Vahe 21
Ko Ha Tenga ʻo e ʻOfá
ʻI he kamataʻanga ʻo e 1981, naʻe fakalele ʻe he taʻu onongofulu mā tolu ko Sūlia Mavimipelá ha ngoue fakakolo ofi ki hono ʻapí ʻi Soueto, ko ha feituʻu ʻo e kau ʻUliʻulí mo ha kakai ʻe taha miliona tupu ʻi he tafaʻaki fakahihifo ʻo Sohānesipeeki, ʻi Saute ʻAfiliká. Ko Sūliá ko ha puleako mālōlō ia ʻi he ʻapiako lautohí, pea naʻá ne kamataʻi ʻa e ngoué ʻi ha ngaahi taʻu siʻi kimuʻa ke tokoni ki he kakai kei talavou ʻo e koló ʻi heʻenau tupu ʻo lalahi lolotonga ʻo e lau lanú, ko e tuʻutuʻuni fakaʻofisiale ʻa Saute ʻAfilika ki he vahevahe fakamatakalí.
ʻI heʻene hoko ko ha fefine ʻUliʻulí, naʻá ne ʻiloʻi ʻa e faingataʻa ke moʻui ʻi he founga ko ʻení. Naʻe hanga ʻe he ngaahi laó ʻo tukuhifo ʻa e kakai ʻUliʻulí pea lau ko ha kakai tuʻufonua maʻulalo ange kinautolu. ʻI he ngaahi taʻu lahi, naʻe fakamālohiʻi ʻe he puleʻangá ʻa e kakai Saute ʻAfilika ʻUliʻuli kotoa ke nau toʻo holo ha tohi ID ʻoku ʻasi ai ʻa e feituʻu ʻe lava mo ʻikai lava ʻa e tokotahá ʻo ʻalu ki aí. Kapau naʻe ʻiloʻi ha niʻihi ʻUliʻuli ʻi he ngaahi kaungāʻapi ʻo e kakai hinehiná ʻi he taimi hala ʻi he ʻahó, ʻe lava ke tā, puke pōpula, pe aʻu ʻo tāmateʻi kinautolu.
ʻI he kei siʻi ʻa Sūliá, naʻe fakamālohiʻi ia ke hiki mei hono feituʻu kaungāʻapi matakali kehekehe ʻi Sohānesipēkí ki ha fale ʻi Soueto kuo ʻosi fakamakehekeheʻi. Ko ʻeni, ʻi heʻene mamata ki he faingataʻaʻia ʻa e kakai kei talavoú ʻi he ngaahi tōʻonga taʻetotonu ko ʻení, naʻá ne hohaʻa ki he mamahi naʻe fakautuutu ʻi honau lotó. Naʻá ne fakaʻamu ke akoʻi ʻaki kinautolu ʻene ngoué, ki he founga ke ikuʻi ai ʻenau ʻitá kimuʻa peá ne fakaʻauha kinautolu mo e niʻihi ʻoku nau ʻofa aí.
Te ne talaange, “Sio mai, ʻoku fefeka mo pakukā ʻa e kelekele ko ʻení. Ka ʻo kapau te tau hokaʻi ʻaki ha huo sipeiti pe ko ha huolanga, ʻe papā ia ʻo fakakongokonga. Kapau leva te tau veteki ʻa e ngaahi kongokonga ko iá pea laku ki ai ha tengaʻi ʻakau, ʻe tupu ʻa e tengaʻi ʻakaú.”
Naʻá ne loto ke mahino ki he kakai kei talavoú ʻa e pōpoaki ʻo e kelekele fefeká. Naʻá ne talaange, “Tau keli muʻa ʻa e kelekele ʻo e mamahí, ʻo lī ki ai ha tenga ʻo e ʻofá, pea tau vakai ki ha ngaahi fua ʻe lava ke ne ‘omi maʻatautolu. He ʻikai ke tau maʻu ʻa e ʻofá ʻo ʻikai kau ai hono fakamolemoleʻi ʻa e niʻihi kehé.”
Ko ha lēsoni ʻeni naʻe kei ako ʻe Sūlia. ʻI he ngaahi taʻu lahi kimuʻá, naʻe mate hono husepāniti ko Sioné ʻi haʻane fepaki ʻi he meʻalelé mo ha fakaʻuli hinehina. ʻI he ʻalu ʻa Sūlia ki ʻapi polisi ke ʻave ʻene ngāʻotoʻotá, naʻá ne ʻilo ai ko e paʻanga naʻe maʻu hono husepānití ʻi he taimi ko iá naʻe kaihaʻasi ia hili ʻa e fakatuʻutāmakí. Pea neongo naʻá ne tui naʻe tonuhia ʻa Sione ʻi he fakatuʻutāmakí, ka naʻe tukuakiʻi ko Sione naʻe halá ʻe ha fakamaauʻanga naʻe kakai hinehina ʻatā.
Naʻe iku ʻa e pekia ʻa Sioné ke ohi toko taha hake ʻe Sūlia ʻena fānaú, pea naʻá ne faingataʻaʻia ʻi heʻene feinga ke tauhi kinauá. Ka ʻi he faingataʻa ʻa e ngaahi tūkungá, naʻá ne ongoʻi naʻe ofi ʻa Sīsū Kalaisi kiate ia, ʻo fakanonga mo fakafiemālieʻi ia.
