir a re ngeasek el ngalk er a skuul a mle dengchokl er a bebul a chudel. a milngedecheduch e luleuchais er tial blekeradel a dilu el kmo tulemes er a ungil el cheremel a kerekar el klou, e bsebsuchel a kemril el milil er a uchul a klebokel el mesisiich el kerekar. A bebil ra taem eng ngara chutem, e a le bebil eng mo rebab ng meriou e mo meliuekl er a uchul tial kerekar. Engdi ngera uchul mesel hutsu el ues a otakl a osengir tirkal betok el ngalk er a skuul?
Le telamt er a bebul a chudel a klou el bilis. Ngikang e a uchul ma rengalk er a skuul a ngelomel, e ngikel charem ra kerekar a kuk ngara uldesuel ngil bilis. Sel ta el kuk ke le bol dibus ngil charem elmo meliuekl er tial kerekar, e ngikal bilis a mekekokil merael bedul luchei e kuk tometii. E tiang e a uchul me tirkal ngalk er a skuul a mle ngelomel. Ngdiak a cherodech e ngelomel, tomes el bedul tial tekoi el lultebechel el morngii a metemall.
E ngii el bilis a kmal kmedang el sechesokl er ngil charem eng sobngii el loba ngerel. A ktekudel a dubechang, me tirkal delbechelir a rengalk er a skuul a riruret el mong e melai er ngikal charem er ngkal bilis, engdi temlo meod. Ngikal charem a mlad.
Ngidil chad ersel seked a mle sebechel sobecheklii ngkel charem er a ngidil taem e lomerek chimorir malechub e toldiu, eng ding dimlak. Te diulmes e ngii a mekekokil lolamt el dubech a kerior. Ng dimlak oker, “Tiang ngoikid el morker?” Sera le dubech a lilsang, e te rokui el mlo remuret elmo tomer er a mla metemall, engdi te mlo meoud. Ng meringel el ouchel el reng a di ta el tekoi el sebechir el rullii.
Tial meral dilubech el lomeruul a belkul a betok el tekoi. Ng melutk el kirel a tekoi el de ues er a elsel a klengar er kid, ma klengar ma omeruul el meliuekl er kid. Sel de ues a metarchebesul el merael kirir a rechad malechub eng tekoi el betik a rengud er tir, eng ngarngii a lemelted el kmu tekoi malechub e kede ouedikel malechub e kede di lmuk. Meng ngungil el dil kid el loker er kid el kmo, “Tiang ngoikid el morker?” Maikel mo dubech el mereched e etiteuokel, a diak el kired eldi chelelakl. Ng kired e louedikel elmo ungil mesebechakl malechub e kede olngeseu a ureor el merob sel direke ngarngii a taem.
A ikel luldasu el blak basech a uldimukl el sel dolilt er a delongelel a mo uedikel malechub e kede kuk di chelelakl. E oumesind er ngii a ikel lomelilt er a delongelel a imol tekoi malechub eng tara tekoi. A ikang a uldimukl er a melilt er a delongelel a ungil ma mekngit, engdi ng blechoel el lomelilt er a delongelel a teblong el lungil. E dirrek el tiakid a ngungil a doker el kmo tiang ngoikid el morker. Kede melilt e lokiu a betok el rael er a delongelel a teblong el lungil, el blechoel el kirel a kmong mekerang a dousbech a temed. Ngdiak a mekngit a dousekool a klekool er a video malechub e kede meluches malechub e kede omes a TV malechub e kede mengedecheduch er a cell phone. Engdi a ikang a uldimukl er ngii sel cheloit el techall, el belkul a kmo alsekum a kede chemoit a temed el meruul er a tara tekoi, e kede kuk oridii sel tara techall el meruul e ra kmung ngerang. A kungil el medengei el kmo ng kired elmo telkael a domdasu ra kmo ngera kede mla metom ersel taem el de mechesang er a tara tekoi, molmuut er a domes er ngii mel ngarngii a klungiolel.
A tara taem er a memong e ak milngedecheduch el cheldechedechak a mle “Ungil, Lmuut Lungil, malechub eng Kmal Ungil.” Ngokiu sel cheldecheduch e ak dilu el kmo, “leng kuk di uchul e a tekoi a ungi a diak el bleketakl a belkul me doruul er ngii. A ikel betok el lungil tekoi el sebeched el doruul a lmuut el lengelakl ersel taem el ngarngii me bode ketmokl. A bebil er a tekoi a lmuut el luldingerongel er a ungil, e a ikang a ikel tekoi el kirel ngaruchei a belkul er a klengar er kid. … Ng kired elmo imikl a bebil er a ungil tekoi me bol sebeched el ngmilt a bebil el lmuut el lungil.”
Ka berkii osengem. Ngera sel mo meketmokl er a ngarmedad el taem er a ikel luldasu el deruul er chelechang? Molbedebek ersel lusbechelel a dolai er a skuled, mesuub er a ebangkelio, omekbeches a telbiled sel dolai er a sacrament, e de ngara templo.
II.
