Klou el Beltikereng el mo er a Rengelekel a Chedam
A beltik el reng a ngii sel kot el klou a belkul teletael el odbechel kirel a chedaol moktek el dengilai el mla er a betik er a rengud el profet er kid.
Rodam me a rodos er ngak, tia kmal tokubets e klou a ultutelel taem er a chelsel a reksi. Kede ngeltengat el kiei er a uriul el klebesei ruchei er a Ongeru Lemei Osobel. Uchei er a lomuchel a ureor er chelecha el uriul klebesei, er sera 1829, sel rak el uchei er a lemechederoder a Ikelesia, e a klebokel chedaol ocholt a mlengai louchais el kirel a “meang el ureor” el “mocha omuchel.” Tial chedaol ocholt ouchais el kmo tirkel semeriar el mo mesiou er a Dios a sebechir el mo ngara omesiou lokiu a “klaumerang, urungulir, bliochel el beltikereng, e oba moktek el bedul a klebkellel a Dios.” A bliochel el beltikereng, el ngii a “klikiid el beltikereng er a Kristo,” a uldimukl er ngii a diak a ulebengelel beltikereng e ra Dios el mo er a rokui el Ngelekel.
A moktek er ngak er chelechal tutau a mo meketeklii a klou el urerel tiaikid el beltikereng er a chelsel a ureor er a klemisionari, ureor er a templo me a reksi er a telungalek, me a kelulul a blai, me a ngesou er a Ikelesia el kirel a tekingel a klechelid er a telungalek. A beltikereng er a Osobel me a beltikereng el mo er a resechal me a redil a kot el ngarbab el blekeradel me a moktek er a odingel e dirrek el ngii a chedaol moktek el ngerachel el dengiluu er a betik er a rengud el profet, el President Russell M. Nelson, el ngii a milchisii er sera 2018.
Blakereng er a Urerel a Klemisionari el Mengideb er a mla Obriid el Israel
Ak mlo medengelii a deleuill er a urerel a klemisionari me a beltikereng er a uchelel a klengar ngak. Sera leteruich me a ta rekik, e ak ngiluu a patriarchal blessing er ngak er a patriarch el ngii a mle demak el rubak. A telkib er tial klengeltengat a kmo, “A ku mekngeltengat er kau me ke mo mui er a beltikereng el mo er a rebebil er a rechad, le kau a mo mokedong el mo omerk er a ebangkelio el mo er a beluulechad …e mo omult er a rechad el mo er a Kristo.”
Ak mle medengei er a dirk kekerei el kmo a osischeklel ebangkelio a ultuil er a klou el beltikereng el mo er a rokui el ngelekel a Chedam er a Babeluades.
A re General Authorities er a longedmokl er a Preach My Gospel er a terucih me a eim el rak er a memong, e a ki mloterkeklii el kmo a beltikereng a kot el klou a ultutelel er a urerel a klemisionari er chelechal taem, el di uaia ngaramong. A ongelolem el bliongel, er a ikel blekerdelel a Kristo, luldimukl er a bliochel el beltikereng, a ngii a dimla kot el merael chisel bliongel er a chelsir a remisionari.
Me tir lomtechei er a Osobel, e ngoumesingd er a remisionari a melchesuar tiaikid el teletael er a beltikereng, e sel bol uaisei, e te mukngeltengat er a urerir. A rechedal a ikelesia sel lenguu chedaol locholt er tiaikid el beltikereng, el ngii a klou a ultutelel ngesou el mo er a Rubak me a moktek er Ngii, e seikid e a urerel a Rubak a mo mekedmokl.
Ak ngeltengat el mlo telkib el chelsechusem er meang lokesiul tiaikid el beltikereng. Sera kusiou el Merredel er a Pacific Islands Area, e ak ngiluu okedong er a dengua el mla er a President R. Wayne Shute. Sera lengeasek el chad eng mla er a mission er a beluu er a Samoa. Uriul, eng liluut el mo er a Samoa el merredel er a mission. Sera loudengua el mei er ngak, eng mle merredel er a Apia Samoa Templo. A ta er a mle ngeasek el misionari, er sel taem er a lorredel er a mission, a mle Elder O. Vincent Haleck, el ngii chelechal taem eng Area President er a Pacific. A President Shute a kmal mle dmolech a beltkil a rengul me a omengull er ngii el mo er a Vince me a tial rokir el telungalek er a Haleck. Oumesingd el chedal tial telungalek a mle chad er a ikelesia, eng di a demal a Vince, er a Otto Haleck, el bdelul tial telungalek (el uchelel a rechad er a Dois me a Samoa), a dimlak. A President Shute a mle medengei el kmo ak mla er a stake conference me a lmuut el bebil er a miting er a American Samoa, e ulengit me a lsoak e bok kiei er a blil a Otto Haleck me luchul e kuchais er a ebangkelio el mo er ngii.
