Ng mekera Bo Kudengei?
Se el oba blakelreng, e ngara rengud, e mesisiich, e klemerang el osiik el mesuub el kirel a ebangkelio er a Jesus Kristo e olisechakl er ngii el mo er a ta er kid, aika el omesuub a sebechel el mengodech a rengud.
Rodam me a Rodos er ngak, ng kmal lungil deurreng el demei el kldibel er a tial klou el ongibel er a Ikelesia er a Jesus Kristo er a Uriul-Klebesei el Santo el ngar er a deruchellel a betik er a rengud el profet, President Russell M. Nelson. Ak ouchais er kau el kmo kid a mor ngii a techelled el mo rongesii a ngerel a Osobeled, Jesus Kristo, lokiu aikel losisecheklir tirke el tir a meluluuch, mengitakl, e mesaod el kirel a dousbech el ngesou er chelechal taem er tial ongibel.
Ng ua ikel llechukl er a hong er a Rrellir, el Philip el Evangelist a ulisechakl er a ebangkelio el mo er a tal chad er a Ethiopia el ngii a mle mengkerngel aikel rokui el mekreos el kloklel a bilung er a beluu er a Ethiopia. Me sera lueta el meluluuch er a Jerusalem, eng menguiu er a hong er a Isaiah. Ng uaia le mlodurch er a Chedaol Reng, e a Philip a ulekeed el mo er ngii e dula el kmo, “Ke medengei aika el monguiu?
“Me a ngikal [sibai] a dilung, Ak mekerang e mo medengei, dilmerekmo tara chad lomekrael er ngak? …
“Solae a Philip a milkengii a ngerel, e mocha omuchel er a osisiu el bades, e mocha olsisechakl er ngii er a Jesus.”
A ker el luleker er ngii ngkal chad er a Ethiopian a uleklatek el kirel aikel chetengakl el klisiich el dolab, el ngara ta el chad me a telungalek, losiik omesuub e olsisechakl er tang er a ebangkelio er a Jesus Kristo. A mera er ngii, sel dosaod el kirel omesubel me a osischeklel ebangkelio, e kid a lebebil er a taem e kede uaia ngkel chad er a Ehtiopia—kede ousbech a ngesou er a remesisiich e meduch el sensei; e dirrek el bebil er a taem e kede uaia Philip—el kired lolisechakl e melisiich er a rebebil er a beltir.
A moktek er kid sel dosiik el mesuub e dolisechakl er a ebangkelio er a Jesus Kristo a mo melisiich er a klaumera er kid er a Dios me a chedaol moktek er a deureng er Ngii me a Jesus Kristo me a tngakireng er Ngii e mo nguu a mui el bult. Tiaikid el meisisiich el klaumerang me a bult a mo ngosukid el meruul e oltirakl a telbiled lobengkel a Dios, el uchul eng mo mesisiich a blakereng er kid el mo oltirakl er a Jesus me a belted a kmal mo chedaol—ng belkul a kmo, kede obult el mo beches el chad, el uaia osischeklel a Apostol Paulus er sel babilengel el mo er a rechad er a Korint. Tiaikid el bult a mo meskid a deureng, me a klungiaol, me a klengar kid a mo mesisiich e ngosikid el ngmai osenged el bedul a diak a ulebengelel klengar. Ng diak tiaikid a dilubech el mo er ngike el sibai el chad er a Ehtiopia ruriul er a bo lodengelii Osobel e lobult el mo chemau ebangkelio er Ngii? A chedaol llechukl a dilu el kmo ngii “a mlo er a omerolel el ngar er a deureng.”
A llach el kired el mo mesuub er a ebangkelio e olisechakl er ngii el mo er a ta me a tang a diak el beches; ng dimla blelekel el llach er a chelsel a reksi er a chad er a uchelel mei. A tal kmal bleketakl el taem, a sera Moses me a rechedal le ngara ked er a Moab ruchei er a lesiseb er a yaksok el beluu, a Rubak a ulemekrael er ngii el mo mellach er a rechedal el kirel a ngerchelir el mo mesuub a llach me a yaksok el tir a ngilai er a Rubak e olsisiechakl er a rengelekir, el betok er tir a dirkak el tal bol iuul er a Red Sea malechub el ngai ocholt el mlo cholt er a Mount Sinai.
