Vahe 16
ʻA e ʻAhó Ni Pē
Hili ha taʻu ʻe taha ʻo ʻene ʻi he ʻUnivēsiti Pilikihami ʻIongí, naʻe fakakaukau ʻa Maeta Holitei ke tuku ʻa e akó kae kumi ha ngāue. Naʻá ne manako ʻi he ngaahi kalasi hulohula fōmoló mo e hivá pea mo e faiva ʻi he Toʻu Tangata Leimaná (Lamanite Generation), ko ha kulupu faiva manakoa ʻa e Kakai Tupuʻa ʻo ʻAmeliká. Ka naʻe fuʻu faingataʻa ki ai ha niʻihi ʻo ʻene ngaahi kalasí, hangē ko e fīsikí. ʻI he konga kimuʻa ʻo e 1974, naʻe lolotonga nofo ʻi Sōleki Siti mo ngāue ko ha tokotaha talitali kakai ʻi he KSL, ko ha kautaha letiō mo e televīsone ʻa e Siasí
Naʻe toe faikaumeʻa foki ai mo ha taha ʻosi ngāue fakafaifekau ko hono hingoá ko Tenisi Peki (Dennis Beck). Naʻá ne ʻosi fakafeʻiloaki mai ia ʻi ha hulohula ʻi Polovo ʻi Sepitema ʻo e taʻu kuo ʻosí, pea naʻá na hulohula ʻi he poó hono kotoa. Peá ne fakaafeʻi ia ke na ō ki he lotú.
Naʻe ʻohovale ʻa Maeta. Talu ʻene mavahe mei BYU, moe ʻikai toe fuʻu mālohi ʻi he Siasí ʻo hangē pē ko ʻene ʻi Kalefōniá. Ka, naʻá ne tali ʻa e fakaafe ʻa Tenisí mo fiefia ʻi heʻene ʻi ai mo iá. Naʻe loto ke na toe ō ʻi he uike hono hokó, pea ʻikai fuoloa kuo hokohoko ʻena teití.
ʻI he fakaʻau ke ʻiloʻi lelei ange ʻe Maeta ʻa Tenisí, naʻá ne tanganeʻia ʻi heʻene angaleleí mo e fakamātoató. Ko ha mēmipa mālohi ia ʻo e Siasí naʻá ne tauhi ʻa e ngaahi fekaú mo ʻalu maʻu pē ki he temipalé. Naʻe fāʻeleʻi ia ʻi ʻIutā pea ngāue ʻi he Misiona ʻInitia Tokelaú ʻi he fakatokelau ʻo e ʻIunaiteti Siteití, ʻa ia naʻe fakaʻau ke ʻofa ai ʻi he Kakai ʻInitia ʻo ʻAmelika naʻá ne akoʻí pea mo fakamahuʻingaʻi hono tukufakaholo ko e Mekisikou ʻAmeliká. Naʻe ongoʻi nonga mo fiemālie ʻa Maeta ʻi heʻena feohí.
ʻI ha ʻaho ʻe taha, ko e meimei ʻosi ia ha māhina ʻe ono ʻo ʻena feʻiloakí, naʻe haʻu ʻa Tenisi ʻi haʻane kiʻi loli lanu kulokula motuʻa, ʻa ia naʻá ne ngaohi mo fakaleleiʻi. Naʻá na ō ai ʻo ʻeva, pea tau ai ʻe Tenisi ʻa e meʻalelé ʻi muʻa ʻi he Temipale foʻou ʻo Polovó kae lea mali kia Maeta.
Talu mei he taimi ʻo ʻene kei taʻu hongofulu tupú, mo e fakapapau ʻa Maeta he ʻikai pē ke teitei mali ia. Ka ʻi he taimi naʻe lea mali ange ai ʻa Tenisí, naʻe ʻikai ke toe fakakaukau ia ki he vete ʻa ʻene ongomātuʻá pe ko e mali tuʻolahi ʻa ʻene fineʻeikí. Ka, naʻe fakakaukau kia Vena mo Sipenisā Peleki mo ʻena tā sīpinga ki he nofomali fiefiá. Naʻá ne fakakaukau, “Teu lava mo au ʻo fiefia.” Ko ia ai naʻá ne tali ʻa e kole malí.
ʻI he konga kimui ʻo e fahaʻitaʻu māfana ko iá, ʻi he ʻaho 27 ʻo Suné, naʻe tūʻulutui fakataha ai ʻa Maeta mo Tenisi ʻi he Temipale Sōlekí. Naʻe tui ʻe Maeta ha kofu pē naʻá ne tuitui, ʻo felea mei ʻolunga (empire waist) pea ʻaofituʻa ʻaki ʻa e leisi (lace overlay). Naʻe hangē naʻe aʻu pē ki ʻitāniti ʻa e ʻata ʻo e ongomeʻa malí ʻi he ongo sioʻata ʻi he holisí. Naʻá na ʻi he loki silá mo ʻene ongomātuʻa ohí, ʻa Vena mo Sipenisā, pea mo hono ʻofefine ko Lusí.
Naʻe ʻosi talaange ʻe Vena ʻi heʻene fanongo ki he fakamaʻu ʻa Maetá, “ʻOku ou laukau ʻaki koe.” “Naʻa mau fakaʻaongaʻi ha taimi lahi ke tūʻulutui, ʻo lotua koe ke ke fai ʻa e ngaahi fili ʻoku totonú.”
ʻI he taimi naʻe tūʻulutui ai ʻa Maeta ʻi he ʻōlitá mo Tenisí, naʻe hounga kiate ia ʻa e lotu faivelenga ʻa Vená. Naʻá ne fiefia ʻaupito. Naʻá ne ʻilo naʻe tonu ʻene fili ke mali mo Tenisí.
Naʻe toki fononga meʻalele kimui ange ʻa Maeta ki ʻAlesona ke feʻiloaki ʻa Tenisi mo ʻene faʻeé. Naʻe foki mai ʻa ʻEvelini mei he polokalamá ʻoku manumanu-melieʻia ʻia Tenisi. Naʻá ne saiʻia ʻi heʻene poto he huá, lea moʻoní, mo ʻene tauhi ʻa e Lea ʻo e Potó.
Naʻá ne talaange kia Maeta, “Ko ha tangata lelei ia.” Naʻá ne tali ʻa e fili ʻa hono ʻofefiné.
Naʻe fakakaukau ʻa Pele Sipāfooti, ʻi heʻene tokoto ʻi he mohengá ʻi he ʻaho 5 ʻo ʻOkatopa 1974, “ʻOku ongosia hoku sinó, fuʻu ongosia ʻaupito, ʻi he pooni.” ʻI he konga kimuʻa ʻo e uike ko iá, ʻi he konifelenisi lahi fakataʻu ʻa e Fineʻofá, naʻe tukuange ai ia ʻe Palesiteni Sipenisā W. Kimipolo mei heʻene hoko ko e palesiteni lahi ʻo e Fineʻofá. Naʻe fakatau ʻa e mānava kotoa ʻi he Tāpanekale Sōlekí, ʻi he ʻohovale ʻa e kakai fefiné mo loto-mamahi ʻi he ongoongó. Ka naʻe ʻosi ʻilo pē ʻe Pele ʻe fai ha tukuange, pea naʻá ne tali lelei ia ko e finangalo ʻo e ʻEikí.
