12:51

Fare Gapas rok Kristus nima Tal’eg e To’ogor

Yib Rok Elder Dale G. Renlund

Ko fare Ulung ko fare Ragag nge L’agruwi Apostle

Napan nra suguyey e t’ufeg rok Kristus ulan e yafos rodaed, ma tin ni dani fel’ u wun’daed e ran munguy nag, gaman’ nag, min gol nag.

Pi brothers nge sisters, napan ba sikeng ko ba exercise ko gelngin e tin nibe m’agfan’daed ngay, fare gelngin e muruwel ko fare gum’ircha’ era gel. Gum’ircha’ nrayag ni nge athamgiliy e yean u but’ e rayag nra gafgow ko mil i yaen nga lang. Ko biney, fare sikeng ni fan e murwel ko dogur e rayag ni nge dag e m’ar ni dawri yibi m’ug ya’an. Ma tin nra yibi m’ug e rayag ni ngan falay nag u m’on ni nge kireb nag e yafos ni gubin e rran.

Fare m’ar ko COVID-19 e woed ba m’ar nin sikeng nag ni yib nga dakean e fayleng! Sikeng riy e ke dag ni tin nike buchbuch riy ab thilthil rogon. Mangil mab fel’ e falay ko tussah nikan ngongliy.¹ Gidii’en e togta, sensey, gidii’en e ayuyweg e m’ar, nge ku boech e gidii’ e ke pii’ e ayuw ni rib gel—ma ki yaed be ul’ul’ ni yaed be pii’ e ayuw. Bo’or e girdi’ nibe dag nibe pi’ ayuw nge t’ufeg—ma ki yaed be ul’ul’ ngar rrin’ed ni aray rogon. Machane aram rogon, ma ka bo’or e tin nde fel’ ni kube buchbuch riy. Bo’or e gidii’ ni kube gafgow riy—ma ki yaed be ul’ul’ ngar rrin’ed ni aray rogon. Gidii’ nima murwiliy e mit ney e murwel e ba t’uf ni ngan pining e magar ngoraed min pi’ e athamgil ngoraed.

Fare m’ar e kabang ko fare thothup ni ki yibe sikeng nag ni fan e pi gidii’en e Galasia rok fare Tathapeg. Me tin nibe buchbuch riy e mathuk. Kan tawa’ath nag e yafos rodaed ko machib nib “thothup mab tolang,”² ko fare Come Follow Me, tin ni yibe fil ulan e tabinaew, nge tin nibe fil e Galasia ni mornga’agen fare gospel. Bo’or e gidii’ nibe pii’ e ayuw ko t’ufeg nge gapas ko napan e pi ngiyal’ ney nib momaw’ ma ki yaed be ul’ul ’ni yaed be rrin ni arogon.³

Machane, aray rogon, tin ni yibe sikeng nigey riy ko tin nib thothup e be dag nibe yo’or nag e togopuluw ma be k’iyeg nigey. Biney e be dag nibay e murwel nib t’uf ni ngan rrin’ ni nge thilyeg gum’ircha’endaed ni ngan ta’areb ni woed pi gachalpen fare Tathapeg nib yul’yul’. Biney e gathi ban’en nib be’ech, machane ban’en ni rib tu’uf.⁴

Napan ni yean fare Tathapeg nge guy fapi Nephites, me fil, “Ma arame dabi yib e maleʼeg thin nga fithikʼmed. … Ni chaʼ ni bay fare lem ko togopluw rokʼ e gathi gamow, machane yow fare moʼoniyanʼ, niʼir e chitamangin e togopluw, ma ire ma kʼaring e damomuw nga lan gumʼirchaʼen e gidiiʼ ni ngar togopluw gaed u fithikʼ e damomuw roraed ngoraed.gumʼirchaʼen e gidiiʼ ni ngar togopluw gaed u fithikʼ e damomuw roraed ngoraed”⁵ Napan ni gadaed ra togoppluw godaed u fithik e damomuw, ma aram nibe minmin fare Moʼoniyanʼ ma be map luwen Got u tharmiy.⁶