A bechik, er a Mary, me a ngak a kiliei lobengkel a Otto me a bechil, er a Dorothy, er tial klebokel el blirir. Sel tutau er a ki momengur e a kuuchisa er a ebangkelio e ulengit me a Otto bol kebetech ngii me a remisionari. Ng kmal mle medemdemk, eng di mle mesisich, el kotouar er a ongtik. Ng dilu el kmo ngungil a rengul el betok el chedal a telungalek er ngii a Uriul-klebesei el Santo. Eng di ng mle mesisiich el melekoi el kmo a rebebil er a rebeldekel a delal el redil er a Samoa a mle mengeteklel a kle Kristiano er a Samoa, e ulemelchesiu el kirel urrekodel er tial uldelid el klaumerang er a Kristiano. Meng uaisei, me a ki mirrael e melemolem el ungil sechelei.
Uriul, er sera longedmokl er ngii a President Gordon B. Hinckley el mo olterekokl er a Suva Fiji Templo, e a secretary er ngii, er a Brother Don H. Staheli, a ulemekedong er ngak er a New Zealand el kirel a kedmeklel omerollir. A President Hinckley a mle soal tuobed er a Fiji el mo er a American Samoa el mo oldingel er a Resanto. A tal hotel el di bla lousbech er ngii er a ngaramong a lulemdasu el kirel. Me a kuleker el kmo ng sebechek el ngodechii a mo delengcheklir. A Brother Staheli dula el kmo, “E kau a Area President; meng kmal di ungil.”
Ak di mle merreched lomekedong er a President Shute e silbedii el kmo ng locha ngarngii ongeru el techelled er a chedaol klengeltengat el mo er a sechelid er a Otto Haleck. Tiaikid el taem e a President Gordon B. Hickley a mo misionari. A kulnger el kmo ng locha di ungil besul er a re Halecks omko tirkal rokui el chad el ngara omerael lobengkel a President Hinckley a bol kiei er a blirir. Ng President me a Sister Hinckley, me a ngelekir redil er a Jane, me a Elder me a Sister Jeffrey R. Holland a dirrek el mla er tial omerael. A President Shute, a ulureor lobengkel tial telungalek, el kudmokl a rokui el teletelel tial omerael.
Sera ki mngara Fiji el mong ruriul er a oterkeklel a templo, e te kmal mle ungil me mukai er kemam. Sel kesus e a ki milngedecheduch er a kmeed el telael chedal a ikelesia er a Samoa e a uriul e a ki merolang el mlo er a blirir a re Haleck. Sera ki bom kldibel er sel tutau er a bol kukuk ki momengur, e a President Hinckley me a Otto Haleck a mla mekur a klausechelei er tir. Ng uaia blo el mechas a renguk le te chadecheduch osisiu el tekoi el ki ble mchadecheduch el kirel er a kmeed el tal rak ruchei. A Otto ulechotii omengull er ngii el kirel a ikelesia er kid eng di kmal milketeklii a blakereng er ngii el kirel a ikelesia er ngii, me a President Hinckley a mocha orkedii ongelngelel Otto e dula el kmo, “Otto, ng di ng diak el klebech; ng kirem el mo chedal a Ikelesia. Tiaikid a Ikelesia er a Rubak.” Ng uaia ble el sebeched el mesa osengel Otto el mengodechd e mlo semeriar er tial tekingel a Preisdent Hinckley.
Tiaikid a mle uchelel a melemolem el osisechakl er a remisionari me a chedaol ngariou el reng el mlo uchul e a Otto Haleck a miltecholb e moterekokl er a kmeed el tal rak ruriul. Tal rak ruriul, e a telungalek er a Haleck a mlo moak er a templo el di mereko el telungalek el mo er a ulebongel.
Sel kmal rutechii a renguk er a chelsel tial meang el teletael a sel dmolech lodingel er a beltikereng el mlocholt lokiu a dimla misionari er cheungel a President Wayne Shute, el Elder Vince Haleck, me a blakereng er ngii el soal mesa cherrengelel a telungalek er a Haleck el mo moak el telungalek el mo er a ulebongel.