Ka naʻe fakakaukau noa pē. “Manatuʻi ʻeni! Hangē ʻoku pehē mai, Manatuʻi ia!” Naʻá ne loto ke hiki ʻene ngaahi fakakaukaú ʻi ha pepa, pea tuʻu leva mei he mohengá ʻo kamata ke hiki. Naʻá ne fehuʻi pē kiate ia, “Ko e hā te ke toe mohe ai, ʻi he lahi fau ʻo e ngaahi meʻa nāunauʻia lahi ke ke toe manamanatu ki aí?”
Naʻá ne manatu ki he ongoʻi taʻetaau naʻá ne maʻu ʻi he taimi naʻe ui ai ia ʻe he Kau Palesitenisī ʻUluakí ke ne fetongi ʻa ʻEimi Palauni Laimani ko e taki ʻo e Fineʻofá ʻi ʻEpeleli 1945. Ka koʻeni, kuo ʻosi ha taʻu ʻe uofulu mā hiva mei ai, kuó ne ngāue ʻo lōloa ange ʻi ha toe palesiteni lahi ʻo e Fineʻofá.
ʻI he lolotonga ʻo e taimi ko iá, kuó ne tofanga ʻi ha ngaahi faingataʻaʻia fakafoʻituitui lahi, kau ai ʻa e kanisā huhú mo e mālōlō siʻono husepānití pea mo hano ʻofefine. Neongo ia, ʻi he malumalu ʻo ʻene fakahinohinó, naʻe tokoniʻi ai ʻe he houalotú ha kau faingataʻaʻia ʻo e Tau Hono II ʻa Māmaní, langa ʻa e fale ʻo e Fineʻofá, kamata ʻa e ngaahi fakataha Fineʻofa efiafi maʻá e kau fafine ngāué, poupouʻi ʻa e ngaahi polokalama taʻofi ʻo e ngaohikoviá mo e ohi ʻo e fānaú, mo fakahoko ha tokoni fakakolo makehe ʻi he ngaahi tokoni fakasōsiale kehé.
Kimui mai angé, naʻe tokangaʻi ai ʻe Pele mo ʻene poate lahí ʻa e ngaahi liliu ʻi he kau ki he Fineʻofá ke fakalotolahiʻi ha kakai fefine tokolahi ange ke nau kau. ʻI he ngaahi taʻu he kuo hilí, naʻe fakamoʻoni hingoa ʻa e houʻeiki fafiné ke nau kau ʻi he houalotú mo totongi ha ngaahi tukuhau fakataʻu ke mēmipa. Kuo ʻikai ke toe fai ʻa e totongi tukuhau ko ʻení he taimí ni, pea kau hangatonu pē ʻa e fefine kotoa ʻi he Siasí ki he Fineʻofá ʻi he hoko pē hono taʻu hongofulu mā valú.
Naʻe tohi ʻe Pele, “Ko ha ngaahi taʻu femoʻuekina, ngāue lahi, mo faingataʻa ʻeni, ka naʻe ʻaonga fau ʻo ʻikai ke u lava ʻo mākupusi. Kuo angalelei lahi ʻa e ʻEikí kiate ia. “Kuo tā-tuʻo lahi Haʻane fakahū ha ngaahi fakakaukau ki hoku ʻatamaí pea naʻa mo ha ngaahi lea ki hoku ngutú ʻo nau ʻai ke u lava ʻo matuʻuaki ʻa e ngaahi tūkunga faingataʻá pe toʻo ai ʻa e ngaahi meʻa fakatutá.”
ʻE fiemaʻu ʻe hono fetongí, ʻe Pāpulā B. Sāmita, ʻa e tokoni fakalangi tatau ʻi heʻene tataki ʻa e Fineʻofá ki ha kahaʻu toutou-mo-liliu. ʻI he lolotonga ʻo e ngaahi taʻu fakaʻosi ʻo Pele ko e palesiteni lahí, kuo fakalalahi ʻa e teke ki he totonu ʻa e kakai fefiné ʻi he ʻIunaiteti Siteití ʻi hono fakafehuʻia ʻe ha kakai fefine tokolahi, motuʻa mo e kei talavou, ʻa e ngaahi tufakanga tukufakaholo ʻo fafiné pea nau ngāue ke fakafepakiʻi hono ngaohikovia mo taʻetotonu ʻo e kakai fefiné.
ʻI heʻenau muimui ki he ngaahi ngāue fakafalealea ʻi he ngaahi fonua kehé, naʻe fakangofua ai ʻe he Falealea ʻo e ʻIunaiteti Siteití ʻa e Ngaahi Fakatonutonu ki he Totonu ki he Tuʻunga Tataú (Equal Rights Ammendment) ʻi he 1972. Naʻe feinga ʻa e fakatonutonú ke fakaleleiʻi ʻa e Konisitūtone ʻo ʻAmeliká ke fakakau mahino ʻa e tuʻunga tatau fakalao ʻa fafiné. Kuo feinga ʻeni ʻa e kakai ʻAmeliká ke fakakikihiʻi ʻa e kahaʻu ʻo e fakatonutonu fakalaó. Kapau ʻe tali ia ʻe ha vahe fā ʻe tolu, ʻo e ngaahi siteití, ʻe hoko ia ko e lao ʻo e fonuá.
Ki ha kakai ʻe niʻihi, naʻe hangē ʻa e fakatonutonú ko ha faitoʻo lelei ia ki he faʻunga fakalao fuoloa naʻe ʻikai ke tatau ai ʻa e tangatá mo e fefiné. Naʻe ʻi ai mo ha kakai kehe, ʻo kau ai ha kau mēmipa tokolahi ʻo e Siasí, naʻe ʻikai ke nau fakapapauʻi.
Naʻe toki fakamatalaʻi ʻe Pele kimuí ni ʻa ʻene fakakaukau ki he fakatonutonú pea mo e ngaʻunu ʻa e kakai fefiné ʻi haʻane lea ki ha kulupu ʻo ha kau pisinisi fakapalōfesinale ʻi he Kolo ko Niu ʻIoaké. Naʻá ne pehē, ʻo ne fakamatalaʻi ʻa e totongi tatau ki he ngāue tataú mo e founga lelei ki hono fakangāueʻi ʻo e kakaí, “ʻOku ʻi ai ha ngaahi meʻa ʻoku ueʻi ʻe he kakai fefiné ʻa ia ʻoku totonu ke poupouʻi.” Ka naʻá ne manavasiʻi naʻa hoko ʻa e ngaʻunu ʻa e kakai fefiné ke vaivai ai ʻa e tufakanga ʻo e uaifí, faʻeé, mo e kau tauhi ʻapí. Naʻe tui ko ha liliu ki he ngaahi totonu fakalao ‘a ha fefine ʻoku totonu ke fou mai ‘i he ngaahi puleʻanga fakafeituʻú, fakasiteití, mo fakafonuá, ka ʻoku ʻikai ko hono fakatonutonu pē ʻo e konisitūtoné.
ʻI he kei ʻā fuoloa ʻa Pele ʻo fakakaukau ki heʻene hoko ko e palesiteni lahi ʻo e Fineʻofá, naʻá ne ongoʻi houngaʻia fakataha mo ha ongoʻi fiefia ʻo e nonga pea mo e nēkeneka ki hano tuku atu hono ngaahi fatongiá ki he uma ʻo ha tokotaha foʻou. Naʻá ne tohi ai, “ʻOku ʻi ai ha “ongo ʻi hoku lotó, ko ha ongo ʻo e nonga mo ha talaʻofa lelei ki he kahaʻú—hoku kahaʻu ʻoʻokú pea mo ʻeku Fineʻofa ʻofeiná.”
