Mokisii a Bdelum e Mngara Deureng
Mese el dechebangel a meringel el tekoi er a teletelel a Rubak, mei medokiis a bdelud e de ngara deureng.
Sera 1981, a demak, ma teru el kmal sechelil, me a ngak a mlo milil ra Alaska. Ng mle kiram el mo kmerd ra klebokel el basio e merael melemiakl el mora bebul a beluu. Aki milngesadel a berraod ra kloklam, maki ultuu a kloklam ra baks, e dokedek ra foam, e locha bekbedengel a kora okul, e metech ra rikl el bedul sel ki borngii el basio.
Sera ki bom kerd, aki ulsiik losiik aikal kloklam, e kmal dimlak a chimo ra ikal baks el kibetik er ngii. A uriul aki miltik ra chimong. Ng mlarngii a kekerei el gas stove, ma tento, kiande, ma teblong ra klekedellel a hamburger—eng di dimlak a hamburger. Ng dimlak a rolel e ki mongedecheduch el mora rechad ra blimam, e kiram el ngeiull ra tal sandei ruriul.
Ak siluub a erung el meklou a belkul suobel er tial teletael. A kot, lak mometech a kelem ra rikl. Ongerung, bebil ra taem eng kired el mo chemau a ringel.
Ng blechoel, kot el ngar kid el kirel a ringel a kmo “Ngera me ngak?” A oker el kmo ngera uchul, a diak el cheridii a meringel el tekoi. A Rubak a mengerchir kid el mo kats ra ringel, e Ngii a mla dmu el kmo aikal rokui a mo meskau a klubelem e mo klungiolem.”1
Bebil ra taem a Rubak olengit er kid el mo meruul a meringel el tekoi, e a bebil ra taem a ringel a di kid lochau el mei er kid malechub ete bebil ra rechad lultuil ra lolilt el tekoi. A Nephi a siliseb ra ikal erung el teletael. A Lehi ra ldung ra rengelekel elmo melai aikel sintsyu ra Laban, eng dilu el kmo, “A rubekum a mengiremrum, e kmo tiang a kmal meringel el tekoi el blak delii er tir; eng di tiang a diak el oderchelek, ng oderchelel a Rubak.”2 A kuk tara taem, e a rubekul a Nephi a millilt el mo omtok er ngii: “Te milngelebed er ngak, leng kmal, mle iimis el kesib a rengrir, e lilchetak lolab a lechet, leng mle sorir lomekeuad er ngak.”3
A Joseph Smith a siliseb ra ringel ra lengara Liberty Jail. Ng dimlak a kora teletelel a ngesou el morngii, meng kmal mlara ringel, a Joseph meng lilangel el kmo, Rubak, ke ngar ker?4 Ng klemerang el bebil er kid a mla omelchesiu el uaia Joseph.
Rokui el chad a di chelbangel a ringel: kodall ra betik ra rengud, dertel a chebechiil, mla touchakl el ngalek, secher, ringel ra klaumerang, diak a urerel, malechub eng kuk di bebil ra ringel.
Ak dimle merekong el mengodech ra krenges aikal tekingel a Elder Neal A. Maxwell ra Chelechad ra Teruich ma terung, lulekoi ra lesal smecher ra rakt el leukemia. Ng dilung, “A kmal mle blak a renguk el melbedebek e a ikal 13 el melisiich el tekoi a siliseb ra uldesuek: ‘Ak mla meskau a secher el leukemia me bo meduch el olisechakl ra rechedak.’ E millemolem el mesaod el kmo ng mekera tial teletael e mla omekngeltengat er ngii el mo “cherrungel osengel kirel a klemerang ra diak a ulebengelel. … Tial telkib el osenged ra diak a ulebengelel a sebechel ngosukid el melemolem el merael bedul uchei, el ngii a sebechel kmal mo meringel.”5
A mongosukid el merael bedul uchei ra chelsel aikel meringel el taem e omes ra diak a ulebengelel, e msall e kuchais a eru el tekoi. Ng kired elmo chelbangel a meringel el tekoi, el kot, e kede ousubes ra rebebil, e a ongerung, odersid el mora Rubak.
Sel dousubes er tirkel uchul a ringel el mei er kid e “otilid ra soal a Dios”6 a sebechel kmal mo ulis el meringel el tekoi. Ng sebechel kmal mo meringel sel sekum a chedal a telungalek a uchul a ringel el mei er kid, malechub a kmal sechelid, malechub eng di kid.
