Tingting blong God I blong Karem Yu Kam Hom
Evri samting abaot plan blong Papa blong ol pikinini blong Hem we i lavem tumas i blong karembak evriwan i go hom.
Mi laekem blong talem tangkyu from ol prea blong yufala taem mi statem blong mi save gud koling ia, tru long Presiden Nelson, blong givim seves olsem wan Aposol blong Lod Jisas Kraes. Yu save finis olsem wanem mi filim wetem tingting i stap daon, mo hem i bin wan taem blong mekem ol impoten jenis mo blong jekemgud miwan long evri samting. Be, hem i wan bigfala ona blong givim seves long Sevya, long eni wei we yu save mekem, mo blong wok wetem yufala blong serem gud nius ia blong gospel blong Hem abaot hop.
Wetem hemia, oli bin stap talem se biaen evri niu Aposol, i gat wan gudfala mama blong waef. Mi no save sapos oli bin talem olsem finis, be long kes ia, i tru. Mo mi save i tru se mama blong waef blong mi we i nomo stap wetem mifala bae hem i mas sek bigwan long koling blong mi.
Sam manis i pas, taem mi mo waef blong mi i stap visitim wan narafala kantri long sam asaenmen blong Jos, mi wekap long eli moning mo lukluk i go aotsaed long windo blong hotel blong mitufala wetem ol ae we oli taet. Daon long rod we i bisi, mi bin luk oli blokem rod wetem wan polis man we i stanap i stap blong mekem ol trak oli tanem raon taem oli kasem ples ia we oli blokem. Fastaem, sam trak nomo we oli kam long rod mo oli tanem olgeta i gobak. Be taem taem i stap go mo trafik i stap kam antap, laen blong trak i stap kam plante.
Long windo antap, taem mi stap wajem polisman, i luk olsem se hem i stap glad mo wetem paoa we hem i gat, hem i blokem trafik mo tanem ol pipol i gobak. Wanem we i tru, i luk olsem se hem i stap soem se hem i smat mo stap danis smol tu, taem ol trak oli stap kam kolosap long rod blok ia. Sapos draeva i kros from rod blok ia, polisman ia i no soem se i wantem help o i sore. Hem i saksakem hed blong hem mo poen i go long narafala rod.
Ol fren blong mi, ol fren disaepol blong mi long rod long laef long wol ia naesfala plan blong Papa blong yumi, iven “gudfala” plan blong Hem, i blong karem yu kam hom, i no blong blokem yu long Hem. I nogat wan man i bildim wan rodblok mo putum wan man i stanap i stap blong mekem yu tanem raon o i sendemaot yu. Blong talem tru, hemia i oposit. God i stap gohed blong wantem gat rilesensip wetem yu. Hem “i wantem evri pikinini blong Hem blong oli jusum blong gobak long Hem,” mo Hem i mekem evri samting blong Hem i save helpem yu gobak stap wetem Hem.
Papa we yumi lavem tumas i lukaotem kriesen blong wol ia i talemaot stret stamba tingting blong givim janis long yu mo mi blong kamaot long ples we yumi stap long hem mo kam moa gud long laef ia, janis ia blong yusum fasin blong mekem joes we God i givim long yumi blong jusum Hem, blong lan, blong gro, blong mekem mistek, blong sakem sin, blong lavem God mo neba blong yumi, mo blong wan dei gobak hom long Hem.
Hem i sendem Pikinini blong Hem we Hem i lavem tumas i kam long wol ia blong sin blong eksperiensem evri pat blong laef ia, blong givim wan eksampol long ol narafala pikinini blong Hem blong folem, mo blong pem praes blong sin blong olgeta. Bigfala presen blong pem praes blong sin i karemaot evri rodblok blong ded long saed blong bodi mo spirit we i seraotem yumi long hom blong yumi we i no save finis.
Evri samting abaot plan blong Papa blong ol pikinini blong Hem we Hem i lavem tumas i blong karembak evriwan i go hom.
?Wanem nao ol mesenja blong God, ol profet blong Hem, oli singaotem plan ia insaed long ol skripja blong Restoresen? Oli singaotem plan blong fasin ia blong pemaot man, plan blong sore, bigfala plan blong fasin blong stap glad, mo plan ia blong fasin blong sevem man we i blong evriwan, “tru long blad blong Wan Stret Pikinini Ia Nomo blong Mi.”
Tingting we Papa i wantem long bigfala plan ia blong fasin blong stap glad i blong yu stap glad, long ples ia, naoia, mo blong ol taem we i no save finis. Hem i no blong stopem yu, blong stap glad mo mekem yu stap wari mo fraet.
Tingting we Papa i wantem long plan ia blong fasin blong pemaot man i blong pemaotyu, taem oli sevem yu tru long ol safaring mo ded blong Jisas Kraes, i karemaot yu long sin mo ded we i holemtaet yu. I no blong lego yu olsem we yu yu stap.
Tingting we Papa i wantem long bigfala plan ia blong sore i blong soem sore taem yu tanem yu gobak long Papa long Heven mo givim ona long kavenan blong stap tru long Hem. Hemia i no blong stopem sore mo mekem soa mo harem nogud i hapen.
Tingting we Papa i wantem long plan ia blong fasin blong sevem man hem i blong sevem yu insaed long kingdom blong selestial glori taem yu kasem wan “testemoni blong Jisas” mo givim sol blong yu fulwan long Hem. Hem i no blong putumaot yu.