A Moses a milellach er a rechedal:
“Molengesenges, E Israel, a rokui el llach, el kulisechakl er kemiu, el ngii a bo moruul, me bo mngar, e kom mo kiei er ngii el beluu, el Rubak el Dios er a rucheliu omeskemiu. …
“… Molsisiechakl er a ngeklem el sechal, me a ngelekel a ngelekem el sechal.”
A Moses a milrekui ra tekingel, meng dilung, “Molengesenges a rokui el kot el ngar er bab el mekllel, me a llechul, el blak beskemiu er chelechang, isei ea rokui a di mo ungil el ekor kemiu ma ruldidellel a telcheroll el okiu uriul, e kemiu di mo blechoel el kiei er ngii el beluu, el Rubak el Dios er kemiu omeskemiu meng mo belumiu el mo cherechar.”
A Profet er a Dios a blechoel el lolsisechakl er kid el mo ng kired el mo omekroul er a telungalek er kid el ngar er a ungil blekeradel el ngar a omerolel a Rubak el ngara llomes me a klemerang. A President Nelson a dirk milekoi, “Chelsel chelechal taem el klou a delngerenger me a osengelel a deleboes lomeruul, ea roungalek a ngar ngii a chedaol el ngerchelir el mo olisiechakl er a rengelkir a ultutelel a Dios ( ma Jesus Kristo) er a chelsel a klengar tir.”
Rodam me a Rodos, tial omellach er a profet er kid a omklatk er kid er a dersta el ngercheled el mo osiik el mo mesuub er a ebangkelio er a Jesus Kristo e mo olsisechakl er a telungalek er kid el kmo ngar ngii a Rubak el ngar er babeluades el ngii a betik a rengul er kid e mla rulii tial chedaol el uldasu er a deureng el mo er rengelekel; ea Jesus Kristo, a Nglekel, el ngii a Osobelel a beluulechad; e tial osobel a mengai er a klaumerang er a ngklel. A re keblid a kirel mo chedaol el basio, el ngar a chetemel a Osobeled, el Jesus Kristo, el ngii a mo sebechel ngosouir a dersta er kid me a telungalek er kid el mo oba chedaol domelchesiu er a chelsel a rengud, el ngii a mo ngosukid el melomelem er a klaumgerang er kid.
Ke locha mednglii tirkel terung el mesiungel a Johanes el Techolb the el lultirakl er a Jesus Kristo er a rengesii a Johanes er a uriul el sioning er a Jesus el ngii a sib er a Dios, el Messias. Tirka el rungil chad a kilengei er a ongtil a Jesus el “mei e omes” e bo lobengkel er sel sils el mong. Te mlo medengei el kmo a Jesus a Messias, el Ngelkel a Dios, e ulultirakl er Ngii el mo lmuut er a rokir el klengar er tir.
Chelsel a osisiu el omeruul, e sel de kengei er a siotai er a Osobel el mo “mei e mesang,” ng kired el kongei er ngii, e mo omekeek er kid er a chedaol llechukl, e dmeu a rengud el kirel, mesuub er a osisecheklel, e kiei el di uai Ngii er a lekiei. Seikid a di ta el rolel e kid a mo Medengelii, Jesus Kristo, e mtebngar otto er a Ngerel, el medengei el kmo sel do bo er Ngii e doumera er Ngii, eng diak bo desengerenger me a ka bol meched a rengud. Ng mo sebeched el mtebengar a klemrang er a bek el taem, el uai sel dilubech el mo er tirkel teru loltirakl el kiliei lobengkel a Jesus er isel sils.
Rodam me a Rodos, tia diak el dil keberuul el dubech. A dosmechokl er kid el mo er sel kot el ngarbab el teletael er a kledios a diak el beot el tekoi; ng kired el mo ultuil er a Dios e mesuub el kmo kede mekera e nguu ebangkelio er a Jesus Kristo el mo cheberdil a rengud. Sel bodeuaisei, e ak yaksok el kmo a odbechel Chedaol Reng a mo meskid a klemerang er a rengud me a uldesued e mo sioning el kirel, e osischeklid a rokui el tekoi.
