Ngerang mla Rulii a Osobeled el Mei er Kid?
A Jesus Kristo a mla remuul a rokui el ngii a ulsbechall er tial omeroled er a klechad el bedul a basio el ngii a beldukl er a chelsel sel uldesuel a Demad er a Babeluades.
Mle kesus er a Sebadong er a miting ra klou el ongdibel er a stake ra betok el rak ra mla memong, e ak milsa redil el dilu el kmo a rsechelil e uleker er ngii el lmuut el mera ikelesia er a uriul er a betok el rak el diak el ngara ikelesia, engdi ngikal redil a diak el sebechel mdesuiu a di imol uchul eng kirel lmuut el mong. Ak mlo melisiich er a rengul, me ak dilu, “Sel bo momes a rokui el tekoi el riruul a Osobel, eng mo betok a uchul e kelmuut el mei e oldanges e mesiou er Ngii.” Ng mlo mechas a renguk er a longer, “Ngerang mla rulii el merngak?”
A Jesus Kristo ngerang mla rulii el mera derta er kid? Ngii a mla remuul a rokui el ngii a ulsbechall er tial omeroled er a klechad el bedul a basio el ngii a beldukl er a chelsel sel uldesuel a Demad er a Babeluades. Ak mo melekoi a eua er a ikal osisechakl el ngii a nga er tial uldasu. Derta er aikang, e a Dital Ngelekel, el Jesus Kristo, a ngii a ngara belngel. E a uchul aikal rokui a sel beltkil a rengul a Dios, el ngii a ulecholt er a beluu el ngara chelsel a rengrir a rengelekir a rechad; maleuaisei, e tiang ea kot el ngarbab el soad er a rokui el tekoi (1 Nephi 11:22).
I.
Uchei er a Sandei el Baskua, eng temel dongedecheduch el omuchel er a Okisel a Jesus Kristo. Sel Okiis er a Kodall a msa otil a rengul a dertang er kid er a delecherul a klaumerang er kid. Ngii a dochelir a belkul aikel osisechakl el merkid, e uchul a mo ungil blekerdeled, e meskid a urunguled el omes er a ngarmedad.
E le kid loumerang er a Bibilia me a Babier er a Mormon el mesaod er a meral Okisel a Jesus Kristo, kede dirrek el kongei a betok el osisecheklel a chedaol llechukl el kmo a osisiu el okiis a mora rokui el chad el tir a mla tal kiei er tial belulechad.1 El uaikel lulsisechakl a Jesus, “E le uchul ngak a ngar, me kemiu a dirrek el mo ngar” (Johanes 14:19. Me a Apostol er Ngii a ulisechakl el kmo “a mla mad a lmuut el mo ngar e diak el metemall” e “tial bedenged a di mo ngar el mo cherechar” (1 Korinth 15:52, 54).
Engdi a Okiis a meskid a lmuut el betok er a di otil a rengud el kirel a diak demad. Tia ngodechii a teletelel a domes er tial klengar.
A Okiis a meskid a ues me a klisiich el mo otekengelii a ringelel a klengar el chelbangel er ngii a derta er kid me a rebetik er a rengud. Ng meskid a beches el osenged er a bedenged, uldesued, me a domelchesiu er a ngelsengesed el de ngilai er a de bechell malechub a kede ngilai er tial omerolel klengar er kid. Ng meskid a klisiich el mo outekangel a klengit el reng, rebet, me a kngtil a rengud. E le a derta er kid a oba otil a reng er a okiis, e kede medengei el kmo aikal ngelsengesed er a klechad me a ultok a diak el meketeket.
A Okiis a dirrek el meskid a mesisiich el omeksuled el mo urekodel a llechul a Rubak er chelechal de ngar tial klengar. Sel de bekiis er a kodall e dolemolem el mor sel ngii a mla mocholt el Ulebongel Kerrekeriil, eng soad el mla nguu a techelled el kirel a ikel ngellitel el klengeltengat el mla metib el kirir a remla lmuut el mo ngar.2
A dechelel tiang, e a telbiil er tial Okiis a sebechel ulsiseb er ngii a techall el lmuut el mo obengkel a rechedal a telungalek er kid—el bechiil el sechal, bechiil el redil, rengalek, chedam ma chedil, me a ruldidelel a rsechir—tia mesisiich el odbechel a reng el mo oltaut a ngercheled er a telungalek er kid er tial klengar. Ng dirrek el ngosukid el dmak el kiei loba beltik el reng el ngar tial klengar, e dirrek el chemolodid sel lemad a re betik er a rengud. Kede medengei el kmo a klechacheroid leng kodall a di kedeb el taem, e kid a mengerechir ra ngarmedad el deureng el kid a lmuut el mo dmak el ngara deleuill. A Okiis a meskid a urunguled me a klisiich el mo klou a rengud el mengiil. Ng dirrek el kudmeklid el mo mesisiich a rengud el mo obengelii a kodelled—ngii me a le kodall el di mereched el merkid.
