Mo er Ngii
Klaumedengei el kirel a techang me a ngerang e ke de mesiou er a rebebil el olngeseu er kid el medengeli sel kot el ngarbab el beltik el reng Rubak.
Ngara reksi er chelecha el kesus, ak kulecholt er a beltkil a renguk me a omereng el saul el mo er a derta er kemiu, el rodos er ngak. Ng diak el ior er a rekid, basio el dengar er ngii, me a lechub e ng tekoi el de ngara chelsel, kede kldibel er chelecha el kesus el uldak, el oba klisiich, moktek, me a klaumerang el kmo kid a oubeltikelreng e ulekrael el okiu a Demad er Babeluades; Osebeled, el Jesus Kristo; me a ngar er ngii el profet er kid, President Russell M. Nelson.
Se er a taem er a kim ngeasek el obekel, e ngak me a bechik a mulkedong er a bisob er kemam el mo oldingel e olisechakl el mo er a ta el telungalek el dirkak el be el duum er a ikelesia el mla cheuib a betok el rak. Aki mle kilngei er tia el ngerachel e mlo oldingel er a blirir er a uriul er a tela el klebesei. Ng kmal mle mereched el mo bleketakl el me er kemam el kmo te dimlak el sorir a roldingel el chad er a Ikelesia.
Me a ongeru el odingel er kemam, e aki dilum er tir el olab a cookies, e mle klou a rengmam el kmo aika el chocolate chip a mo dmedemek a rengrir. E ng di te dimlak. Tirka el obekel a milngedecheduch er kemam er a chami el chesmerel a blirir, el meruul er ngii el kmal mlo bleketakl el kmo ng diak el sorir aki be moldingel. Sera ki morael mo remei, eng locha mlo ungil omko a ki milsterir a bebil er a merekos el Rice Krispie.
A ngelsengesam er a chedaol el ues er a ngar medemam a riruul aika el bebil er a kimiltom er ngii el omelasem el mo omekringel a rengmam. A oltngakl a blechoel el diak el ungil besul er a rengud. Mo chuib a telkib el taem e aki mocha oker er kemam, “Ngera me a uchul e aki meruul er tiang? Ngera moktek er kemam?”
A Elder Carl B. Cook a miltebengar el kmo: “Omesiou er a Ikelesia … a sebechel el mo meringel a lsekum e kid a mukedong el meruul er a tekoi el demedakt el kirel, me a lechub e kid a melemolem el mosaul a rengud se el dosiou, me a dirrek el sekum e a tekoi el kid mukedong el mo meruul a diak a klemeriar el reng er kid el kirel.”1 Kede mesa klemrang er tial tekingel a Elder Cook sel detibir el kmo ng kired losiik er a kmo ng Techang el lmut el ngarbab osengel er kid.
Me a leuaisei, e a uriul er a betok el mera el mlara rengmam el nglunguuch me a omesuub, e aki mlo ngmai a nger er a kmo ngera se el belkul a omesiou er kemam. A klaumedengei er kemam a milngodech, beltel a rengmam, el mera er ngii a mle mocholt el omeruul.2 Tia er aki mosiik er a olechotel a chedaol llechukl, e a Rubak a ulsisechakl er kemam el kmo ng mekera e aki moruul er a teleltael el mo mesiou er a rebebil el mo beot e ngar er ngii a belkul. Tiaikid a bades el ngii a kim chiluii el ngii a ngiledechii a rengmam me a teletael el ki bo mousbech er ngii: “Kau e a kirem el mo oubeltikelreng er a Dios el oba rengum el rokir, dechal a rengum el rokui, uldesuem, me a klisichem; e okiu a ngkel a Jesus Kristo e kau a mesiou er ngii.”3 Uaisei el tia el bades a dodengelii, ng ua le ble longedecheduch er kemam el ngara beches e kmal klou a ultutel el rolel.
Aki mlo melechesuar el kmo aki kmal mlarngii er a rengmam a melasem el mesiou er tia el telungalek me a dirrek el bisob, e ng di ng mlo kiram el oker er kemam e kmo aki mera el mle mesiou el oba beltikelreng er a Rubak. A King Benjamin a milketeklii tia el teletael se er a lolekoi, “Uaisei, ak melekoi er kau el uaisei e le ak ouchais er kau el kmo ak mla chemoit a temek er a sils er ngak el ngara omesiou el kiriu, ng diak el soak el chemat er ngak, e le ngak a di mla ngara omesiou el kirel a Dios.”4
Meng uaisei el techa ngike el King Benjamin a mera el ble losiou er ngii? Chedam er Babeluades me a Osobel. Klemedengei el kirel a kmo ng techang me a ngera uchul se el dosiou er a rebebil a ngosukid el mo medengei el kmo se el kot el ngar er bab el olechotel a beltikelreng se el blak el reng el kirel a Dios.