Ko ʻeni, naʻe laka hake ʻi he taʻu ʻe uofulu mā nima hili ʻa e pekia ʻa Sioné, naʻe ʻiloʻi ʻe Sūlia naʻe mahuʻinga ʻa e fakamolemolé ke faitoʻo hono mamahí. Ka naʻe kei faingataʻa pē ke ne fakamolemoleʻi ʻa kinautolu naʻa nau fakameleʻi ʻa e hingoa lelei ʻo Sioné mo kaihaʻa meiate ia mo hono fāmilí.
ʻI ha ʻaho ʻe taha, ʻi Sune 1981, naʻe fakaafeʻi ʻa Sūlia ke tokoni ʻi hono fakamaʻa ha fale ʻo e toʻu tupú mo ha laipeli naʻe fahi mo tutu ʻi he ngaahi moveuveu kimuí ni ʻi he laulanú. ʻI he aʻu atu ʻa Sūlia ki aí, naʻá ne ʻohovale ke sio ki ha ongo talavou ʻokú na fakamaʻa mai ʻa e vevé ʻaki ha sāvolo. Ko ha ongo tangata hinehina ia—ko ha meʻa fakaʻohovale ia ke mamata ki ai ʻi Soueto.
Naʻe malimali ʻa e ongo talavoú mo talaange kia Sūlia ko e ongo faifekau ʻAmelika kinaua pea naʻá na haʻu ke tokoni. Naʻe ʻi ai pē ʻena kiʻi ʻilo ki he ngoué peá na talanoa mo Sūlia kau ki heʻene ngoue fakakoló. Naʻá na kole ange foki pe te na lava ʻo ʻaʻahi ange kiate ia. Naʻe ʻikai ke vēkeveke ʻa Sūlia ke fetaulaki mo kinaua. ʻI hono fakaafeʻi ha ongo tangata hinehina ki hono ʻapí, naʻe tuʻu fakatuʻutāmaki ia ki ha fakamamahi ʻe fakahoko kiate ia mo hono fāmilí. ʻE fakakaukau nai hono ngaahi kaungāʻapí naʻá ne fengāueʻaki mo e polisí pe ko e puleʻanga laulanú?
Naʻe kamata ke ne kumi ha ʻuhinga, ka naʻá ne maʻu ha ongo mālohi ʻi hono lotó peá ne ʻiloʻi naʻe pau ke ne tuku ke na ʻaʻahi ange. Naʻá ne talaange ke na ʻalu ange ʻi ha ʻaho ʻe tolu mei ai.
Naʻe aʻu taimi tonu ange ʻa e ongo tangatá, naʻá na sote hina mo tui ha pine hingoa. Naʻá na fakafeʻiloaki mai kinaua ko ha ongo faifekau mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne fakafanongo lelei ki heʻena pōpoakí. Ka naʻá ne feinga ʻi he ʻaʻahi hono uá ke fakakaukauʻi ha founga te ne talaange fakalelei ai naʻe ʻikai ke ne mahuʻingaʻia ʻi heʻena pōpoakí.
Naʻe tuhu leva ha taha ʻi he ongo faifekaú ki ha tā ʻo Sūlia mo hono husepāniti kuo mamaʻo atú pea fehuʻi ange, “ʻOku ʻi fē ia?”
Naʻá ne talaange, “ʻOku ʻosi mālōlō ia.”
Naʻe vahevahe ange ʻa e ongo faifekaú ʻo kau ki he papitaiso maʻá e pekiá. Naʻe ʻikai ke ne fuʻu tui ki ai. Naʻe taʻu lahi ʻene ʻalu ki ha ngaahi siasi kehekehe. Naʻe teʻeki ke ne fanongo tuʻo taha ki ha taha naʻá ne pehē ʻoku lava ʻo papitaiso ʻa e kau pekiá.
Naʻe fakaava ʻe ha faifekau ʻa e Fuakava Foʻoú pea kole ange ke ne lau ʻa e 1 Kolinitō 15:29: “Kae ʻikai, pea ko e hā ʻe fai ʻe kinautolu kuo papitaiso ki he maté, ʻo kapau ʻe ʻikai ʻaupito toetuʻu ʻa e maté? Ko e hā ʻoku papitaiso ai ʻa kinautolu ki he maté?”
Naʻe tohoakiʻi ʻene tokangá ʻe he vēsí. Naʻe kamata ke ne fanongo ki he ongo faifekaú mo ha loto fiefanongo. ʻI heʻena akoʻi kiate ia ʻo kau ki he ngaahi fāmili taʻengatá, naʻá ne ako ai ʻe lava ʻo fakahoko ʻi he temipalé ʻa e papitaisó mo ha ngaahi ouau kehe maʻá e kau pekiá ʻe he niʻihi ʻoku nau ʻofa aí. Te ne lava foki ʻo toe feʻiloaki mo kinautolu kuo mamaʻo atú—kau ai ʻa Sione—ʻi he maama ka hoko maí.
ʻI he kamata ke ne lau ʻa e Tohi ʻa Molomoná, naʻe kamata ke liliu ʻene moʻuí. Ko e fuofua taimi ia naʻá ne fakatokangaʻi ai, ko e kakai kotoa pē ko ha fāmili pē ʻe taha. Naʻe ʻoange ʻe he ongoongolelei ʻo Sīsū Kalaisi kuo fakafoki maí ʻa e ʻamanaki lelei te ne lava ʻo fakamolemoleʻi ʻa kinautolu naʻa nau fakamamahiʻi ia mo ʻene fānaú.