ʻI he ongoʻi nonga ko ʻení, naʻe fāifai pea mateuteu leva ke mohe. Naʻá ne tohi, “Ko e pōní te u mālōlō he ʻoku ʻi hoku lotó ha fakamoʻoni ʻoku lelei ʻa e meʻa kotoa.”
ʻI he meimei taimi ko ʻení, ʻi Keipi Kousi, ʻi Kana, naʻe mamata ai ʻa Pili Sionisoni ki ha ngaahi tā mo e kau palesiteni ʻo e Siasí ʻi he kuo hilí, ʻi he takafi muʻa ʻo ha nusipepa fakalotu fakalotofonua. Makehe mei he ngaahi taá, naʻe ʻi ai ha ngaahi fakamatala tukuhifo ʻo e Siasí mo hono kau takí. Naʻe feinga moʻoni ʻa e nusipepá ke ne fakatupu ha veiveiua ʻi he kāingalotu tupu tokolahi ʻo Pilí.
Naʻe ʻosi fakaangaʻi ʻa Pili mo hono kaungā tuí tokua ʻoku nau tui ki ha ongoongolelei kuo toutou fakafoki tuʻo lahi mai kimuʻa. Naʻe fakatupu fili ha kakai ʻe niʻihi kia Pili ʻi heʻene liʻaki ʻa e tui fakalotu naʻe tupu hake aí. Naʻa nau pehē naʻe lotu ʻa e Kāingalotú kia Siosefa Sāmita pea ʻikai tui ki he ʻOtuá. Naʻe ʻi ai ha niʻihi naʻa nau tuhuʻi mai ʻa e ʻikai maʻu ʻe he houʻeiki tangata ʻUliʻulí ʻa e lakanga fakataulaʻeikí ʻi he Siasí mo manukiʻi ʻa Pili mo hono kau muimuí ʻoku mole noa honau taimí.
Naʻe faingataʻa ke kei tui faivelenga ʻi he faʻahinga tukuakiʻi peheé. ʻI he taʻu ʻe taha kimuʻá, naʻe fakaʻau ke taʻeoliʻia ʻa e kau mēmipá ʻi he ʻosi ʻa e ngaahi taʻu lahi mo e ʻikai ke haʻu ha taha ke papitaiso kinautolú. Naʻe kole leva ʻa Pili he taimi ko iá ki hono kau muimuí ke nau kau fakataha mo ia ʻo ʻaukai mo lotu. ʻI heʻenau fakahoko iá, naʻe maʻu ʻe ha kakai ʻe niʻihi ha ongoʻi mālohi ʻe vavé ni pē ha aʻu mai ʻa e kau faifekaú ki Kana.
Neongo naʻe maʻu ʻe he kāingalotú ha ongo fakapapauʻi mei he meʻá ni ka naʻe ʻikai pē ke tuku ʻa e fakatangá ia. Naʻe tailiili ha kau mēmipa ʻe niʻihi ʻi heʻenau sio ki hono fakaangaʻi ʻe he nusipepá ʻa e kau palōfitá, pea naʻe ʻikai ke nau ʻilo ʻa e meʻa ke faí. Naʻe lotu ʻa Pili mo kinautolu mo ne tapou ange ke ʻoua te nau tokanga ki he lau ʻa e nusipepá. Naʻá ne pehē, “Tukunoaʻi pē ia ʻe kimoutolu.”
Ka naʻe pehē pē kia Pili, naʻá ne ongoʻi vaivai. ʻI ha pō ʻe taha, naʻá ne ʻalu ai ki he falelotú ke fai haʻane lotu. Naʻá ne pehē, “Tamai, neongo ʻoku ou tui ki he Siasí, ko e Siasi moʻoni ʻeni ʻi mámani ʻi he ʻaho ní. ʻOku ou fiemaʻu ha ivi mo ha fakamoʻoni lahi ange ke u fakamoʻoniʻi ʻa e Siasí.”
Naʻá ne tautapa ki he ʻEikí ke fakahā mai muʻa Ia. Pea tō ia ʻo mohe ʻo ne misi naʻe mamata ki he maamangia ʻa e Temipale Sōlekí, pea ʻoku ʻalu hifo mei he langí. Naʻe ʻikai ke fuoloa kuo ʻākilotoa ia ʻe he falé. Naʻe folofola mai ʻa e leʻo ʻo e ʻEikí, “Sionisoni, ʻoua naʻa mole hoʻo tui ki hoku siasí.” “Pe ʻokú ke tui ki ai pe ʻikai, ko hoku siasi moʻoní ʻeni ʻi māmani he ʻahó ni.”
Ko e taimi naʻe ofo hake ai ʻa Pilí, naʻe ʻikai ke toe hohaʻa ia ki he fakatangá. Naʻá ne pehē, “Kuo folofola mai ʻa e Tamaí.” “He ʻikai ke u toe manavasiʻi au.”
ʻI he ngaahi ʻaho hoko atu aí, naʻe mālohi ange ʻa e tui ʻa Pilí ʻi ha taimi pē ne fanongo ai ʻoku fakaangaʻi ʻe ha taha ʻa e Siasí, pea naʻe ngāue leva ke fakamālohia hono kaungā tuí. Naʻá ne fakamoʻoni, “ʻE ʻi ai pē ha taimi ʻe tuʻu ai ʻa e Siasí.” “Te tau mamata ai ki he fakaʻofoʻofa ʻo e Siasí.”
ʻI he 1974, ko e ʻosi ia ha taʻu ʻe nima mei heʻene fakafisi ko e supiliteni ʻo e Fale maʻá e Fānau Paeá ʻi Songisukí, pea mo hono fakaava ʻe Huangi Keuni Oki ha ʻapi ki he tamaiki fefiné ʻi Soulu, Kōlea Tonga. Kuó ne tauhi ʻeni ha tamaiki fefine ʻe toko hongofulu mā fitu, ko hanau niʻihi naʻe Siasi, mo tokoni ki ha niʻihi ke kumi ha ngaahi fāmili ohi ʻo fakafou ʻi he Tender Apples Foundation. Naʻe toe tokoniʻi foki ʻe he kautahá ha ngaahi kulupu fānau kehe, kau ai mo ha ʻapi ki he fānau paeá maʻá e tamaiki tangatá. Naʻe toe fakaava foki ʻe Keuni Oki ha ako tokamuʻa (preschool) ke ako ai ʻa e longaʻi fānau iiki taha ʻo Kōlea naʻe faingataʻaʻiá.
Neongo naʻe tokosiʻi ange ia ʻi he kulupu hiva ʻi he fale ʻo e fānau paeá, ka naʻe kei hiva pē ʻa e Tender Apples ʻi he televīsoné mo fai ha ngaahi koniseti. Naʻe femoʻuekina ʻaupito ʻa e tamaiki fefiné, ka naʻe fakapapauʻi ʻe Keuni Oki ʻoku nau ongoʻi lata. Ko e efiafi Mōnite kotoa pē naʻá ne fakatahatahaʻi ai kinautolu ki ha efiafi ʻi ʻapi.
