Vahe 4
Ko e Misiona ʻo e Siasí
ʻI he pongipongi ʻo e ʻaho 2 ʻo Sepitema 1958, naʻe sio hifo ai ʻa Palesiteni Tēvita O. Makei ki he fonuá mei ha mita ʻe 5800. Kuo lava ha māhina ʻe fā mei heʻene fakatapui ʻa e Temipale New Zealand, pea naʻá ne ʻi ha toe vakapuna ʻe taha ko e folau ki he Puleʻanga Fakatahataha Pilitāniá ke fakatapui ʻa e temipale ʻi Lonitoní. Neongo naʻe ʻikai ko ha meʻa foʻou ki he palōfitá ʻa e fepunaʻaki holo [ʻi ha vakapuna] ʻi he uhouhonga ʻo e ʻaó, ka naʻá ne kei ofo pē ʻi he faingofua mo e vave ʻa e fefolauʻaki ʻi he ʻeá—talu ʻene tataki ʻa e Siasí, kuó ne fepunaʻaki ʻi ha kilomita ʻe fākilu tupu. Kuo teʻeki ha palesiteni ʻo e Siasí kimuʻa ʻiate ia kuó ne folau mamaʻo pe vave pehē.
Naʻe hoko ʻene vakai mei he vakapuná ke ueʻi ai ia ke ne fakakaukauloto ki he māmaní mo e vave ʻene feliliuakí. ʻI he taʻu kuo ʻosí, naʻe ʻave ʻe he Sovieti ʻIunioní mo e ʻIunaiteti Siteití ha ʻū satelaite ki tuʻa māmani ke nau takatakaiʻi ʻa e māmaní, pea naʻe hangē kuo toʻoa ai ʻa e māmaní kotoa ʻi he taimí ni ʻe he fakakaukau ʻo e folau ʻi he vavaá. Ka naʻe tui ʻa Palesiteni Makei ʻe toe lahi ange ha ngaahi liliu fakaofo ʻe hoko māmālie ʻi he ngaahi taʻu lahi ka hoko maí, tautautefito ki he Siasí.
Naʻá ne talaange ki he Kāingalotu naʻa nau folau fakatahá, “Ko e tupulaki māʻongoʻonga ʻa e Siasí ʻi he taʻu ʻe uofulu mā nima kuo ʻosí ʻe lava ke tupulaki ia ki ha lelei ʻoku toe māʻongoʻonga angé maʻá e māmaní, ʻo kapau ʻoku tau taau moʻoni mo e ngaahi faingamālie ʻoku fakaava mai ʻe he ʻEikí.”
Naʻe fakatautefito ʻa e fakatuʻamelie ʻa Palesiteni Makeí ki he Misiona British. Naʻe fakaava ʻe ʻAposetolo Hiipa C. Kimipolo ʻa e misioná ʻi he 1837. Talu mei ai, kuo kau mai ha kakai ʻe toko 150,000 ki he Siasí ʻi he ʻOtu Motu Pilitāniá. Ko ha konga lahi ʻo kinautolu naʻa nau hikifonua mai ki ʻIutā, kau ai ʻa e ongomātuʻa ʻa Palesiteni Makeí. Kuo tuʻo ua ʻa e ngāue fakafaifekau ʻa Palesiteni Makei ki aí—ʻuluakí naʻá ne hoko ko ha faifekau kei talavou ʻi he konga kimui ʻo e 1890 tupú pea naʻá ne toe hoko leva ko ha palesiteni ʻi he Misiona European ʻi he konga kimuʻa ʻo e 1920 tupú.
Ka naʻe hoko ʻa e fakalalahi ʻa e hikifonuá, tau tuʻo ua ʻa māmaní, tō lalo fakaʻekonōmiká, mo e kei maʻuhala ʻa e kakaí [ki he Siasí] ke fakatuotuai ai ʻa e tupu ʻafaʻafa ʻa e Siasí ʻi Pilitāniá, pea ko ha Kāingalotu pē ʻe tahamano tahaafe nai naʻe kei nofo ʻi aí. Ka, naʻe hoko ʻa e temipale foʻoú ke fakatupunga ai ha fie ʻilo lahi ʻa e kakai fakalotofonuá ki he Siasí.
Naʻe tūʻuta ʻa Palesiteni Makei ʻi Lonitoni ʻi he ʻaho 4 ʻo Sepitemá, pea ʻi he hili ha ʻaho ʻe tolu mei ai, naʻe fakatahataha mai ʻa e Kāingalotu mei he ʻOtu Motu Pilitāniá mo ha ngaahi feituʻu kehe ʻi ʻIulope ki he fakatapuí. Naʻe tuʻu ʻa e temipalé ʻi he kelekele naʻe ʻi ai ha fuʻu fale lahi ʻa e kau Pilitāniá ʻi he feituʻu ʻutá ʻi he fakatonga ʻo Lonitoní. Ko e konga kelekelé naʻe ʻeka ʻe tolungofulu mā ua pea naʻe ʻi ai mo ha ngaahi lotoʻataʻatā, ʻulu ʻoke motuʻa, mo ha ʻakau iiki mo e matalaʻiʻakau kehekehe. Naʻe ʻi ai mo ha anovai mamaha ʻi he tafaʻakí naʻe hoʻata ai ʻa e temipale maká mo e taua naʻe ngaohi mei he kopá.
Naʻe tangi ʻa Palesiteni Makei ʻi heʻene sio ki he temipalé. Naʻá ne pehē, “Fakakaukau ki heʻeku moʻui ʻo aʻu mai ki ha taimi ke langa ai ha temipale ʻi ʻIngilani.”
