“Josefa Simici kei na Vakawati Vakalewelevu,” Ulutaga ni iTukutuku Makawa ni Lotu

“Josefa Simici kei na Vakawati Vakalewelevu”

Josefa Simici kei na Vakawati Vakalewelevu

Era vakabauta na Yalododonu Edaidai ni ivakarau ni vakawati ki na dua ga na tamata—na vakawati ni dua na turaga kei na dua na marama—e sa lawa tudei tu ni vakawati ni Turaga.¹ Ena gauna vakaivolatabu, a vakarota na Turaga eso na Nona tamata me vakatovotovotaka na vakawati vakalewelevu—na vakawati ni dua na turaga kei na sivia ni dua na marama.² Era a ciqoma ka muria talega eso na isevu ni lewe ni Lotu i Jisu Karisito ni Yalododonu Edaidai na ivakaro oqo ka soli mai vei ira na parofita ni Kalou.

Ni ciqomi oti na ivakatakila me vakaroti koya me vakatovotovotaka na vakawati vakalewelevu, a taura o Josefa Simici e vica na watina ka tauyavutaka na ivakarau oqo vei ira na itokani voleka eso. Na ivakavuvuli oqo esa bolea vakalevu sara na veika e baleta na Veivakalesuimai—kivei Josefa vakataki koya kei ira na lewe ni Lotu tale eso. Na vakawati vakalewelevu e vakatovolea na vakabauta ka vakatubura na veileti kei na veisaqasaqa. E vica ga na Yalododonu Edaidai e a kidavaka taumada na vakalesui mai ni dua na ivakarau vakaivolatabu e vou vakalevu sara ki na nodra vakasama. Ia e vuqa sa vakadinadinataka e muri na veika vakayalo kaukauwa e sa vukei ira ni uabaleta na nodra lomalomarua ka solia vei ira na yaloqaqa mera vakadonuya na ivakarau oqo.

E vuqa na ka matailalai ni ivakarau taumada ni vakawati vakalewelevu e sega tu ni kilai baleta ni ra a kerei na vakaitavi me maroroya vakabibi na nodra ivalavala. Sa mamare kina na ivolatukutuku makawa ni vakawati vakalewelevu vakailiu: e vica ga na ivolatukutuku ni gauna e vakarautaka na veika matailalai, ka sa sega tu ni dau nuitaki na veitalanoa emuri ni veika sa oti.. Yalododonu era vakamacalataka e vica na italanoa bibi me baleta na ivakarau ni vakawati vakalewelevu i Josefa Simici kei na so tale na isevu ni Yalododonu Edaidai. Me baleta na ivakamacala ni vakawati vakalewelevu vakailiu, raica na “Plural Marriage in The Church of Jesus Christ of Latter-day Saints,” Gospel Topics Essays, topics.churchofjesuschrist.org.

Ulutaga Veisemati: Joseph Smith Jr., Emma Hale Smith, Fanny Alger, Nauvoo Expositor