Hili ha māhina ʻe ono mei he fetaulaki ʻa Sūlia mo e ongo faifekaú, naʻá ne papitaiso. Hili ha māhina ʻe taha mei ai, naʻe fakaafeʻi ia ke ne lea ʻi he konifelenisi fakasiteikí. Lolotonga ʻa e puleʻanga laulanú, naʻe ʻikai feinga ʻa e Siasí ke malanga ʻi he kakai ʻUliʻuli ʻi Saute ʻAfiliká. Ka naʻe kamata ke mōlia ʻa e laulanú ʻi he konga kimuʻa ʻo e 1980 tupú, ʻo faingofua ange ai ki he kāingalotu ʻUliʻuli mo hinehina ʻo e tui fakalotu tatau ke nau fakatahataha pea lotu fakataha. ʻI ha ngaahi māhina siʻi kimuʻa pea papitaiso ʻa Sūliá, naʻe fokotuʻu ha haʻofanga lotu maʻá e Kāingalotu mei Souetó.
Naʻe manavasiʻi ʻa Sūlia ʻi heʻene tuʻu ʻi muʻa ʻi ha siteiki naʻe meimei kakai hinehina ʻataʻatā pē. Naʻá ne hohaʻa naʻa hoko ʻene mamahi ʻi he pekia ʻa Sioné ke faingataʻa ai ʻene feohi mo e kāingalotu kehe ʻo e Siasí. Ka naʻe fonu hono lotó ʻi he lotu, pea naʻe ueʻi ia ʻe he ʻEikí ke vahevahe ʻene talanoá.
Naʻá ne talanoa kau ki he pekia hono husepānití, ko e angakovi ʻa e kau polisí, pea mo e mamahi naʻe fuoloa fau ʻene feʻao mo iá. Naʻá ne fakamoʻoni ʻo pehē, “Kuo faifai peá u maʻu ʻa e siasi te ne lava ʻo akoʻi au ke u fakamolemole moʻoní.” Hangē ko e ngaahi kongokonga kelekele ʻi ha ngoué, naʻe toʻo atu ai ʻene loto-mamahí.
Naʻá ne pehē, ko e meʻa pē naʻe toé ko e melino mo e fakamolemole.
ʻI he fokotuʻu ange ʻe he kau ʻōfisa fakapuleʻangá ke langa ha temipale ʻi he Lepapulika Fakatemokālati ʻo Siamané (LFS), naʻe fakamafaiʻi ʻe he Kau Palesitenisī ʻUluakí ʻa Henelī Pekihaati ke ne kole ha ngofua ke langa ha falelotu mo ha tafaʻaki makehe ki hono fakahoko ʻo e ʻenitaumeni mo e sila maʻá e kakai moʻuí, kae ʻikai ke fai ha ngaahi ouau fakafofonga maʻá e pekiá.
Hili ha ʻaukai mo e lotu ʻa Henelī mo hono ongo tokoni ʻi he kau palesitenisī ʻo e Misiona Dresden, naʻa nau fokotuʻu ai ke langa ha falelotu ʻi Kali-Makisi-Sitati. Naʻe tokolahi ʻa e Kāingalotu ʻi he koló, pea naʻa nau fiemaʻu ha falelotu foʻou. Ka naʻe ʻikai loto ʻa e kau ʻōfisa fakalotofonuá ke foaki ha ngofua ki he Siasí, ʻo pehē naʻe ʻikai fiemaʻu ʻe he koló ha toe ngaahi siasi lahi ange. Ka naʻa nau fokotuʻu ange ʻa Falaipeki, ko ha kolo ʻunivēsiti ofi mai.
Naʻe talaange ʻe Henelī, “ʻIkai ke lava ia. ʻOku mau fiemaʻu ʻa Kali-Makisi-Sitati.”
Naʻe hangē naʻe ʻosi fakapapau ʻa e fakakaukau ʻa e kau palesitenisī fakamisioná. Ka ʻi heʻenau ʻaukai mo lotú, naʻe kamata ke fakakaukau fakamātoato ʻa Henelī mo hono ongo tokoní ki he langa ʻi Falaipekí. Ko e koló naʻe nofo ai ha kiʻi kolo toko siʻi ʻo e Kāingalotú pea ofi ki he ngaahi kolo ʻi Tulesiteni mo e ngaahi kolo lalahi mo e fanga kiʻi kolo kehe ʻi he feituʻú.
Ko e lahi ange ʻa e fakalaulauloto ʻa Henelī mo hono ongo tokoní ki aí, ko e lahi ange ia hono fakalotoa kinautolú. Naʻá nau pehē pē ʻiate kinautolu, “ʻIo, ko hono moʻoní ʻoku ʻikai kovi ʻa Falaipeki ia.”
Naʻe hangē naʻe vēkeveke ʻa e kau taki fakapuleʻanga ʻi Falaipekí ke langa ʻe he Siasí ha fale hangē ko e Temipale Swiss ʻi honau koló. ʻI he LFS, naʻe feinga ʻa e puleʻangá ke fakamālohia honau ngaahi vā fetuʻutaki mo e kakai lotu naʻa nau fakaʻapaʻapaʻi ʻa e mafai ki he siteití. Naʻe ʻiloʻi fakaʻofisiale ʻi he taimí ni ʻe he LFS ha ngaahi tui fakalotu ʻe niʻihi pea feinga ke toe langa ha ngaahi falelotu fakahisitōlia naʻe fakaʻauha lolotonga ʻo e Tau Lahi ʻa Māmani Hono II.