Kimuʻa pea fakahoko ʻe he palōfitá ʻa e lotu fakatapuí, naʻá ne lea loto-māfana fekauʻaki mo e Siasí ʻi Pilitāniá. Naʻá ne pehē, “Ko ha kamataʻanga ʻeni ʻo ha kuonga foʻou, pea ʻoku mau fakatuʻamelie mo lotua ha kuonga foʻou ʻo e mahino lahi ange maʻá e kakai faitotonu ʻi he feituʻu kotoa pē.”
Naʻá ne fakahā ʻo pehē, “Ko ha laumālie ʻo e manavaʻofa lahi ange, laumālie ʻo e ʻofa lahi ange, pea fakasiʻisiʻi ʻa e fekeʻikeʻí mo e fakakikihí. Ko e misiona ia ʻo e Siasí.”
ʻI he konga kimuʻa ʻo e 1959, naʻe heka ai ʻa Nola Kuti mo hono hoa faifekau ko ʻIleini Toamaní ʻi ha lēlue fakataha mo ha kulupu toʻu tupu ʻa e Kau Māʻoniʻoni ʻi he Ngaahi ʻAho Kimui Ní mei Tai Pou, ko ha vahefonua ʻi he feituʻu ʻutá ʻi he tokelau-hahake ʻo Hongo Kongó. Naʻe fai ha hulohula ʻa e Siasí ʻi he pō ko iá ʻi ha holo naʻe totongi ʻi he loto koló, pea naʻe tailiili ʻa e toʻu tupú ke ō ki ai. Ko ha kau papi ului kotoa kinautolu ki he Siasí, pea kuo ʻikai ha taha ʻiate kinautolu kuó ne nofo fuoloa ʻi loto kolo. Naʻe ʻikai ke nau ʻilo pe ko e hā ʻa e meʻa ʻe hokó.
Naʻe ʻikai foki ke loko ʻilo ʻe Nola pe ko e hā ʻa e meʻa ʻe hokó. Ko e hulohulá ko e fuofua Polo Koula mo Lanu Mata ia ʻi Hongo Kongo ʻa e Siasí. Naʻe maʻu ʻa e hingoa Polo Koula mo Lanu Matá mei he ngaahi lanu ʻo e Ngaahi Kautaha Mutuale Fakalakalaka ʻa e Siasí, pea kuo hoko ia ko ha polokalama ʻiloa ʻi he taʻu kotoa pē maʻá e toʻu tupu ʻo e Kau Māʻoniʻoni ʻi he Ngaahi ʻAho Kimui Ní talu mei he 1920 tupú, tautautefito ki he ngaahi feituʻu naʻe fakahoko lelei ai ʻa e NGKMF (MIA) maʻá e Kau Talavoú mo e Kau Finemuí. Naʻe ʻomi ʻe he hulohulá ha faingamālie lelei maʻá e toʻu tupú ke nau feohi ai mo e kau mēmipa kehe ʻo e Siasí, pea naʻe fakaʻamu ʻa e kau faifekau mei ʻAmeliká ke fakafeʻiloaki ʻa e polokalama angamaheni ko iá ki he Kāingalotu ʻi Siainá. He ko hono moʻoní, kuo tupu ʻa e Siasí ʻi Hongo Kongo ʻaki ha kakai ʻe hivangeau tupu.
Naʻe meimei houa ʻe taha ʻa e heka lēlue ki he loto koló. ʻI he taimi naʻe aʻu ai ʻa Nola, ʻIleini mo e toʻu tupu Tai Poú ki he hulohulá, naʻa nau ʻiloʻi kuo fai ʻe he poate NGKMF (MIA) ʻa e misioná—ʻa ia ko ha kau faifekau ʻAmelika kotoa pē—ʻa e meʻa kotoa pē ke teuteuʻi ʻa e hulohulá ke hangē ko ha Polo Koula mo Lanu Mata ʻi he ʻIunaiteti Siteití. Ko ha ʻū tupenu lanu koula mo e lanu mata ʻoku tautau mei he ʻató, mo ha ʻū pula ʻe nimangeau naʻe haʻi ʻi ʻolunga, ko e teuteu pē ke tukuange mei he ʻató ʻi hano fusiʻi ha foʻi afo ʻi he fakaʻosinga ʻo e poó. Naʻe ʻi ai mo e kūkisi mo e inu melie ke fakaneifua.
Ka ʻi he kamata pē ʻa e poló, naʻe ʻi ai ʻa e meʻa naʻe ngali kehe. Naʻe palaki ha meʻalea leʻolahi ki ha tepi, pea naʻe tā ʻe he kau faifekaú ʻa e ʻū hiva ʻiloa ʻi he hulohula ʻi ʻAmeliká. Naʻe fokotuʻutuʻu ʻe he kau pule polokalamá ha ʻū sea pē ʻe niʻihi ʻi he lokí, ko e fakatetuʻa ʻe hanga ʻe he siʻisiʻi ʻa e seá ʻo fakaʻaiʻai ʻa e toʻu tupú ke nau hulohula. Ka naʻe ʻikai ke ola lelei ʻa e fakakaukau ko iá. Naʻe ʻikai ke loko hulohula ha taha ia.
Hili ha kiʻi taimi mei ai, naʻe kamata tā ʻe ha niʻihi ʻo e Kāingalotu ʻi Hongo Kongó ʻa e faʻahinga fasi naʻa nau saiʻia aí, pea naʻe liliu ʻa e meʻa kotoa. Naʻe hangē naʻe ʻikai fakakaukau ʻa e kau faifekaú ki he fasi naʻe manakoa fakalotofonuá. Naʻa nau tā ʻa e ngaahi fasi ʻoku tā meʻalea ʻataʻatā peé ka ko e meʻa naʻe fiemaʻu ʻe he Kāingalotu Siainá ko e ngaahi fasi ʻoku hivaʻí. Naʻe toe saiʻia ange foki ʻa e Kāingalotú ke hulohula ki he ngaahi fasi uōlosí, sāsaá, mo e mamipoú (mambo), ʻa ia naʻe ʻikai ke tā ʻe he kau faifekaú. ʻI hono liliu pē ʻa e fasí, naʻe kātoa mai ʻa e tokotaha kotoa pē ʻi he lokí ʻo hulohula.
