“Momes! Ngak a Dios er a Tekoi el chelid”
Tekoi el chelid, olangch, me a ongasireng a betok er a delongelir a roltirakl ra Jesus Kristo er a chelechal taem, el ngara chelsel a klengar kemiu, me a ngak.
Rodam me a rodos er ngak, ng meral ungil techall el ngak a dechor er a medemiu er a chelechal sils. Dmak lobengterir tirkel mla kmung a cheldechederir er tial ongdibel, e ngak a ouchais er kemiu el kmo a Jesus Kristo a ngar. Ngii a mengetikaik er a Ikelesia er Ngii; Ngii a mengedecheduch el mo er a profet er Ngii, er a President Russell M. Nelson, e Ngii a betik a rengul er a rokui el rengelekel a Chedam er a Babeluades.
Tial Sandei el Baskua e kid a oldeu er sel Okisel a Kodellel a Jesus Kristo, el Osobel e Osebeled,1 e Mesisiich el Dios, e King er a Budech.3 A Tngakireng er ngii, lobengekl a Okisel a Kodellel a uriul er a edei el klebesei el ngara debull, a kmal kot el klou el tekoi el chelid el ngara chelsel a reksi er a rechad. Momes, Ng dilu el kmo: Ngak a Dios; e Ngak a Dios er a tekoi el chelid.3
“A tekoi el chelid ng dikeang le Kristo el mla ngmasech el mo er a babeluades, meng kiei er a klisichel a chimal a Dios?”4 el profet Mormon a uleker el ngara chelsel a Babier er a Mormon. Ngii ulenger, “Ng diak; me a reanghel meng dirkak bolak lolisechakl er a rengelekel a chad.”5
Uriul er a omengerus, ea anghel er a Rubak a mlo chemolt er a Maria me a rebebil ra redil el mlo er a debull el mo mengilt er a bedengel a Jesus. A anghel a dula el kmo:
“Ngera me kom osiik er ngikel di ngar er a delongelir a rulekoad?”6
“Ng diak le ngar tiang: ng mla mekiis er a kodall.”7
Sel Babier er a Mormon a profet Abinadi a ulechais er tial tekoi el chelid:
Alsekum a Kristo a dimlak el bekiis er a kodall eng diak a Okiis er a kodall.
Eng di ngarngii a okiis er a kodall, ma leuaisei ea debull a mlo diak el bo le mesisiich, ea ringellel a kodall a mlo diak e leng Kristo a uchul.8
Tial meang omeruul el Jesus Kristo a rirellii tirkel mle kot el oltirakl mete longelang e dulang: “Ngikal chad ng kol techang! ma lolekoi e a eolt ma chedesaoch orrenges er ngii.”9
Sel tirkel mle kot el re Apostol a ultirakl er a Jesus Kristo e ulerrenges er ngii el olsisechakl ra ebangkelio, e te mle sioning a betok el tekoi el chelid. Te milsterir “a re meiko a mla mo sebecherir el omes, ma re chitechut ocherir a mla mo sebechir el merael, me tirkel chebedes a mla mo klikiid, ma re mechad a mla mo orrenges, ma re mlad a mla lmuut el mo chad, ma ungil chais a mla oberk el mor a re mechebuul.”10
Tekoi el chelid, olangch, me a ongasireng a betok er a delongelir a roltirakl ra Jesus Kristo er a chelechal taem, el ngara chelsel a klengar kemiu, me a ngak. Tekoi el chelid a chedaol omeruul, ocholt e olechotel a klisichel, me a kengei er a Dios el kmo Ngii a “diosisiu er chelii, chelechang, me a diak a ulebengelel.”11 A Jesus Kristo, el milebii a daob, a sebechel cholleklii; Ngii el rirellii a meiku el mo omes a sebechel remuul a osenged el mo bedul a babeluades; Ngii el milngikiid er a re chebeds a sebechel sumechokl a chelitechetud; Ngii el ulmekungil ra chad el diak el sebechel merael a sebechel omekedong er kid el mo dechor e melekoi “Mei me, moltirakl er ngak.”12
Ng betok er kemiu a mla sioning a tekoi el chelid, er a bai kuk el sebechem lomtab. Ng locha mekekerei sel mongaisisiu el mo er a Jesus a lokisii a mla mad. E ngdi sel klungel a diak el uchul eng tekoi el chelid, ngbai tekoi el chelid eleng mlara Dios. A bebil ra udasu a kmo a tekoi el chelid a kuk di dubech a lechub eng kuk di ungil a chung er ngii. Engdi a profet Nephi a merrob er tirkel metetoech a mederir er a klisichel me a tekoi el chelid er a Dios, e oldanges a osisecheklir lousbech a di llemesir me a klemedengei er tir, me bo le ngarngii a lengai.13
Tekoi el chelid a morngii lokiu a chedaol klisiich el ngkel Ngii a mesisiich el mo olsobel.14 Tekoi el chelid a telengtengil a diak a ulebengelel moktek er a Dios; a tekoi el chelid a klou a ultutelel el kirel a klengar el ngara babeluades el mo er a beluulechad.