Koeʻuhí naʻe ʻosi ʻi ai ha falelotu lelei ʻo e Kāingalotu ʻi Falaipekí, naʻe maʻu ʻe Henelī ha ongo mālohi ʻoku totonu ke fakatatali ʻe he Siasí ʻene palani ke langa ha fale ʻe lava ke fai ai e lotú mo fakahoko ai mo ha ngaahi ouau fakatemipale kae langa ha temipale angamaheni pē naʻe ʻi ai mo ha faiʻanga papitaiso mo fakaʻatā ki he ngāue ouau fakafofonga kehé. Naʻá ne fokotuʻu ʻa e fakakaukaú ki he kau taki ʻo e Siasí ʻi Sōleki Sití peá ne maʻu ha ngofua ke kumi ha tuʻuʻanga ki ha fale faifatongia kakato ʻo e ʻEikí ʻi Falaipeki.
Naʻe ʻave leva ʻe Henelī ʻa e palaní ki ha fakataha fakakolo ʻi Falaipeki fakataha mo Falangikē ʻĒpeli, ko e sekelitali pule ʻa e misioná mo ha tangataʻi fonua ʻo Falaipeki. Naʻe ʻoange ʻe he kōsilioó ki he Siasí ha feituʻu ʻe ua ʻe malava ke langa ai. Ko e ʻuluaki kelekelé naʻe tuʻu ia ʻi he loto koló, ka naʻe siʻisiʻi ia pea maʻulalo ia ʻi he halá, ʻo faingataʻa ki he niʻihi naʻe fononga aí ke nau mamata mai ki ai. Ko e feituʻu ʻe tahá ko ha loto ʻataʻatā ia naʻe teʻeki fakaʻataʻatā ʻi ha tafungofunga ʻi he tafaʻaki fakatokelau hihifo ʻo e koló. Naʻe ʻikai ha taliʻanga pasi ofi ai, ka naʻe māʻolunga ʻa e feituʻú ʻo ʻasi lelei ki he feituʻu takatakai aí.
ʻI he mamata pē ʻa Henelī mo Falangikē ki he feituʻu hono uá, naʻá na ʻiloʻi naʻá na maʻu ʻa e feituʻu totonu ki he temipalé.
ʻI he ʻaho 27 ʻo Fēpueli 1982, naʻe ʻaʻahi ai ʻa ʻEletā Tōmasi S. Monisoni ki he LFS ke vakai ki he Kāingalotu ʻi Siamane Hahaké mo talanoa mo Henelī ki he tuʻuʻanga ʻo e temipale foʻoú. Kuo meimei taʻu ʻe hongofulu mā fā talu mei he fuofua feʻiloaki ʻa Henelī mo hono uaifi ko ʻIngikaá pea mo e ʻaposetoló, pea naʻa nau kaungāmeʻa lelei. Naʻe ʻoange ʻe ʻEletā Monisoni kia ʻIngikā ha peleti teuteu mo ha piva foʻou mei hono uaifi ko Falanisesí. Naʻá ne fakaʻohovaleʻi foki ʻa Topiesi, ko e foha taʻu hongofulu mā fā ʻo e ongo Pekihātí, ʻaki ha kalakuleita ʻoku lava faʻo ʻi he kato hoto soté—ko ha koloa hāhāmolofia ʻi he LFS.
ʻI he ʻaho hono hokó, naʻe ʻave ʻe Henelī ʻa ʻEletā Monisoni ki he feituʻú. Neongo naʻe mahino kia ʻEletā Monisoni ʻa e ʻuhinga naʻe ʻikai lava ai ʻa e Siasí ʻo langa ʻa e temipalé ʻi Kali-Makisi-Sitatí, ka naʻe ʻi ai haʻane ngaahi fehuʻi ki he tuʻuʻanga ʻi Falaipekí.
Naʻá ne ʻeke ange kia Henelī, “Kuó ke fakakaukauʻi lelei ʻa e fili ko ʻení? Ko e feituʻu totonu nai ʻeni? ʻE omi fēfē ʻa e kakaí ki ai ʻi he ʻikai feʻunga ʻa e pasi ki he fefonongaʻaki ʻa e kakaí?”
Naʻe tali ʻe Henelī ʻa e ngaahi fehuʻi ʻa ʻEletā Monisoní ʻi he lelei taha naʻá ne lavá. Naʻá ne fakapapauʻi ange leva naʻá na poupou mālohi mo hono ongo tokoní ki hono langa ha temipale aí. Naʻá ne talaange naʻa nau ʻaukai mo lotua ʻa e feituʻú, pea naʻa nau ongoʻi ko e feituʻu ia naʻe finangalo ʻa e ʻEikí ke tuʻu ai Hono falé ʻi he LFS.
Naʻe ʻikai toe fiemaʻu ke fakalotoa lahi ange ʻa ʻEletā Monisoni. Naʻe fakatau ʻe he Siasí ʻa e kelekelé pea fakahū ʻa e ngaahi palani ʻo e falé naʻe fakaleleiʻí ki he puleʻanga Siamane Hahaké.
