Fokotuʻu ha Taimi moʻó e ʻEikí
ʻOku ou kōlenga atu he ʻahó ni ke mou fakafepakiʻi e fakatauele ʻa e māmaní ʻaki hano fokotuʻu ha taimi moʻó e ʻEikí ʻi homou moʻuí—he ʻaho kotoa pē.
Siʻoku ngaahi tokoua mo e tuofāfine ʻofeina, kuo akonekina lelei kitautolu ʻi ha ʻaho ʻe ua ʻe he kau tamaioʻeiki ʻa e ʻEikí, kuo nau feinga faivelenga ke ʻilo e meʻa ʻokú Ne finangalo ke nau lea ʻakí.
Kuo tuku mai ʻetau tukupā ki he māhina ʻe ono ka hokó. Ko e fehuʻi ʻi he taimi ní, kuo tau kehe fēfē nai koeʻuhí ko e ngaahi meʻa kuo tau fanongoa mo ongoʻí?
Kuo fakahaaʻi ʻe he mahaki fakaʻauhá ʻa e lava ke liliu vave ʻa e moʻuí, pea taimi ʻe niʻihi, mei ha ngaahi tūkunga ʻoku ʻikai ke tau mapuleʻi. Neongo ia, ka ʻoku lahi ha ngaahi meʻa te tau lava ʻo puleʻi. ʻOku tau fokotuʻu e ʻū meʻa ʻoku mahuʻinga kiate kitautolú pea fakapapauʻi e founga ʻo ʻetau fakaʻaongaʻi hotau iví, taimí, mo e koloá. ʻOku tau fili e anga ʻo ʻetau fakafeangai mo e niʻihi kehé. ʻOku tau fili pe ko hai te tau maʻu mei ai e moʻoní mo ha fakahinohinó.
ʻOku vivili mo taʻefaʻalaua e ngaahi leʻo mo e mālohi ʻo e māmaní. Ka ʻoku lahi fau ha ngaahi leʻo ʻoku kākā, olopoto, mo lava ke fusi kitautolu mei he hala ʻo e fuakavá. Ke hao mei he loto-mamahi mahino ʻoku muiaki maí, ʻoku ou kōlenga atu he ʻahó ni ke mou fakafepakiʻi e fakatauele ʻa e māmaní ʻaki hano fokotuʻu ha taimi moʻó e ʻEikí ʻi homou moʻuí—he ʻaho kotoa pē.
Kapau ko e lahi taha e fakamatala ʻokú ke maʻú mei he mītia fakasōsialé pe ha toe mītia kehe, ʻe hōloa hoʻo malava ke ongoʻi e fanafana ʻa e Laumālié. Kapau ʻoku ʻikai ke ke fekumi fakaʻaho ki he ʻEikí ʻi he lotu mo e ako ʻo e ongoongoleleí, ʻokú ke tuʻu ai ʻi ha tuʻunga ʻe uesiangofua ʻe he ngaahi fakakaukau fakapoto ʻo e tangatá, ʻa ia ʻe ngali lelei ka ʻoku ʻikai moʻoní. Naʻa mo e Kau Māʻoniʻoni ʻoku faivelengá ʻe lava pē ke fakaheeki ʻaki e ngaahi ongo ʻo e hiva ʻo Pāpiloné.
Siʻoku kāinga ʻofeina, ʻoku ou kole atu kiate kimoutolu ke mou fokotuʻu ha taimi moʻó e ʻEikí! ʻAi ho tuʻunga fakalaumālié ke mālohi mo ne lava ke matuʻuaki e sivi ʻo e moʻuí ʻaki hano fai e ngaahi meʻa ʻe lava ai ke ʻiate kimoutolu maʻu ai pēe Laumālie Māʻoniʻoní.
ʻOua naʻa teitei taʻetokaʻi e moʻoni kāfakafa ko ia “ʻoku folofola [ʻa e] Laumālié … ki he ngaahi meʻá ʻo hangē ko honau anga moʻoní , pea ki he ngaahi meʻa ʻo hangē ko honau anga moʻoni ʻe ʻi aí.”1 “Te ne fakahā kiate kimoutolu ʻa e meʻa kotoa pē ʻoku totonu ke mou faí.”2
ʻOku ʻikai ha meʻa te ne fakaafeʻi lahi ange ʻa e Laumālié ka ʻi hono tuku ko ia hoʻo tokangá kia Sīsū Kalaisí. Lea ʻia Kalaisi, fiefia ʻia Kalaisi, keinanga ʻi he ngaahi folofola ʻa Kalaisí, pea vivili atu ki muʻa ʻi he tui mālohi kia Kalaisi.3 ʻAi ke fakafiefia homou ʻaho Sāpaté ʻi hoʻomou moihū kiate Iá, maʻu ʻa e sākalamēnití, pea tauhi Hono ʻahó ke māʻoniʻoní.4
ʻI heʻeku fakamamafaʻi ʻeni he pongipongi ní, kātaki ʻo fokotuʻu ha taimi moʻó e ʻEikí ʻi Hono fale tapú. ʻOku ʻikai ha meʻa te ne fakamālohia ho tuʻunga fakalaumālié ʻo tatau mo e ngāue ʻi he temipalé mo e moihū ʻi he temipalé.
ʻOku tau fakamālōʻia kotoa ʻa kinautolu ʻoku ngāue ʻi hotau ngaahi temipale foʻoú. ʻOku langa kinautolu ʻi he funga ʻo e māmaní kotoa. ʻI he ʻaho ní ʻoku ou fiefia ke fakahā atu ai ʻemau palani ke langa ha ngaahi temipale lahi ange ʻi he ngaahi feituʻu ko ʻení pe ofi ki ai: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; pea mo hono toe langa foʻou ʻo e Temipale Provo Utah ʻi he hili e fakatapui ʻo e Temipale Orem Utah.
ʻOku ou ʻofa atu, siʻoku ngaahi tokoua mo e tuofāfine ʻofeina. ʻOku ʻafioʻi mo ʻofeina kimoutolu ʻe he ʻEikí. Ko Ia homou Fakamoʻuí mo homou Huhuʻí. Ko Ia ʻokú Ne taki mo fakahinohino Hono Siasí. Te Ne taki mo fakahinohino kimoutolu ʻi homou moʻui fakafoʻituituí ʻo kapau te mou fokotuʻu ha taimi Moʻona ʻi homou moʻuí—ʻi he ʻaho kotoa pē.
ʻOfa ke ʻiate kimoutolu ʻa e ʻEikí kae ʻoua ke tau toe feʻiloaki, ʻoku ou fai ʻeni ʻi he huafa toputapu ʻo Sīsū Kalaisí, ʻēmeni.