Tial mlo merek el fall ea Sister Rasband me a ngak a mle ngara omerollam el mo er a Goshen, Utah el mor sel Face to Face el ongdibel el mora rokir el beluulechad el broadcast el mo er a bekord el elolem el dart el telael el rechad el ngarngii a teruich ma elolem el bek bedengel a tekoi.15 Tial brokuram a mle kirel sel Oltel ebangkelio er a Jesus Kristo, el mla er ngii a ker el mlara rengease el mkekou el chad el meliuekl er a beluulechad. A Sister Rasband me a ngak a mle omes a ikal nger; ng milskemam a techellam el mo ouchais el kmo a Joseph Smith a profet er a Dios, a klisichel a ocholt el ngara chelsel a klengar kemam, e ngarngii a melemolem el Oltel ebangkelio er a Jesus Kristo, me a klemerang me a llach el ngii a mekreos el merkemam. A betok el orrenges er a chelechang a mlar tial meang el ongdibel.
A mle meral ngii tial broadcast a mle kirir el mo er ngii er a Sacred Grove el ngara New York, er sel blar ngii a Joseph Smith a uluchais el kirel: Ak milsterir a teblong el chad, el llemesir me a klebkellir a diak a mouai ngii e mle dechor el ngara melidiul. A ta er tir a milngedecheduch er ngak, el ulemekedong ra ngklek, e melutk ra chimong—Ngika Betik ra Renguk el Ngelekek el Sechal. Bo Mrengesii!16 Tiang, e rodam me a rodos, a mle tekoi el chelid.
Tial bekuiuiuul rakt el meliuekl er a beluulechad a uchul maki millukl er tial broadcast el mo er a Goshen, Utah, el Ikelesia er a Jesus Kristo er a Uriul-klebesei el Santo a mla rullii , a telkib el basio el uai a Jerusalem er a ngaramong el kirel a omeruul el huirum. Sister Rasband me a ngak a mochu kmeed er a Goshen er tial kebesengei er a Sandei ea kimes a okrokr el chat el ngarsel basio el kiram el morngii. Mla er ngii a ngau er tial basio, ma ki mlo suebek a rengmam el kmo tial broadcast a locha diak el sebechel mo er ngii. Ng kmal uaisei, e sel lluich el bung er a lebo lelolem el klok, el temel a broadcast, eng mlad a dengki er tial basio. Ng diak a dengki! Ngdiak a broadcast. Mla er ngii a chimo el generator el rebebil a ulmedasu el sebechel mekerdii a dengki, engdi dimlak a menglou a rengmam el kmo ngsebechel lorurt a ikal meringel el chad el klekedall.
Kemam rokui el ngara brokuram, el uldimukl er a rechad er a cheldecheduch, chelitakl, ma omengituuk, ma re lluich el rengeasek el meklou el chad el rechedal a telungalek er kemam—a kmal mle ngarngii a rengrii el kirel tial mochu rengii lomeruul. Ak mlor cheroid er a lengelir me a rrau el reng e ulengit er a Rubak me lekedmeklii a tekoi el chelid el kiram. “Chedam er a Babeluades,” ak miluluuch, “ngdiak blechoel lolengit a tekoi el chelid, engdi chelechang e ak kmal olengit mebol ngarngii a chimong. Tial miting a kmal kirel morngii el mo ra rokui el rengeasek meklou el chad el meliuekl er a beluulechad. Aki ousbech er a dengki mebol ngarngii alsekum meng moktek er Kau.”
