Toketekii a Tengetenged er a Chedaol Tekoi me a Ucheliu
Sel doltirakl er a ebangkelio er a Jesus kristo, sel bo dultuil er a tngakireng er a osobel e dorael bedul uchei loba klaumerang, el diak demedakt, e kid a telenget er a chelbeldil a cherarou.
Rodam me a rodos er ngak, chelechal bo dongesimer tial klou el ongdibel, e ak mereng a sulel a Demad el ngara Babeluades er a llechul, klemrang, me a chedaol ocholt el mla medung er a ikal merekong el eru el klebesei. Kid a mla mosisechakl er a remesiungel a Dios el mla mokedong el mo melekoi a chedaol Tekingel. A Rubak a mla omeklatk er kid er a chelsel a uriul-klebesei el chedao locholt, “A ltobed er a ngerek malechub … a ltobed er a ngerel a remesiungek, eng di osisiu.”
Sel kumes er tial seked er a resanto, e kulbedebek er tirkel chedal a ikelesia lomes er tial klou el ongdibel el meliuekl er a beluulechad, e ak lotkii a kldibel er a chelsel a babier er a Mormon er sera bo eldum a Jesus Kristo er a re Nephites ruriul er a kodellel er a kerus. Ng mle olisechakl er tir a ebangkelio e dilu er tir el kmo, “Bom rei er a rekeblimiu, e molbedebek aika el tekoi el bla kdung, e moker er a Chedam, el ngara ngklek, mbo modengei.”
“Bom rei er a rekeblimiu, e molbedebek” a ngii a ongeru el dauch el ngmai locha er a rengud a tekingir a reprofet me a remengeteklel a Ikelsia el mla medung er tial chedaol kldibel. A blai el telutk er a Kristo a mesisiich el dodai er a rengedel a Dios el ngara beluulechad er chelchal sils, el mlulaoch el kmo, a diablong a “mengesuseu [a] rengrir a rengelekel a chad, e omdui [er] tir el mo kesib a rengrir er a ungil.”
A rechad a mla omekedechor a mesisiich el blai er a chelsel a reksi el mengeroid er a cherarou. Oumesingd, el ikal mesisiich el blai a ngarngii a chad el ngara talikerab el mengkar—el uaia reprofet—el omeklatk er kid er a odechelakl el merael mei.
Sera uchelel a Utah er a temel, a demal a demal Thomas Rasband me a telungalek er ngii e mle bebil er rekot el chad el mo tmuu er a Heber Valley er a klebokel el Wasacth Mountains er a Utah.
Sera 1859, Thomas a ulengeseu el omkedechor er a Heber fort, ng mlo dechor el kirel a mengellobel. Ng mle beot a rellel el di ruul er a kerrekar, el tang a teletelel okedecherul teblong, el ungil ruul a tkul meliuekl. A mekekerei el kerrekar el blai a mlokedechor er a chelsel el ngarngii a kbekbel. Tial omekedecheraol a mle basio er a selbechakl er tirkel uchelel a ikelesia me a telungalek er tire r sera lolalem a dellomel e longull er a Rubak.
Ngosisiu el mei er kid. A rekeblid a mesisiich el sebechekled er a mekngit er a beluulechad. Chelsel a rekeblid e kid a mei er a Kristo e mesuub el mo oltirakl a Llechul, el menguiu chedaol llechukl e dmak el meluluuch, e kaingeseu el melemolem el ngara rael er a telbiil. Sel beches el teletelel omesuub er a dersta el chad me a telungalek er a blai lokiu a hong el Mei, e Moltirakl er Ngak a mla mekedmokl el mo “smisichii a belted e ngosukid el mo uaia Jesus Kristo.” Sel doruul el uasiei e kid mo uai ngkel Paulus omekedong el kmo “beches el cha[d]” rengud me a bedenged a ulsirs er a Dios. Kid ousbech er tial klisiich el mo odngeklii a odechelakl er a cherarou.
Sel dekiei el ngara blakereng el mokdubech er a Jesus Kristo, e kid a momelchesuar a budech er a Chedaol Reng, el mekrolid el mo er a klemerang, e rullid el mo kiei el klikiid el kirel a klengeltengat er a Rubak, e mo sioning el kmo a Dios a ngar e betik a rengul er kid. Aika el rokui a ngar er a chelsel a mesisich el rekeblid. Eng di molatk el uase, a rekeblid a di meisisii leng ultuil er a chedaol klisiich er a dersta me a dersta er kid el ngara chelsel.
A President Russel M. Nelson a ulsisechakl el kmo, “Aikal sils el merael mei, eng diak el sebeched el mo selbechakl er a chedaol tekoi a lak a ulekrael, ngesou, ongelaod, me a odbechel chedaol reng.” Ngii el ngar el profet er a Dios, chad er a ues, me a chedaol ocholt er chelechal sils, el ngara bebul a talikerab el mengkar, er a Ikelesia er a Jesus Kristo er a Uriul-klebesei el Santo, e ngii a mesa cherarou ruchei.