ʻI he taimi naʻe ʻikai ke ne tokangaʻi ai ʻa e tamaiki fefiné, naʻe tokoni ʻa Keuni Oki ki he houʻeiki fafine ʻo hono vahefonuá, he ko ha palesiteni ia ʻo e Fineʻofá. Naʻe ʻai ʻe hono fatongiá ke fetuʻutaki ai mo ʻIusini Tila (Eugene Till), ko e palesiteni foʻou naʻe toki ui ki he Misiona Kōleá. Naʻe hohaʻa ʻa Palesiteni Tila ʻi he tokolahi ʻo e kakai Kōlea naʻe teʻeki ai ke nau ʻilo ha meʻa fekauʻaki mo e Siasí, neongo naʻe ʻi ai ha siteiki mo e ʻinisititiuti fakalotu longomoʻui ʻi Soulu. Ko hono moʻoní, naʻá ne toki ʻilo naʻe tokosiʻi ange ʻi he pēseti ʻe 10 ʻa e kakai Kōlea naʻa nau ʻiloʻi ʻa e hingoa kakato ʻo e Siasí. Pea ko kinautolu naʻa nau ʻilo ʻa e Siasí naʻe ʻikai ke nau faʻa maʻu ha fakakaukau lelei ki ai. ʻIkai ngata ai, naʻe fakangatangata ʻe he puleʻangá ʻa e tokolahi ʻo e kau faifekau ʻAmelika naʻe fakangofua ki he fonuá.
Ka, kapau ʻe lava ʻe Palesiteni Tila ʻo fakahaaʻi ki he kau ʻōfisa Kōleá ʻoku nofotaha pē ʻa e Siasí ki he ngaahi fāmilí, ʻe ala loto fiemālie ʻa e puleʻangá ke fakangalokuloku ʻa e fakataputapui ʻi he ngāue fakafaifekaú.
ʻI ha ʻaho ʻe taha, naʻá ne kole tokoni ai kia Keuni Oki. Naʻe ʻi ai ha kau faifekau tokosiʻi naʻa nau fakakau ʻa e hivá ʻi heʻenau akoʻí. Pea hangē ko e kau hiva ʻOsimoní, naʻa nau tui ʻe lava ʻe he hiva manakoá ʻo ueʻi ʻa e kakaí ʻi he ngaahi pōpoaki ʻo e ongoongolelei kuo fakafoki maí. Naʻe ʻosi tukuatu ʻe he Kau Hiva ʻOsimoní, ʻi ha taʻu ʻe taha kimuʻa ʻa e The Plan, ko ha ʻalapama hiva ʻiloa naʻa nau ngāue ki ai ʻi ha ngaahi taʻu lahi. ʻI he tafaʻaki fakamūsiká, naʻe ongo ʻa e ʻalapamá ʻo tatau mo e ngaahi lekooti kehe ʻa e kau tāmeʻa manakoa ʻo e kuongá. Ka naʻe feinga makehe ʻa e kau tautehiná ke faʻu ha ngaahi hiva ki he tuʻunga takitaha ʻi he palani ʻo e fakamoʻuí, mei he moʻui ʻi he maama fakalaumālié ʻo aʻu ki he hākeakiʻí. Neongo naʻe ʻikai tali ʻe he kau fakaangá ʻa e ʻalapamá koeʻuhí ko hono ngaahi kaveinga faka-Siasí, ka naʻe ongo hono ngaahi pōpoaki ʻi he ongoongoleleí ki ha kakai kei talavou tokolahi ʻi ʻAmelika Tokelau, ʻIulope, mo ʻAositelēlia.
ʻI hono fakahoa ki he ngāue fakamūsika ʻa e kau faifekaú ʻi Kōlea Tongá naʻe ʻikai pē ke fuʻu fēfē, ka naʻe tatau pē ʻenau ngaahi taumuʻá. Naʻe faʻu ʻe honau taki fakakulupú, ʻe ʻEletā Lenitī Teivenipooti (Randy Davenport) ʻa e lahi taha ʻo e ngaahi fuofua hiva ʻa e kulupú, kae fakatuʻunga fasi ʻe ʻEletā Meki Uilipeeki (Mack Wilberg). Naʻa nau ui kinautolu ko e New Horizon (ʻIlo Foʻoú).
ʻI heʻene fakatokangaʻi e meʻa ʻe lava ʻo fai ʻe he kulupú, naʻe kole leva ʻe Palesiteni Tila kia Keuni Oki pe ʻe lava ke hiva fakataha ʻa e Kulupu Tender Apples mo e ʻIlo Foʻoú ʻi he polokalama Kilisimasí. Naʻe fakatokangaʻi ʻe Keuni Oki hono mahuʻinga ke vahevahe ʻe he Tender Apples ʻa e ongoongolelei kuo fakafoki maí, pea hili haʻane talanoa mo Siteni Polonisoni (Stan Bronson), ko e tokotaha naʻá na kaungā fokotuʻu ʻa e kulupú, naʻe loto leva ki ai.
Naʻe ola lelei ʻaupito ʻa e polokalama Kilisimasí, pea naʻe tui tatau ʻa e taha kotoa ko e ʻIlo Foʻoú mo e Tender Apples ʻokú na fetākinima lelei. Naʻá na kamata ʻaʻahi takai fakataha ki he fonuá mo maʻu ha toe kakai lahi ange ʻi he televīsoné mo e ngaahi polokalama he letioó. Naʻe tautautefito hono manakoa ʻo e Tender Apples ʻi he ngaahi nofoʻanga fakakautaú, he naʻe fakamanatu ai ki ha kau mēmipa tokolahi ʻi he matangá ʻenau fānau ʻi he ʻIunaiti Siteití. ʻI he tafaʻaki ʻe tahá, ko e kau ʻeletā ʻi he ʻIlo Foʻoú naʻe manakoa ange ʻi he kau Kōleá, he naʻa nau saʻia ke mamata ki he lea mo e hiva ʻa e kau ʻAmeliká ʻi he lea faka-Kōleá. Naʻe aʻu ʻo lekooti fakataha ʻe he ongo kulupú ha ngaahi ʻalapama.
Naʻe ʻi ai ha taimi naʻe kiʻi fakafufū ai ʻe Keuni Oki ʻa ʻene tuí. Ka ko ʻeni kuo fakakau ʻe he Tender Apples mo e ʻIlo Foʻoú ʻa e hingoa ʻo e Siasí ʻi he ʻenau hiva mo e ʻinitaviu kotoa pē. ʻI he ngaahi fakaʻaliʻalí, naʻe ʻi ai ʻa e kau faifekau taimi kakató ke fakamatalaʻi lahi ange ki he kakaí ʻa e Siasí. Naʻe talitali lelei ʻaupito ʻa e kau faifekaú heʻenau tukituki atu ʻi he ngaahi matapaá, pea pehē ʻe he kau fiefanongó naʻa nau ʻilo ʻa e hingoa ʻo e Siasí mei ha koniseti pe ko e ʻalapamá. ʻI ha ngaahi feituʻu ʻe niʻihi, naʻe fokotuʻutuʻu ai ʻe he kau faifekaú ke fai ha koniseti ʻi ha feituʻu kakai ke tokolahi ange ʻa e kakai te nau ala fie fanongo ange kiate kinautolú.