Mla imiit a euid el bung er a elolem el klok, e sel mle rechedel a dengki er a lemlad, a mle rechedel er a lluut el kmard. Rokui el tekoi a mocha oureor, el ngara chelitakl me a olkeiungel el mo er a huirum me a rokui el klekedall. Aki mlo sebechem el omuchel er tial broadcast. Aki mlo chemau a tekoi el chelid.
Sera Sister Rasband me a ngak er a ki ngara mlai el kaieri el mo remei er sel kesus, ea President me a Sister Nelson a mle text er kemam el obang tial klumech: “Ron, somam a obo modengei el kmo sera kim rrenges el kmo ng mlad a dengki, ea ki milluluuch me bol ngarngii a tekoi el chelid.”
Ngara chedaol llechukl er a uriul-lebesei eng llechukl el kmo a Rubak a mla odersii a chimal el mo nguu a klisiich er a babeluades; meng diak el sebeched el mesang er a chelechal taem, engdi sel lorael el mong e kede mo mesang e medengei el kmong kmal Ngii, e Ngii a mei e mo merredel er a rechedal.17
Tiang sel meral diluubech. A Rubak a uldersii a Chimal, meng mlo er ngii a dengki.
A tekoi el chelid a morngii lokiu a klisichel a klaumerang, el President Nelson a ulsisechakl er kid er sel mlo merek el ongdibel. A profet Moroni a mle mengelechel er a rechad el melekoi el kmo a lsekum meng diak a klaumerang er a delongelir a rengelekir a rechad ea Dios a diak el sebechel remuul a tekoi el chelid er a delongelir; ma leuaisei, eng diak lolecholt er Ngii di merekmo a uriul er a klaumerang er tir.
Ng millemolem:
Momes, ng mle sel klaumerang er a Alma me a Amulek el rirellii sel blil a kelbus el mlongkangk el meriou.
Momes, ng mle sel klaumerang er a Nephi me a Lehi a uchul ma re Lamanites a ulbult a rengrir, me te mlo metecholb el obang a ngau me a Chedaol Reng.
Momes, ng mle sel klaumerang er a Ammon me a rodam er ngii el uchul eng mlo er ngii a klou el tekoi el chelid ra delongelir a re Lamanites. …
E diak el ngidil taem le bo er ngii a tekoi el chelid el di merekmo a uriul er a klaumerang er tir; ma le uaisei e tir a mo kot el moumerang er a Ngelekel a Dios.18
Ng sebechek el dochelir a beldeklel tial chedaol llechukl, “Ng mle klaumerang er a rengeasek el meklou el chad ra klekool, semong el rechad ra broadcast, Remerredel me a rechedal a Ikelesia, a apostol, me a profet er a Dios el ulsiik er a klou el tekoi el chelid meng liluut el mo er ngii a dengki er tial cheroid el basio el meruul a movie el ngara Goshen, Utah.”
A tekoi el chelid a sebechel mo er ngii el nger ra nglunguuch. Ng diak el blechol el ikel dolengit malechub e dongerchiil, eng di sel doumerang er a Rubak, Ngii a morsei, e Ngii a mo melemalt. Ng mo rodelii tial tekoi el chelid el mo er sel taem el dousbech er ngii.
A Rubak a meruul a tekoi el chelid el omeklatk er kid er a Klisichel, beltkil a Rengul merkid, Omerolel er a chelsel a klengar er kid, me a sel soal a Rengul el mo olsisechakl a ikel ngii a meklou a ultutelel. Ngkel ngarngii a klaumerang er ngii er Ngak el mo nguu a omekungil, Ngii a millekoi el mo tirkel re Santo er sera 1831, me tial yaksok a melemolem er a chelechal taem, “el chad el dirkak el metutk el mor a kodall, a mo nguu omekungil.”22 Ngarngii beldukl el llach er a babeluades, el kid a blechoel kired el oltirakl.
