Glad blong Kraes I Kavremap Yumi
Mi testifae se Papa blong yumi long Heven i stap harem ol krae blong yu mo bae i oltaem ansa long waes we i stret evriwan.
Mifala i lavem yu, Elda Kearon. ?Mi save yusum tiun blong toktok blong yu blong 10 minit?
Ol Merikel We Yumi Stap Wantem Tumas blong Longtaem
Long Niu Testeman, yumi lanem abaot Batimeas, we i bin krae long Jisas se hem i wantem wan merikel. “Jisas i talem long man ya se, “Ale yu stanap, yu wokbaot, yu gohom. Bilif blong yu i mekem yu yu gud finis. Nao wantaem nomo ae blong hem i open.”
Long wan nara taem wan man long Betsaeda i bin wantem tumas blong kasem hiling. Be long taem ia i defren. Merikel ia i no bin kam kwiktaem. Be, Jisas i bin blesem hem tu taem bifo hem i “kam gud olgeta.”
Long nambatri eksampol, Aposol Pol “tri taem [i] askem long Masta” long hadtaem blong hem, be yet, folem wanem yumi save, oli no bin givim wanem we hem i bin stap wantem tumas
Tri defren pipol. Tri spesel eksperiens.
From hemia, i gat kwestin ia: ?From wanem sam oli stap kasem ol merikel we oli stap wantem tumas, kwiktaem, be ol narawan oli gohed blong stap wet longtaem mo trastem Lod? Maet yumi no save from wanem, be yet, tangkyu se yumi save Hem we i “lavem [yumi]” mo i “mekem evri samting from gudlaef mo hapines blong [yumi].”
Ol Tabu Stamba Tingting
God we i stap luk ol samting long en i gobak long stat, i stap talem bakegen long yumi se “Ol samting we oli kam agensem yu mo ol hadtaem blong yu, oli blong smol taem nomo” mo bae Hem i konsekretem “oli kam blesing blong yu.”
Blong helpem yumi blong faenem moa mining long ol hadtaem blong yumi, Elda Orson F. Whitney i bin tijim: “I no gat sobodi we yumi safa long hem, i no gat wan tes we yumi stap gotru long hem we i blong westem taem. Hem i givhan long edukesen blong yumi. … Evri samting… we yumi stap stanap strong long hem … i bildimap ol fasin blong yumi, mekem hat blong yumi kam klin, mekem sol blong yumi i gro, mo i mekem yumi kam moa kaen mo gat moa jareti. … Hem i tru long harem nogud mo safaring, hadwok mo hadtaem, we i mekem yumi kasem edukesen we yumi kam long ples ia blong kasem mo from hemia, bae i mekem yumi kam moa olsem [papa mo mama blong yumi long heven].”
Aposol Pol i andastanem se “[paoa blong Kraes bae i stap wetem hem]” long ol hadtaem blong hem, mo Aposol Pol i talem wetem tingting we i stap daon se, “From we long taem we mi mi no gat paoa, long taem ya nao, mi mi gat paoa.”
Ol hadtaem blong laef oli testem yumi. Iven Sevya i bin “lanem … fasin blong obei” mo Hem i kam “[stret evriwan tru long ol safaring].”
Mo wan dei bae Hem i talemaot wetem lav mo sore: “Mi bin klinim yu, mi bin jusum yu long oven blong faea blong hadtaem.”
Blong kam blong trastem ol tabu stamba tingting blong Lod, i givim hop long ol sol we oli slak, mo i mekem tingting i strong bakegen long ol strong hadtaem mo hat we i soa.
Ol Tabu Stamba Tingting
Plante yia i pas, Presiden Russell M. Nelson, i serem gudfala tingting ia: “Taem yumi lukluk evri samting long wan lukluk blong taem we i no save finis, hemia bae i mekem wari blong yumi i kam laet bigwan moa.”
Waef blong mi Jill, mo mi i bin witnesem trutok ia i no longtaem i pas, long ol fetful laef blong Holly mo Rick Porter taem boe blong tufala we i gat 12 yia, i ded long wan faea we i nogud tumas. Wetem ol han mo leg blong hem we oli bin bon nogud taem hem i stap traem blong sevem dia boe blong hem, Holly i bin testifae long wan wod sakramen miting abaot bigfala pis mo glad we Lod i bin kapsaetem long famli blong olgeta long taem blong bigfala harem nogud ia, mo i yusum ol toktok olsem merikel, had blong bilivim, mo gud tumas.