Neongo naʻe ʻikai ke kamata lelei ʻa e Polo Koula mo Lanu Matá, ka naʻe ola lelei ia. ʻI ha kiʻi taimi siʻi kimuʻa pea tuku ʻa e hulohulá, naʻe tukuange ʻe ha taha ʻa e fanga foʻi pula ʻi ʻolungá, pea naʻa nau ngangana hifo ki lalo ki he kau hulohulá. ʻI he fakakaukau ʻa e Kāingalotu Siainá kuo tuku ʻa e poló, naʻa nau fakavave ʻo hū ki tuʻa ʻi he matapaá. Naʻe feinga ʻa e kau faifekaú ke uingakiʻi kinautolu ke nau foki mai koeʻuhí ke fai pē ā haʻanau lotu tuku, ka naʻe ʻosi tōmui ia. Naʻe ʻosi mātuku hanau konga lahi.
Naʻe fiefia ʻa Nola ʻi he vakai ki he Kāingalotu mei Tai Poú ʻoku nau feohi mo e toʻu tupu kehe mei he vāhengá, ʻi he poó kakato. Kuo hoko ʻene ngāue ʻi Tai Poú ko e taha ia ʻo e ngaahi meʻa mahuʻinga ʻo ʻene ngāue fakafaifekaú, pea kuo hoko ʻa e taimi kuó ne fakaʻaongaʻi aí ke fakamālohia ai ʻene fakamoʻoní.
Ka ʻi he hili ha ngaahi māhina siʻi mei he Polo Koula mo Lanu Matá, naʻá ne ʻiloʻi kuo taimi ʻa e fehikitakí. Naʻe ʻave ia ʻe Palesiteni Heatoni ki Taiuani, ko ha motu naʻe kilomita ʻe onongeau nimangofulu ki he hahaké.
ʻI he taʻu tatau pē ko iá, naʻe fakaʻofoʻofaʻia ʻa ʻEletā Sipenisā W. Kimipolo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene fuofua sio ʻi Lio ti Senelo, Palāsilá. Naʻe kāpui ʻe he kakapu pongipongí ʻa hono ʻotu moʻunga māʻolungá mo e ‘ū fale fakatuputupulangi ʻi he matātahí. Ka ʻi he vakai mai ʻa ʻEletā Kimipolo mo hono uaifi ko Kamilá mei he vaka naʻá na heka aí, naʻe faingofua pē ke na ʻiloʻi ʻa e mātanga ʻiloa taha ʻo e koló ʻa e: Cristo Redentor (Kalaisi ko e Huhuʻí), ko ha maka tā tongitongi fakaʻofoʻofa mita ʻe 38 ʻo e Fakamoʻuí ʻoku hanga mai ki he taulangá.
Ko e ʻuluaki feituʻu ke hifo ai ʻa e fāmili Kimipoló ʻi haʻana folau māhina ʻe ua ki he ngaahi misiona ʻa e Siasí ʻi ʻAmelika Tongá, ko Lio ti Senelo. Naʻe meimei ko ha Kāingalotu ʻe valuafe naʻa nau nofo ʻi ʻAmelika Tongá, pea naʻe tupulaki māmālie ʻa e ngaahi kolo ʻo e Siasí ʻi he konitinēnití. ʻI he vēkeveke ʻa Palesiteni Makei ke poupouʻi ʻa e ngaahi haʻofanga ko ʻení, naʻá ne toki fakangofua ai mo hono ongo tokoní ʻa hono fakalahi ʻo e polokalama langa ʻa e Siasí ʻi ʻAmelika Tongá, ʻo fakamafaiʻi hano langa ʻo ha ʻū falelotu ʻe uofulu mā nima ʻi ai.
ʻI he ʻaʻahi ʻa ʻEletā Kimipolo ki he Kāingalotu ʻi ʻAmelika Tongá, naʻá ne fie ʻilo ki heʻenau ngaahi fiemaʻú mo fekumi ki ha ngaahi founga ʻe ala tokoni ai ʻa e Siasí ke nau fakahoko ʻa e ngāue ʻa e ʻEikí. Naʻá na fakatou tutupu hake mo Sisitā Kimipolo ʻi he ʻātakai ʻo e kakai Tuʻufonuá ʻa ia naʻa nau nofo ʻi he kauʻāfonua ʻi he vahaʻa ʻo e ʻIunaiteti Siteití mo Mekisikoú. Pea ʻi he hili ha ngaahi taʻu siʻi ʻo hono uiuiʻi ʻo ʻEletā Kimipolo ki he Toko Hongofulu Mā Uá, naʻá ne maʻu ha ngāue makehe meia Palesiteni Siaosi ʻAlipate Sāmita ke ngāue fakaetauhi ki he kakai Tuʻufonua ʻi he funga ʻo e māmaní. Talu mei ai mo ʻene kau ki he ngaahi konifelenisi mo e ʻū polokalama maʻá e Kāingalotu peheni ʻi ʻAmelika Tokelaú, pea naʻá ne fakaʻamua ke fai ʻa e ngāue tatau ʻi ʻAmelika Tonga.