ʻI he ʻaho 31 ʻo Māʻasi 1982, naʻe tangutu fakalongolongo ʻa Tēvita Kalipelefi ʻi ha ʻōfisi ʻi Selusalema, ʻi hono vakaiʻi ʻe ʻAmanoni Niva, ko e ʻenisinia pule ʻo e koló, ha mape lahi ʻo e Moʻunga ʻŌlivé ne valivali nima pē. Naʻe tuʻu fakataha mo kinaua ʻi he lokí ha kau tā palani kehe ʻe toko ono ʻo e koló.
Naʻe lau māhina ʻa e nofo ʻamanaki ʻa Tēvita ke fakataha mo ʻAmanoní. Naʻe ʻosi maau ʻa e Siasí ke hoko atu ʻene palani ke langa ha Senitā ʻi Selusalema maʻá e kau ako ʻa BYU ʻi he fonua mulí pea mo e Kāingalotu fakalotofonuá. ʻI hono fokotuʻu pē ʻa e senitaá, ʻe fakaʻofisiale leva ʻa e ʻi ai ʻa e Siasí ʻi he Fonua Tapú. ʻE hoko ia ko ha feituʻu ʻo e ako, ʻilo, mo e nonga, ʻe lava ʻa e kāingalotu ʻo e Siasí ʻo omi ki ai ke ʻeveʻeva ʻi he feituʻu naʻe ʻaʻeva ai ʻa Sīsuú, ako lahi ange kau ki he tupuʻanga fakakuongamuʻa ʻo ʻenau tuí, mo fakahoungaʻi ʻa e ngaahi anga fakafonua mo e tui ʻa e kakai ʻoku nofo ʻi he Hahake Lotolotó.
Naʻe loto ʻa e kau taki ʻo e Siasí, kau ai ʻa Tēvita, ke langa ʻa e senitaá ʻi he feituʻu naʻe saiʻia ai ʻa Palesiteni Kimipolo lolotonga ʻene ʻaʻahi mai ki he koló ʻi he 1979. Ka naʻe ofi ʻa e feituʻú ki he Moʻunga Sikapasí, ko e feituʻu māʻolunga taha ia ʻi he Moʻunga ʻŌlivé, pea ko ha “feituʻu lanu mata” naʻe tuku ʻe he puleʻangá, ʻo tapui ke fai ai ha langa. Naʻe ʻosi feinga ha kau langa kehe ke fulihi ʻa e feituʻú ka naʻe ʻikai ola lelei. Kapau naʻe fakaʻamu ʻa e Siasí ke langa ai, ʻe fiemaʻu ke liliu ʻe ʻAmanoni ʻa e ngataʻanga ʻo e feituʻu lanu matá.
Naʻe poupou ʻa e Pule Kolo ko Teti Kolekí ki he loto ʻa e Siasí ke langa ha senitā ʻi he koló. Naʻá ne tui ʻe tokoni ʻa e kaungāmeʻa ʻa e Siasí mo e kau Mosilemí mo e kau Siú ke nau fakatou femahinoʻaki mo nofo melino. Ka naʻá ne kei tui pē ʻe faingataʻa ke maʻu ʻa e kelekele ʻi he Moʻunga Sikapasí. ʻI hono kole ʻe Tetí, naʻe ʻosi vakaiʻi ʻe Tēvita ha ngaahi feituʻu kehe ʻe ala langa ai. Pea ʻi heʻene maʻu pē ha feituʻu leleí, naʻá ne fetuʻutaki ki he hetikuota ʻo e Siasí. Ka naʻe ʻikai fakangofua ha taha ʻo e ngaahi feituʻu ko ʻení, pea naʻe faleʻi ia ʻe Palesiteni N. ʻEletoni Tena ke nofotaha pē ʻi he Moʻunga Sikapasí.
ʻI he ʻaho ʻe taha, naʻe fakalotolahiʻi ʻe he Pule Kolo ko Kolekí ʻa ʻAmanoni ke fokotuʻutuʻu ha fakataha mo Tēvita ke fanongo ki heʻene fakamatalá. Naʻe fakaafeʻi mai foki ʻa Tēvita Lesiniki, ko e tangata tā palani fakalotofonua naʻe fakangāueʻi ʻe he Siasí ke ne tā ʻa e Senitā BYU ʻi Selusalemá.
Naʻe fakaʻaliʻali ʻe Lesiniki kia ʻAmanoni ha niʻihi ʻo ʻene ngaahi palani ki he ʻapiakó mo fakamamafaʻi ange ʻene ofi ki he ʻUnivēsiti Hepelū ʻo Selusalemá, ʻa ia naʻá na tokoni mo ʻAmanoni ke tā ʻi he ngaahi taʻu kimuʻá. Naʻe hoko atu hono siofi ʻe ʻAmanoni ʻa e mapé ʻi ha ngaahi lau miniti, pea naʻe tatau pē ʻene fakalongolongó mo e lōngonoa ʻa e lokí. Naʻe fakafokifā naʻá ne pehē ange, “ʻOmai ha peni valivali.” Naʻe ʻikai ke ʻi ai ha peni ʻa ha taha ʻi he lokí, pea naʻe kumi fakavave ha taha ʻo maʻu mai ha peni. Naʻá ne mafao atu leva hono nimá ʻo kamata tā ʻi he mapé.
