Urerel a Klausubes
A kuchais el kirel a budech el mei er kid sel bo dousubes lobengkel a Dios me a rebebil alsekum eng medemdemk a rengud e blak a rengud losiik er ngii.
Tial mlomerek el Ongeua el buil, e a President Russell M. Nelson a ulechotii a tekoi er a olngeseu el kmong, tara rael ra otireklel a llach el mo betik a rengud er a Dios me a ta me a tang.1 Kemam el mengeteklel a Ikelesia, a chemat er kemiu e mereng a suliu el mla muchelii tial teletael. Aki mereng a suliu loltirakl er a profet er kid er tial meang lureor e dmu el kmo ng diak mongiil a lmuut el omesodel. Di momuchel lolngeseu er tirkel ngesool. Lak di mchelellakl lomdaso el kmo ngera el teletael er a ngeso a sebechem lodars. Alsekum e kede otireklii a beot el llach el mla mosisechakl er kid, lobengkel a kiis er a priesthood, e oltirakl a ulekrael er a Chedaol Reng, eng diak demeterob.
Chelechal tutau eng soak el mo mengedecheduch el kirel a tara komakai el teletelel olngeseu el ngii a diak luldimukl er a ngerachel, diak luldimukl a ulterekokl el teletelel, e diak di el ngerachel, el kirel ruoll ng bai di mo llechukl er a babeluades. Msall e kuchotii a tal beot lokesiul tial teletael er a oldingel.
A Grant Morrell Bowen a mle mesisiich lourero el chad, e ungil bechiil e chedam el mla siungii a klengar ngii el meruul a sers, a mlo chebuul er a chimol sens ra bolak dellemelel boteto. Ngii me a bechil, er a Norma, a mlo siik a kuk ngodech lureor, e millukl el mo er a tara beluu, e ulemuchel er a klengar tir el mirrael mo ungil beserir. Eng di, ng chelebuul tekoi, el kmal mlo mekngit a rengul a Brother Bowen, er a bo lolai er a babilengel el mo e ra templo, e a bisop a mlo rrau a rengul er a tekingel a Morrell el kmo ngmui el melecha ongeltacher er ngii.
Ng diak kudengei el kmo ng techa er tirkal teru el chad a mle melemalt ochur lobang er sel sils, eng di a Sister Bowen a mirrael loba beches el babilengel er a mo er a templo, e a kuk Brother Bowen a tilobed el merael el kesib a rengul e mlo diak le bo er a Ikelesia el teruich me a eim el rak.
Ng diak el iior er a kmo ng techa mle klemrang tekingel kirel ongeltacher, eng di ng bleketakl el Morrell me a bisop a mla obes er a tekingel Osobel mo “sumechokl a cheleuid”2 me a tekingel a Paulus el kmo “lak moba ngasechereng el tal sils.”3 Tir el terung el dimlak el mesmechokl a delongelir e a sils me a sandei, me a rak, er a klengar, a Brother Bowen a millmeolem el ngara ngasechereng lolchotel a klemrang el tekoi ledillii a tara mellomes a rengul chad er a Rom, el dilu el kmo, “A lak moserechii, a ngasechereng e ngelmuut el klou a [telmellel] er a tekoi el milchelii.”4 Eng di a ongasireng el teletael er a klangunguuch a di blechoel medechel kired, e ultuil er a beltkil a rengul el mo er a telungalek er ngii me a Ikelesia el ble lodengei el kmo ng klemrang, e a Morrell Bowen a liluut el mei er a Ikelesia. Msall ek telkib el smodii el kmo ng milkera duubech.
A ngelekel a Brother Bowen el sechal er a Brad a kmal ungil sechelimam e blak a rengul chedal a Area Seventy el ngara beluu er a Idaho. A Brad a mle 11 a rekil er sel taem er a ldubech tial teletael, e teruch me a eim el rak lomes er a klaumera er a demal merael mo mechitechut, e milsa sel kngtil a ngasechereng el uchul a telmellel a telungalek el di cheleuid el tekoi a uchul. Ngarngii a kmo ngera el kirel mekedmokl. A lorola el mocha temel a Thanksgiving er sera 1977, e a Brad, el 26 a rekil e ngalek er a skuul er a Brigham Young University; me a bechil, er a Valerie; me a ngelekeir el sechal, er a Mic, a ngilasech er a mechetong el mlirir, el mekgit a eanged, e ulemekall el mo er a Billings, Montana. A meklungel a snow el mlara West Yellowstone a dimlak el terrebengii tial omerollir el mo omes er a Brother Bowen.