“Tiang ngoikid el morker?” a dirrek el klou a belkul sel dolilt el kmo kede mekerang a domdasu el kired. Esel klou a belkul, sel kede bekl el chad el ngelekel a Dios el lobang sel mesisiich el rael er a diak a ulebengelel el klengar. A bekl el lolangch, elmo uldimukl er a urrered, skeng, klisiched malechub eng etengakl, a di tedeb malechub eng mekekerei el tekoi sel domekesiu er ngii elmo ersel diak ulebengelel. Lak el dil kemiu el merob er kemiu malechub e komdasu elmo melchang er a olkael er a tekoi el kau a melasem el ngoriakl el kirel.
Rodom er ngak, me a ruchedak el lomes malechub e ko menguiu a ikal kulekoi, a kureng me ko medengelii a uchul ma re meredel a meskemiu a ikel losisechakl ma omelach. Aki betik a rengmam er kemiu, e a Demad ra Babeluades ma Ngelekel ra, Jesus Kristo, a betik a rengrir er kemiu. A uldesuir el kired a sel “klou el luldasu er a deurreng” (Alma 42:8). Sel luldasu ma ikel lecherir ma ikel lureor ma telbiil a mekrolid el morsel klou el klungioul ma deurreng er tial klengar mesel merael el mei el klengar. Sel de dosiou ra Demad ma Ngelekel, e kede olsisechakl e omekrael le Tir el mla mekrolid e lokiu a Chedaol Reng. Kemam a diak a somam el ua sel ki molekoi a klemerang e melisiich er kemiu elmo meruul a ikel Tir a mla kutmokl el rael el mora diak a ulebengellel klengar, “sel kot el klou er a rokui el sengk er a Dios” (mesa Doctrine and Covenants 14:7).
III.
Tiakid a tara okesiu el kirel a mo dubech er a debdasu el tekoi el meketmokl er chelechang. Ng melutk el kirel aikel dolilt el remuul el dolenget er chelechang el mesengar a klou a belkul el moktek er a ngar medad.
Ng mlara ongdibel er a stake ra Cali, Colombia, e a odos a uluchais ra kmong milkerang ngii ma bol kaubuch el chad a blel sorir el mo bechiil er a templo e a mle kmeed el templo a imis el cheroid el ngara Peru. Ng mlo kemanget el taem, e lulngudel a ududir elmo olengil a bas. Me te merolang el ngara bas el mora Bogota, engdi sera le bochang e te mlo medengei el kmo a rokui el kingall er tial bas el mora Lima, Peru a mla mengai. Te sebechir elmo remei meng diak el bol bechiil malechub e te mo bechiil er a ikrel a templo. E klengeltengat, e leng mlo rengii a tara techall. Ng sebechir el ngara bas el mora Lima alsekum e te kongei el dengchokl er a ulolel a bas e lomelemii omerael el leiim el klebesei. Tem le sorir el meruul er tiang. Ng dilu el kmo eng kmal mle meringel, le re bebil ra mlara omerael a kuk mechititerir me te mo dengchokl a kingelir me bol sebechir el tuamt ocherir er a ulaol.
Sel ilsir a renguk er tial tekingel sel cheldechedecal ngil odos el kmo ng tmeu a rengul el ngii ma bechil a mlo sebecherir el mora templo el lulekiu tial blekeradel, e leng ngildechii a teletelel a lolchesuar el kirel a ebangkelio ma teletael er a blo lolchesuar el kirel a chebechiil er a chelsel a templo. A Rubak a ulusengk elmo er tir e loba ulekerool e lulekiu er a lolenget. Ng dirrek el lulmes el kmo sel leiim el klebesei el lomerael el mlora templo a milkdebechii a kmal klou el lukurulel a rengrir ra kuk betok el lomerael el mora templo ra kuk di mle tada el lomelnget.
Ma ikel mla mo merek el rak me sera ak rengesii sel kle sioning, e ak melbedebek el mekerang a blol ngodech a klengar er tirkel ngeasek el kaubuch el chad alsekum e te kuk mlo melilt el ngodech—e ruchei ersel lomelnget el lusbechall me bol bechiil er a templo.
Ke de meruul a diak el mochur lomelilt er tial klengar, a bebil a meklou ma bebil a kora mekekerei. Sel bo dolebedebek, e kede sebeched el mesang a klou el klekakerous er a bebil ra tekoi el kiltmokl a klengar er kid. Ke de remuul a ungil tekoi sel domes eh domtab aikel bek bedengel a teletael el sebechel duubech. E sel de uaisei, ede mo mesuub aikel tekingel a President Russell M. Nelson el blechoel lomdasu ra ulebengelel a tekoi. Sele kid, ea ulebongel a blechoel ikel telbiled er a templo el mo bedul a diak a ulebengelel klengar, el ngii a kot l ngaruchei el sengk er a Dios.
Akuuchais el kirel a Jesus Kristo ma Tngakireng er ngii ma ikel klemerang ra diak a ulebengelel ebangkelio er ngii el ngara ngklel a Jesus Kristo, amen.