’Ōmuara’a

Te fa’aorara’a i te mau tamari’i ato’a a te Atua ’o te tumu ïa o tāna ’evanelia. ’Ua fafau ’oia ē « te mau nuna’a ato’a o te fenua nei e ha’amaita’ihia [ïa] » nā roto i te huā’ai o Aberahama (Genese 22:18), ’e i te mau tīa’i māmoe ha’eha’a i Iudea, ’ua parauhia ē te « parau maita’i » o te ’evanelia nō « te mau ta’ata ato’a ïa » (Luka 2:10). I roto i te mau ’api mātāmua o te Buka a Moromona, ’ua parau o Nephi ē te Fatu « ’aore ho’i…’ohipa e rave ra, maori rā e roa’a tō te ao nei e maita’i i te reira ; e aroha ho’i tōna i tō te ao nei, ē ’ia tae atu ho’i i tōna hōro’ara’a i tōna iho ora, ’ia ’ume ’oia i te mau tāne [’e te mau vahine] iāna ra » (2 Nephi 26:24; tu’uhia te pāpa’i ’opa).

’Aita i maoro roa i muri a’e i te fa’anahora’ahia Te ’Ēkālesia a Iesu Mesia i te Feiā Mo’a i te mau Mahana Hope’a Nei, ’ua fa’aue te Fatu i te feiā mo’a ’ia poro i te ’evanelia nā te ao ato’a nei : « Nō te mea e heheu mai ’oia i tōna rima mo’a i roto i te mau mata o te mau nuna’a ato’a », ’ua parau te Fatu i te matahiti 1831. « ’A fa’aineine na ’outou, ’a fa’aineine na ’outou, e tā’u mau ta’ata nei… ’A tu’u atu ’ia tae atu te parau poro’i i rotopū i te mau ta’ata ato’a ra » (Te Parau Ha’api’ira’a ’e te mau Parau Fafau 133:3–4, 10). Nō reira, ’ua fāri’i te feiā mo’a ha’apa’o maita’i i te mau pi’ira’a e poro nā te ao ato’a nei, te Buka a Moromona i ’īritihia (te tā’āto’ara’a ’aore rā, te tahi tuha’a) i roto e hau atu i te 110 reo, ’e ’ua ha’amauhia te mau ’āmuira’a ’e ’ua ruperupe nā te ao ato’a nei.

Noa atu ē, ’ua ta’a maita’i i te rahira’a o te feiā mo’a i te mau mahana hope’a nei ē, e fa’aro’o nā te ao nei te ’Ēkālesia, te ’ā’amu o te ’Ekālesia i roto e rave rahi mau tuha’a fenua nā te ao nei ’aita ïa i matau-maita’i-hia. Tē ’imi nei teie mau ’ā’amu nā te ao nei nō te fa’a’ite i te ’ā’amu fa’auru e mea nāhea te parau poro’i o te fa’aho’i-fa’ahou-ra’a mai i te tauahihia ’e i te fa’a’itehia nā te ao ato’a nei.

Tē vai nei i roto i te ’ā’amu tāta’itahi hō’ē hi’ora’a poto, hō’ē mā’itira’a o te mau ’ā’amu nō te fa’aro’o, hō’ē pāpa’ara’a parau, ha’amāramaramara’a nō te rahira’a ’e te tahi atu mau rāve’a tauturu ’o tā te feiā tai’o e nehenehe e hi’o atu. ’Ua fa’atumuhia te mau ’ā’amu i ni’a i te mau melo o te fenua iho tei fa’aro’o ’e tei tāu’a i te pi’ira’a a te Fa’aora « ’ia poro haere i te parau i te mau vāhi e ’ati noa a’e ia rātou ra » (Te Parau Ha’api’ira’a ’e te mau Parau Fafau 52:39) ’e ’o tei fa’a’ohipa i te fa’aro’o, nō te upo’oti’a i ni’a i te mau tītaura’a ta’a ’ē i te rirora’a ’ei feiā mo’a i te mau mahana hope’a nei i roto i tō rātou fenua ’āi’a.