Ngarngii a taem e kede oureng er a tekoi el chelid el mo omekungil er ngkel betik er a rengud, e meltii a chebirukel el omeruul, malechub eng domedemekii a rengul ngkel mekngit malechub eng diak lungil a uldesuel chad. Omes a tekoi lokiu a di udesuel a chad, eng soad a Rubak a bel soiseb, el chituuk a ikel telemall. Ngokiu a klaumerang, ea tekoi el chelid a mo er ngii, el diak el belkul sel temed malechub eng kedmeklel el ngii a soad. Tiang a belkul a kmo ngdiak el sal klou a klaumerang er kid malechub eng diak el sebeched lousbech a Ngesuil? Ng diak. A Rubak a betik a rengul er kid. Ngii a mlad el kired, ea Tngakireng er Ngii a melemolem el olngeseu er kid er a berraod me a klengit e douchel a rengud e mo kmeed el mo er Ngii.
A Rubak a ulmeklatk er kid el kmo, “A uldesuek a diak le ua uldesuiu.”20 Ng dilu, “Merngak, kemiu el rokui el chorma er oberaod el chelungel, e ak mo meskemiu a ulengull”21—ulengull er a de simbai, klengit el reng, diak el lolngesenges, cheokl el mora rebetik er a rengud, el kirel a mla mo diak a lechub eng telemall el berrous. Sel ngarngii a budech er a delongelel a rraurreng me a klengiterreng a uai a le tekoi el chelid. Molatk a tekingel a Rubak: el milngedecheduch a budech el mera uldesued el kirel tial tekoi? Ng kol ngera el mesisiich el sioning a sebechem el nguu el diak el mlara Dios?25 Sel tekoi el chelid a uasei a Jesus Kristo, el Ungil el Jehovah, el Ngelekel a Kot el Ngarbab, a onger loba budech.
El di ua sel Ngii a mlo chemolt er a Maria er sel sers, e ulmekedong er a ngklel, e Ngii a omekedong er kid el mo ousbech a klaumerang er kid. A Maria a mle soal mo mesiou er Ngii e omtebechel er Ngii. A Okisel a Kodellel a dimlak sel ngii a ulmedasu er ngii, engdi tia otireklel sel klou el uldasu er a deureng.
“Be metengel er a kerus,”23tial seked er tirkel diak el oumerang a millenguul er Ngii el ngara Calvary. Ngii a mle sebechel rullii a tekoi el chelid. Eng di mle medengeii el kmo a ulebongel ngmo ua ngerang er a uchelel, e Ngii a mle soal blak a rengul er kirel sel moktek er a Demal. Ng diak el kired el lak bo dodengelii tial okesiu.
A ikel taem el dengara ringel e Ngii a dilu el kmo momes a telemall el ngara kekengek, me a llechul a deel el ngara chimak me a ochik; di moumerang, moltirakl a llechuk, e komo nguu a rengedel a babeluades.24 Sei e, rodam me a rodos, a tekoi el chelid el mle yaksok el merkid rokui.
Tial Sandei el Baskua el doldeu a tekoi el chelid er a Okisel a Kodellel a Rubak, el ngak el Apostol er a Jesus Kristo, e ak kuba ngariou el reng e meluluuch me bo molchesuar a klisichel a Osobel er a chelsel a klengar er kemiu, ea ongtemiu el mo er a Demad er a Babeluades a bo longer loba beltik el reng me a blakerreng el Jesus Kristo a ulechotii er a chelsel a Urerel. Ak meluluuch me bo el sebechemiu el mo blak a rengmiu e moumerang a ikel rokui el mo er ngii. A ku mekngeltengat er kemiu me a tekoi el chelid bo lobengkemiu el diua sel ki blo mchau er ngii er a Goshen—alskeum eng moktek er a Rubak. Mosiik el kirel aikal klengeltengat-ng mlodurokl er a babeluades el mera chelsel a klengar kemiu el losiik er ngika el Jesus el ngii a reprofet me a re apostol a mla meluches el kirel, me luchul a krasia er a Dios el Chedam, me a Rubak el Jesus Kristo, me a Chedaol Reng, el ngii a sioning el kirir, bo le kiei lobengked el mo cherechar.25 El ngara a ngklel a Jesus Kristo, amen.