Ra minmin fare Moʼoniyanʼ ma Got e bayi map luwen ni lʼagruw fan. Sommʼon, togopluw e ma war nag daed u dakean e fayleng rok Yesus Kristus nge fare bayul rok nima yib u dakean e “matʼaw, … wurengaenʼ, nge murnguy rok.”⁷ Ke gaʼar: “Nggu pi’ reb e motochiyel nib be’ech ngomed, nge bigimed me t’uf bigimed rok. … Fa’anra um pired nib t’uf bigimed rok bigimed, ma aram e urngin e gidii’ ni yad ra nang ni gimed pi gachalpeg.”⁸ Biney e kab ta’ab rogon fa’an ran thilyeg u but’—gubin e gidii’ ma manang ni gathi gadaed gachalpen ni fa’anra dardaged e t’ufeg ngodaed. Murwel rok ko tin tomur e rran e yibe tagan nag ni bachan nibay e togopluw nge to’ogor⁹ u fithik pi gachalpen.¹⁰ Ma migid, togopluw e dani fel’ ko tin nib thothup ngak be’. Ra iring e gapas, falfalen’, nge tofan, nge rogon nrayag ni ngan thamiy fare Thothup riy.

Yesus Kristus e weliy ni fare yalen e machib rok e gathi “maleʼeg thin nga fithikʼmed, machane [fare] yalen rok [e] machib rog, ni pinʼen ni aray rogon e ngan pag i rinʼ.”¹¹ Faʼanra pay e damomuw ngog fa de taʼareb laniyaenʼ mow beʼ make yib e damomuw ngog fa pufthin nag fachaʼ, ma gag e ku “mul” ko fare sikeng nifen e tin nib thothup. Biney e sikeng ni ku mul riy e dar yip fan ni ke mʼay fare athap. Machane, be dag nib tʼuf ni nggu thiliyegneg. Nge biney e mangil ni ngan nang.

Tomuren ni yib fare Tathapeg ngabi guy fapi Mariken, fapi gidiiʼ e ra taʼareb gaed; “ma dariy e maleʼeg thin u lan gaʼangin yang fare nam.”¹² Gabe lemnag ma fapi gidiiʼ e kar taʼarebgaed ni bachan e yaed gubin ma yaed btaʼab rogon, fa bachan e dani taʼab rogon ni yaed ma leam? Dagur tafney nag. Make buch, tagopluw nge fananikan e chuw roraed ni bachan e kar ted yalen fare Tathapeg niʼir e tolang ko gubin banʼen. Dani gaʼfan e tin nib thilthil roraed ko fare tʼufeg roraed ngak fare Tathpaeg, ma napan ni kar taʼarebgaed ni woed e “piʼin taferaed fare gilʼilungun Got.”¹³ Nʼen ni buch ni “riyulʼ ni dakuriy ba ulung i gidiiʼ ni aram fini falfalaenʼ … ni sunmiy Got nga paʼ.”¹⁴

Taʼareb nigey e bagel e murwel riy.¹⁵ Ra buch u napan ni gadaed be gay rogon fare tʼufeg rok Got ulan gumʼirchaʼendaed¹⁶ min sap ko yafos rodaed ni manemus.¹⁷ Taʼarebgaed ni gadaed fapi bitir ni fak e en Got¹⁸ nge yulʼyulʼ rodaed ko fare gospel nikan sulweg yarmen nib yulʼyulʼ. Mara buch, ni tʼufeg rodaed ngak Got nge gadaed ni pi gidiiʼen Yesus Kristus e ra gaʼ min tafney nag boech e girdiʼ. Ma gadaed ra tayfan daed ni demuturug rogon ni gadaed ba thilthil, rogon e tafney rodaed nib thil, nge tin ni gadaed ba salap riy.¹⁹ Faʼanra dabyag ni ngaed ted yalen fan ngak Yesus Kristus ko tin nib gaʼfan ngodaed nge rogon ni gadaed be tafney nag boech banʼen, ma thingar da sapgaed ngodaed min thil.