Se er a lemengodech a osengam er a tekoi, ng osisiu el mlora nglungucham. Aki mlo blechoel el olsingch el kirel a odingelam lobengkel tia el telungalek le ng uchul a beltkil a rengmam el mora Rubak.5 Aki milruul er tia el omeruul el mo er Ngii. Ngii a mlo uchul me tia el ringel el mo diak el meringel. Uriul er a betok el mla engelakl el buik er aki mededechor er a medal a tuangel er a blirir, e tirka el ongalek e ng mocha sebecham el soiseb er a chelsel a blirir. Cherengel a taem, e aki mocha dmak el meluluuch e mesaod el kirel a ebangkelio. A kemanget e diak a ulebengelel el klausechelei a milekdubech. Aki uleldanges e oubeltik el reng el mo er Ngii el okiu a oubeltikelreng el mora Rengelekel.
Ng sebechem el melebedebek er a taem el kau a mle oubeltikelreng el odars a chimam el oba sel kmal reng er a omelasem el olengeseu er a tang el ngii a kmal ousbech a ngesou e mlo melechesiu el kmo a ngelsuim a dimlak a lesang me a lechub e te milreng a sulem el kirel me a lechub e ng mle dimlak el sorir? Ngar se el taem, ke uluumededenger el kirel a belkul a omesiou er kau? A lsukum e ng uaisei, mei me a tekingel a King Benjamin bo el techil a ike el ngii a oumedenger er a rengum me a dirrek el tomelii a rengum: “Kau e a di ngara oemsiungel a Dios er kau.”6
Bai lak molechelech a kngtil a rengum, ng bai sebeched el meleketek, el okiu a omesiou, a muut el kmal cherrungel el delongeled el obengkel a Demad er a Babeluades. A beltkil a rengud me a blak el reng er kid el mo er Ngii a mo olekebai er se el reng er a ousbech el mo nguu a chetengakl me a omereng el saul el ngii a mo uchul e a Beltkil a rengul a mo omaoch el me er kid e dirrek el okiu kid.
Bebil er a taem e kede locha omuchel el mesiou el ngara moktek er a deruchall me a lechub e ng ngerachel, e ng di ngii me se el omesiou a sebechel el mekrolid el mo ousbech er a kmo ngera el ngar er bab el ngara reng er kid, el ngii a mo uchul e kede mesiou el ngara “kot el cherrungel el teletael”7—el ua omengemedaol er a President Nelson el mo “er a beches, e muut el chedaol el teletael el mo omekerreu e mesiou er a rebebil.”8
Se el bo domtab aike el rokui el ngii a Dios a mla remuul el me er kid, e a siunged a mo omaoch el okiu a reng er a omereng el saul. E kid a mo diak desa el bekikl el kirel a omesiou er kid el mo oltngakl er kid, kede bai mo melechesuar el kmo a moktek er a omesiou er kid a oba a Dios el ngar ruchei er a rokui.9
A President M. Russell Ballard a ulsisechakl, “Ng di se el sekum kid a oubeltikelreng er a Dios me a Kristo el oba rengud el rokir, reng er kid, me a uldesued e kid a sebeched el mo merous er tia el beltikelreng el mora retonari er kid el okiu a blekongesenges el omeruul me a omesiou.”10
Se el kot er a Teruich el Llechul a Dios a meketeklii tia el chedaol el llomes: “Ngak e a Rubak el Dios er kau. … Ng diak el kirel ngar er ngii a bebil el chelid el mo kot er ngak.”11 A blechebechel tia el llechul a Dios a ngosukid el mo medengei el kmo alsekum e kede Nguu el mo ngar ruchei er a rokui, e a rokui el tekoi a di mo ngara ungil rebetellel—osisiu el omesiou er kid el mora rebebil. Se el nguu se el kot el klou e ngaruchei el kingall er a klengar er kid el okiu a moktek er kid el melilt, e Ngii a mo sebechel el mo omekngeltengat a omerolled el kirel a klungioled me a dirrek el mo klungiolir a rebebil.
A Dios a milellach er kid, “Momes er ngak el okiu a rokui el uldasou.”12 E a bek el sandei e kede yaksok el mo meruul er a di uai tiang—el “mo blechoel el melebedebek er ngii.”13 Ng sebechel el chedaol el ultab a mo utuil er a rokui el tekoi el kid a meruul? Ng sebechel el omeruul er a di kekerei el tekoi bo el techall el mo olecholt er a beltkil a rengud me a blak el reng er kid el mo er Ngii? Ak oumerang el kmo ng sebechel e mo ngar ngii.