Sel dosaod er a omengideb er a Israel, eng kired el sumechokl a rengud lobengkel tiaikid el teletael er a beltikereng e choridid er sel uaia le kuk di el ngerachel e merekong e mo oba beltikereng e dmak loureor lomerk er a klemechel, odngelel, me a urerel Osobel el mo er a beluulechad.
Kid el chedal a ikelesia a sebeched lochotii a beltkil a rengud el mo er a Osobel me a rodam me a rodos er kid er a beluulechad el rokir lokiu a beot el ongit. A beches el temel a miting a le Sandei a olchotel a kmal ungil techall el rechedal a ikelesia a mo oba beltikereng e siotai er a resechelirir me a lekaodengei el chad el mei me lomes e lomelchesiu a teletael er a chelsel a Ikelesia. A chedaol miting er a sakrament, el omengull uasei el Elder Jeffrey R. Holland a silodii sera chelii, lokiuellel a okeim el bung el miting el moktek er ngii a mesuub er a Chuodel Renged me a Osobel malechub eng omesubel a cheldecheduch er a klou el ongdibel el ngii a melutk el kirel Osobel me a Osischeklel.
A rebebil er a rodos er a Relief Society a melchedech el kmo ngera me te mla nguu a ngerachel er a “omengideb” lobengterir a rechedal a chelechad er a priesthood. Ngarngii a moktek er tiang, e a President Nelson a dilu bebil er ngii er tial mlomerek el klou el ongdibel. Ng dilu el uasei, “Kemam a diak el sebecham el mengideb er a Israel alak kemiu.” Chelechal taem e kede ngeltengat le ng kmeed el okedei el basent er a remisionari er kid a redil. Tia dirrek el mesterir a techall a rodos er a Relief Society el mo oba beltikereng e omerk er a ebangkelio. Sel ngii a usbechall a sel beltikereng, chubechub, chedaol blakereng er a dersta me a dersta er kid—rsechal, redil, ngeasek, me a rengalek—el mo omerk er a ebangkelio er a Jesus Kristo. Omko kede ochotii a beltikereng, blekokeuii, me a ngariou el reng, e te betok a mo kongei er a ongtid. Tirkel tir a kuk melilt el diak el kengei er a ongtid a di melemolem el sechelid.
Ureor er a Templo me a Reksi er a Telungalek el mo Mengideb er a Israel
A beltikereng a dirrek el kmal moktek er a ikal templo er kid me a reksi er a telungalek el kirel omengideb er a Israel er sel bital beluu. Sel dosuub aikel ringel me a ongarm el rebeldeked a mla er ngii, e a beltkil a rengud me a omereng el saul el kirir a mo chachisois. A ureor er a templo me a reksi er a telungalek a mla lmuut el kmal mo mesisiich lokiu tial beches el temel a miting sel Sandei me a teletelel a klas er a rengeasek me a rengara kakerous el chelechad. Aika el ngeldechel a taem a rullid el muut el kmal mo kerekikl e mesisiich el mesuub el kirir a rebeldeked e mengideb er a Israel er sel bital beluu. A ureor er a templo me a reksi er a telungalek a kmal mo meisiich.
A internet a kmal meisiich el dongu; a rekeblid er chelechang a mla mo kot el basio el kirel a reksi er a telungalek. A rengeasek el chedal a ikelesia a kmal meduch er a ureor er a reksi er a telungalek e kmal blak a rengrir el semeriar el mengedmokl a techolbechelid el kirir a rebeldekir el bla losuub el mo oubeltikereng e mereng a sulir. Me sera lebo el sebecherir tirkel teruich ma ta rekrir el mo meruul a techolbechelid el kirir a re mla mad, e a remerredel a templo el meliuekl ouchais er a obdois el iidisir a rechad el mo er a templo. A tal merredel er a templo ouchais er kemam el kmo “te meral betok el chad a meruul a ureor er a techolbechelid … me tirkal teruich me a ta rekrir olab a ngklir a retelungalek el mei. … Ng uaisei te kmal [ngeasek], eng di te oba omengull e medengelii a moktek er a chedaol ruoll el tir a meruul. Ng klebokel el ues!”
Ak medengei el kmo a roungerachel er a Primary me a rengeasek a meruul e melemolem el blak a rengir er a ureor er a templo me a reksi er a telungalek. A rodos er a Relief Society me a rodam er a priesthood a sebechir lolngeseu el kudmokl a ngerchelir er a ureor er a templo me a reksi er a telungalek e dirrek lolngeseu el mengesuseu er a rengalek me a rengeasek el mo mengideb er a Israel er sel kuk tara beluu. Tia kmal tokubets el klou a belklul er a blai me a temel Chedaol sils. Ak yaksok el kmo sel doba beltikereng el doruul a ruoll el kirir a rebeldeked eng mo smisicheterir e omecheliu er a rengeasek el ngeleked me a telungalek er tial kmal di merael mo mui er a mekngit el beluulechad. Ak dirrek louchais el kmo a President Russell M. Nelson a mla ngmai a meklou a belkul chedaol ocholt el kirel a templo me a ureor er a templo.