Rodam me a rodos, kid a ngara mekemad lobengkel a Diablong el kirel a chad. Tial mekemad a dimla ngarngii er sel kelngar kid ruchei. A Diablong me a edei el itiud er a rengelekel a Chedam er a Babeluades a mlo ikrii sel yaksok er Ngii er a diak a ulebengelel klengar. Seikid el taem el mei, e tirkel kesai el chedal a cherarou a melemolem el oldechelakl er a reblak a rengrir el millilt loltirakl er a uldesuel a chedam.
A Diablong a medengei el uase a sils er ngii a ulecherangel e di merael mo diak a taem. Ng kmal meduch e cheblad, eng di ng diak bol kats. Eng di sel mekemedil kirel a dersta me a dersta er kid a di melemolem.
Sel mo sebechekled, eng kired el mekedechor a mesisiich el chedaol klechad me a ucheliu el kired, el mesisiich el diak a klisichel a mekngit el mei er ngii.
A Diablong a kmal meduch el bersoech, el mekekokil soiseb er a uldesued me a rengud sel sekum e kid a mla mecherei a mengkerenged, mo chemau a olibesongel, malechub eng mo diak a urunguled. Ng mengesuseu e rkid lolab a cheleblad, el oleko mengebekakl er kid, mengelaod malechub eng di telkib el taem lungil a rengud. Ng mesebechakl er a kldidai el reng, diak lungil lomeruul, blulak, mekngit el reng me a tekoi er a deleboes e a cherengel a taem e kid “omdasou el kmo ng di ungil.” A Chedaol Reng a sebechel mo cheroid er kid. “Me a Diablong omulak er tir, e mekekokil mengesuseu er tir el mo er a beluu er a ngau.”
A kuk bitang, e kid a melchesuar Chedaol Reng el meisiich sel doldanges er a Dios lolab aikakid el tekoi:
Sel dokedecherur a chedaol klisiich el tengetenged, e kid a torbengii a cherarou, e mi iikrii, e melchesuar a budech er a Chedaol Reng. Ng sebeched loltirakl er a okesiu er a Rubak el Osobeled, el ngii, er sera bo longetikaik er ngii er a chereomel, eng dilu el kmo, “Mcheridau er ngak e Diablong.” Ng kirel a derta er kid el mesuub a teletael er a klengar e mekera bo doruul er ngii.
Tial melemalt el moktek a ungil selaod er a chelsel a babier er a Mormon el captain Moroni er a longedmokl er a re Nephites el mo oumekemad er a cheblad, omekeuad, e osiik a klisiich el Amalickiah. A Moroni a milkedecherur a tenget el omecheliu er a re Nephites “me bol kiei loltirakl er a rubak el Dios er tir, e bo lomecheliu e longeluoul er sel chereuir omekedong er ngii el Kristiano.” Moroni a mle “mesisiich a klaumerang er ngii er a Kristo,” me a rechad a mle blak “a rengrir loltirakl a llechul a Dios … e chetirir a mekngit.”
A re Lamanites sera be loumekemad, eng mlo mechas a rengrir er a kedmeklir a re Nephites, me te mlo make. A re Nephites a mle oureng a sulel “a Rubak el Dios er tir, el klisichel a uchul e te mlo kats er a rechereuir.” Tem le mekedechor a tengetengir lomecheliu er tir, e mla toketekii a klaumerang er tir er a Jesus Kristo er a rengrir—el dmolech el ngara rengrir.
Ngera bebil er a teletael el dolenget er kid er a taem er a uldikel me bol sebeched el mo “dongu er a chimal a Dios el kirel tial klou el ureor”? Ka domes chedaol llechukl.
Kid olngesenges. A Rubak a dilu er a Chedam er a Lehi el mo oldurokl er a rengelekel sechal muut el mo er a Jerusalem el mo “melai aikel record, e lengai el mei er a chereomel.” A Lehi a dimlak longer; ng dimlak loumededenger el kmo ngera uchul e mekerang. A lechub a Nephi, el ngii a kilengei e kmo, “Ak mo meruul aikel tekoi el bla ldung a Rubak.”
Ked emo ngara omeruul el meral ngarngii er a rengud lolngesenges el uaia Nephi? A lechub eng meringel er kid e oumededenger a tekingel a Dios el uai robekul a Nephi, el dimlak a klaumera er tir me tem le obult el mo cheroid er a Rubak? Olngesenges, lobengkel a “chedaol reng,” a lolengit er ngii a Dios er kid.
Kid oumerang er a Dios, el dilu er a Joshua, er a longedmokl er a rechad er a Israel el mo sosieb er a beluu er a telbiil, “Bol mesisiich a rengum … e lungil a rengum; lak ko medakt, e lak bol moualech a rengum; le Rubak el Dios er kau a mo obengkem er sel mo er ngii.” A Joshua mle oumerang aikal tekoi e milellach er a rechad: “Mongikiid er kemiu: le klukuk e a Rubak a momeruul ongasireng el tekoi er a delongeliu.” A Rubak a milingii a ralm er a Jordan, m e a re Israelites el okeua el rak lorael er a chereomel a mlomerek.