?Hemia i minim se yumi save mekem eni samting wetem laef blong yumi? ?Se wei we yumi jusum blong yusum fasin blong mekem joes hem i nomata? ?Se wei we yumi jusum blong obei o no obei long ol komanmen blong God? No. Yes, wan long ol semmak invitesen mo singaot blong Jisas long taem blong ministri blong Hem long wol ia i blong yumi jenis mo sakem sin mo kam long Hem. Stamba nid blong evri tijing blong Hem blong laef folem gudfala fasin we i moa hae i wan singaot blong yu gro i kam antap, mo mekem wan jenis long fet blong yu long Kraes, i go long wan bigfala jenis ia long hat blong [yu].
God i wantem blong yumi jenisim ol wei blong tingting mo tekem aksen blong winim hae tingting blong yumiwan, mo no folem fasin blong wol, mo blong yumi “gohom mo [yumi] no moa mekem sin bakegen.”
Sapos yumi biliv se tingting we Papa i wantem plan ia blong evriwan i kasem i blong sevem yumi, pemaot yumi, gat sore long yumi, mo karem kam long yumi fasin blong stap glad, ?wanem nao tingting blong Pikinini blong Hem we tru long Hem nao oli karem plan ia i kam?
Pikinini, Hemwan i talem long yumi: “From we mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem.”
Tingting blong Jisas i blong folem tingting blong Papa. Hem i wantem blong mekem i posibol long evri pikinini blong Papa blong Hem blong kasem gol blong plan ia—laef we i no save finis wetem Tufala. I nogat wan we oli stopem hem long tabu paoa ia.
Sapos yu ting se bae yu wari se bae yu neva kasem mak ia, o neva kasem Atonmen blong Kraes we i nogat en we i kavremap evriwan wetem sore, be i no yu, hemia i minim se yu no andastanem gud. I nogat en i minim i nogat en. I nogat en i kavremap yu mo olgeta we yu lavem.
Nifae i eksplenem naesfala trutok ia:“Hem i no mekem eni samting sapos i no blong helpem wol; from hem i lavem wol, go kasem hem i givim laef blong hem bakegen blong hem i save pulum evri man i kam long hem. Taswe, i no gat man we hem i givim oda long olgeta se bae oli no mas tekempat long fasin blong sevem man, we hem i givim.”
Sevya, Gudfala Man Ya blong Lukaotem Sipsip, i go mo lukaotem ol sipsip blong Hem we i lus kasem taem we Hem i faenem olgeta. Hem i “no wantem se wan man bae i lus.”
“Luk, mi stretem han blong sore blong mi i kam long yufala, mo huia we bae i kam long mi, bae mi akseptem hem.”
“?Yufala i gat eniwan we i sik long medel blong yufala? Karem olgeta oli kam long ples ia. ?Yufala i gat eniwan we bodi blong olgeta i nogud, o oli blaen, o we leg blong olgeta i nogud, o we i handikap, o we i gat leprosi, o we haf bodi blong olgeta i ded, o we sora blong olgeta i fas, o we oli gat hadtaem long eni fasin? Karem olgeta oli kam long ples ia mo bae mi mekem olgeta i oraet, from mi mi gat sore long yufala.”
Hem i no sakemaot woman ia we i gat sik blong blad, Hem i no ronwe long man ia we i sik long leprosi, Hem i no sakemaot woman ia we i slip wetem man we i no man blong hem, Hem i no sakemaot man we i wantem sakem sin—nomata wanem sin oli mekem. Bae Hem i no sakemaot yu o olgeta we yu lavem taem yufala i kam long Hem wetem ol hat we oli fulap wetem sore mo ol spirit we oli wantem blong sakem sin. Hemia i no tingting blong Hem, o plan blong Hem, stamba tingting, o hop blong Hem.
No, Hem i no putum ol rodblok mo ol samting we i stopem yumi blong pas; Hem i karemaot olgeta. Hem i no kipim yu stap aotsaed, Hem i welkamem yu insaed. Ful ministri blong Hem i wan laef testemoni blong tingting ia.
Yes mo i gat atonmen mo sakrifaes blong Hem, we i had tumas blong yumi andastanem, bitim save blong yumi long wol ia. Be, mo hemia i wan impoten “be,” yumi andastanem, save andastanem, tabu, tingting ia blong sevem yumi tru long atonmen mo sakrifaes blong Hem.
Kaliko ia we i blokem Rum ia we i Tabu we i Tabu…hem i brok olwe long tu haf taem we Jisas i ded long kros, we hem i saen blong rod ia blong gobak stap wetem Papa i open—long evriwan we oli tanem olgeta i go long Hem, trastem Hem, putum ol hevi samting blong olgeta long Hem, mo tekem yok blong Hem long olgeta tru long kavenan we i fasem olgeta.
Long nara toktok, plan blong Papa hem i no abaot ol rodblok. Hem i neva bin olsem, mo bae i neva olsem. ?I gat ol samting we i nid blong yumi mekem, ol komanmen blong kipim, ol fasin blong laef blong yumi blong jenisim? Yes. Be wetem gladhat blong Hem, olgeta we yumi save kasem, yumi save mekem.
!Hemia wan gudfala nius! Mi no save olsem wanem blong talem tangkyu from ol simpol trutok ia. Plan blong Papa, stamba tingting blong Hem, tingting blong Hem, mo hop blong Hem i blong hilim yufala, givim long yufala pis, karem yu, mo olgeta we yu lavem i kambak hom. Wetem hemia mi mi wan witnes long nem blong Jisas Kraes , Pikinini blong Hem, amen.