Sera lebong, e a Brad me a ochedal er a Pam a ulengit el mo chadecheduch lobengkel a demerir. “Kau a kmal ungil chedam,” ngulemuchel a Brad el mengedecheduch el ko er a mekikngit a rengul, “e kemam a kmal di medengei el uase ng betika rengum er kemam. Eng di ngarngii a ngodech, el kmal meketeketa el taem. Kau el telemall a rengum, a uchul e tial telungalek a telemall el meketeketa el rak. Kemam meng telemall a rengmam, e di kau el tang a sebechem el sumecheklii. A kulengit, me a chelsel aika el mereko el taem, e bo bechei a tekoi el dilubech lobengkel a bisop e mluut el nguu tial telungalek el mo er a ikelesia el uaia ngaramong?”
Ng dimlak a cherrodech. E a Brother Bowen a ulemes er tirka el terung, el kmal resechel,5 e mekekokil dula el kmo, “Oi. Oi, ng mo uaisei.”
Ng mlo mechas a rengrir er tial nger, e a Brad Bowen me a telungalek er ngii a uelemes er a demerir el mocha omes er a bisop er ngii loba reng er a klausubes el mo mesmechokl er a klengar ngii. Ng dirrek el mlo mechas a rengul a bisop leng dimlak lolsingch el kirel tial odingel, e ngii el bisop, el betook el taem ruchei eng mle blechoel lolengit er a Brother Bowen me luut el mei, a kmal di milchulii a Morrell—e omechull er ngii, el meketeket el, meketeket, el taem.
Ng dimle cheslel—a sesei el sandei— e a Brother Bowen a mlo mui lomais el mo er a Ikeleia e mla mo klikiid el muut el mo er a templo. Telkib el taem ruriul, eng mlokedong el mo oungerachel er a kekerei el branch el di 25 a rechedal e milkerulii el mo chengelakl er a dart el chad er a chelsel. Aika el rokui a dilubech er a kmeed el okeim el rak er a memong, eng di a olchotel a ngeso er a ngalek el sechal me a redil er a ongterir el mo er a demerir me a blakereng er a demerir lousubes e omakes el bedul uchei el diak el iior er a cheleuid er a rebebil er a rechad a mlo uchul—a klengeltengat el ngii a melemolem—el mo er a telungalek er a Bowen.
Rodam me a rodso, a Jesus a mla olengit me “dekiei el ngara beltikereng”6 el “lak a klautok er a dleongeled.”7 “Ngike el oba reng er a klautok a diak el chedak,” Ngii a ulemeklatk er a re Nephites.8 Ng klemrang, e klou a ultutelel, el deleuill er kid lobengkel a Kristo a sebechel moterekokl—lultuil er a—deleuill er kid me a rebebil.