A keril ngkelchad er a Ethiopia, “ Ak mekerang e [medengei, dilmerekmo tara chad lomekrael er ngak?” a dirrek el ngar ngii a ungil ututelel er a omeruul el ngerchelel a desta er kid el osiik el mo mesuub er a ebangeklio er a Jesus Kristo e ngmai e oltirakl er a chelsel a klengar er kid. Chelsel sel teletael er ngike el chad er a Ehtiopia, eng mlo oltirakl aikel el klemrang lesiluud er a Philip. Ngii a ulengit el mo nguu a techolbechelid. Ngii a mocha medengei el kmo a Jesus Kristo a Ngelekel a Dios.
Rodam me a rodos, a omerelled a kirel chatter er a ikel desuub me a dolsiechakl. Mal uaisei, ng kired lochotii er tir lokiu a klaumerang er kid lokiu a rolel a de kiei. A ungil sensei a ungil el okesiu. Sel dolisechakl er a kmo ngerang el kid oltirakl er ngii eng kmal klou a lengedechii er a rengrir tirkel dolisechakl er tir. Alsekum e ke doureng er a rechad, el diak el ior er a kmo te telungalek malechub eng ngii dil chad, el mo ungil a rengrir el urrekodel er a chedaol llechukl me a osisecheklir a rengar el apostol me a re profet er a chelechal el temed, e ng kirir el mesekid loldeu a rengud el kirir. Osisiu, alsekum eng soad a bo ldoengei el kmo a President Russell M. Nelson a profet, chad er a ues, me a chedaol ocholt er chelechal sils, eng kirir el mesekid lodersii chimad el kongei er ngii e oltirakl a chedaol osischeklel. Me sel dodengelii el omelekoi a kmo, “A omeruul a klou e relii er a di tekoi.”
Kele bebil er kemiu a chelebancgel er a cheuai tia el omeruul er a di chelechal taem e di kemiu el oker er kemiu,”Elder Soares, Ak mla meruul aikang el rokui e mla oltirakl er tial teletael me a dirrek el telungalek er ngak, eng di, a rebebil er a rsechelik me a rebetik er a renguk a mla ngosekelterir el mo cheroid er a Rubak. Ak Mekerang?” Tirkel tir a ngara cheslel aikaikid el teletael er klengitelreng, me a ringel, me a ocuhel reng, er chelechang e a kulengit me bo modongei el kmo tiak diak el blal riid el Rubak a medengei el kmo ten gar ker e ngii omes er tir. La mobes, tir me te ngelekel el dirrekl!
Ng meringel a bo dodengei a rokui el uchul e a rebebil er a rechad a kuk ngiltii a ta er a rael. Mal uaisei sel kot lungil sebeched el rulii er a chelsel tial teletael a mo oubeltik el reng e outkeu er tir, meluluuch el kirel a mo klungiolir, e osiik a ngesu er a Rubak el mo medengei doruul me a dolekoi. Moutkei lobengterir er a ungil lurrelir; bom sechelirir e momes er sel lungil el ngara chelsir. Ng diak el kired el kimer el kirir ng bai kired el mengeluolou er a deleuill er kid lobengterir. Lak bo mouketui malechub e morritel er tir. Di moubeltik el reng el mor tir! Sel ollachitnger er a ngikel ririid el ngalek a osisechklid el kmo a rengalek sel bolodengei a rengrir, e te blechoel el sorir el mor mei. Alsekum e tia duubech, e mokekii a rengum, loba klechebchub, mrurt el mor tir, bechulterir, em terengur a mederir, el diua a demal ngkal ririid el ngalek.
Ulebongel, molemolem el kiei er a klikiid el klengar, bo mungil el olechotel sel mou merang er ngii, e bom keid er a Osobeled, el Jesus Kristo. Ngii a medengei e medengelii aikel klengitelreng me a ringel, e Ngii a mo omeklengat er a blakelreng er kau me a temem el mchoit er a renglkem alsekum eng diak el tial klenga, eng el merael mei el klengar. Bo blechoel, rodam me a rodos, el melatk el kmo a oureng a klou a ututelel el tebedechel a uldasou er a ebangkelio.