ʻI he mamata ʻa e tokotaha kotoa ki aí, naʻá ne liliu ʻa e feituʻu lanu matá, ʻo tā takai ha laine kulokula ʻi he feituʻu tonu naʻe loto ʻa e Siasí ke langa ai ʻa e Senitā Selusalemá.
Naʻá ne pehē, “Ko e laine ʻeni ʻe fai ai e langá” Naʻá ne toʻo mai ha sitapa fakaʻofisiale ʻo sitapaʻi ʻaki ʻa e mapé, pea fakamoʻoni hingoa ai. Naʻá ne pehē, “Ko ia!”
Naʻe kamokamo ʻa e taha kotoa. Naʻe ʻohovale moʻoni ʻa Tēvita. Naʻe toki maʻú ni ʻe he Siasí ha fakangofua ki ha meʻa naʻe fakakaukau ʻa e taha kotoa naʻe taʻemalava. Naʻe ʻikai ke ne faʻa tatali ke fetuʻutaki ki he hetikuota ʻo e Siasí ʻo fakahā kiate kinautolu ʻa e maná.
Hili ha ngaahi māhina siʻi mei ai, ʻi Siulai 1982, naʻe fononga meʻalele ʻa ʻOlokā Kovalova mo ha kiʻi kulupu Kāingalotu toko siʻi ki ha tafenga vai ofi ki Puluno, Sekisolovākia ke fakahoko hono papitaisó.
Talu mei he fuofua houalotu sākalamēniti ʻa ʻOlokā ʻi he ʻapi ʻo ʻOtaka Voikuvuká, naʻe fakaʻau ke ne saiʻia ʻi he tui ʻa e Kāingalotu matuʻotuʻa ʻo Sekisolovākiá. Naʻá ne ongoʻi naʻe langaki hake ʻene moʻuí ʻe heʻenau ngaahi fealeaʻaki ʻi he Lautohi Faka-Sāpaté pea naʻá ne vahevahe loto-fiemālie ʻene ngaahi fakakaukaú.
ʻI he ngaahi māhina kimuʻa ʻi he papitaiso ʻa ʻOlokaá, naʻá ne maʻu ʻa e ngaahi lēsoni fakafaifekaú meia Seilomia Holomani, ko ha mēmipa ʻo e kau palesitenisī ʻo e Kolo Pulunó. Naʻe faingataʻa mo taʻefakafiemālie ʻa e ngaahi fuofua lēsoní koeʻuhí naʻe foʻou ʻaupito ʻa e ngaahi foʻi lea fakalotú kiate ia. Naʻe hangē ʻa e palani ʻo e fakamoʻuí ha talanoa fanangá, pea naʻe fefaʻuhi ʻa ʻOlokā mo ha ngaahi fehuʻi fekauʻaki mo e Tamai Hēvaní.
Naʻá ne hohaʻa foki ki he ngaahi palopalema ʻe hoko ʻi he hili ʻa e papitaisó. Naʻe kamata ke tupulaki ʻa e Siasí ʻi he feituʻu lotoloto mo fakahahake ʻo ʻIulopé hili ʻa e 1975, ʻi he taimi naʻe fokotuʻu ai ʻe Henelī Pekihaati mo hono ongo tokoni ʻi he kau palesitenisī ʻo e Misiona Dresden, ha tangata ko Sili Sinaitafala ke ne tokangaʻi ʻa e Kāingalotu ʻi Sekisolovākiá. Ka naʻe teʻeki ke ʻilo lahia ʻa e Siasí pea ʻikai mahino lelei ʻi he fonuá. Naʻa mo ʻene fakakaukau ke fakangaloki ʻa e ongoongolelei ʻo Kalaisí, naʻá ne ongoʻi ʻi hono lotó naʻe moʻoni ia.
Naʻe ʻaukai ʻa ʻOlokā ʻi he ʻaho kakato naʻe papitaiso aí. ʻI he hokosia ʻa e taimí, naʻá ne heka ʻi he meʻalelé ʻo ʻalu ki he tafenga vaí mo ʻOtaka mo Kati Voikuvuka pea mo Seilomia mo hono uaifi ko Maliá. Naʻe fakataha ʻa e kulupú ʻi he veʻe vaí pea fai ha lotu. Kae kimuʻa pea nau lava ʻo hoko atu ʻa e ouaú, naʻa nau ʻohovale ʻi he fanongo atu ki he leʻo ʻo e kau tangata toutai tokolahi naʻa nau lue hake ʻi he matāfangá. Naʻe fakaofi atu ʻa e kau tangatá ʻo tangutu ofi ki he feituʻu naʻe ʻai ke papitaiso ai ʻa ʻOlokaá.
Naʻe talaange ʻe ʻOtaka, “ʻOku meimei ke loloto ʻaupito ʻa e ngaahi ngataʻanga ʻo e vai ʻi he feituʻú ni. Ko e feituʻu pē ʻeni ʻoku mau ʻilo ʻoku tafe māmālie mo malu ke fai ha hifo ki he vaí.”
Naʻe ʻikai toe ʻi ai haʻanau fili, ka ko e nofo pē ʻa ʻOlokā mo hono ngaahi kaungāmeʻá ʻo tatali. Naʻe ʻosi atu ha miniti ʻe hongofulu, pea aʻu ʻo uofulu. Naʻe teʻeki pē ke ʻasi mai ha fakaʻilonga ʻe mavahe ʻa e kau toutaí.