ʻI he fakaʻau ke manakoa ange ʻa e Tender Apples mo e ʻIlo Foʻoú, naʻe fakahoko leva ʻe Palesiteni Tila ha savea ʻo ʻilo ai ko e tokolahi ʻo e kakai ʻi loto Soulu mo e ngaahi feituʻu takaí, kuo nau fanongo ki he Siasí, kuo aʻu ʻeni ʻo toko valu ʻi he toko hongofulu kotoa. Kae mahuʻinga angé, ko e ngaahi ongo naʻe maʻu ʻe hanau tokolahi ki he Siasí, naʻe mātuʻaki lelei.
Neongo naʻa nau ō mai mei ha ngaahi tupuʻanga mo ha ngaahi anga fakafonua mātuʻaki kehekehe, ka kuo tokoni ʻa e ʻIlo Foʻoú mo e Tender Apples ke na fakamafola fakataha ʻa e ongoongoleleí, ʻi he foʻi hiva takitaha.
ʻI ʻEpeleli ʻo e 1975, naʻe maile ʻe lauiafe ʻa Henelī mo ʻIne Pekihaati (Henry and Inge Burkhardt) mei ʻapi. ʻI he fakaafe ʻa e Kau Palesitenisī ʻUluakí, naʻá na folau ai ki ʻIutā mei he Lepāpulika Fakatemokalati ʻo Siamané ke ʻi he konifelenisi lahí. Ko e folaú ni, ko ha faingamālie hāhāmolofia ia ki ha ongomātuʻa Siasi ʻoku nofo ʻi ha fonua ʻoku puleʻi fefeka honau kauʻā-fonuá mo honau kakaí.
Naʻe ʻikai ko e fuofua taimi ʻeni ʻo Henelī ke ʻi Sōleki Siti ai. Naʻe fakaafeʻi ia mo Ine ʻe Palesiteni Siosefa Filitingi Sāmita mo hono ongo tokoní, ʻi he taʻu ʻe fā kimuʻá, ke na kau ange ki he konifelenisi lahí. ʻI heʻenau ʻiloʻi ʻe lau ʻe he kau pule ʻo Siamane Hahaké ʻa e fakaafé, naʻe tohi fakaʻapaʻapa ai ʻa e Kau Palesitenisī ʻUluakí fekauʻaki mo ʻenau ʻamanaki ki ha melino mo ha ongo fakatokoua ʻi he māmaní, pea mo ha ngaahi fakakaukau lelei kehe naʻe fakahaaʻi ʻe he Lepāpulika Fakatemokalati ʻo Siamané. Naʻe tali ʻe he puleʻangá ʻa e kole folau ʻa Henelií, pea maʻu konifelenisi lahi ai ʻi he 1972.
ʻI he taimi ko iá, naʻe ʻikai fakangofua ʻe he Lepāpulika Fakatemokalati ʻo Siamané ʻa ʻIne ke na ō, ʻo manavasiʻi naʻa ʻikai ke toe foki ange ʻa e ongomātuʻá kapau ʻe fakangofua ke na mavahe fakataha mei he fonuá. Ka, ʻi he taʻu ʻe ua hono hokó, naʻe maʻu ʻe he ongo tokoni ʻo Henelī ʻi he kau palesitenisī ʻo e Misiona Tulisitení ha ngofua ke na folau ki he konifelenisi lahí mo hona malí, ʻo maʻu ai ʻe he fāmili Pekihaatí ha ʻuhinga ke ʻamanaki ʻe fakangofua ʻe he kau pule ʻo e puleʻangá ʻa e tohi kole visa hono hoko ʻa ʻIné. Ka ʻi heʻena kole ke ō ki he konifelenisi lahi ʻi he 1975, naʻe ʻikai pē tali ʻa e tohi kole ia ʻa ʻIné.
Naʻe fakahoko ʻe he kau taki ʻo e Siasí ʻi Sōleki Sití ha lotu makehe maʻa ʻIne ʻi he temipalé, ʻi heʻenau ʻiloʻi ʻa e meʻa naʻe hoko ki aí. Pea ko e taimi naʻe toe tangi ai ʻa Henelī mo ʻIne ki he tuʻutuʻuni naʻe fakahokó, naʻe fakangofua leva ʻe he puleʻangá ʻa e visá ʻo ʻikai ha toe palopalema.
Naʻe hoko ʻa e maʻu konifelenisí ko ha aʻusia kāfakafa. Naʻe fakaava ʻe Sipenisā W. Kimipolo ʻa e konifelenisí ko e tuʻo tolu ʻaki ia ʻi heʻene hoko ko e palesiteni ʻo e Siasí. Ko ʻene pōpoakí naʻe fai ia ki he Kāingalotu ʻo e Ngaahi ʻAho Kimui Ní ʻi he funga ʻo e kolopé. Naʻe ʻi ai ha meimei siteiki ʻe 700 mo ha ngaahi misiona ʻe 150 ʻi he funga ʻo e māmaní, pea ʻi he taʻu kuo hilí, naʻe lava ai ke feʻiloaki mo e Kāingalotú ʻi ha ngaahi konifelenisi lahi fakaʻēlia ʻi ʻAmelika Tonga mo ʻIulope. Naʻá ne fakatapui foki ha temipale ʻi Uāsingatoni, DC, fanongonongo ha temipale ʻi Sao Paulo, Palāsila, mo kamataʻi ha palani ki ha temipale ʻi Mekisikou Siti. Ko e taimi lahi, lolotonga ʻene fakataha mo e Kāingalotú, naʻá ne fakalotolahiʻi kinautolu ke “fakavaveʻi ʻenau laká,” pe fakalahi ʻenau ngāue, ʻi hono vahevahe ʻo e ongoongoleleí.
Ka ko ʻeni, naʻe lea ki he Kāingalotú ʻi he konifelenisi lahí, ʻo tapou ke nau moʻui angamaʻa. Naʻá ne fakahalaki ʻa e ponokālafí mo e fakatō-tamá, ko ha ngāue naʻe toki fakalaoʻi ni ʻi he ʻIunaiteti Siteití. Naʻá ne toe fakalotolahiʻi foki ʻa e Kāingalotú ke nau tō ha ngoue, vahevahe ʻa e ongoongoleleí, mo fokotuʻu ʻa e Siasí ʻi honau fonua tupuʻangá. Naʻá ne pehē, “Ko e tānaki ʻo ʻIsilelí ʻoku fakahoko ia ʻi he taimi ʻoku tali ai ʻe he kakai ʻi he ngaahi fonua mamaʻó ʻa e ongongoleleí pea kei nofo pē ʻi honau ngaahi fonua tupuʻangá.”
Ko ha pōpoaki ia naʻe tō loloto kia Henelī mo ʻIne ʻi heʻena kau mai ki he Siasí. ʻI he taʻu ʻe uofulu ki muʻá, ʻi heʻena pehē ke na foki ki he Lepāpulika Fakatemokalati ʻo Siamané hili ʻena sila ʻi he Temipale Suisalaní, naʻá na feilaulauʻi hona faingamālie ke moʻuiʻaki ʻena tui fakalotú mo toutou ō ki he temipalé. Ka kuo tokoni ʻena faʻifaʻitakiʻangá mo ʻena takí ke tānaki ʻa e Kāingalotú, ʻo ʻikai ko kinautolu pē ʻi he Lepāpulika Fakatemokalati ʻo Siamané, ka ʻi Hungali, Pōlani, mo Sekisolovākia foki, ʻa ia naʻe faʻa ʻaʻahi ki ai ʻa Henelī mo e kau taki ʻo e Siasí ʻi Siamane Hahaké.