Sera kngeasek el bisop, ak silubii a klausubes ra merredel ra stake er ngak, el Bruce M. Cook, louchais er tiakid el cheldecheduch. Ng dilu el kmo:
“Sera ulebongel ra 1970, e a bebil ra kim dak loureor el chad a ulemuchel ra siobai. Meng dimlak a ngera el mekngit el ki moruul er ngii, eng di a mekngit el uldasou, lobengkel a meringel el taem ra kerruul, a tilmellii a siobai.
“A rebebil ra rechad a ultutakl er kemam. A chad ra llach er tir a mle counselor ra bishopric ra ward er kemam. Ng kmal meringel el kuldubech ra chad el ngii osiik el melemall er ngak. Ng mlorngii a mekngit el uldesuek el kirel e ulemdasou er ngii el chereuek. Uriul ra eim el rak el kimkatutakl, e a ki mlo make el di mlo diak a ngera er kemam, luldimukl a blimam.
“Sera 2002, ea bechik ma ngak a mlo medengei el kmo a stake presidency el ngak a mle counselor ngii a mo mengodech a rechedal. Omerollam el ngara kedeb lomilil ruchei ra kmengubet, eng uleker ngak el kmo ng techang a kngiltii el mo counselor ngak omko ak mokedong el mo beches el merredel ra stake. Ng dimlak el soak el mesaod er ngii, eng di ngii a di milngelechel er ngak. Uriul, a tal ngakl a siliseb ra uldesuek. Eng mocha dulii a ngklel ngkal chad ra llach el ngii a bai kmal uchul a ringel er kemam ra lluich el rak ra memong. Sera longedecheduch, e a Chedaol Reng a ulterkeklii el kmo ngii a mo tara counselor. Ng locha sebechek lousubes er ngii?
“A Elder David E. Sorensen ra lokedongak el mo merredel ra stake, eng di milskak a tal sikang el melilt ra recounselor er ngak. Ak lilangel, e ulechais er ngii el kmo a Rubak a mla meskak tial ocholt. Sera kungedecheduch e a ngklel ngika el chad el ngak a ulemdasou el kmo ng cherreuek, e a ngasechereng, klsibereng, ma ouketui el mlar ngak a di ririid. Seikid el taem, e ak mlo medengelii a budech el mei lobengkel a klausubes lokiu a Tngakireng ra Kristo.”
Ng belkul a kmo, a stake president er ngak a “ulsubes” er ngii, el uaia Nephi ra irechar.7 Ak mle medengei el kmo a President Cook ma counselor ngii a teru el melemalt el chad loba priesthood e mle kaubeltikereng. Ng mlo blak a renguk el mo uai tir.
Rak ruchei, ra kbo er tial omilil er kemam ra Alaska, ak silubii el kmo sel doltelechakl ra rebebil el kirel a teletael el dengara chelsel—a lechub e kede omidokl a keled ra rikl—a diak el ngii a nger. Eng di, sel bol mesaul a bedenged, el diak a kall, secher, e mechiuaiu ra chutem ra sesengel a eolt el di tento melekedek er kid, e ak silubii el kmo a dultuil ra “Dios eng diak a ngera el diak el sebechel mekedmokl.”8
Rengeasek el chad, a Dios a mengerchir a meringel el tekoi er kemiu. A tal 14 a rekil redil a mle chad ra klekool. Ng mle soal mo chad ra basket sel bora high skuul el uaia chudelel. E mocha medengei el kmo a rechad ra blil a mla mokedong el mo oungerachel ra mision ra Guatemala.
Sera lebora tial beluu, eng mlo medengei el kmo a bebil ra klas er ngii ra skuul a di tekoi ra Sebangiol, el dimlak lodengelii el tekoi. Ng dimlak a di chimol tim ra klekool ra redil er tial skuul. Ng kiliei ra ongeteruich ma eua el chellibel ra blai el meringel a omengkar er ngii. E sel kmal merngelel, ng dimlak el sebechel mora rikl el di ngii el tang leng mol metemall.
A rechad ra blil a ulerenges erngii el lemangel a leklebesei el melai a buil. Ng kmal mlo mekngit a rengrir! Te mocha omdasou odureklii el mo remei el mo obengkel a delal mechas e mora high skuul.
