Rodos el ngara Urerel Omengideb er a Israel
Ak kudersii a ngara ulaoch longit lekor kemiu, a redil ra Ikelesia, el mo ngodechii a beluulechad el mo olngeseu el mengideb ra Israel.
Ng klebokel el kteloi lobengkemiu, el ungil rodos er ngak. A kumdasu a dirk dilubech el tekoi a mo meskemiu a telkib er sel kumelchesiu er ngii el kiriu me sel ngarbab el klisiich el kemiu obang.
A tara klebesei ra kungedecheduch ra seked ra South America, eng mal mlo smiich a renguk ra tekoi el kulsaod er ngii, mesel kmal klou a belkul taem, ak dilu el kmo, “Ngak el derrir a reteruich el ngalek, eng sebechek louchais er kemiu …” E millemolem el rokir a tekingek.
Ng dimlak kutebengar el uase ak mla duli a tekoi el chedil. Ngkal oleiuid a tekingek, a ulemdasu el uase ak milcheuid, e ngildechii tial tekoi el chedil el mo chedam, me tial seked a dimlak bolodengei el uase ak millekoi er ngak el oleko ak chedil. Eng di a bechik ra Wendy a rirngesii, e mle ungil a rengul er tial dimlak kudengelii Cheleuid er ngak.
Tiaikid el taem, e sel dmolech el ngara renguk el soak ngodechii a beluulechad—el di chedil a sebechir rulii—a milkekii a renguk. Aikal rak, e sel loker ngak el kmo ngera uchul ak millilt el mo toktang, a nger ngak a di osisiu: “Leng diak el sebechek el melilt el mo chedil.”
A kulengit bomodengei el uase sel kulekoi ra tekoi el chedil, eng diak di kulekoi el kirir tirkel mla omechell malechub e te merodel ra rengalek er tial klengar. Ak melekoi er tirkel rokui el meklou el redil ngelekel a Chedam me a Chedil ra Babeluades. Rokui el redil a chedil lokiu sel diak a ulebengelel chedaol bekesel ochil.
Chelechal kesus, e ngak el demerira reteruich el ngalek el——tetiu el redil me a chimol sechal—e Merredel er a Ikelesia, e nglunguchek me bo molchesuar a renguk—el kiriu el kmo ngerang ma ikel rokui el klungiaol moruul. Ng diak a chad el sebechel remuul aikal loruul a ungil redil. Ng diak a chad el sebechel mtechir a ungil blekerdelel a chedil.
A rsechal a blechoel sebechir melekoi el kirel a beltikereng ra Chedam ra Babeluades ma Osobel el mora rebebil. Eng di a redil oba tokubets el sengk—el chedaol klengeltengat. Ngarngii a teleteliu el medengei a lousbech a chad—ma taem el tir ousbech. Ng sebechiu lolngeseu, mengelaod, olisechakl, e melisiich ra chad ra ikel taem el sal ousbech a ngesou.
A redil a ngodech osengel ra tekoi ra rsechal, e kede, meral ousbech a uldesuiu. A teleteliu a mekrolemiu el mo kot, lomdasu ra rebebil e mes aikel mo klungiolel a tekoi el mora rebebil.
Uaisel President Eyring a mla ochotii el kmo, ng mle klebokel el Delad er a Eva—me sel kemanget el osengel ra moktek er a Chedam ra Babeluades—el ngii a milchelii sel domekedong er ngii el “Rebet.” A mellomes e mesisiich lomelilt er ngii ma Adam lulngesenges a rirelii a moktek ra Dios el kirel a deureng el mo tekoi. Tir a rirelii meng sebechel a dersta er kid el mei ra beluulechad, nguu a bedenged ra tech, e melilt el uase kede mo melkakl ra Jesus Kristo er chelechang, el uaia omerelled er a dengara sel klengar ruchei.
Kemiu rodos er ngak, ngarngii a tokubets el chedaol sengk ma duch er kemiu. Chelechal kesus, ak mengelechel er kemiu, loba rokui el urungulel a renguk, me bom ngara nglunguuch el mo medengei aikel chedaol sengk—el molab el mo meruul, ousbech, e menglou, el mo ruchei ra ikel dimla molab. Komo ngodechii a beluulechad sel bom uaisei.
Kemiu el redil, a rulterir a rebebil e ochotii a teletael ra okesiu. Msall ek saod a eru el meklou el chais el mildung er tial mlomerek el klou el ongdibel. Kemiu, rodos er ngak, a mal mle meklou a belkmiu.