Pis we i moa bigwan, i tekem ples blong harem nogud blong mama ia we i had tumas blong karem, wetem tingting ia: “Ol han blong mi oli no ol han blong sevem man. !Ol han ia, oli blong Sevya! Mi no lukluk ol mak blong soa blong mi olsem wan rimaenda abaot wanem mi bin save mekem, be mi tingbaot ol mak we Sevya blong mi i gat.”
Witnes blong Holly i mekem promes blong profet blong yumi i kam tru: “Taem yu tingting selestial, bae yu luk ol hadtaem mo fasin blong agens long wan niu wei.”
Elda D. Todd Christofferson i bin talem: “Mi biliv se, jalenj ia blong winim mo gro i kam antap aot long fasin we i kam agens, i bin kamkamaot long yumi taem we God i bin presentem plan we Hem i gat blong pemaot man, taem yumi bin stap long laef bifo laef long wol ia. Yumi mas kam fesem jalenj ia naoia, wetem save ia se Papa blong yumi long Heven bambae i sapotem yumi. Be, i nid blong yumi tanem yumi i go long Hem. Sapos i no gat God, ol tudak eksperiens ia blong stap safa mo blong fasin we i kam agens, bae oli lidim yumi blong lusum hop, go lus, mo iven gat konkon fasin.”
Ol Tabu Stamba Tingting
Blong stap longwe long tudak blong no stap hapi be faenem pis, hop, mo iven glad we i moa bigwan long ol hadtaem blong laef, mi serem ol tri tabu prinsipol ia olsem ol invitesen.
Wan—fet we i moa strong i kam taem yumi putum Jisas Kraes faswan. “Lukluk blong mi long evri tingting blong [yufala],” Hem i talemaot; “no gat tu tingting, no fraet.” Presiden Nelson i tijim se:
“Laef blong [yumi] we i no save finis i dipen long fet blong [yumi] long [Kraes] mo long Atonmen blong Hem.”
Taem mi bin stap faet strong wetem soa blong bak blong mi ia, mi kam blong gat wan dip filing blong tangkyu long Jisas Kraes mo presen blong Atonmen blong Hem we i no isi blong andastanem. !Tingbaot hemia! Sevya i bin safa wetem ‘ol soa mo ol harem nogud mo ol defren kaen temtesen’ blong mekem se Hem i save kamfotem, hilim mo sevem yumi long ol taem blong nid.”
Hem i gohed blong talem: “Soa blong mi i bin mekem mi luklukbak bakegen mo bakegen long ‘ol bigfala samting blong Tabu Wan blong Isrel.’ Long taem we mi stap kasem hiling, Lod i soemaot tabu paoa blong hem long ol wei we i gat pis mo no gat mistek.”
“Long wol ia bambae yufala i harem nogud tumas: Be yufala i no fraet,” Sevya blong yumi i leftemap tingting; “Mi mi winim paoa blong olgeta samting blong wol ia finis.”
Tu—hop i saen moa i kam taem yumi lukluk fiuja blong yumi we i no save finis. Taem Sista Linda Reeves i stap tokbaot paoa we i stap taem yumi stap lukluk “wan visen blong ol gudfala promes blesing blong Papa blong yumi … long fored blong ae blong yumi evri dei,” hem i testifae se: “Mi no save from wanem yumi gat plante tes we yumi gat, be hem i filing blong mi se praes i bigwan tumas, … i gat plante glad mo i bigwan bitim wanem yumi andastanem, mekem se long dei blong givim praes, bae yu filim blong talem long Papa ia we i gat bigfala lav mo sore se: ‘?Hemia nomo mi nidim blong mekem?’… ?Wanem we yumi safa long ples ia bae i impoten sapos long en, ol hadtaem ia nao … bae i mekem yumi save kwalifae from laef we i no save finis … long kingdom blong God?”