Kae mahalo naʻe lahi ange ʻa e hanganaki atu ʻa ʻEletā Kimipolo ke talanoa mo e Kāingalotu tokolahi ʻe fetaulaki mo ia ʻi heʻene folaú. ʻI he taʻu ʻe taha mo e konga kuohilí, naʻe toʻo ʻe he kau toketaá ha konga ʻo e ʻōkani ʻokú ne ʻomi ʻa e ongo ʻo e leʻó mei hono mongá. Naʻá ne hohaʻa, ʻi ha kiʻi taimi, naʻa ʻikai ke ne toe lava ʻo lea. Ka ʻi he hili ha ngaahi lotu lahi mo ha ngaahi tāpuaki ‘o e lakanga fakataulaʻeikí, naʻá ne ako ke fetuʻutaki ‘i ha fanafana leʻo faingataʻaʻia. Naʻá ne houngaʻia ʻi heʻene Tamai ʻi Hēvaní koeʻuhí ko e mana ko iá.
Hili ʻa e nofo taimi nounou ʻa ʻEletā mo Sisitā Kimipolo ʻi Palāsilá, naʻá na ʻaʻahi ki ʻĀsenitina, ʻa ia naʻe ʻi ai ha ngaahi kolo ʻo e Siasí ʻe uofulu mā nima mo ha kau mēmipa ʻe toko 2,700 nai. Talu mei he tūʻuta ʻa e kau faifekaú ʻi ʻĀsenitina ʻi he 1920 tupú mo e mafola ʻa e ngaahi kolo ʻo e Siasí ki he ngaahi fonua kehe ʻoku lea faka-Sipeini ʻi he vāhengá. ʻI he 1940 tupú, naʻe hū ʻa e kau faifekaú ki ʻUlukuai, Kuatemala, Kosita Lika, mo ʻEla Salavatoa. Kimuí ni mai ʻi he 1950 tupú, naʻe kamata ke malangaʻi ʻa e ongoongolelei kuo fakafoki maí ʻi Silei, Honitulasi, Palakuai, Panamā mo Pelū.
Hili ha ngaahi ʻaho ʻi ʻĀsenitina, naʻe fononga fakahihifo ʻa e fāmili Kimipoló ki Silei, ʻa ia naʻe ʻi ai ha ngaahi kolo ʻe fitu ʻo e Siasí mo ha kau mēmipa ʻe toko tolungeau nai. Naʻe hoko ʻa Silei ko ha konga ʻo e Misiona Argentine talu mei he 1955, pea naʻe tui ha kau faifekau tokolahi ko e fonua taliangi taha ia ʻi he misioná.
Naʻe fononga ʻa e fāmili Kimipoló mei he Misiona Argentine ki ʻUlukuai ke feʻiloaki mo e Kāingalotu ʻi Monitevitioó mo e tukui kolo kehé. Naʻá na foki mai leva ki Palāsila ke vakaiʻi lelei ʻa e misioná. ʻI heʻena fononga holo ʻi he fakatonga ʻo Palāsilá, naʻá na tuʻu ʻi he kolo ko Soinivilí, ʻa ia naʻe fuofua kamata ai ʻa e Siasí ʻi he fonuá. Naʻe fetaulaki ai ʻa ʻEletā Kimipolo mo ha mēmipa ʻo e Siasí ʻa ia naʻe ʻikai ke ne lava ʻo maʻu ʻa e lakanga fakatauʻeikí koeʻuhí ko ʻene hakoʻi ʻAfiliká. Naʻe loto-siʻi ʻa e tangatá ʻi heʻene fakapapauʻi naʻe hoko ʻa e fakangatangata ʻo e lakanga fakataulaʻeikí ke taʻofi ai ia mei heʻene fua ha faʻahinga fatongia ʻi he Siasí.
Naʻá ne pehē, “He ʻikai pē ke u lava au ʻo hoko ko ha taha leʻo matapā, ʻikai ko ia?”
Naʻe ongoʻi loto-mamahi ʻaupito ʻa ʻEletā Kimipolo. Naʻá ne tali ange, “Te ke lava pē ʻo ngāue ʻi ha faʻahinga uiuiʻi pē ʻoku ʻikai fiemaʻu ki ai ʻa e lakanga fakataulaʻekí,” mo ʻene fakaʻamua ʻe hoko ʻa e fakapapau ko ʻení ke fiemālie ai ʻa e tangatá.
ʻI he ngaahi fakatahaʻanga kehe ʻi Palāsilá, naʻe ʻikai ke tokolahi ʻa e Kāingalotu ʻUliʻuli naʻe sio ki ai ʻa ʻEletā Kimipoló, ʻo ne fakakaukau ai mahalo ʻoku ʻikai ko e fakangatangata ʻo e lakanga fakataulaʻeikí ʻa e fakafeʻātungia lahi taha maʻá e Siasí ʻi aí. Ka naʻá ne fakatokangaʻi meimei ko e peseti ʻe 40 ʻo e kakai ʻo Palāsilá naʻa nau hakoʻi ʻAfilika, pea naʻe tupu ai hano fehuʻia ʻo e fakalakalaka ʻa e Siasí ki he kahaʻú ʻi he fonuá, tautautefito ki he ngaahi siteiti ʻi he tokelaú, ʻa ia naʻe toe tokolahi ange ai ʻa e kakai ʻUliʻulí.
Naʻe faifai ʻa e folau ʻa e fāmili Kimipoló peá na aʻu mai ki Sao Paulo, ʻa ia naʻá na fetaulaki ai mo ʻĒliu ta Losa Kamākou mo hono uaifi ko Naiá, ʻa ia naʻe kau mai ki he Siasí ʻi ha hili pē ha taimi siʻi ʻo e kau mai hono husepānití. Naʻe omi ʻa e ongomātuʻá mo hona foha taʻu taha ko Militoní kia ʻEletā Kimipolo ke maʻu ha tāpuaki ‘o e lakanga fakataulaʻeikí. Naʻe moʻui lelei pē ʻa Militoni ʻi hono fāʻeleʻi maí, ka kimuí ni maí kuo ngāvaivai hono ngaahi hokotanga huí. Naʻe manavasiʻi ʻa e kau toketaá naʻa faifaí kuó ne poliō, ko ha mahaki fakatupu mamatea ʻa ia naʻe tokolahi ha fānau mo e kakai lalahi naʻe fokoutua ai ʻi he funga ʻo e māmaní. Naʻe tāpuakiʻi ʻe ʻEletā Kimipolo ʻa e tamasiʻí, pea ʻi he ʻaho hono hokó naʻe fiefia lahi ʻa e fāmili Kamākoú ʻi he fuofua taimi naʻe kuku ai ʻe Militoni ʻa e ʻā ʻo hono mohengá ke tuʻu ki ʻolungá.