A bechik ra bol tuu ra rum er ngii el mo ouchais el kirel tial uldesuam, eng milsang ngkal ngelekel el outubaruach e meluluuch e oba Babier ra Mormon ra bebul a dukellel. A Chedaol Reng a ulechais ra bechik el kmo, “Ng di ungil besul,” ma bechik a liluut el tuobed ra rum.
Ng dimlak kimluut el rongesii el lemangel el mo mechiauiu. Meng ultuil ra blakereng ma ngesou ra Rubak, eng kiliei el edei el rak.
Sera bol merek a mission er kemam, ak uleker ra ngelekek el kmo ng soal mora mission. A nger ngii a mle “Ng diak, e Chedam, ak mla momerek el ngara mission.”
Ng di mle ungil a renguk el kirel tial nger ngii! Eng di elolem el buil ruriul, e a Chedaol Reng a ulekerengak ra tal kesus e milskak tial uldasou: “Ak mla mekodongii a ngelekem el mora mission.”
A nger ngak a mle “Chedam ra Babeluades, ng kmal betok a blal ruul.” A Chedaol Reng a mle mereched el sumecheklak e mlo medengei el kmo a omesiungel el misionari a longerchir ngii a Rubak.
Ak ngiluu ngkal ngelekek el mo ousueleb. Mak ngara bital tebel, e dula el kmo, “Ganzie, ke medengei el kmo ngera uchul me kede ngar tiang?”
Ng dilung, “Oi, e Chedam. Ng kirek el mora mission. Ng diak el soak el mong, eng di ak mong.”
Ngii a ultireklii a soal a Chedam ra Babeluades, eng mlo mesiou er Ngii loba rengul rokir, ma ikel sebechel, ma uldesuel, ma klisichel. Ng mla osischeklii a demal el uase ng mekera loruul a meringel el tekoi.
Sel ongdibel lobengkel a President Russell M. Nelson el kirir a rengeasek, eng millekoi a bebil meringel el tekoi ra rengeasek. A President Nelson a dilu el kmo: “A ongeim el ongtik a kemiu el mo ngodech; ngodech ra rengara beluulechad. … A Rubak ousbech er kemiu el mo uaia, melekoi el uaia, meruul el uaia, e oubail el uaia meral oltirakl ra Jesus Kristo.”9 Tiang a sebechel meringel el tekoi, eng di ak medengei el sebechiu rullii—loba deureng.
Molatk el kmo a “chad a ulebeob, me bol nguu a deureng.”10 Aikel rokui el blol chelebangel a Lehi, eng millemolem loba deureng. Kom lotkii a Alma ra lesal “mekngit a rengul”11 el chad ra Ammonihah uchul? A anghel a dilu er ngii el kmo, “Kengeltengat, e Alma; bol ungil a rengum, e mokisii a bdelum e bom ngara deureng … le kau a kmal blak a rengum loltirakl a llechul a Dios.”12 A Alma silubii a klou el klemrang: ng sebeched el blechoel ngara deureng sel doltirakl a llach. Molatk el kmo aikel taem ra mekemad ma ringel ra taem ra Captain Moroni, “eng dimlak a rungil a rengrir ngara deureng el chad ra chelsir a rechedal a Nephi.”13 Ng sebeched el kired losiik ra deureng sel dengara chelsel a ringel.
A Osobel a mlo chemau a meringel el teletael: “A beluulechad … a mo oukerkeriil er ngii el diak a belkul; a leuasiei e te ultuub er ngii, eng di liluk; e milngelebed er ngii, eng dililuk. Oi, te millub er ngii, eng dililuk, leng beltik el reng er ngii ma chubechub ma kllou el reng er ngii el kirir a rengelekel a chad.”14
Ngokiu tial beltikereng ma blekokeuii, e a Jesus Kristo a mlora ringel ra Tngakireng. Sei a uchul, e Ngii a kmo er a dersta er kid, “Chelsel a beluulechad e komo chelbangel a ringel: eng di bom ngara deureng; ak mlo kats ra beluulechad.”15 Ngokiu a Kristo, e kid a dirrek el sebeched el mo kats ra beluulechad.
Sel bo dechelbangel a meringel el tekoi lokiu a teletelel a Rubak, e bo dokiis a bdelud e dengara deureng. Chelechal techall el kuchais ra beluulechad, e a kuchais el kmo a Osobeled a ngar e omekrael ra Ikelesia er Ngii. El ngara ngklel a Jesus Kristo, amen.