Naʻe fakafalala ʻe ʻOlokā hono ʻulú ki ha fuʻu ʻakau. Naʻá ne fakakaukau, “Mahalo ʻoku ʻikai ke u mateuteu feʻunga, pe ʻoku ʻikai mālohi feʻunga ʻeku fakamoʻoní pe kuo teʻeki ke u fakatomala kakato.”
Naʻe ʻamanaki ke ne tūʻulutui ʻo lotu mo e taki ʻe Seilomia hono nimá ke na lue foki ki he toenga ʻo e Kāingalotú.
Naʻá ne talaange, “ʻOku ou tui ʻoku fiemaʻu ke tau toe lotu ke malava ʻo papitaiso ʻa ʻOlokā he ʻahó ni.”
Naʻe tūʻulutui fakataha ʻa e kulupú ʻi he tautapa ʻa Seilomia ki he ʻOtuá maʻa ʻOlokaá. Naʻe lava ke ongoʻi (ʻe Olokā) ʻa e ongo vivili ʻa e leʻo (ʻo Seilomiá). ʻI he ʻosi ʻa e lotú, pea hili ha ngaahi miniti siʻi mei ai naʻe tuʻu fakafokifā hake leva ʻa e kau tangata toutaí ʻo mavahe.
Naʻe kei nonga pē mo tofukī ʻa e vaí ʻi he taki atu ʻe Seilomia ʻa e nima ʻo ʻOlokaá pea lea ʻaki ʻa e lotu ʻo e papitaisó. ʻI he fanongo ʻa ʻOlokā ki hono hingoá, naʻá ne ongoʻi naʻe ngata ha konga ʻo ʻene moʻuí. Naʻe ʻamanaki ke liliu ʻa e meʻa kotoa pē ʻi heʻene fili ko ia ke muimui kia Kalaisi mo ʻEne ongoongolelei kuo fakafoki maí. Naʻá ne fiefia lahi, pea naʻá ne ʻiloʻi naʻe lekooti hono papitaisó ʻi he langí.
Naʻe ʻikai fuoloa mei ai kuo fononga foki ʻa e kulupú ki Puluno ʻi he meʻalele ʻa Seilomiá. ʻI heʻenau fonongá, naʻa nau fanongo ki ha kāsete ʻa e Kuaea Tāpanekalé. Naʻe ongoʻi ʻe ʻOlokā hangē naʻá ne fanongo ki he kau ʻāngeló, pea naʻá ne ofo ʻi hono talaange ʻe Seilomia ko e kau hivá ko ha kau mēmipa kotoa kinautolu ʻo e Siasí. Naʻá ne fifili pe naʻe fēfē nai ʻa e moʻuí ki he Kāingalotu naʻa nau nofo ʻi ha fonua naʻe tauʻatāina ai ʻa e tui fakalotú pea ʻi ai mo ha palōfita moʻuí.
Hili ʻa e tūʻuta ʻa e Kāingalotú ʻi Pulunó, naʻa nau fakatahataha ki he ʻapi ʻo Seilomiá. Naʻe hilifaki ʻe Seilomia, ʻOkata, mo ha kau maʻu lakanga fakataulaʻeiki kehe honau nimá ʻi he ʻulu ʻo ʻOlokaá. ʻI heʻenau fakamaʻu ia ko ha mēmipa ʻo e Siasí, naʻá ne ongoʻi naʻe ʻōʻōfaki ia ʻe he Laumālie Māʻoniʻoní. ʻI he momeniti ko iá, naʻá ne ʻiloʻi ko ha ʻofefine ia ʻo e ʻOtuá.
ʻI he tāpuakí, naʻe fakahā ai ʻe Seilomia ʻe tokolahi ha kakai kei talavou te nau kau ki he Siasí ʻo fakafou ʻia ʻOlokā, pea akoʻi ange ʻa e ongoongoleleí ʻi ha founga ʻe mahino kiate kinautolu. Naʻá ne ʻohovale ʻi he ngaahi leá. Naʻe ngali taʻemalava ia, ʻi he taimi ko iá, ke ne lava ʻo vahevahe tauʻatāina ʻa e ongoongoleleí.
Neongo ia, naʻá ne tukulotoʻi ʻa e ngaahi lea ko iá mo fakaʻamua ki ha ʻaho ʻe hoko ai ʻo moʻoní.
ʻI he ʻaho 27 Nōvema 1982, naʻe ʻaoʻaofia ʻa e langí ʻi Sohānesipeeki, Saute ʻAfilika, ʻi he fakatahataha ha kakai ʻe toko 850 ki hono tanupou ʻo e fuofua fale ʻo e ʻEikí ʻi he konitinēniti ʻAfiliká. Naʻe haʻu ʻa Sūlia Mavimipela ki he ouaú mo ha ngaahi fāmili ʻe hongofulu mei Soueto, ko e kolo ia ʻa e kau ʻUliʻuli ʻi he tafaʻaki fakahihifo ʻo e koló. Mei he taimi pē naʻe ʻilo ai ʻe Sūlia kau ki he ngaahi temipalé, naʻá ne loto ke fakahoko ʻa e ngāue ki he ouaú maʻa hono husepāniti mo e ongomātuʻa kuo mamaʻo atú. Naʻá ne fakapapauʻi ke kau ʻi he meʻa mahuʻinga kotoa pē ʻe hoko ʻi he langa ʻo e temipalé.