Naʻe lahi mo ha ngaahi kole kehe naʻe fai kia ʻEletā Kimipolo ke ne foaki ha ngaahi tāpuaki ‘o e lakanga fakataulaʻeikí ʻi ʻAmelika Tonga, pea naʻá ne fiefia ke tokoniʻi ʻa e kakaí ʻi he founga ko ʻení. Ka naʻá ne ʻohovale he ʻiloʻi naʻe tokolahi ʻa e kau talavou mo e kakai tangata taau naʻe ʻikai ke nau maʻu ʻi he taimi totonu ʻa e lakanga fakataulaʻeikí, ʻa ia naʻe fehangahangai mo e founga ʻa e Siasí. Hangē ko ʻení, ko e ʻuhinga naʻe ʻomi ai ʻe ʻĒliu hono fohá kia ʻEletā Kimipolo ke tāpuakiʻí he naʻe ʻikai ke ne maʻu ʻa e Lakanga Taulaʻeiki Faka-Melekisētekí, neongo naʻá ne hoko ko ha mēmipa mālohi ʻo e Siasí ʻi ha meimei taʻu ʻe ua.
ʻIkai ke ngata aí, ka naʻe ʻilo ʻe ʻEletā Kimipolo naʻe faʻa momou ʻa e kau faifekaú ke vahe ʻa e ngaahi fatongia fakakoló mo fakavahefonuá ki he Kāingalotu fakalotofonuá. Ko hono olá, naʻe tokosiʻi pē ha kāingalotu ʻo e Siasí ʻi ʻAmelika Tonga naʻa nau maʻu ha taukei ke tataki mo akonaki ʻi he Siasí. Pea naʻe femoʻuekina ʻa e kau faifekaú ʻi hono fai ʻa e ngāue naʻe totonu ke fai ʻe he Kāingalotu fakalotofonuá pea siʻisiʻi leva honau taimi ke malangaʻi ʻa e ongoongoleleí.
ʻI he fakaʻosinga ʻo e folau ʻa ʻEletā Kimipoló, naʻá ne tui ʻoku totonu ke fakahoko ha ngaahi liliu. Ko e tokolahi ʻo e Kāingalotu naʻe ʻikai ke nau nofo ʻi ʻAmelika Tokelaú naʻa nau maʻulotu ʻi ha ngaahi kolo ʻo e Siasí naʻe tokangaʻi ʻe he kau taki fakavahefonuá mo e kau taki fakamisioná, ʻa ia naʻa nau faʻa omi mei he ʻIunaiteti Siteití. ʻI hono fokotuʻu ha ngaahi siteiki ʻi he ngaahi feituʻu ko ʻení, ʻe tokolahi ange ai ha Kāingalotu te nau tauʻatāina ke tokangaʻi fakalotofonua ʻa e Siasí.
ʻI Mē 1958, ko ha māhina ia ʻe taha hili hono fakatapui ʻo e Temipale New Zealand, naʻe fokotuʻu ʻe he Siasí ha siteiki ʻi ʻAokalani. Ko e fuofua siteiki ia ke fokotuʻu mavahe mei ʻAmelika Tokelau mo Hauaiʻí. Naʻe tui ʻa ʻEletā Kimipolo ʻe vave pē ha maau mo ha ngaahi feituʻu ʻe niʻihi ʻi ʻĀsenitina mo Palāsila ke fokotuʻu ai ha siteiki, pea naʻá ne fakalotolahiʻi ʻa e kau taki fakamisioná ke nau ngāueʻi ʻa e taumuʻa ko iá. Naʻá ne fakaʻosi ʻaki foki haʻane pehē naʻe maau ʻa e Siasí ke fokotuʻu ha misiona foʻou ʻi Silei mo Pelū pea mo ha misiona hono ua ʻi Palāsila.
ʻI he hili pē ha taimi nounou ʻo ʻene folaú, naʻá ne fakahā ki he Kau Palesitenisī ʻUluakí, “ʻOku tau ‘ngata pē ʻi he māʻutoʻutá’ ʻi heʻetau ngāue ʻi he fonuá ni. Kuo hokosia moʻoni ʻa e taimi ke fakaului mālohi ai ʻa e ngaahi fonua ʻi ʻAmelika Tongá.”
Naʻe tūʻuta ʻa Nola Kuti ʻi Taiuani ʻi he konga kimui ʻo Siulai 1959, ko e ʻosi nai ia ha taʻu ʻe tolu mei hono fekauʻi ʻe Palesiteni Heatoni ʻa e ʻuluaki kulupu ʻo e kau faifekau ʻa e Siasí ki he motú. Naʻe ʻikai ke aʻu ʻo toko tolungeau ʻa e Kāingalotu ʻi Taiuaní, ko ia naʻe ʻikai ke tokolahi pe fokotuʻutuʻu lelei ʻa e Siasí ʻi ai ʻo hangē ko ia ʻi Hongo Kongó. Ka naʻe kei maʻu pē ʻe he ongo faifekaú ha kakai ke akoʻi ʻi he kakai Siaina tokolahi naʻa nau kumi hūfanga ʻi he motú, ʻa ia naʻe meimei ke nau lea faka-Manitalini, ko e lea foki ia naʻe poto ai ʻa Nolá.