Presiden Nelson i serem tingting ia: “Tingting long ol ansa blong Lod long Josef Smit taem hem i stap askem blong oli karemaot hem long Libeti Kalabus. Lod i bin tijim Profet se evri samting ia bae i givim eksperiens long yu mo bae i blong gud blong yu. ‘Mo afta, sapos yu mekem gud blong stap strong,’ Lod i promes se, ‘God bae i leftemap nem blong yu long heven.’ Lod i bin stap tijim Josef blong tingting selestial mo blong stap gat wan visen finis blong wan riwod we i no save finis bitim we blong lukluk long bigfala harem nogud blong dei ia.”
Jenis long lukluk blong Josef i kam moa tabu olsem we hem i soem long leta ia i go long wan fren: “Afta we oli sarem mi insaed long ol wol blong wan kalabus blong faef manis, long mi i luk olsem se hat blong mi oltaem bae i moa sopsop bitim evri nara taem bifo. … Bae mi neva filim olsem we mi stap filim naoia sapos mi no bin safa ol rong samting ia we mi bin safa from.”
Tri—paoa we i moa bigwan i kam taem yumi lukluk moa long glad. Long ol aoa ia we oli impoten tumas blong taem we i no save finis, mo blong bigfala harem nogud, Sevya blong yumi i no stop be i tekem konkon kap ia. ?Olsem wanem nao Hem i mekem? Yumi lanem se, “Taem hem i go blong i ded long kros, [Kraes] i luksave finis we bambae i save harem gud” wanem we Hem i wantem i “draon insaed long wanem we Papa i wantem.”
Toktok ia “draon insaed” i tajem mi bigwan. Intres blong mi i kam moa bigwan taem mi lanem se long Spanis, “draon insaed” oli transletem olsem “kakae”; long Jeman hem i “hanggri from”; mo long Jaenis hem i “kavremap.” From hemia, taem ol jalenj blong laef oli soa mo bigwan tumas, mi tingbaot promes blong Lod—se yumi mas “gotru long eni kaen hadtaem, sapos nomo [we bae oli kakae, hanggri from, kavremap mo draon insaed long] glad blong Kraes.”
Mi luk glad ia long plante long yufala, we “[i bitim] … andastaning blong yumi long wol ia,” nomata se oli no karemaot ol konkon kap blong yu yet. Tangkyu blong stap kipim ol kavenan mo stanap olsem ol witnes blong God. Tangkyu blong stap givhan mo blesem yumi evriwan, taem “harem nogud i haed long kwaet hat blong yu we ae i no save luk.” Presiden Camille Johnson i tijim se taem yumi karem rilif blong Sevya i kam long ol narawan, yumiwan yumi faenem rilif long hem.
Ol Tabu Stamba Tingting
Naoia, gobak wetem mi long sakramen miting long ples we yumi witnesem merikel we Lod i bin sapotem famli blong Holly Porter. Taem mi sidaon long fored mo stap tingting long wanem mi save talem blong givim kamfot long naesfala famli ia mo ol dia fren blong olgeta, tingting ia i kam long mi: “Yusum ol toktok blong Sevya.” So mi klosem tedei olsem we mi bin mekem long Sabat dei ia, wetem ol toktok blong Hem, “we i mekem sol we i gat soa i kam oraet bakegen.”
“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.”
“Mo tu, bae mi mekem ol hevi samting long solda blong yufala i nomo hevi, mekem se bae yufala i no save filim long ol bak blong yufala, iven long taem ia we yufala i stap olsem slef; … blong mekem se yufala i save gud se mi, Lod God, mi visitim ol pipol blong mi long ol hadtaem blong olgeta.”
“Taem mi mi aot long yufala, mi no save lego yufala i stap nomo olsem. Bambae mi mi save kambak bakegen long yufala.”
Witnes blong Mi
Wetem glad mo respek, mi witnes se Sevya blong yumi i stap laef mo !ol promes blong Hem oli tru. Speseli blong olgeta we oli trabol mo “gat hadtaem long eni fasin,” Mi testifae se Papa blong yumi long Heven i stap harem ol krae blong yu mo bae i oltaem ansa long waes we i stret evriwan. “Bae God i mekem,” olsem we Hem i bin mekem blong famli blong mifala long ol bigfala taem blong nid, “ol hevi samting blong yu oli nomo hevi,” semmak olsem we “glad blong Kraes i kavremap [yu].” Long tabu nem blong Jisas Kraes, amen.