Naʻe puleʻi ʻa e ouaú ʻe ʻEletā Māvini J. ʻEsitoni ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻI heʻene lea tukú, naʻá ne lea ki he fiefia fakalaumālie naʻá ne ongoʻi mei he Kāingalotu Saute ʻAfiliká. ʻI he ʻosi pē ʻa e fale ʻo e ʻEikí, ko e Kāingalotu ko ia naʻe faʻa fiemaʻu ke nau fononga ʻi ha maile ʻe lauafe ki he ngaahi temipale ʻi he ʻIunaiteti Siteití, Suisalani, ko e Puleʻanga Fakatahatahá, pe Palāsila, naʻa nau lava ʻi he taimí ni ʻo hanganaki atu ki honau temipale ofi maí.
Hili ʻa e lea ʻa ʻEletā ʻEsitoní, naʻá ne tanupou mo ha kau taki kehe ʻo e Siasí ʻa e kelekelé ʻaki ha ngaahi huo sipeiti. Naʻe feinga atu leva mo e toenga ʻo e Kāingalotú, ʻo vēkeveke ke kau ai. ʻI he ʻikai loto ʻa Sūlia ke tutui atu ʻi he haʻofangá, naʻá ne holomui mo e toenga ʻo e Kāingalotu mei Souetó. Naʻe sio ha niʻihi ʻo e kau takí kiate kinautolu pea fakaafeʻi kinautolu ke nau laka mai ki muʻa, toʻo hake ha sipeiti, pea tanupou foki ʻa e kelekelé. Naʻe fakapapauʻi ʻe Sūlia naʻe ʻi ai ha kaunga ʻa e Laumālié ʻi hono ui kinautolu ki muʻá.
ʻI he ngaahi māhina hono hokó, naʻe maʻu ʻe Sūlia ʻa e fiefia ʻi he ngāue ʻi he Fineʻofá. Ko e kakai tokolahi ʻi hono koló ko ha kau toki papi ului, pea naʻe tokoni ʻa e kāingalotu taukei ʻo e Siasí mei he ngaahi uooti kehe ʻi he siteikí ke akoʻi kinautolu kae ʻoua kuo nau mateuteu ke tataki ʻa e koló. Naʻe ui ʻe he palesiteni Fineʻofá, ko ha fefine hinehina, ʻa Sūlia ko hono tokoni ʻuluaki.
Ko e koló ko e taha ia ʻo e fuofua kolo naʻe fokotuʻu mei ha kolo ʻo e kakai ʻUliʻulí. Naʻa nau lotu ʻi ha falelotu ʻi ha feituʻu kaungāʻapi ʻi Sohānesipeeki. Ke ʻalu ki aí, naʻe pau ke heka tekisī ʻa Sūlia mo e Kāingalotu kehe mei Souetó ki kolo pea lue leva ʻi he toenga ʻo e halá ki he falelotú. Hili ha vahaʻataimi, naʻe kamata ke fakataha ʻa e koló ʻi ha ʻapiako māʻolunga ʻi Soueto, pea naʻe fiefia ʻa Sūlia ʻe ofi ʻa e lotú ki ʻapi.
Ka naʻe ʻi ai ha ngaahi pole ʻo e feituʻu fakatahaʻanga foʻoú. ʻI he pongipongi Sāpate kotoa pē, naʻe pau ke ʻalu vave ki ai ʻa e Kāingalotú ke tafi ʻa e falikí mo olo ʻa e luvá mo e ʻū seá ke ʻai ke taau ʻa e ʻapiakó mo e houalotu sākalamēnití. Pea ko e taimi ʻe niʻihi ko e tokotaha ko ia naʻá ne fakataimi-tēpileʻi ʻa e falé te ne toe fakataimi-tēpileʻi ʻe ia mo ha meʻa kehe ke fai ai ke maʻu ha paʻanga lahi ange, ʻo ʻikai ha feituʻu ke fakataha ai ʻa e Kāingalotú.
Naʻe ʻikai fuoloa, naʻe kamata ui ʻe he Siteiki Sohānesipēkí ha Kāingalotu ʻUliʻuli tokolahi ange ke nau taki ʻi he ngaahi koló. ʻI he kolo ʻo Sūliá, naʻe uiuiʻi ia ko e palesiteni foʻou ʻo e Fineʻofá.
Naʻá ne ongoʻi taʻefeʻunga ʻi he taimi pē ko iá. Neongo ko ha taki fakakolo taukei ia naʻá ne ʻiloʻi ʻa e founga ke tokoniʻi mo fakalotoa ʻaki ʻa e kakaí, ka naʻe anga ʻa e Kāingalotu ʻi hono koló ki he kau taki ʻo e Siasí naʻa nau hinehiná. Naʻe hā mei he tōʻonga ʻo e kāingalotu ʻi hono koló ʻenau taʻefalala ki he ngaahi meʻa ʻokú ne malavá mo fakakaukau, “ʻOkú ne ʻUliʻuli tatau pē mo kitautolú.”
Ka naʻe ʻikai loto ʻa Sūlia ke ne loto-siʻi. Naʻá ne ʻiloʻi ʻa e meʻa naʻá ne malava ʻo fakahokó. Pea naʻá ne ʻiloʻi ʻe tokoniʻi ia ʻe he ʻEikí.