Ngokiu aikal betok el rak el kusiou er a Ikelesia,e ak mla mesterir a rechad er a Ikelesia el tir a semerirar e belchoel el meruul aikal osisiechakl er a chelsel a klengar tir. Tiang a teleletel a mesobil el chedil el ngii a bo kulker er a ngklel el “Mary.” Ng mekngit el dolekoi, le Mary a siliseb er a meringel el dertel a chebechiil. Tiaikid el taem, e a Mary a mlo medengei el kmo sel kot el klou a ultutelel lomdaosu el kirel me a telungalek er ngii a chedaol klechad er ngii. A omeluluuch, mesuub er a chedaol llechukl, olsengerenger, me a mo er a Ikelesia ma templo ng mo melemolem el meklou a tutelel mo er ngii?
Me a tial chetituokel el taem, eng mle meililt el mo orreked er sel ngii a loedengelii el klemerang. Ng miltik olisiich er a chelsel sel “Telungalek: Chais el mo er a Beluulechad,” el ngii, me a lmuut el bebil er a ungil osisiechakl, a olisechakl el kmo a “roungalek el chedam me a chedil a oba chedaol ngerachel lomekeroul er a rengelekir el ngara beltikereng me a llemalt” e mo olisechakl er tir el mo blechoel loltirakl a llechul a Dios. Ng millemolem losiik a nger er a Rubak e uluchais el mo er tirka el teua el ngelekel er a bek el kldibel el tir el telungalek. Tem le blechoel mesaod er a ebangkelio e kauchais a ikel mla duubech el tekoi me a klaumera er tir el mo er a ta me a tang.
Diak el ior a rekrir el kekerei me a klengit er reng el tir a mlo chemau er ngii, a rengelkel a dilubech a beltik el reng er tir el mo er a ebangkelio er a Kristo me a klemeriar el reng el mo mesiou e omerk er ngii el mo er a rebebil. Tedei er tir a mlo mesiou el misionari, e ngkel kot el kekekrei a chelechang eng misionari el ngara South America. Ngkel kot el klou el ngelkel redil, el ngak a kmal ungil medengelii, el chelechang a bechiil e mesisiich a klaumerang er ngii, ouchais, “Ngak a dirkak a tal kulechsuar el kmo a delak a ulemekeroul er kemam el di ngii el tang le Rubak a blechoel el ngara chelsel a blimam. Me a sera delak louchais er a klaumerang er ngii el mei er kemam, ng ulemuchel a dersta er kemam el lobult el mo er ngii el lolab a ker er kemam. Ng kmal dmeu a rengud el ngii a ulechotii ebangkelio.”
Rodam me a rodos, ngika el ungil chedil a mlo sebechel rulii a blil el blil chedaol tekoi. Ng osisiu el mo er sel ker luleker er ngii ngkel Ethiopian el mo er a Philip, e ngkal chedil a di mle ngii loker er ngii el betok el taem, “ng mekerang a rengelek a le suub dilmerekmo a chedil bo lomekrael er tir?”
Kemiu el kldemek er a chelsel ebangkelio, a kuchais er kemiu el kmo sel ,meral blak a rengud, e meral ngar er ngii er a rengud, e demesisiich, e desemeriar lolisechakl er a ebangkelio er a Jesus Kristo loba meral moktek e dultuil er a odbechel Chedaol Reng, e a ika el osisiechakl a soiseb er a rengud e mekrolid el mo kiei loltirakl a klemrang er a Dios.
A kuuchais el kmo a Jesus Kristo a a Osobel er tial beluulechad. Ngii a Osobeled, e Ngii a ngar. Ak medengei el kmo Ngii a omekrael er a Ikelesia er ngii lokiu a profet er Ngii, el chad er a ues, me a ocholt. Ak olecholt er a klaumerang er ngak el kmo a Dios a ngar, e Ngii a betik a rengul er kid. Ng soal kid a deluut el mo kiei el Obengkel—kid el rokui. Ng orrenges a nglunguched. A ouchais a ikal klemerang er ngak er aikal klemerang loba ngklel a Jesus Kristo, amen.