Kimuʻa peá na fokí, naʻe talanoa ʻa Henelī mo Palesiteni Kimipolo fekauʻaki mo e faingataʻaʻia ʻa e Siasí koeʻuhi ko e puleʻangá ʻi he Lepāpulika Fakatemokalati ʻo Siamané. Naʻe ʻikai tui ʻa Palesiteni Kimipolo ʻe lava ʻe he Siasí ʻo fakaleleiʻi hono tuʻungá ai, ʻi ha ngaahi alea fakapolitikale. Naʻá ne talaange kia Henelī, “Kapau ʻokú ke fie sio ki ha liliu ʻi he ngaahi meʻa ʻi Siamane Hahaké, kuo pau ke kamata pē ia ʻiate koe.” “Kuo pau ke ke fakamālohiʻi koe ke ke fakakaungāmeʻa ki he kau kominiusí. He ʻikai te ke lava ʻo kukuta ha faʻahinga loto kiate kinautolu. Kuo pau ke liliu kakato hoʻo fōtungá mo hoʻo tōʻongá.
Naʻe ʻohovale ʻa Henelī ʻi he meʻa naʻe fokotuʻu ange ʻe he palōfitá. Naʻe loto ia ke ne talaange, “ʻOku ʻikai ke ke ʻilo lelei ʻe koe ʻa e kau kominiusí.” “He ʻikai te ke lava ʻe koe ʻo fakatupulaki ha vā fengāueʻaki lelei mo kinautolu. ʻOku nau fakafepakiʻi ʻa e tui fakalotú.” Naʻá ne manatu ki he ngaahi taimi lahi naʻe faʻa ngaohikoviʻi ai ia ʻe he kau maʻu mafaí mo feinga ke lī ia ki pilīsoné.
Naʻe ʻikai ke ongo lelei ʻa e foʻi fakakaukau ko ia ke fakakaungāmeʻa kiate kinautolú.
ʻI ha pongipongi Sāpate ʻe taha, ʻi he fonua moveuveu he taú ʻo Vietinamí, naʻe hū atu ai ʻa Ngueni Vani Tā (Nguen Van The), ko e palesiteni ʻo e kiʻi Kolo Saikoní ʻi he ʻuluaki matapā ʻo e ʻaá ki ha fuʻu fale faka-Falanisē, naʻe hoko ko honau falelotu fakafeituʻú. ʻI he taimi pē ko iá, naʻe ʻātakaiʻi ia ʻe he kau mēmipa ʻo e kiʻi koló, ʻoku fotu mei honau fofongá ʻa e taʻefiemālié mo e ʻamanakí. “Palesiteni Tā! Naʻa nau kaila, “Palesiteni Tā!” “Ko e hā ha ongoongo kuó ke maʻu?”
Naʻá ne maʻu ha ongoongo, ka naʻe ʻikai ke ne fakapapauʻi pe ko e hā e anga e ongo ki ai ʻa e koló. Naʻe lue atu ki he matapā ʻo e falelotú, pea muimui atu ki ai ʻa e Kāingalotú, mo kaikaila atu mo ha ngaahi fehuʻi lahi ange. Naʻe ʻikai ke ne tali, ka naʻe tātaaʻi pē ʻe Palesiteni Tā ʻa e tuʻa ʻo e kakaí. Naʻe puke ia ʻe Kongi Toni Nu Tuongi-Vī (Cong Ton Nu Tuong-Vy ) ʻi hono nimá, ko e palesiteni Fineʻofa mo e pule liliu lea ʻo e Tohi ʻa Molomona Faka-Vietinemí.
Peá ne fehuʻi ange, “Ko e hā haʻo faleʻi Palesiteni Tā?” “Ko e hā te u talaange ki he kakai fefiné?”
Talaange ʻe Tā, “Hū mai ki loto Sisitā Vī.” Te u talaatu kiate koe ʻa e meʻa kotoa ʻoku ou ʻiló, ʻi he ʻosi ʻa e houalotu sākalamēnití.” Peá ne tapou leva kiate kinautolu kotoa ʻi he kakaí ke nau fakalongolongo hifo. “ʻE tali kotoa atu hoʻomou ngaahi fehuʻí.”
Kuo lauitaʻu, ʻa e hoko ʻa Vietinemi ko ha fonua movetevete. Naʻe mapuna hake ʻa e fepakipakí ʻi ha taimi nounou pē mei he Tau Lahi ʻa Māmani hono II, ʻi hono kapusi ʻe he ngaahi kongakau Vietinemí ʻa e kau pule faka-kolonia Falanisē naʻa nau puleʻi ʻa Vietinemi talu mei he senituli taha-hivá. Ko e taimi naʻe ʻikai tali ai ʻe he ngaahi paati fakafepaki ʻi Vietinemi Tongá ʻa e pule fakakominiusí, naʻe aʻu ai ʻa e feituʻú ki ha fepaki fakatau-toitoi fakalilifu. Naʻe kau fakataha ʻa e ngaahi kau tau ʻAmeliká mo e kau Vietinemi Tongá ʻi ha meimei taʻu ʻe hongofulu, ka naʻe hanga ʻe he lahi ʻo e maté ʻo ʻai ke ʻikai manakoa ʻa e ʻIunaiteti Siteití, ʻo fakaiku ai ki he holomui māmālie ʻa e fonuá mei he taú. Kuo ofi ʻeni ʻa e ngaahi konga kau Vietinemi Tokelaú ki he kolomuʻa fakatonga ʻo Saikoní, pea mavahe leva ʻa e toenga ʻo e kau ʻAmeliká.
Naʻe fakamanamana ʻa e ngaahi kongakau Vietinemi Tokelaú ke fakangata ʻa e kiʻi kolo Saikoní. Naʻe mamata ʻa e kiʻi koló ki he kau mai ʻa ha kau mēmipa foʻou he māhina kotoa, ʻo aʻu mai ki he uike ki muʻá, ʻa ia naʻe ʻave fakavavevave ai ʻa e kau faifekau ʻo e Siasí mei he fonuá. Naʻe laka hake ʻi ha Kāingalotu Vietinemi ʻe uangeau tupu naʻa nau lotu maʻu pē mo e kāingalotu ʻo e Siasí mei he ʻIunaiteti Siteití. Ka kuo ilifia ʻeni ʻa e Kāingalotu Vietinemí naʻa tauteaʻi kinautolu ʻe he kau Vietinemi Tokelaú ʻi heʻenau feohi ko ʻení. Naʻe ʻi ai ha kau mēmipa ia ʻo e Siasí naʻa nau ʻosi movete, ko hanau tokolahi naʻa nau kau atu ki he kakai ʻi he ngaahi malaʻe vakapuná, ʻo ʻamanaki ke nau hola mei he fonuá.