Hili ʻa e maau ʻa Nola ki hono ʻēlia foʻoú, naʻá ne ʻaʻahi mo hono hoa faifekau ko Teisi Kelekí kia Mīsisi Pai ʻIusu, ko ha mēmipa ʻo e kulupu faʻu lao lahi ʻa Taiuaní. Naʻe ako fakataha ʻa Mīsisi Pai mo e mali ua ʻo e tamai ʻa Nolá, ʻa ia naʻá ne ʻave ha tohi kia Nola ke fakafeʻiloaki ki hono kaungāmeʻa fuoloá. Naʻe vēkeveke ʻa Nola ke tokoni kia Mīsisi Pai ke ne mamata ki he ngaahi tāpuaki ʻe lava ke ʻomi ʻe he Siasí ki he kakai ʻo Taiuaní.
ʻI heʻenau fakatahá, naʻe fakahā ʻe Nola mo Teisi ʻa e tohi fakafeʻiloakí kia Mīsisi Pai, pea naʻá ne fakaafeʻi ke na tangutu ki lalo. Naʻe hū mai ha taha mo ha seti ipu tī fakaʻofoʻofa, pea naʻe fakaafeʻi ʻe Mīsisi Pai ʻa ʻene ongo ʻaʻahí ke na inu ha tī Earl Grey (ʻEli Kulei).
Neongo naʻe ʻikai ngofua ʻi he Lea ʻo e Potó ke inu ʻa e faʻahinga tī ko iá, ka naʻe ʻiloʻi ʻe Nola ko ha angakovi ia ʻi hono ʻulungaanga fakafonuá ke fakasītuʻaʻi ha tī mei he tokotaha ʻoku haʻana ʻa e falé. Ka ʻi he fakalau ʻa e taimí, kuo faʻu ʻe he kau faifekaú mo e kāingalotú ha ngaahi founga fakaʻapaʻapa ke fakaʻehiʻehi ai mei he inu tií ʻi he taimi ʻe foaki mai aí. Hangē ko ʻení, naʻe fokotuʻu mai ʻe Konili Sani, ko ha Siaina Siasi ʻi Hongo Kongo ʻa ia naʻe taukei ʻaupito ʻi he ʻulungaanga totonu fakasōsialé, ʻoku totonu ke tali pē ʻe he kau faifekaú ʻa e tií pea tuku lelei pē ia ki he tafaʻakí. Naʻá ne fakapapauʻi ange kiate kinautolu, “He ʻikai teitei fakamālohiʻi ʻe he kakai Siainá ʻa honau ngaahi kaungāmeʻá ke nau inu ʻa e tií.”
Naʻe ʻikai tali ʻe Nola mo Teisi ʻa e tií ʻi he anga-fakaʻapaʻapa pea naʻá na fakamatalaʻi kia Mīsisi Pai kuó na haʻu ki Taiuaní ke akoʻi ʻa e kakaí ke nau talangofua pea hoko ko ha kau mēmipa lelei ʻo e tukui koló. Ka naʻe kei fakaafeʻi pē ʻe Mīsisi Pai kinaua ke na maʻu ʻa e tií.
Naʻe faifai pea pehē ange ʻa Nola, “Fakamolemole pē Mīsisi, ka ʻoku ʻikai ke ma inu tī.”
Naʻe hangē naʻe ʻohovalé ʻa Mīsisi Paí. Naʻá ne fehuʻi ange, “Ko e hā hono ʻuhingá?”
Naʻe tali ange ʻe Nola, “ʻOku akoʻi kimautolu ʻe he Siasí ke mau muimui ʻi ha tefitoʻi moʻoni ʻoku ui ko e Lea ʻo e Potó ke tauhi homau sinó ke moʻui lelei mo ʻemau fakakaukaú ke maʻa.” Naʻá ne fakamatalaʻi ange leva naʻe ʻikai ke inu kofi, tī pe kava mālohi ʻa e kāingalotu ʻo e Siasí, pea naʻe ʻikai ke nau fakaʻaongaʻi ʻa e tapaká pe faitoʻo konatapú hangē ko e ʻopiamú. Naʻe fakatokanga foki ʻa e kau takí mo e ʻū tohi naʻe paaki ʻe he Siasí fekauʻaki mo hano inu ha faʻahinga inu kehe ʻoku ʻi ai ha meʻa ʻoku fakatupu maʻunimā.
Naʻe fakakaukauloto ʻa Mīsisi Pai ki he meʻá ni ʻi ha kiʻi taimi siʻi. Naʻá ne fehuʻi ange leva, “Ko e hā leva ʻa e meʻa ʻoku ngofua ke mou inú?”
Naʻe pehē ange ʻe Nola, “ʻOku lahi ʻa e ngaahi meʻá. Ko e huʻakau, vai, inu moli, 7Up, kapainu.”
Naʻe kole ange ʻe Mīsisi Pai ki he tokotaha ngāué ke toʻo ʻa e tií kae ʻomi ha huʻakau mokomoko ki he ongo faifekaú. Naʻá ne fakangofua ange leva ke na akoʻi ʻa e kakai ʻi Taiuaní. Naʻá ne talaange, “ʻOku ou fiemaʻu homau kakaí ke nau hoko ko ha kakai lelei ange, ke nau moʻui lelei ange mo talangofua ange.”