“Alsekum …e ko melatk elmei er ngak,” Ngii a millekoi, “e mocha medengei el kmo ngkesib a rengum er a odam er kau—
“E a kot e bo mesa odam er kau, e bom mkangunguuch, e sola mereku er [ngak] loba rokir el rengum, e ngak a mo ngoikau.”9
Ng klemrang el sebechel a dersta er kid el dmung a betook el telmellel a reng me a kelngitelreng me a ringel el ngii chelechal taem eng dirk mengesang er a budech er a chelsel a rengul a chad malechub a telungalek malechub a tonari. A le kid a mle uchul tial ringel malechub e kede kuk mle uker, aikal telmellel a reng a kirel mesmechokl me bl sebechel a klengar mo ungil loltirakl er a moktek er a Dios. El uaia kall el seluk er a icebaks er kau el rengelekir a rengelekem a di blechoel loltechim lomes, e a ikal meketeketang el temellel a reng a kmal meketeketang er a bo lak a belkul. A kulengit me lak luut el morngii a basio er a chelsel a rengum el kirel. El uaia tekingel a Prospero el mo er a ouchel a rengul el Alonso er a chelsel a The Tempest, “Lak domekberaod a uldesued er a tekoi el mla momerek.”10
“Mousubes me bo mousubes,”11 a Kristo a ulsisechakl er a chelsel a Beches el Renged.. E chelechal sils: “e ngak el Rubak, a ousubes er a soak lousubes er ngii, eng di kemiu a kiriu lousubes er a rokui el chad.”12 Eng di, ng klou a belkul bo modengei kemiu el kiei el ngara ringel el kmo Ngii a dimlak el du el kmo. Ng dimlak el du el kmo, “Ng diak bom molchesuar a ringel me a klengitelreng er a mekngit el omerellir a rebebil er a rechad.” E dirrek el Ngii a dimlak el du el kmo, “A mo uchul e ko meral mo mousubes eng kiriu el melemolem malechub e ko melmuut el mo er a chelsel a mekngit, el teletael.” Eng di nguldimukl er a ikel kmal mekngit lomeruul duubech el mei er kid, e kid a sebeched el ngoriakl er a ringel sel sekum e kede soiseb er sel rolel a meral omekungil. Tial rael a rael er a ousubes lurrael er ngii a Jesus er a Nazareth, el ngii oleker er a dersta er kid, “Mei, e moltirakl er ngak.”13
Tial ongit el mo Chedal meruul aikel Ngii a miruul, e a Jesus olengit er kid el mo dongu er Ngii er a chubechub—e mo “oderchelel a Kristo” er a “urerel a klangunguuch,” el uaia tekingel a Paulus el mora rechad er a Korinth.14 Ngkel Omekungil a bek el telemall, Ngike el sumechokl a bek el cheleuid a olengit er kid el mo oureor Lobengkel el kirel a meringel urerel a budech er a beluulechad el ngii a diak debetik er ngii er a ngii di el ngerang.
Meng uaia, tekingel a Phillips Brooks: “Kemiu el mechei a cheleuid meng melemolem el melai a rak me a rak, el melatk a mo mesmechokl ririul; kemiu el mechei a ngasechereng meng melemolem le kemiu el diak bol lulterekokl a uldesuiu el kmo chelechal taem eng sils el bo bechei a kldidai el reng e sumechokl a telemall; me kom kasiuekl er a rael e diak mchadecheduch el diak a ultutelel ngasechereng a uchul … ; kau a kmal omekringel er a rengul a [tara] chad el mengiil er kau lochotii omereng el saul malechub a chubechub, e kau a kmo cherei me a tara … me a tara taem, … morchedau el mong e mruul a tekoi el dirkak a tal mruul le ke mol metom er a techall.”15
Rodam me a rodos er ngak, a kuchais el kmo sel dousubes e dobes a telemall, a mechut me a beches el telmall, a kmal klou a ultutelel er a chelsel a Tngakireng er a Jesus Kristo. A kuchais el kmo tial klou el semecheklel a telemall el reng a mei lokiu chedaol Osobel, el Ngii a mereched el “ngosukid e omekungil er kid.”16 Kede mereng a Sulel, me a Demad er a Babeluades luldureklii, el me lmuut el omekbeches er kid er a meketeketa el klengit el reng me a cheleuid, meng diak di bol mesmechokl, ng dirrek el mla muchar, lokiu a kmal, klou el ringel el resechel a Ngelekel a Sib a mlechubel el kirel.
Ngokiu a ngerachel el apostol kubang el kngiluu er a Osebelel a beluulechad, e a kuchais el kirel a budech el kmo ngokiu a klausubes lobengkel a Dios me a rebebil e ked emo metik er ngii alsekum e kede oba delemdemk reng e blak a rengud losiik er ngii. “Lak mkaumondai lobengkel a tang.17 A lengarngii a meketeketa el telemall, e msemecheklii. Bom kaukerreu el ngara beltikereng.
Kemiu a resechelik, sel douchais el kirel a urerel a klangunguuch, e a kulengit me bom chad er a budech—bol somiu a budech, osiik er a budech, e uchul a budech, e mongeluolou er a budech. A kulengit er tiang el ngara ngklel a Prince er a Budech, el ngii a medengei rokui el kirel a “melemalt me a chelbirukel, blulak lultelechakl me a “telmellel a rengul er a [Resechelil]”18 Tiaikid a nglunguchek, el kiriu, e kirek, el ngara ngklel a Rubak el Jesus Kristo, amen.