Aikal rokui el mla mocholt el kirel a Okiis a tebedechel sel kot el nger el mora ker el “A Jesus Kristo ngerang mla rulii el mei er ngak?”
II.
A oumesind er kid, sel techall el mo nguu a klausubes er a kengtid a kot el klou a belkul er tial Tngakireng er a Jesus Kristo. Sel de ngar odanges, e kede oba omengull e mengitakl:
A mekreos el resechel a mle mimokl lodars;
A kelngar er Ngii a mle mimokl el mecherei,
A diak a kengtil a mlo tenget el kirel a klengit,
Mlad el mo olsobel er a belulechad.3
A Osobeled e Olsobel a uluutekangel er a diak el mudasu el ongarm el mo tenget el kirel a kngterir a rokui el chad el tir a mo ouchel a rengrir. Tial tenget el tngakireng a odersii a ngarbab lungil, el klikiid el ngelekel a sib el diak a mekngit er ngii, el kirel a ngarbab el telkelel a klengit, el klengit er tial rokir el beluulechad. Ng milkisii a chesimer el mora derta er kid el mo mukbeches a kengtid mel sebeched el lmuut el mora medal a Dios, el Chedam el mo Cherechar. Tial blok el chesimer a ngarngii el mora rokui el ngelekel a Dios. Sel de ngara odanges, e kede mengitakl:
Ak mechas a renguk el kmo ngii a miltengel er a chedaol kingellel
El mo olsobel er a reng el ngii a omtok e kedidai el uai ngak,
El ngii a mo odersii a ngarbab el beltkil a rengul el mera chouai ngak.4
Sel klebokel e diak el mudasu el olechotel a Tngakireng er a Jesus Kristo a ultuil er a beltkil a rengul a Dios el mera derta er kid. Ngii a smisichii a tekingel el kmo klou a belkul a reng—er a bek el chad—el ngii a kot el ngarbab er a medal a Dios (Doctrine and Covenants 18:10. Ngara Bibilia, ea Demad er a Babeluades a silodii loak a beltikelreng: “E le uchul a Dios el betik a rengul er a rokui el chad, meng chilitii a Dita el Ngelekel, meng ngikel mo oumerang er ngii a diak bol mad, e bai mo nguu a diak a ulebengelel klengar” (Johanes 3:16). Ngara ocholt er chelechal taem, ea Olsobel, el Jesus Kristo a uluuchais el kmo Ngiia betik a rengul er a beluulechad meng chilitii a klengar er ngii, me tirkel rokui el mo oumerang a mo ngelekel a Dios(Doctrine and Covenants 34:3).
Ng uaisei, el, Babier er a Mormon: El dirrek el Ouchais el kirel a Jesus Kristo a mochar sel mocha ulebengelel loba osisechakl el kmo a omeroled el mo “cherrungel” e “klikiid el ngar a Kristo,” kida kired “lou beltik el reng el mora Dios lolab a rokui er [kid], uldesued, me a klisiched”? (Moroni 10:32–33 Sel Uldesuel el mlodubech lokiu a beltikelreng a kirel mengai loba beltikelreng.
III.
Ngera bebil el Osobeled, el Jesus Kristo a mla remuul el mei er kid? Ngokiu a osisecheklel a re profet er Ngii e dirrek lokiu a osisecheklel, ea Jesus a ulsisecheklid er a uldasu er a mo suobel. Tial uldasu a uldimukl er ngii a Omeob er a beluulechad, moktek er a klengar, ulsbechellel a erbita lomeruul, me a sengk er a omelilt. Ng dirrek el mla osisecheklid ra llach me a telbiil el kired el mengull me a chedaol ruoll el kired el ngmai el ngii a mo ngoikid el lmuut el mora rdemad me a rdelad el ngara Babeluades.
Ngara Bibilia e kede menguiu a osisecheklel: “Ngak a llomes er a beluulechad: ngikel oltirakl er ngak a diak lorael er a ilkolk, ng bai mo oba llomes er a klengar” (John 8:12). Me a chocholt er chelechang a donguiu el kmo, Mesang, ngak a Jesus Kristo, … el llomes el diak el sebechel lobart er a ilkolk (Doctrine and Covenants 14:9). Alsekum me kede oltirakl a osisecheklel, e Ngii a omekllomes er a roled er tial klengar e meskid chotil a rengud el kirel a mo basio er kid er tial mei el klengar.