ʻI he ngaahi ʻaho mo e uike naʻe hoko aí, naʻe vahevahe ʻe Nola ʻa e ongoongolelei kuo fakafoki maí mo ha kakai tokolahi. Ko e kakai Kalisitiane Siainá naʻa nau fakahaaʻi lahi taha ʻenau fie ʻilo ki he Siasí, ka naʻe ʻi ai mo e kau lotu Puta mo e Tao (Taoist) naʻa nau fie ʻilo foki ki ai. Ko ha kakai ʻe niʻihi ʻi Taiuani naʻe ʻikai ke nau tui ʻOtua pea naʻe ʻikai ke nau fie ʻilo ki he tui faka-Kalisitiané pe ko e Siasí. Ka naʻe hoko ʻa e ʻikai maʻu ʻa e Tohi ʻa Molomoná pe tohi kehe ʻa e Siasí ʻi he lea faka-Siainá ko ha fakafeʻātungia ia ki ha niʻihi.
Naʻe tuai ʻa e tupu [ʻa e Siasí] ʻi Taiuaní, ka ko e kakai naʻa nau kau ki he Siasí naʻe mahino lelei kiate kinautolu ʻa e ngaahi fuakava naʻa nau fai ʻi he papitaisó. Naʻe pau ke nau maʻu kotoa ʻa e ngaahi lēsoni ʻa e ongo faifekaú, maʻulotu maʻu pē ʻi he Lautohi Faka-Sāpaté mo e houalotu sakalamēnití, talangofua ki he Lea ʻo e Potó pea mo e fono ʻo e vahehongofulú ʻi ha māhina ʻe ua pe lahi ange, pea tukupā ke tauhi mo e ngaahi fekau kehé, kimuʻa pea nau toki hoko ko ha Kau Māʻoniʻoni ʻi he Ngaahi ʻAho Kimui Ní. Ko e tokolahi ʻo e kakai naʻa nau fakataha mo e ongo faifekaú ʻi Taiuaní naʻa nau lolotonga kau longomoʻui mai pē ki he [ngaahi fakatahaʻanga] honau koló ʻi he taimi naʻa nau fokotuʻu ai ha ʻaho ke papitaiso ai kinautolú.
Ko e taha ʻo e ngaahi tefitoʻi fatongia ʻo Nola ʻi he motú ko hono fakamālohia ʻa e Fineʻofá. Naʻe tataki pē ʻe he kau ʻeletā ʻAmeliká ʻa e Kau Fineʻofa kotoa pē ʻi Taiuaní, pea toki liliu mai kimuí ni. Naʻe liliu ʻeni ʻi he konga kimuʻa ʻo e 1959 ʻi he taimi naʻe fekauʻi ai ʻe Palesiteni Heatoni ha faifekau ko Peti Sionisoni ke ne fokotuʻutuʻu ʻa e Kau Fineʻofá pea akoʻi ha kau taki fefine ʻi Taipei mo e ngaahi kolo kehe ʻi he motú. Naʻe hoko atu leva ʻe Nola mo e kau faifekau sisitaá ʻa e ngāue ʻa Petí, ʻo fononga mei he kolo ki he kolo ke fai ha faʻahinga tokoni pē ʻe fiemaʻu ʻe he Kau Fineʻofá.
Naʻe ʻosi ʻa e ngāue fakafaifekau ʻa Nolá ʻi he ʻaho 1 ʻo ʻOkatopa 1959. Lolotonga ʻene ngāué, naʻá ne maʻu ha mahino lahi ange ki he ongoongoleleí pea naʻá ne ongoʻi ʻa e tupulaki ʻene tuí. Kiate iá, naʻe hoko ʻa e tupulaki ʻa e Siasí ʻi Hongo Kongo mo Taiuaní ko hano fakakakato ia ʻa e misi ʻa e palōfita ko Tanielá.
Naʻe tatau moʻoni ʻa e Siasí mo ha maka kuo tā mei he funga moʻungá taʻe-kau ai ha nimá, ʻo ne teka hifo ke fakafonu ʻa e māmaní.
ʻI he taimi naʻe fakaʻosiʻosi ai ʻe Nola Kuti ʻa ʻene ngāue fakafaifekaú, naʻe ngāue ʻa Lama Uiliami, taʻu fāngofulu mā fitu, ʻi he ʻōfisi ʻo e Potungāue Ngāue Fakafaifekau ʻa e Siasí ʻi Sōleki Sití. ʻI he taimi naʻe fiemaʻu ai ʻe he kau taki fakasiteikí pe fakamisioná ha tohi ʻa e Siasí pe ko ha faʻahinga fakatātā, hangē ko ha laʻitā, te ne meili ia kiate kinautolu. Kapau naʻe kole ʻe ha taha ha fakamatala fakalūkufua fekauʻaki mo e Siasí, ʻe meili ʻe he kau ngāue ʻi hono ʻōfisí ha meʻa kiate kinautolu ke nau lau, fakataha mo ha ngaahi fakahinohino ki he founga ke fetuʻutaki ai ki he ongo faifekau ofi tahá.
Naʻe ʻikai ke tokangaʻi fakataautaha ʻe Lama ʻa e kole kotoa pē, ka naʻá ne kole ki heʻene sekelitalí ke talaange kiate ia ʻa e taimi ʻoku ʻomi ai ha meʻa mei ha feituʻu ʻoku ʻikai angamaheni ke ʻomai ha meʻa mei ai.
Ko e founga ia naʻá ne ʻilo ai fekauʻaki mo Naisīliá. ʻI ha ʻaho ʻe taha naʻe ʻomi ʻe heʻene sekelitalí ha kole mei ha faifekau ko hono hingoá ko ʻOnesitī Sione ʻEikongi ʻi ʻApaka, Naisīlia. Naʻe maʻu ʻe ʻOnesitī Sione ha kiʻi tohi fekauʻaki mo e talanoa kia Siosefa Sāmitá mei ha faifekau Palotisani, pea naʻá ne fakafonu ha foomu ʻo kole ha fakamatala lahi ange fekauʻaki mo e Siasí, ko ha ʻaʻahi mei he ongo faifekaú, pea mo e feituʻu ʻoku ʻi ai ʻa e ʻapisiasi ofi taha ʻa e Kau Māʻoniʻoni ʻi he Ngaahi ʻAho Kimui Ní.