Ko e taimi naʻe hū ai ʻa Tā ki he falelotú ʻo tangutu ʻi muʻa ʻi he lokí, naʻe lava ke fanongo ki he fepāpaaki ʻa e mahafú—pea ko ha ngaahi fepāpaaki ʻe niʻihi naʻe ofi mo fakailifia ʻene ongo maí. Ko hono mālie ʻo e mōmēniti ko ʻení he naʻe ʻikai ko ha meʻa foʻou eni kiate ia. Ko e taú naʻá ne ʻomi ʻa e kau sōtia ʻAmelika naʻa nau fakafeʻiloaki iá mo ha Kāingalotu Vietinemi tokolahi ki he ongoongolelei kuo fakafoki maí. Ka ko e tau tatau pē ʻeni te ne veuveuki ʻa e kiʻi koló ke movete. Naʻá ne ongoʻi ʻo hangē ʻokú ne ʻi ha meʻa-fakaʻeiki maʻá e kiʻi haʻofanga lotú.
Naʻe ʻi ai ha kāingalotu ʻe toko 125 ʻo e kiʻi koló ʻi he fakatahá, ʻi heʻene tuʻu ʻo laka atu ki he tuʻunga malangá. Naʻa nau fotu taʻemanonga, pea naʻe tangi hanau tokolahi. Naʻá ne ongoʻi pehē foki mo ia, ka naʻá ne mapuleʻi pē ia ʻi heʻene kamataʻi ʻa e houalotu sākalamēnití. Naʻe hivaʻi ʻe he Kāingalotú ʻa e “Hau Kāingá” mo maʻu ʻa e sākalamēnití. Pea fakahoko leva ʻe Tā ʻene fakamoʻoní mo fakaafeʻi ha niʻihi kehe ke nau fai ʻa e meʻa tatau. Ka ʻi he tuʻu ʻa e Kāingalotú ʻo fai ʻenau fakamoʻoní, naʻe ʻikai ke ne lava ʻo fuʻu fakatokangaʻi ʻenau ngaahi leá. Naʻe fakafalala ʻa e Kāingalotú kiate ia ʻi he taimi faingataʻá ni, ka naʻá ne ongoʻi taʻe-taau ia.
ʻI he ʻosi ʻa e houalotú, naʻe talaange ʻe Tā ki he Kāingalotú kuo loto fiemālie ʻa e ʻŌfisi Faka-ʻAmipasitoa ʻo e ʻIunaiteti Siteití ke fetukutuku ʻa e kau mēmipa ʻo e Siasí mo ha taha pē ʻoku mateuteu ke papi. Ka ko e Kāingalotu ko ia ʻoku ʻi ai honau ngaahi fāmili naʻe ʻikai mēmipa ʻi he Siasí ko ʻenau fili ke tuku pē honau ngaahi ʻofaʻangá pe ko ʻenau nofo pē mo kinautolu. Naʻe siʻi tangi mamahi ha Kāingalotu ʻe niʻihi ʻi he ongoongo ko ʻení. Naʻa nau fehuʻi ange, “Kae fēfē siʻoku fāmilí?” “He ʻikai ke u lava ʻo mavahe taʻe-kau ai hoku fāmilí!”
ʻI he tokoni ʻa e kau mēmipa ʻo e kiʻi koló, naʻe fokotuʻutuʻu leva ʻe Tā ha lisi fetukutuku ʻo fakamahino ai ʻa e Kāingalotu ʻe ʻuluaki mavahé. Neongo e kole ʻa e ʻŌfisi faka-ʻAmipasitoá, ka naʻe kau ʻi he lisí ha ngaahi fāmili taʻe-siasi mo ha ngaahi kaungāmeʻa ʻo e kau mēmipa ʻo e kiʻi koló. Naʻe kau ʻa e uaifi ʻo Taá, ʻa Lieni, mo ʻena kiʻi fānau ʻe toko tolú ʻi he Kāingalotu he lisí. Naʻe vili ʻa e kau mēmipa ʻo e kiʻi koló ke mavahe leva ʻa e fāmili ʻo Taá koeʻuhí kae tokanga kakato ki hono fetukutuku atu ʻo e toengá. ʻI heʻene hoko ko e palesiteni fakakoló, naʻe ongoʻi ʻe Tā ko ia ʻoku totonu ke toki mavahe fakamuimui tahá.
Naʻe puna ʻa Lieni mo e fānaú, fakataha mo ʻene fineʻeikí mo e ngaahi tokouá mei Saikoni, ʻi ha ngaahi houa siʻi mei ai.
ʻI he ʻaho hono hokó, naʻe laku pomuʻi ʻe he kau Vietinemí ʻa e malaʻe vakapuna ʻi Saikoní, ʻo maumau ai ʻa e leleʻanga ki he vakapuná pea ʻikai toe lava ai ha vakapuna fakakautau ke toe tō. Pea, ʻi he houa ʻe fāngofulu mā valu hono hokó, naʻe fetuku helekopeta ʻa e toenga ʻo e kau ʻAmeliká pea mo ha kau kumi hūfanga Vietinemi pē naʻa nau lava ke ʻave. Naʻe fakatovave ʻa Tā ki he ʻōfisi fakaʻamipasitoa ʻAmeliká ke maʻu ha founga ke mavahe ai mo e toenga ʻo e Kāingalotu naʻe kei ʻi he koló. ʻI he taimi naʻe aʻu atu aí, kuo ʻosi vela ʻa e falé mo kohu tuʻu ki he ʻataá. Naʻe fakatahataha ʻa e kau tāmate afí mo e kakaí ʻi tuʻa, ka naʻe ʻikai ha toe taha ʻi he ʻōfisi fakaʻamipasitoá. Kuo ʻosi mavahe ʻa e kakai ʻAmeliká mei he koló.
ʻI heʻene holiholi vale ke tokoni ke hao ʻa e toenga ʻo e kau mēmipa ʻo e kiʻi koló, naʻe heka paiki leva ʻa Tā mo ha mēmipa ʻe taha ko Tuleni Veni Ngohia (Tran Van Nghia) ke kumi tokoni mei he Kolosi Kula Fakavahaʻapuleʻangá. Ka naʻe ʻikai fuoloa kuó na fetaulaki mo ha fuʻu kakai tokolahi ʻoku nau lele ilifia mai ʻi he halá, ʻo huʻu ki he feituʻu pē ʻe taha. Naʻe ʻi ai ha tangikē tau mo ha fuʻu meʻafana lahi naʻe lele muimui vave ange ʻiate kinautolu.
Naʻe afeʻi leva ʻe Ngohia ʻa e paikí, ka na feinga atu mo Tā ke toitoi ʻi ha loto luo. Naʻe lele mai ʻa e tangikē taú ʻi hona tafaʻakí, pea ngalulu ʻa e kelekelé ʻi heʻene fakalaka haké.
Kuo maʻu ʻe he kau Vietinemí he taimí ni ʻa Saikoni.
ʻI he ʻosi ha uike ʻe taha mei ai, ʻi Mē ʻo e 1975, kuo hifo atu ʻa Lei Mai Lieni (Le My Lien) mei ha pasi fonu ʻi ha nofoʻanga fakakautau ofi ki Senitieko, Kalefōnia, ʻi he Matāfanga Fakahihifo ʻo e ʻIunaiteti Siteití. Naʻe tuʻu ʻi muʻa ʻiate ia ha ngaahi tēniti lahi fau, hangē ha fuʻu koló, naʻe fokotuʻu ke fakamalumalu ai siʻa kau kumi hūfanga ʻe tahamano valuafe mei Vietinemi. Naʻe ʻuʻufi ʻe he musié mo e ʻoneʻoné ʻa e funga kelekelé, pea tōtō-holo ʻa e ʻuluʻakaú ʻi he ngaahi tafaʻakí. Naʻe lue takai ʻa e fānaú ʻi ha ngaahi sāketi fakakautau lalahi, pea femoʻuekina ʻa e kakai lalahí he ʻahó ʻo ʻikai siʻa fofonga malimali.