E le Ngii el betik a rengul er kid, Ngii a melasem er kid el mo chemau Ngii e diak dechau a tekingel tial beluulechad. Ngar sel ngarbab el osisecheklel er a blauang er a klengar, a Jesus a ulisechakl el kmo ng diak el kired el teloi er tirkel tir a sorir a tekingel a beluulechad—tekoi el ngii a olngeseu a klengar er tial beluulechad a bai diak el beskid a dousbech el kirel a diak a ulebengelel klengar.5 A Jesus a lmuut el oleker er kid e lmuut e lmuut el lmuut, “Moltirakl er ngak.”5
IV.
Sel mong mengulebongel, ea Babier er a Mormon a olisechakl el kmo sel tebedechel a Tngakireng er a Jesus Kristo a [mlo] chouarm er a ringel me a berraod me a rokui el bedengel a ngibesereng; tia kirel uaisei me bol mutaut a ikal tekoi el kmo ngii a mo ngmai a ringel me a secherir a rechedal (Alma 7:11).
Ngera uchul me a Osobel a mlo chuarm er a ikal “bek bedengel omelasem er tial belulechad”? A Alma a silodii, e ngii a mo ngmai a rokui el chelitecheterir, me a rengul bol mui er a klechubechub, lokiu a tech, me bo lodengei el kmo ng mekera lolkakl [belkul a kmo mo olngeseu] er a rechedal loltirakl aikel chelitecheterir (Alma 7:11–12
A Osobel a melchesuar e medengei a de ngibes er ngii, odechelakl el de ngarngii, kngtil a rengud, ongarm el de ngarngii, e le Ngii e mle mimokl el soiseb er a chelsel a ikal rokui leng tebedechel a Tngakreng er Ngii. A bebil er a bades a oterkeklii tiang. Sel Beches el Renged a melekoi, “E le Ngii a mlo chuarm er a ongarm, sei a uchul eng sebechel lolengeseu er tirkel mo chemau ongarm” (Hebru 2:18). Isaia a olisechakl, “Lak medakt; e ak obengkem: … ak morullau el mo mesisiich; e, ngosukau” (Isaia 41:10). A rokui el ngara ringel el kirel a ngiidi el chelitechut a kirel melebedebek el kmo a Osobeled a dirrek el siliseb er tial bedengel a ringel, me ngokiu a Tngakireng er Ngii, e Ngii odersii el mera derta er kid a klisiich el mo sebeched el otekau.
A Prophet Joseph Smith a mlo kodebengii tiang el ngar sel ongedei el Tebechelel a Klaumerang: “Aki oumerang el kmo ngokiu a Tngakireng ra Kristo, ea rechad el rokui a sebechir el mo suobel, lokiu a otireklel a llach ma ruoll el ngar er a osisecheklel a Ebangelio.”
“Ngerang mla Rulii a Osobel el Mei er Ngak?” ng kel odos a uleker. Ngar cheungel sel uldesuel a Demad er a Babeluades, Ngii a milebii a eanged me a chutem (mesaDoctrine and Covenants 14:9) me a derta er kid bol sebechel soiseb er tial klengar el ngii a klou a ultutelel er a mo skel a chedaol blingeled er a ngarmedad. El tebedechel a uldesuel a Chedam, e a Okisel a Jesus Kristo el mlo mesisiich er a kodall a msang a derta er kid a chotil a rengud er a klengar el mo cherechar. A tengetengel el tngakireng a Jesus Kristo a msang a derta er kid a techall el mo ouchel a rengud er a kengtid e moluut el beches el mora blid er a babeluades. A llechul me a telbilel a ochotii a rael, ea priesthood er Ngii a meskid a ngerachel el mo kudmokl a chedaol ruoll el ngii a dousbech el mo nguu sel blingeled. Me a Osobel a mle mimokl el soiseb er a ringel me a chelitechut me Ngii bol sebechel medengei el kmong mekera lolisiich er kid sel de ngara ringel.
A Jesus Kristo a riruul a ikal rokui e le Ngii el betik a rengul er a rokui el ngelekel a Dios. A beltik el reng a odbechel a ikal rokui, e di mla uaisei er sera uchelel. A Dios a mla melekoi er kid el ngar ocholt er chelechang el kmo ngii a milebii … sechal me a redil, el di uai ngii … ; e milsterir a llach el kmo ngkirir loubeltikelreng e mesiou er ngii (Doctrine and Covenants 20:18–19).
A kuchais aikal rokui e meluluuch el kmo kid er rokui bo dolatk aikel Osobel a riruul el mei er a derta er kid me kid el rokui bo de oubeltik el reng e dosiou er Ngii, el ngara ngklel a Jesu Kristo, amen.