Tin Riyul’ nib Machalbog, Machib nib Machalbog, nge Yi’iy nib Machalbog
Wenig mu fal’eg e ngiyal’ ko mu’ulung ney ere rangam duwuri’iyed gimed ko pi milwol rok’ Kristus u dakean e tapigpig Rok’.
Pi walageg, kammagar ni kam bad ko mu’ulung ko conference! Rigub falfalean’ ni gubay romed! Fare nel’ e pul nike thimur ma gimed bay ko tafney rog nib yo’or. Kug meybil marunga’agem nge nifan ngomed. Napan e ngiyal’ ko biney e wiik kug meybil nib gel ni re mu’ulung ney e ra mang e ngiyal’ ko lemnag nge yi’iy nifan e pi’in ni be gay e mit ney e tawa’ath.
Gimad ba’adag ni nggu nonad ngomed ko fare Conference Center bayay. Oren fapi chiya e dariy e gidii’ riy, machane bochi chongin ko fare Tabernacle Choir ura’ be dag e mon’og nib fel’. Gamad be pinning e magar ngomed ko re mu’ulung ney nib gaa’, demuturug e gin ni gamed be paer riy.
Gadad be ul’ul’ ni ngad fek e magawon ko COVID-19 nge bochi miit e m’ar ney. Kammagar ni kam fol e fonow romad nge thin ko pi togta nge pi gidii’ ko am ulan e pi nam romed.
Gadad be tabab gubin e mu’ulung ko rogon ni Somoel ni ke powi’iy.1 Ke thilyeg buchuw u fithik e duw. Napan kab fel’yangreg, mu’ulung ney ke buch dalip fa aningeg e rran. Tomuren, ke ngochngoch e mu’ulung ney ni kemus ta’areb e rran. Urngin e milwol—kafram nge daba’—ma buch bachane meybil nib gaa’ nge ta’ermadliy ko ya’el rorad.
Fapi General Authoritie nge General Officer ko fare Galasia nira non’ed marunga’agen e Tathapegdad, Yesus Kristus, murunguy Rok’, nge gelingin ko bayul Rok’ ni dabi tungun. Dariy reb e ngiyal’ ulan e chep ko feylang napan e ganop ko fare Somoel rodad e rib gaa’fan ngodad nge pe’eth ngak gubin e bee’. Mu lemnag rogon nrib papay e pi n’en nib gathay nag ulangab e feylang—nge pi n’en ulan e yafos rodad—ra thaang fa’an gadad gubin ni gadadra mel’eg ni ngad fol Yesus Kristus nge machib Rok’.
Ulan e ya’el nem, gube pinningmed ni ngam motoyil ko dalip e pi n’en napan e mu’ulung ney: tin riyul’ nib machalbog, machib nib machalbog ku Kristus, nge yi’iy nib machalbog. Be thil’ ko maerwaer u wan’ rok bochi gidii’ bay pi n’en nib mat’aw nge de mat’aw. Bay pi n’en nib riyul’—e tin nib riyul’ nib gubinfen. Ta’ e gafgow ko rran rodad ni bo’or e gidii’ dabi nanged u rogon ni ngar pir’eged e tin riyul’.2 Rayog ni nggu micheg ngomed e tin ni ngam rungaged e daba’ nge gabul e be riyul’ mab machalbog.
Rib gaa’ e gelngin e machib nib machalbog ku Kristus. Ma thilyeg e yafos ngak demuturug e bee’ ni ra nanged fan mra gay rogon ni ngar tay ulan e yafos rok’. Fare machib ku Kristus ma ayuwegdad ni ngad pir’eged nge pared ko kanawo’en e motochiyel. Ra kanawo’en nib k’ik’iy mab wu’in’in radan mra ayuwegdad ni ngad thapeged gubin pi n’en Rok’ Got.3 Dariy ban’en ngay nib tolang ko urgnin nibay rok e Chitamangdead!
Amrogon, yi’iy nib machalbog nifan ko fapi duwer ulan e gum’ircha’med ra fal’eg e mu’ulung ney nibthabi fel’ nge dani pagtalin. Fa’an dawo’ ni ngam gay rogon ni thapeg e ayuweg ko fare Kan ni Thouthup ere ngam rungaged e pi n’en fare Somoel ba’adag ningam rungaged u fithik gali rran ney, wenig mu rrin’ chiney. Wenig mu fal’eg e ngiyal’ ko mu’ulung ney ere rangam duwuri’iyed gimed ko pi milwol rok’ Kristus u dakean e tapigpig Rok’. Mu fil rogom ni ngam murwel ngay u lane yafos rom.
Ireray Fare Galasia ku Yesus Kristus ni fan ko Gidii’en ko Tin Tomur e Rran Gadad e gidii’ Rok ni fal’eg ba m’ag u thilraed. Fare Somoel nike yog Irra papay nag e muruwel Rok’ u ngiyal’ rok,4 nge Irba rrin’ chiney nib buchuw nge buchuw. Gadad be falfalaen’ ni ngad uned ko muruwliy nib thothup Rok’.
Gube pii’ e ta’awath ngak e pi’in nibe pir’eged e magal nib gaa’, ganop, nge tin riyul’. Gube pii’ e tu’ufeg rog ngomed ni gubin, u dakean fithingan Yesus Kristus nib thothup, amen.