Bay ni bay da gaʼ ar gaed, “Rayag ni ngaed taʼ arebgaed—makemus ni faʼanra taʼ areb lungum ngog!” Bin nib mangil ni ngan fith e, “Mang e rayag ni nggu rrinʼ ni nggu piiʼ e ayuw ko taʼareb nigey? Uw rogon nrayag ni nggu fulweg e ayuw ni nge ayuweg fachaʼ ni nge chugur ngak Kristus? Mang e rayag ni nggu rrinʼ ni nge lich nag e togopluw me tabab nag e murnguy nge tʼufeg ulan fare Galasia?”

Napan nra suguyey e tʼufeg rok Kristus ulan e yafos rodaed,²⁰ ma tin ni dani fel’ u wun’daed e ran munguy nag, gaman’ nag, min gol nag.²¹ Ma gadaed ra sagaʼal i tafney nag e tin ni dabun daed ma gaʼ e tafney rodaed ngak e buguliyiror rodaed. Ma gadaed gay rogon e “taʼareb nigey.”²² Ma aram ni dabda uned ko “tugthin ko darifannag,” fa pufthin nag beʼ nde taʼareb laniyaenʼ ngodaed, fa ni gafgow ngak.²³ Woed ni, gadaed be susun nag ni pi gidiiʼ ney e ki yaed be gay rogon ni ngar rrinʼed rogon nrayag roraed ko tin nibe buch ulan e yafos roraed.

Le’engig e fil skul nag e motochiyel ni pag riliwʼ e duw ngay. I ir ni fare attorney, muruwel rok e bagaʼ ni lʼagruw niʼ nde taʼareb lungun row. Machane ke fil nrayag ni nge yoeg e tin nde magaranʼ ni dariyag u fithik e damomuw. Ma gaʼar ngak fachaʼ ni dar taʼareb lungun ko fachaʼ, “gube guy ndabi taʼareb lungun dow ko ranʼey. Guba adagem. Gube tayfan e tafney rom. Gube athapeg ni gara rrinʼ ngog ni taʼab rogon u fithik e murnguy.” Oran ni ngiyalʼ, ma biney e ma tayfan ma mang tafagar ndarifan nib thil laniyaenʼ row.

Kumus ko toʼogor e rayag ni ngar taʼareb gaed u dakean e yalen roraed ngak fare Tathapeg.²⁴ Ko 2006, kug un ko fare yibliy nag fare Temple u Helsinki Finland nifan e chitamangig nge galibthir ko labthir rog, ni ra unew ko Galasia u Finland. Finns, nib muʼun e chitmag ngay, e i tafney nag e temple nga Finland ni boʼor e duw ngay. Ko ngiyalʼ nem, fare temple district e bay u Finland riy, Estonia, Latvia, Lithuania, Belarus, nge Russia.

Napan e yibliy riy, ku fil banʼen ni gin owcheg ngay. Bin sommʼon e rran e kan tay ni girdi’en e galasia u Russia e kan tay ni ngar rrinʼed fapi gam’ing u temple. Rib momawʼ rogon ni ngan weliy e biney nike buch. Russia nge Finland e boʼor e mal ni kar tew bukun e duw faram. Chitamangig e dani paganʼ ma dabun dakaen fapi gidiiʼ nu Russia nge gaʼangin yang u Russia. Ke weliy e ranʼey ni gathi taʼabiyay, ma thamtham rok e woed rogon e Finnish ndabun dakean yu Russia. Ke fil fapi thin nibay morngaʼagen fapi mal riy ko napan e duw ko 19th-centuary u thilin yu Russia nge Finns. Nʼen ni buch rok ko World War II, napan yu Finland nge Russia ni kireb thilin row bayay, e dani thilyeg rogon e tafney rok.