Ng sebeched el rullii me a ike el ngii a ngara blechebechel a ruoll el tekoi el bo doruul a sebechel el mo tara teletael mekede me a techal el mo mesiou er ngii, ngosisiu alsekum kid a ngara delongelel a tekoi el ruoll, ngerachel, me a diak el selilk el osime.
El ua ike el bla lolekoi a Ammon, “Uaisei, ak medengei el mo ngak a diak ngerang; a dengu er a klisichek e ak mechitechut; el uaisei e ng diak chat er ngak, e ng di ak chemat er a Dios er ngak, el okiu a klisichel e ngak a sebechek el remuul a rokui.”14
Se el sekum e a omesiou er a Dios a mo klou a ultutelel er a klengar er kid, e kede metom er kid, e ngdi cherengel a omerolled, e kede mo metik er kid.15
A Osobel a ulsisechakl er tia el osisechakl el kmal beot e bleketakl: “Uaisei bo mrelii me a llemesem bo lomekllomes er tirka el chad, me bo luchul e lesa ungil urerem e bo bsa klebkellel a Chedam el ngii a ngara babeluades.”16
Mei e bo kuuchais er kemiu a bebil er a tekoi er a llomes el ngii a mucholt er a kbekbel a blirir a rengalek el diak a rechad er a blirir el ngara Calcutta, India: “A lsekum kau a bekururau, e a rebebil a mo oltelechakl er kau el kmo ke bechechelingaol, e blart a moktek er kau. Di moutekangel el bekokuii. A ike el tekoi el kau a melai a rak el moleketek, a chad a sebechel el tomall er a chelsel a ta el kesus. Bo moutekangel el di meleketek. A ungil tekoi el kau a meruul er chelechang, a rebebil a mo obes er a klukuk. Di moutekangel el meruul. Besa a beluulechad se el kot el ungil el kau obang, e ng di ng di ngesonges. Moutekangel el msa beluulechad a molab. Momes, se el orokiolel, e ngii a di mo delongelem kau me a Dios er kau … el uaisei.”17
Rodos, ng di blechoel el delongeled kid me a Rubak. Uai ike el bla ledung a President James E. Faust: “‘Ngera se el kmal klou el oubech er a ngii a beluulechad?’ … Ng diak el se el kot el lousbech er ngii a beluulechad a rechad bo el ngar er ngii a ta el reng er tir, ngar er ngii, e belchoel, e melemolem el deliongel el obengekel a Osobel?’ Oba a ta el deliongel a sebechel ochotii a chedaol el reng el dobang, el diak a ngodech el sebechel el ngodechii a klengar er kid el ua se el bo dodengelii e de metebengar el kirel a chedaol el delongeled el obengkel a Dios.”18
Osisiu, e a Alma a silodii el mora rengelekel sechal, “Uaisei, mei me a rokui el moruul le bora Rubak, me a ngidi el ker el kau a morngii mei me le bora Rubak; uaisei, mei me a rokui el uldesuem bo el bedul a Rubak; uaisei, mei me a tekoi er a rengum le bo le medechel er a Dios el mocherechar.”19
Me a dirrek el President Russell M. Nelson me ng osisiu el mla olisechakl er kid, “Se el domtab er se el ngii a di mle oldars er ngii el Tngakireng, ngidi el tekoi er a omelenget er kid a ngii el rokir a mo ngara cheungel a dekedekel se el kmal dmolech el reng er a omereng el saul el kirel a techall dosiou er Ngii.”20
Rodos, ak olecholt er a klaumerang el kmo se el sekum e a Jesus Kristo, el okiu se el klisichel a Tngakireng er Ngii, a oureor er kid e ngar er kid, Ngii a omuchel el oureor el okiu kid el mo omekngeltengat er a rebebil. Kede mesiou er tir, e ngdi kede meruul er ngii el okiu a bletik el reng me a omesiou el mo er Ngii. Ked emo uaisei el chedaol llechukl a olecholt: “Rokui el sechal [me a redil] el tir a osiik er se el soal a rengul a tonari er ngii, me a dirrek el meruul a rokui el tekoi el ngara klebkellel a Dios.”21
Ng locha bisob er kemam a mle medengei el kmo tiaia mle ollachitnger el ngak me a bechik a mo suubii er aike el mle kot e ungil moktek, el uaisei el diak el cherrungel, el omelasem el mo mesiou er a betik er a rengul Rengelekel a Rubak el sechal me a redil. Ak olecholt er a kmal reng er ngak e bleketakl el klaumerang el kirel a klungiaol me a beltik el reng el Ngii a omeskid el me er kid osisiu se el dolasem el blak a rengud el mesiou er Ngii. El oba chedaol el ngklel a Jesus Kristo, amen.