Naʻe ʻikai ke ʻiloʻi pau ʻe Lama ʻa e feituʻu ʻoku tuʻu ai ʻa Naisīliá, ko ia naʻá na fakasio mo ʻene sekelitalí ʻi ha mape ʻi hono ʻōfisí. Koeʻuhí ko ʻene tuʻu ʻi ʻAfilika Hihifó, naʻá na ʻiloʻi ʻi he taimi pē ko iá ʻe faingataʻa ke fakakakato ʻa e kolé. Ko e haʻofanga lotu pē naʻe ʻi ʻAfiliká naʻe kilomita ia ʻe lauafe hono mamaʻó ʻi he feituʻu fakatonga ʻo e konitinēnití, ko ia naʻe ʻikai ke ne lava ke ʻave ha ongo faifekau pe ʻoange ha tuʻasila ʻo ha ʻapisiasi. Naʻá ne ʻiloʻi foki kapau ʻoku ʻUliʻuli ʻa ʻOnesitī Sione, ʻe lava ke papitaiso ia ka he ʻikai ke ne lava ʻo maʻu ʻa e lakanga fakataulaʻeikí.
Naʻe fakakaukau ʻa Lama, “Kuo pau ke tau ngāue ʻi ha founga tokanga mo fakapotopoto.” Naʻá ne faʻo puha ha fanga kiʻi tohi tufa mo ha ʻū tohi ʻa e Siasí, ʻo kau ai ha tatau ʻe ono ʻo e Tohi ʻa Molomoná, pea meili ia ki he tuʻasila ʻa ʻOnesitī Sioné.
Naʻe tali mai ʻe he faifekaú ʻi he hili ha taimi nounou mei ai. Naʻá ne tohi ʻo pehē, “ʻOku ou fakamālō atu ʻi he ʻū meʻaʻofa lelei naʻá ke ʻomí.” Naʻe lava ke tala ʻe Lama mei he tohí ʻoku kau ʻa ʻOnesitī Sione ʻi ha haʻofanga ʻo ha kakai naʻe tui ki he ongoongolelei kuo fakafoki maí.
ʻI he ngaahi māhina ne hoko aí, naʻe fetohiʻaki ʻa Lama mo ʻOnesitī Sione ʻo feʻaveʻaki ʻi he ʻŌseni ʻAtalanitikí. Naʻe fakaafeʻi ʻe ʻOnesitī Sione ʻa Lama ke haʻu ki Naisīlia ʻo akoʻi ʻene haʻofangá. Naʻe fakaʻamu ʻa Lama ke ne tali ʻa e fakaafé, ka naʻá ne ʻiloʻi ʻe fiemaʻu ha kiʻi taimi ke fakangofua ʻe he Kau Palesitenisī ʻUluakí ha taha ke ʻalu ki Naisīlia. Neongo iá, ka naʻá ne fakahā ke ʻiloʻi ʻe he kau taki ʻo e Siasí ʻa e holi ʻa e kakai ʻi Naisīliá ke ʻilo ha fakamatala lahi angé, pea naʻá ne hoko atu ʻene fetohiʻaki mo ʻOnesitī Sioné pea mo e niʻihi kehe naʻe fetuʻutaki atu kiate iá.
ʻI Fēpueli 1960, naʻe tohi ʻa Lama kia ʻOnesitī Sione ke ʻeke pe ʻoku ʻi ai haʻane tepi ʻoku lava ʻo lekooti. Kapau ʻoku ʻikai uiuiʻi ʻe he Siasí ha kau faifekau ki Naisīliá, te ne lava ʻo lekooti ʻa e ʻū lēsoni ʻo e ongoongoleleí ʻo ʻave ki he faifekau [ko ʻOnesitií] mo ʻene haʻofangá. Ko e pangó he naʻe ʻikai ha tepi ʻa ʻOnesitī Sione ʻe lava ʻo lekooti pe ko ha paʻanga feʻunga ke fakatau mai ha tepi. Ka naʻá ne ʻave hono laʻitaá kia Lama. Naʻe ʻasi ʻi he taá ha tangata ʻUliʻuli kei talavou ʻokú ne tangutu mo ʻene fānau iiki ʻe toko ua. Naʻá ne tui ha suti mo e hēkesi pea naʻá ne mataʻi fakamātoato.
Naʻe tala foki ʻe ʻOnesitī Sione kia Lama kuo kamata ke ui pē ʻe heʻene haʻofangá ʻa kinautolu ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻa nau fakaʻamu ke fetaulaki mo Lama ka nau hoko ko e kau mēmipa ʻo e Siasí. Naʻe talaange ʻe ʻOnesitī Sione kia Lama, “Kapau naʻe maʻu ʻe he tokotaha kotoa pē ha kapakau, te nau fakaʻamu kotoa ke puna ki Sōleki Siti ke fanongo mo mamata tonu kiate koe.”
Naʻe tali ange ʻe Lama ʻo pehē, “ʻOku ou lāngilangiʻia ʻi hoʻo fakaʻamu ke u ʻalu atu ki Naisīliá, ka kuo pau ke fekauʻi au ʻe he kau palesitenisī ʻo e Siasí ni kae toki lava ke fai ha faʻahinga fatongia pehē.”
Naʻá ne hoko atu ʻo pehē, “ʻOku ou houngaʻia ʻi hoʻo falala mai kiate aú, pea ʻi hoʻo loto-holi lahi ke tokoniʻi ho kakaí. Te u fetuʻutaki atu pē ʻa e meʻa kotoa te u malavá.”