Reb e duw u mmʼon ko fare yibliy fare Temple u Helsinki Finland, fapi gidiiʼen e temple committee, ni oren ni raed e fapi gidiiʼ ni chonggin e galasia u Finnish, e ra madaʼ gaed ngar puruy niged fapi yibliy. Napan e biney e moʼolung, ke guy beʼ ni fapi chonggin e galasia u Russia e ra malekag in e rran nge yib ko fare yibiliy ma yaed be athapeg ni ngar thapeged fapi tawaʼath u temple u mʼon ni ngar suled nga tabinaew. Fapi gidiiʼen e committee, Brother Sven Eklund, e yoeg ni fapi gidiiʼ ni Finns e rayag ni ngar soen gaed boch, ma fapi Russian e nge mang fapi chonggin e galasia ni sommʼon ni ngar rrinʼed fapi gamʼing. Gubin gathon fare committee e magaraenʼ ngay. Chonggin gidiiʼen e Galasia ni Finns nib yulʼyulʼ e ra sasagal niged pi tawaʼath roraed nga temple ni nge yag ni fapi chonggin gidiiʼen e Galasia u Russia e nge yaen ni sommʼon.

Fare Area President nib muʼun ko fare moʼolung ko temple committee, Elder Dennis B. Neuenschwander, taʼaboech riy me yoloy: “Dariy bingiyaelʼ ni kari falʼan’ug ngak fapi Finns ma chi ngiyalʼ ney. Cheppin u Finland ni yaed ba tagopluw ngak e bugiliyiror roraed … nge falfalaenʼ roraed ko [fare temple] nikan toey nga dakean e butʼ roraed e kạn tay nga orel. Ni pag fapi Russian ni ngar bad ngalan fare temple ni sommʼon e [ba] woʼen e tʼufeg nge maligach.”²⁵

Napan ni gog e biney ngak e chitmag, me munguy gumʼirchaʼen me yoer, banʼen ni darma buch rok beʼ ni Finn. Ko ngiyalʼ nem nge madaʼ ko dalip e duw nga tomuren ni yimʼ, dariy bi’id ni yoeg e thin nde felʼ ngak pi u Russia. Bachan woʼen fapi gidiiʼ rog ni Finns, chitmangig e melʼeg ni nge fanow nag yalen Yesus Kristus ndemuturug ko rogon. Fapi gidiiʼ nu Finns e danra achig gaed ko yalen e gidiiʼ nu Finnish; ma fapi Russian e danra achig gaed ko yalen e gidiiʼ nu Russia; ma dariy reb fagli nam ni digey e rogon rok, cheppin, nge tin ni buch rok ni nge pag e tin ndabun. Dani tʼuf ni ngan drom. Ke buch, ni kar melʼegned ni ngar fanow niged e yalen rok Yesus Kristus niʼir e nge mang e bin nib gaʼfan.²⁶

Faʼanra ke yag roraed, ma krayag rodaed. Rayag ni ngaed feked cheppin, yalen, nge tin nike buch roraed ko fare Galasia rok Yesus Kristus. Samuel e dani tamraʼ ko gin ni yib riy niʼir reb fapi Lamanites,²⁷ ku woed Mormon ni dani tamraʼ niʼir reb fapi Nephite.²⁸ Machane ra bagyuw make fanow nag fare yalen rok fare Tathapeg ni sommʼon.

Faʼanra dan taʼreb gaed, ma dan da manged rok.²⁹ Ngad mʼon niged i taʼ e tʼufeg rodaed ngak Got nge yalen rok fare Tathapeg ko gubin banʼen.³⁰ Fanayed fapi mʼag ko yalen e fanow—motochiyel ni ngan taʼareb.

Laken woʼen gidiiʼen e Galasia u dakean e fayleng nib salap ko rogon i mang gachalpen Kristus. Rayag ni ngaed tagaʼ gaed ngak Yesus Kristus, niʼir e “gapas rodad, ir … buthug fa gi rungrung ngay ni i tayrad; ni [bayul] ni fan e nge ta’ab girdi’nag.”³¹ Michanʼdad ngak Yesus Kristus ko fayleng e ran gel nag, ma gadaedra par ni gadaed gel ko thothup.³² Gube micheg napan ni gadaedra “taleg e melʼegthin” min boed “ni taʼareb e tafnay ngak Somoel u fithik e tʼufeg min taʼareb ngak u fithik e mich,” ma ra par e gapas rok rodaed.³³ U dakean fithngan Yesus Kristus, amen.