Kid a dechor el kirel a klemrang el uaia profet Abinadi er a chelsel a Babier er a Mormon. Ngulebdechem, e milngai el mo er medal a King Noah me a remekngit el prist er ngii, e a Abinadi a ulsisechakl aikel Teruich el Llach e mle mesisiich lolisechakl el kmo a Jesus a mei “el mei metengel er a delongelir a rengelekel a chad, e … mo olsobel er a rechedal.” E ngii, a uleba klaumerang er ngii, e millekoi el kmo, “O Dios, mngikak ,”me a Abinadi “a mlo er a meringel el kodall er a ngau.”
Kid a meruul e omekbeches a telbiled sel dolai er a sacrament e dengara omengull er a chelsel a templo. A sacrament a kmal moktek er a omengull er kid sel Sandei, el kid a nguu a yaksok el mo “el Chedal Reng er ngii a mo blechoel [lobengked].”Tiaikid el chedaol ruoll e kid a tibir el mo nguu a ngklel a Jesus Kristo, e mo oltirakl er Ngii, e mo meruul a ngercheled er tial chedaol ureor el uai Ngii. Chelsel a templo, eng sebeche el mo “mechei a tekoi er a tial beluulechad” e melchesuar a Rubak me a dmolech el budech er Ngii. Ng sebeched el omdasou er a rebeldeked, telungalek er kid, me a diak a ulebengelel klengar er a rengedel a Chedam. Tiaikid a uchul e a President Nelson a dirk dilii er a beluu er a Rome el kmo: “A klungiaol el mo mocholt er tial templo a kmal mo obdois.”
Ng kired el mo bleketakl er a ikel rokui el doruul. Ng kired el mo meduch el merritel meng diak di dolemolem el melchedech el kmo ngera ungil e ngera mekngit. Ng kired loiia er a rengud sel tekingel a Petrus, el mle Apostol er a uchelel a Ikelesia el dilu el kmo, “Bom klekar, e mkerekikl; le cherreuem, el diablong, el uaia ngerel a raihong, a mererorael, losiik er a kelel.”
Sel blak a rengud el melisisiich a tengetenged e kid a merael mo uaia Jesus Kristo, el meral oltirakl er Ngii, el rengud a ucheliu er Ngii.
A klaumerang er kau er a Jesus Kristo a ngii a tengetengem, el sebechekel a klengar kau. A demak el rubak me tirkel lulbengkel er a uchelel lomekedechor er a Heber Fort, e te milngisois a dersta el kerrekar el mol muut er sera bol “okeim a iidisel rokui” me te mle selbechakl. Ngosisiu me a klaumerang er kid. Kede ouderstang el nguu a sioning er a Chedaol Reng el uai Ngii sel longedecheduch er a rengud, lolisechakl a “klemerang er a chelsel a rengud.” Sel doltirakl er a ebangkelio er a Jesus Kristo, sel bo dultuil er a Tngakireng er a Osobel e dorael bedul uchei loba klaumerang, el diak demedakt, e kid a telenget er a chelbeldil a cherarou. A klaumerang er kid a omak er kid el mo er a babeluades, e kid a mo ngeltengat el mo oba “klemerang er a rokui el tekoi.” Me ke de, telnget el, bleiull er a beltikereng er a Osobel.
A profet Ether ulsisechakl el kmo, “A leuaisei, e ngike el oumerang er a Dios a sebechel morngii a urungulel er a ungil beluulechad, oi, ng basio el ngara kadikm er a Dios, el urungulel a msa klaumerang, el mo otil a rengul a chad, el rulterir el mo delalm e mesisiich, el blechoel meruul a ungil omeruul, e mo kobkelii a Dios.”
Rodam me a rodos er ngak, ak meskemiu a klengeltengat er ngak el mo makes le bedul uchei loba blekebek el reng er a Rubak me a ebangkelio er ngii. Mngai chimam el mechulterir tirkel mla mesibas e moba klisichel chedaol reng, e mo mekrael er tir laba beltikereng el muut el mo nguu chedaol klechad me a ucheliu el mor tir. Mosiik “el mo uaia Jesus” er a ikel rokui el moruul, mcheridii a mekngit me a ongetikaik, bol bleketakl a rengum, bom kedung e mklikiid, mochotii a chubechub me a beltikereng, el betik a rengum er a Dios loba olchotel a chad el meral oltirakl.
A klaumerang er kid er a ebangkelio er a Jesus Kristo, me a rekeblid, telungalek er kid, me kid el chedal a Ikelesia er a Jesus Kristo er a uriul-klebesei el Santo a sebechel mo tengetenged lomecheliu er kid er a klisichel a mekngit. Aikang a kuchais er a sioning er ngak el kirel el ngara ngklel a Rubak er kid el Osobel, el Jesus Kristo, amen.