A kot, olngeseu. Sel ngarbab el teletael ra olngeseu a mlara Osobeled, el Jesus Kristo. Klou er ngii, a redil a uaisei, e dimla uaisei, el meduch er tial teletael ra rsechal. Sel meral lolngeseu, e komoltirakl a momelchesiu el mo ngoseuir a chad el dirrek el muut el melchesuar a beltikereng ra Osobel. A rengud el soad el mo olngeseu a delalm ra melemalt el redil. Ak medengelterir a redil el meluluuch ra bek el sils, “Ng techa Soam a bok ngeseuir er chelechal sils?”
Uchei er sel chais ra April 2018 el kirel a ngarbab e chedaol teletael ra omekerreu ra rebebil, eng kse ra bebil ra rsechal el di loia tengetang sel bol merek el oldingel el uase ngmla “momerek” el kuk mora chimong.
Ng di sel molchesuar el uase a odos el moldingel er ngi ousbech a ngesou, e ko mereched el mong e melemolem er seikid el buil. Tiaikid, el teletael ra odingel er kemiu a uchul e kede mlo omuchel ra tekoi ra olgneseu.
Ongerung, tial mlo merek el klou el ongdibel, aki dirrek el liluut el toketekii a chelechad ra Melchizedek Priesthood. Sel kimkaudasu el uase mekerang a dolngeseu ra rsechal ra Ikelesia el muut el mo ungil ra ngerchelir, aki blechoel omes okesiu ra Relief Society.
Chelsel a Relief Society, ea kakerous el redil el kakerous a rekrir a mo dmak. A kakerous el klengar a olab a kakerous el ringel, eng di, ko mei, ra bek el sandei, el dmak el chadecheduch, e mukeroul e olisechakl ra ebangkelio, e meral ngarngii omrelii el ngodech ra beluulechad.
Chelechang, a loltirakl okesiu er kemiu, e a roba Melchizedek Priesthood a chedal a chelchad ra elders. Tirkal sechal a rekrir a ngara 18 el mo 98 (locha lmuut el chengelakl), el kakerous a blal ruul ra priesthood ra Ikelesia. Tirkal sechal a sebechir el kudmeklii a klodam, e dmak loureor, e omekngeltengat ra rebebil.
Kemiu a medengei el kmo tial mlomerek el June, a Sister Nelson ma ngak a milngedecheduch er a rengeasek ra Ikelesia. Aki mle olengit er tir el mo teloi ra resodlau ra Rubak el mo olngeseu el mengideb ra Israel ra ikal erung el belulechad. Tial omengideb a “kot el klou el ureor, klou a moktek er ngii, e klou el ureor el ngara beluulechad er a chelechal sils! ”!
Ng ureor el kmla ousbech ra redil, le redil a sumecheklii a ngarmedad el taem. Ma chelechal kesus, a kudersii a ngara ulaoch longit lekor kemiu, a redil ra Ikelesia, el mo ngodechii a beluulechad el mo olngeseu el mengideb ra Israel.
Komomuchel er ker?
Msall ek beskemiu a kleua el ongit:
A kot, a kulengit er kemiu el mo diak mngara social media el teruich el klebesei ma ngii dil teletael ra media el uchul a mekngit el uldasu. Moluluuch el mo medengei el kmo ngera el teletael a kiriu el mengeroid. A mo olchotel ruriul tial teruich el klebesei a sebechel mo chemas a rengmiu. Ngera ke mesang sel kuk bomcheroid ra osengel a beluulechad el ngii a mengitechut er kau? Ngarngii a soam el melodech er ngii el mo chemoit a klisichem ma temem el kirel? A bebil ra ngerchelem ng mla mengodech—luldimukl a dil kekerei? A kulengit me bomluches e moltirakl aikel bo momelchesiu.
Ongerung, ak siotai er kemiu el mo menguiu ra Babier ra Mormon er chelechang el mora ulebongel ra rak. Ng locha kora diak el sebechel tekoi sel molatk a bebil ra ngerachel ra klengar kemiu, ngdi a omkengei er tial ongit loba rengum el rokir, a Rubak a mo ngosukau el kudmeklii. E sel moluluuch e mosuub, ak yaksok el uase a babeluades a mo obok. A Rubak a mo omekngeltengat er kau ra chachisois el llomes ma ocholt.
Sel monguiu, e bo lecha tengetang ra ikel bek el bades el melekoi, malechub eng mesaod, ra Osobel. E bol, blak a rengum el melekoi el kirel a Kristo, ngara deureng ra Kristo, e molisechakl el kirel a Kristo lobengkel a telungalek er kau ma resechelim. Kau ma tir el mo kmeed ra Osobel lokiu tial teletael. A ngodech, luldimukl ra ongasireng, el tekoi a mo duubech.