Kudmokl a Diak a Ulebengelel Telungalek me a Dersta el Chad el mo Kiei lobengkel a Dios
Sel beches el tekoi el melutk el kirel omesubel me a otireklel ebangkelio er a blai me a ngesou el modars lokiu a Ikelesia a kmal klou el techall el dongedmokl a bek el telungalek me a dersta el chad el mo kiei lobengkel a Dios.
A sechal me a redil sel moak er a chelsel a templo, e te soiseb er a chedaol teletael er a chebechiil el ngii a beches e diak a ulebengelel telbiil, loltirakl er a teletelel a priesthood. Seikid e te dmak e ngmai a klengeltengat er a priesthood me a klisiich el mo omekrael e omtebechel a telungalek er tir. A redil me a rsechal a tokubets ngerchelir el ngii a beldukl er a chelsel “Telungalek: Chais el mo er a Beluulechad,” el tabesul a ngerchelir e meklou a ultutelel. Ngosisiu a klisichir el ngmai chedaol ocholt el kirel a telungalek er tir. Sel ledak loureor el ngara beltikereng me a llemalt, e a lolilt el meruul tekoi a klengeltengat el ngara babeluades.
Tirkel dersta el chad me a telungalek losiik el mo medengelii a soal a Rubak a kirir el melasm loureor el kirel a llemalt, delemdemk el reng, blekokeuii, me a beltikereng. A klengariou el reng me a beltikereng a olengchelir tirkel tir osiik er a soal a Rubak, el kirel a telungalek er tir.
A omengikiid, me a omelisiich er kid el kirel a klengeltengat er a telbiil, me a kedmekled el mo kebetech lobengkel a Dios a ngerchelel a dersta el chad. Ng kirel di mo kid el mesiou a klechad er kid e blak a rengud el remuul a rekeblid el mo sebechekled er a ses el eolt el ngii a iliuekl er kid “e mo basio er a klaumerang.” A rechedam me a rchedil a ngerchelir el mo oba beltikereng e olisechakl er a rengelekir. A obliil el mui er a beltikereng a deureng, e llomes, e meral uaia le babeluades el ngara beluulechad.
A kot el mle soal a delak el chelitakl a “Love at Home.” Sel tal rengesii sel kot el bades el kmo, “There is beauty all around when there’s love at home,” e kede mesang el kmal mo chelellakl e merael a iuechel a medal. Me sera ki mekekerei e aki mle medengei el kmo aki kiliei er a uaisei a teletelel blai; tiaikid a mle ta er a kot el ngarbab el tekoi loruul er ngii.
Uldimukl loutkeu er a beltikereng er a blai, e a President Nelson a mla melekoi el kirel a mo mesebech a usbechelled er a media el sebechel osengkid er a ikel meklou a belkul ngercheled. A tal teletael el ngii a sebechel sobecheklii a telungalek a mo rulii a internet, social media, me a osengel a tibi el mo sibid e bai diak bo longesang er kid malechub, e sel kmal mekngit, a sel deruul el mo uaia lorredel er kid. A mekemad el kirir a rechad, oumesingd a rengalek, a ngara chelsel a rekeblid. Kid a roungalek a kired el mo kerekikl me a teletael er a media a ungil, e chatter er a rekrir, e dirrek losisiu ngii me a teletael er a beltikereng el soad lomekdubech er ngii.
A osisechakl er a rekeblid a kirel bleketakl e mesisiich e dirrek el kirel chedaol, a ultuil er a deureng, e mui er a beltikereng.
Ak yaksok el kmo sel doubeltikereng el mo er a Osobel me a Tngakireng er Ngii, e denguu el mo moktek er a urered el mengideb er a Israel er a ika el eru el beluu, e doldingel er a rebebil, e dongedmokl er kid el mo omes er a Dios, e a ongetikaik er a cherarou a mo cheroid e a deureng, klungiaol, me a budech er a ebangkelio e mo chachisois er a rekeblid lobengkel a beltikereng er a Kristo. A kuchais a yaksok er a ikal osisechakl e chotii a meral sioning er a Jesus Kristo me a tngakireng er Ngii el kired el ngara ngklel a Jesus Kristo, amen.