“Joseph Smith thiab Kev Yuav Ntau tus Poj Niam,” Tej Ntsiab Lus txog lub Koom Txoos zaj Keeb Kwm
“Joseph Smith thiab Kev Yuav Ntau tus Poj Niam”
Joseph Smith thiab Kev Yuav Ntau tus Poj Niam
Tsoom Haiv Neeg Ntseeg hauv Hnub Nyoog Kawg ntseeg tias kev yuav ib tug xwb—kev sib yuav ntawm ib tug txiv neej thiab ib tug poj niam xwb—yog tus Tswv txoj kev cai uas kav ntev txog kev sib yuav.1 Nyob hauv phau Npaivnpaum, tus Tswv tau txib nws cov neeg ib txhia kom yuav ntau tus poj niam—qhov uas ib tug txiv neej yuav niam loj niam yau.2 Muaj ib txhia cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg uas kuj txais thiab ua raws li txoj lus txib no uas Vajtswv txib dhau los ntawm Nws cov yaj saub.
Tom qab nws txais kev tshwm sim uas txib nws kom yuav ntau tus poj niam, Joseph Smith twb yuav ntau tus poj niam thiab qhia txog qhov no rau cov neeg uas nws paub zoo. Lub ntsiab cai no yeej yog ib yam nyuaj tshaj los ntawm txoj Kev Muab Txoj Moo Zoo Txum Tim Rov Qab Los—rau Joseph nws tus kheej thiab rau lwm tus mej zeej hauv lub Koom Txoos. Kev yuav ntau tus poj niam twb sim lawv txoj kev ntseeg thiab ua rau lawv raug kev tsis sib haum xeeb thiab kev tawm tsam. Tsoom Haiv Neeg Ntseeg hauv Hnub Nyoog Kawg feem tsawg muaj siab xav ua raws li ib yam puag thaum ub uas tau muab txum tim rov qab los thiab ib yam uas lawv tsis swm hlo li. Tiam sis tom qab ntawd tau muaj neeg coob ua tim khawv txog tej xwm ntawm sab ntsuj plig uas tau pab lawv kov yeej lawv txoj kev tsis xav ua thiab pab lawv ua siab loj ua raws li no.
Muaj xwm txheej ntau heev txog kev yuav ntau tus poj niam thaum lub sij hawm ntxov ntawd uas peb tsis paub vim tau hais kom cov neeg uas ua li ntawd txhob qhia leej twg li. Yog li ntawd tsis muaj ntaub ntawv keeb kwm pes tsawg txog kev yuav ntau tus poj niam thaum ntawd: tsis muaj ntaub ntawv ntau hauv lub sij hawm ntawd uas qhia meej, thiab tej kev rov qab nco txog uas lawv hais tom qab ntawd los ntseeg tsis taus txhua yam. Saints muaj ob peb zag dab neeg tseem ceeb txog kev yuav ntau tus poj niam los ntawm Joseph Smith thiab lwm tus los ntawm Tsoom Haiv Neeg Ntseeg hauv Hnub Nyoog Kawg. Yog xav tau xov xwm ntxiv txog kev yuav ntau tus poj niam thaum lub sij hawm ntxov ntawd, saib “Plural Marriage in The Church of Jesus Christ of Latter-day Saints,” Gospel Topics Essays, topics.churchofjesuschrist.org.
Tej Ntsiab Lus Sib Thooj: Joseph Smith tus Hluas., Emma Hale Smith, Fanny Alger, Nauvoo Expositor