Moʻoni Haohaoa, Tokāteline Haohaoa, mo e Fakahā Haohaoa
Kātaki ʻo ʻai ke hoko e konifelenisí ni ko ha taimi ia ʻo e keinanga ʻi he ngaahi pōpoaki mei he ʻEikí ʻoku fakafou mai ʻi Heʻene kau tamaioʻeikí.
Siʻoku kāinga ʻofeina, ʻoku ou talitali lelei kimoutolu ki he konifelenisi lahí! ʻOku fakafiefia ke feʻiloaki mo kimoutolu! Kuó u meimei fakakaukau maʻu pē kiate kimoutolu ʻi he lolotonga ʻo e māhina ʻe ono kuohilí. Naʻá ku lotu fekauʻaki mo kimoutolu pea maʻa kimoutolu foki. Naʻá ku lotua fakamātoato ʻi he lolotonga ʻo e ngaahi uike kimuí ni maí ke hoko ʻa e konifelenisí ni ko ha taimi ʻo e fakahā mo e fakakaukau maʻanautolu kotoa ʻoku nau fie maʻu e ngaahi tāpuaki ko iá.
ʻOku mau fiefia ke toe lea atu kiate kimoutolu mei he Senitā Konifelenisí. ʻOku ʻikai nofoʻi ʻa e konga lahi taha ʻo e ngaahi nofoʻangá, ka ko e ʻi heni ʻa e niʻihi ʻo e kau mēmipa ʻo e Kuaea Tāpanekalé, ko ha sitepu fakafiefia ia ʻe taha ki muʻa. ʻOku mau talitali lelei kotoa kimoutolu ki he konifelenisi fakamafola fakaʻilekitulōniká ni, ʻi ha feituʻu pē ʻoku mou ʻi ai.
ʻOku tau kei fefaʻuhi pē mo e ngaahi haʻahaʻa ʻo e COVID-19 mo hono ngaahi kaupeaú. ʻOku mau fakamālō atu ʻi hoʻomou muimui ki heʻemau faleʻí mo e naʻinaʻi ʻa e kau mataotao fakafaitoʻó mo e kau ʻōfisa fakapuleʻanga ʻi homou ngaahi koló.
ʻOku tau fakahoko ʻa e konifelenisi lahi kotoa ʻo fakatatau mo e fakahinohino ʻa e ʻEikí.1 Kuo feliliuaki ʻa e foungá ʻi he fakalau atu ʻa e ngaahi taʻú. Ko e taimi naʻá ku kei siʻi ange aí, naʻe fakahoko e konifelenisí ia ʻi ha ʻaho ʻe tolu pe fā. Naʻe holoki kimui mai e konifelenisí ʻo ʻaho pē ʻe ua. Ko e pōpoaki kotoa—he taimi ko iá pea mo e taimí ni—ko e ola ia ʻo ha lotu taaumaʻu mo e teuteu fakalaumālie lahi.
Ko e Kau Taki Māʻolunga mo e Kau ʻŌfisa Māʻolunga ʻe leá, ʻe nofotaha ʻenau pōpoakí ʻi hotau Fakamoʻui ko Sīsū Kalaisí, ʻEne ʻaloʻofá, mo Hono mālohi huhuʻi taʻe-fakangatangatá. Kuo teʻeki ai ha taimi ʻi he hisitōlia ʻo māmaní ʻe mātuʻaki mahuʻinga fakataautaha lahi ange ai mo kaunga ʻa e ʻilo hotau Fakamoʻuí ki he laumālie ʻo e taha kotoa. Fakakaukau ki he vave hano fakaleleiʻi ʻo e ngaahi fepaki fakalilifu he funga ʻo e māmaní—mo ia ʻi heʻetau moʻui fakafoʻituituí—ʻe lava ke fakaleleiʻi kapau naʻa tau fili kotoa ke muimui kia Sīsū Kalaisi mo tokanga ki Heʻene ngaahi akonakí.
ʻOku ou fakaafeʻi kimoutolu, ʻi he laumālie ko iá, ke mou fanongo ki ha ngaahi meʻa ʻe tolu ʻi he lolotonga ʻo e konifelenisi ko ʻení: moʻoni haohaoa, tokāteline haohaoa ʻa Kalaisí, mo e fakahā haohaoá. ʻOku ʻi ai moʻoni ʻa e meʻa ko e tonu mo e hala ʻoku fehangahangai mo e ngaahi veiveiua ʻa e niʻihi. ʻOku ʻi ai moʻoni ha moʻoni ʻaupito—ko ha moʻoni taʻengata. Ko e taha e ngaahi fokoutua ʻo hotau kuongá ko e tokosiʻi fau e kakai ʻoku nau ʻilo ʻa e feituʻu ke maʻu ai ʻa e moʻoní.2 Te u lava ʻo fakapapauʻi atu ko e meʻa te mou fanongo ki ai he ʻahó ni mo ʻapongipongí, ko e moʻoni haohaoa ia.
ʻOku mālohi fau e tokāteline haohaoa ʻa Kalaisí. ʻOkú ne liliu e moʻui ʻa e taha kotoa ʻoku mahino ki aí mo feinga ke fakahoko ia ʻi heʻene moʻuí. ʻOku tokoni mai e tokāteline ʻa Kalaisí ke tau ʻilo mo nofo ʻi he hala ʻo e fuakavá. Ko e nofo ʻi he hala fāsiʻi ko ia kuo fakamahinoʻi lelei maí, ʻe iku ʻo fakafeʻungaʻi ai kitautolu ke maʻu e meʻa kotoa ʻoku maʻu ʻe he ʻOtuá.3 ʻOku hala ha meʻa ʻe toe mahuʻinga ange ʻi he meʻa kotoa ʻoku maʻu ʻe heʻetau Tamaí!
Fakaʻosí, ko e fakahā haohaoa ki he ngaahi fehuʻi ʻoku ʻi homou lotó, te ne ʻai e konifelenisí ni ke ʻaonga mo fakangalongataʻa. Kapau kuo teʻeki ke mou feinga ke faitokonia kimoutolu ʻe he tokoni ʻa e Laumālie Māʻoniʻoní, ke mou ongoʻi e meʻa ʻoku finangalo e ʻEikí ke mou ongoʻi ʻi he lolotonga ʻo e ʻaho ʻe ua ko ʻení, ʻoku ou fakaafeʻi kimoutolu ke mou fakahoko ia he taimí ni. Kātaki ʻo ʻai ke hoko e konifelenisí ni ko ha taimi ia ʻo e keinanga ʻi he ngaahi pōpoaki mei he ʻEikí ʻoku fakafou mai ʻi Heʻene kau tamaioʻeikí. Feinga ke ʻilo ʻa e founga ke fakaʻaongaʻi ai kinautolu ʻi hoʻomou moʻuí.
Ko e Siasi ʻeni ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko Hono kakai ʻo e fuakavá kitautolu. Naʻe folofola ʻa e ʻEikí te Ne fakavaveʻi ʻEne ngāué ʻi hono taimi, ,4 pea ʻokú Ne fakahoko ia ʻi ha founga vave fau. ʻOku tau monūʻia ke kau ʻi Heʻene ngāue māʻoniʻoní.
ʻOku ou kolea ha tāpuaki ke ʻiate kinautolu kotoa ʻoku fekumi ki ha maama, ʻilo, mo e moʻoni lahi angé. ʻOku ou fakahoko atu ʻeku ʻofa kiate kimoutolu takitaha, ʻi he huafa toputapu ʻo Sīsū Kalaisí, ʻēmeni.