Chelechal tutau eng mluchais a tekoi el kirel a beches el teletelel a Sandei me a chemau a telungalek, ma ngesou ra Ikelesia. Kemiu, a rodos er ngak, a kemiu a klungiolel tial beches, e tabesul e ta llecheklel osischakl ra ebangkelio. A kulengit molisechakl er tirkel betik a rengmiu er tir aikel mosuub ra chedaol llechukl. Molisechakl er tir el uase ng mekera dobult el mora Osobel me Ngii bo lomekungil a lolisiich er tir sel rebet ra klengit. E molisechakl er tir el uase te mekerang e nguu a Klisichel ra bek el sils ra klengar tir.
Ongedei, mkedmeklii a teletael el mo blechoel mora templo. Tia kirem el mo telkib el chuarm er ngii ra klengar kau. Sel bol klou a temem el ngara templo eng uchul a Rubak osischeklau el uase ng mekerang a klisichel a Priesthood er Ngii e mo obengkem el kau a mla mukngeltengat er ngii ra chelsel a templo er Ngii. Tirkel kiei el diak lekeed ra templo, a kulengit me bom ngara omesuub el kirel a templo el ngara chedaol llechukl ma tekingir a rengar el profet. Mosiik elmo medengei a betok, mui el bleketakl ra betok, e omelchesiua betok el kirel a templo.
Tial mlomerek el miting ra rengeasek er sera June, ak milngedecheduch el kirel a ngeasek el chad el mlengodech a klengar ngii ra rechad ra blil a lengedechii a smartphone er ngii el mo flip phone. A delal ngkal buik a mesisiich a klaumera er ngii. Ng milsa ngelekel el mekekokil mo cheroid ra mora mission. Ngiluu ongtil el mora templo el mo medengei el uase ng mekera lengeseuir a ngelekel. Meng mlo oltirakl aikel ngii a mlo melchesiu.
Ng millekoi, “Ak mle omelchesiu el kirek el mesa dengua ra ngelekek ra ulterekokl el taem lomes a kmo ngerang. Ng diak kudengei usbechellel aikal smartphones, eng di a Chedaol Reng a ngilsukak ra ikel teletelel a social media el ngii a diak kusbech! Ak medengei el uase a Chedaol Reng a ngosuterri a roungalek el ngmai a ulekrael el mo omecheliu ra rengelekir. [A kot] a ngelekek a mlo kesib a rengul er ngak. … E ng di uriul ra edei el klebesei, eng mle mereng a sulek! Ng miltebengar a klekakerous er ngii.”
A blekerdelel a ngelekel a mle kiul mengodech. Ng mlo mui lolngeseu ra blai, klikmechur, e blak a rengul el ngara Ikelesia. Ng mle semeriar el mesiou a ureor er sel ngarngii a techolb er ngii ra templo e mengedmokl er ngii el mora mission.
A ongeua el ongtik, el morkemiu a remeklou lodos, a mo mui el ngara Relief Society. Ak mengelechel er kemiu el mo mui el mesuub er sel moktek ra Relief Society. Ng omekellomes. Ng sebechel omekrael er kemiu el mo kudmeklii a moktek ra klengar kemiu. Ak dirrek el olengit me bom ngara deureng ra klemerang er sel tekoi el kirel a Relief Society el tilobed ra lluich el rak ra memong. A lecheklel tial tekoi a bereked ra kboub ra obis ra First Presidency. Ngungil a renguk ra bek el taem el kunguiu er ngii. Ng smodii el kmo kemiu kom techang e techang a Rubak ousbech er kau ra chelechal taem sel moruul a ngerchelem el mengideb ra berberiid el Israel.
Rodos e rngak, kede ousbech er kemiu! Kede “ousbech a klisichiu, beltiu, klaumera er kemiu, duch er kemiu, lomekrael, llemesiu me a tekingiu.” Ng diak el sebeched el mengideb ra Israel a lak kemiu.
Ng betik a renguk er kemiu e mereng a suliu, e omekngeltengat er kemiu me komo ikrii a beluulechad e mo olngeseu er tial klou a belkul ureor. A bodedak eng sebeched el remuul aikel rokui el Chedam ra Babeluades osubech er kid el meruul el kudmeklii a beluulechad el kirel Ongeru Lemei a Betik er a Rengul el Ngelekel.
A Jesus a Kristo. Tiang a Ikelesia er Ngii. Aikang a kuchais el ngara ngklel a Jesus Kristo, amen.