Neongo naʻe ʻi ai ʻa e fineʻeiki ʻa Liení mo hono ngaahi tokouá, ka naʻá ne ongoʻi loto-mamahi. Naʻe kei tokakovi pē mei heʻene fononga mai ki he nofoʻangá. Naʻe ʻikai ke ʻi ai haʻane paʻanga pea fuʻu siʻisiʻi mo ʻene ʻilo ki he lea faka-Pilitāniá. Pea toe ʻi ai mo ʻene kiʻi fānau ʻe tokotolú ke tokangaʻi lolotonga ʻene tatali ki ha ongoongo ki hono husepānití ʻi Vietinemi.
ʻI honau ʻuluaki ʻaho ʻi he nofoʻangá, naʻe talitali ʻa Lieni mo e kau mēmipa kehe ʻo e Kolo Saikoní—ko e tokolahi tahá ko e kakai fefine—ʻe ha kau ngāue tokoni ʻoku ʻi ai hanau ngaahi pine ke ʻiloʻi ko e kau mēmipa fakalotofonua kinautolu ʻo e siteiki Kalefōniá. Naʻe fakafeʻiloaki mai ha fefine teuteu fakaʻofoʻofa ko Tolofī Heeli (Dorothy Hurley), ko e palesiteni fakasiteiki ʻo e Fineʻofá. Naʻe ʻi ai mo e kau ngāue tokoni kehe ʻo e siteikí ke tufa ha meʻakai, vala, mo ha faitoʻo ki he Kāingalotu kumi hūfangá, mo fokotuʻutuʻu kinautolu ki ha ngaahi vāhenga faiako fakaʻapi, pea mo fokotuʻu ha Palaimeli mo ha Fineʻofa. Naʻe hangē ʻa e kau fafine ʻo e Fineʻofá kia Lieni ha kau ʻāngeló.
Naʻe fakaʻaongaʻi ʻe he kau mēmipa ʻo e Kolo Saikoní ʻa e toenga ʻo e hoʻataá ke ʻaʻahi ʻo mamata ʻi he nofoʻangá. Naʻe makulu ʻa e makamaka ʻi laló ʻi he taimi naʻe taki mamataʻi ai ʻa Lieni mo hono fāmilí ki he feituʻu faiʻanga kaí, feituʻu ʻo e Kolosi Kulá, mo e ngaahi fale siʻí. Naʻa nau lue takai holo ʻi he hoʻataá kakato, pea fuʻu ongosia ai ʻa Lieni. Naʻe ʻikai ke aʻu hono mamafá ki he kilokalami ʻe hivangofulú, pea naʻe fuʻu vaivai hono sinó ke maʻu ai ha huʻakau maʻa ʻene kiʻi taʻahine kei valevale ko Liní.
ʻI he pō ko iá, naʻe fai ʻe Lieni hono lelei tahá ke fakafiemālieʻi ʻene kiʻi fānaú. Naʻe ʻikai ke ʻoange ʻe he nofoʻangá ha sipi kafu pea naʻe taha pē kiʻi moheʻangá. Naʻe fakaʻefihi ʻene ongo kiʻi tamaiki tangata ko Vū mo Huí ʻi he kiʻi funga mohengá kae mohe ʻa e kiʻi pēpeé ʻi ha kiʻi mohenga tautau (hammock) naʻe faʻu ʻe Lieni mei ha tupenu kafu mo ha ngaahi lapa peni (rubber bands).
Naʻe ʻikai ha potu ia ke tokoto ai ʻa Lieni, pea siʻi mohe tangutu ai pē ʻi he tuliki ʻo e kiʻi moheʻangá, ʻo falala ki he pou ʻo e tēnití. Naʻe momoko ʻa e ngaahi poó, pea naʻe ʻikai tokoni ʻa e ʻea momokó ki he hōloa siʻene moʻuí. Naʻe ʻikai ke fuoloa kuo maʻu ia ʻe he fatafata vaivaí.
Neongo siʻene puké, ka naʻe ʻā hengihengia ʻa Lieni ʻi he pongipongi kotoa ke ʻomai ha fanga kiʻi hina huʻakau pēpē ʻe ono maʻa ʻene kiʻi pēpeé mo fafanga ʻa e ongo kiʻi tamaiki tangatá. ʻI he taimi kaí, naʻe feʻefiʻefihi ʻa e feituʻu faiʻanga kaí ʻi he kakaí ʻo tatali ki honau taimí. Naʻá ne fua ʻene kiʻi taʻahiné, mo tokoniʻi siʻene ongo kiʻi tamaiki tangatá ke faʻo mo toʻo ʻena peleti meʻakaí. Naʻe toki ʻalu pē ke maʻu haʻane meʻakai ʻi he taimi naʻe ʻosi ai siʻenau kaí.
Naʻe ongo moʻoni ki he loto ʻo Liení ʻi he taimi naʻe sio ai ki siʻi longaʻi fānau kehé ʻi siʻenau tatali fiekaia ʻi he lainé. Koeʻuhí naʻe faʻa ʻosi vave ʻa e meʻakaí ʻi he feituʻu faiʻanga kaí, naʻe faʻa ʻoange ai ʻe Lieni ʻa e meʻakaí ki he longaʻi fānaú ke fakapapauʻi ʻoku nau siʻi kai. Naʻe ʻi ai ha niʻihi naʻa nau vahevahe ange ʻenau kālotí mo e polokolií mo ia.
Naʻá ne lotu maʻu pē ke kei sino mālohi siʻono husepānití, mo tui kapau te ne lavaʻi hono faingataʻaʻiá, ʻe pehē pē mo hono husepānití. Naʻe teʻeki ai ke ne ongona ha meʻa mei hono husepānití talu ʻene hola mai mei Saikoní. Ka ʻi ha ngaahi uike siʻi hili ʻene tūʻutá, naʻe haʻu ʻa ʻEletā A. Fiotoa Tatolo (A. Theordore Tuttle) ʻo e Fakataha Alēlea ʻUluaki ʻo e Kau Fitungofulú ki he nofoʻangá ʻo ʻoange kia Lieni ha pōpoaki fakafoʻituitui meia Palesiteni Sipenisā W. Kimipolo, naʻe ʻaʻahi mai ki he nofoʻangá ʻo fakataha mo e kau kumi hūfangá kimuʻa pea toki aʻu mai ʻa Lieni ki aí.
Naʻe pehē ʻe he pōpoaki ʻa e palōfitá, “ʻOku ou fakamoʻoniʻi atu ʻe fakahaofi ho husepānití, pea ʻe fakatahaʻi kimoutolu ko ha fāmili, ʻi he taimi ʻa e ʻEikí.”
ʻI hono teketeke ʻe Lieni ʻene kiʻi pēpeé he taimí ni ʻi heʻene tangi he pongipongí, naʻá ne tangi foki mo ia.” Naʻá ne kole taaumaʻu ki he ʻEikí, “Fakamolemole muʻa, ʻo tuku pē ke u moʻui ʻi he ʻahó ni”